Ajidhaniaye kuwa amesimama na aangalie asianguke!

Andiko la Msingi:1Wakoritho 10:12“Kwa hiyo anayejidhania kuwa amesimama na aangalie asianguke.”

Utangulizi:-

Ni muhimu kufahamu kuwa kifungu hiki cha maneno ya Paulo mtume kinafunga au kinahitimisha mfululizo wa maonyo muhimu sana aliyoyatoa Paulo mtume ambayo tunayapata kama somo kutoka kwa wana wa Israel

Kwamba kama mababa wa waisrael waliweza kufurahia neema maalumu ya kuokolewa kutoka Misri chini ya utawala wenye nguvu wa Farao, na kuona miujiza mingi na uwepo wa Mungu, bado waliweza kukataliwa na kuangamizwa jangwani, maiti zao ziliangukia katika jangwa zito, hawakuweza kufika na kuingia katika inchi ya ahadi, na kwa sababu hiyo kupitia wao tunajifunza kwamba watu wanaojikinai wenyewe na kufikiri kuwa wao ni maalumu sana na wenye kujiamini kupita kawaida na wenye kujivunia kipawa cha aina fulani, upendeleo wa aina fulani, na kumsanifu awaye yote hii ni moja ya dalili mbaya  inayoweza kumpelekea mtu katika anguko la aina yoyote!

Ujumbe:

Kulikuwa na mti mmoja mrefu sana unaojulikana kama mti wa mtiki na karibu yake kulikuwa na miti mingine iliyokuwa laini kama nyasi,

Mtiki ulianza kujisifu kwa nyasi kuwa mimi ni mzuri mrefu na ni mwenye nguvu sana kuliko ninyi, Nyasi ziliposikia ziliuonya mtiki na kuuamnbia rafiki yangu majivuno ya kupita kawaida ni hatari, Hata wenye nguvu huanguka siku moja

Mtiki ulizizarau nyasi, na kuendelea na kujisifu wenyewe!

Upepo mkali sana ulipuliza na mtiki ulisimama imara, na hata mvua kali ziliponyesha mtiki bado ulisimama imara na uliendelea kutanua majani yake, wakati wote huo nyasi na mbogamboga ziliinama kabisa, na mtiki ukawacheka sana nyasi na mboga mboga.

Siku moja kukatokea dhoruba kali sana msituni kama ilivyo desturi Nyasi ziliinama chini na kama kawaida yake mtiki haukukubali kuinama, Dhoruba iliendela kuwa kali sana kiasi ambacho mtiki haukuweza kustahimili tena, ukaishiwa na nguvu  ukaanguka chini, ulijaribu kwa nguvu zake kusimama na ikashindikana kabisa na huo ndio ukawa mwisho wa mti wenye kiburi, Mambo yalipokuwa sawa Nyasi zilisimama na kushangaa kuwa mtiki hauko na nyasi zilipoangalia vema ziligundua kuwa mtiki umeanguka!

Tunajifunza nini ?

Biblia inasema kijapo kiburi ndipo ijapo aibu, tena kiburi hutangulia uangamivu  Mithali 16:18 “Kiburi hutangulia uangamivu; Na roho yenye kutakabari hutangulia maanguko”.  Biblia inaonya kuwa kila ajikwezaye atashushwa Mathayo 23:12 “Na ye yote atakayejikweza, atadhiliwa; na ye yote atakayejidhili, atakwezwa.” Mithali 29:23 inasema “ Kiburi cha mtu kitamshusha; Bali mwenye roho ya unyenyekevu ataheshimiwa.” Baadhi ya wasomi wa kibiblia wanasema kuwa kiburi kinasababisha kutokujali ambako kunaongoza katika kufanya makosa makubwa ya kutisha na kushangaza na Wengine wanasema Mungu mwenyewe huwatia nidhamu watu wenye kujikinai wakijidhani wao ni bora kuliko neema ya Mungu kwa kuwaachilia wajikute katika matukio yatakayowanyenyekesha.

Iko mifano mingi sana Katika Historia ya dunia ambayo inaweza kutufunza jambokatika mitazamo hii, wote tumewahi kusikia au kuona habari ya Meli ya kifahari sana Duniani ijulikanayo kama TITANIC Meli hii ilitangwazwa na watengenezaji kuwa ni meli ISIYOWEZA KUZAMA kutokana na kujiamini huko kwa kupitakawaida meli hii haikuwa na meli ndogondogo za uokoaji, lakini kilichotokea kimetoa funzo katika Historia ya dunia

Matengenezo ya Titanic.

Meli ya Titanic ilianza kutengenezwa mwaka 1909. Kampuni iliyoagiza meli hiyo kutengenezwa ni White star, lengo la kampuni hii ilikuwa ni kuweza kushindana na kampuni ya Cunard line meli hii ndiyo maarufu kuliko zote katika historia ya dunia. TITANIC ilikuwa meli ya pili kwa ukubwa baada ya meli ya Olympic kwa wakati huo, meli ya tatu kwa ukubwa ilikuwa ni Britannic.

Titanic yaanza Safari.

Baada ya matengenezo yake kukamilika mwaka 1912 maandalizi ya kuanza safari yalianza.

Aprili 10, 1912 meli ya Titanic inaanza safari ikitokea Southampton- Uingereza kuelekea New York- Marekani. Huku ikipambwa na maneno yaliyo kuwa yameandikwa ubavuni mwake kwa ustadi mkubwa yakisomeka T I T A N I C Meli hiyo ilibeba watu wapatao 2,200 wengi wao wakiwa ni matajiri na baadhi ya watu walikuwa wakihamia Marekani kwenda kuanza maisha mapya. Kapteni wa meli hiyo alikuwa ni E.J.SMITH, Meli hii ilikuwa na eneo la Matajiri wa juu, wa kati na wa chini, ilikuwa na kumbi za starehe, viwanja vya michezo na basket ball, ilithibitishwa na wataalamu mbalimbali kama meli isiyoweza kuzama na yenye usalama wa hali ya juu duniani. Mmiliki wa meli alipohojiwa na vyombo vya habari kuhusu usalama wa meli hii alisema "Hata Mungu hawezi kuizamisha"

Titanic yaginga mwamba wa Barafu Baharini.

Aprili 14, 1912 saa 5:40 usiku, Titanic ikagonga mwamba wa barafu. Ilikuwa ni siku ya nne tu tangu ianze safari yake. Kapteni wa meli hii alikuwa amearifiwa kuwa kuna mwamba mbele yao, hivyo arijaribu kukwepa lakini alikuwa kachelewa ubavu wa meli uligonga kwenye mwamba wa barafu na kupasuka ndipo maji yakaanza kuingia ndani ya meli. Ni mashua 16 tu za uokoaji zilizokuwa ndani ya meli hiyo ambazo zingeweza kubeba watu 1,178 hata hivyo mashua nyingi hazikujaza watu na hivyo watu 705 tu ndiyo waliokolewa.

Titanic yazama.

Mnamo tarehe Aprili 15, 1912 saa 8:20 usiku TITANIC ilizama. Watu 1,500 hivi walipoteza maisha. Tangu saa hii histori mpya ya TITANIC yaanza kuandikwa. Ama kweli ni historia ya kusikitisha sana.

Ndugu yangu je wewe ni maalumu sana kama Titanic? Wewe je mgumu kama mtiki? Unajivunia nini Duniani? Mungu yuko nyuma yako anakuangalia, Yeye ni wa kutukuzwa na kuogopwa sana yeye ndiye aliyeshikilia kila kitu hatuna budi kuwa wanyenyekevu kama Nyasi na kukubali kuinama ili tuinuke tena!

Ajidhaniaye kuwa amesimama na aangalie asianguke!

Wa salaam

Na Mkuu  wa wajezni Mwenye Hekima

Rev. Innocent Kamote.