Watu hawa wana nini, hata wakalia?

1Samuel 11:1-5 “Ikawa, kama baada ya mwezi mmoja, Nahashi, Mwamoni, akakwea na kupanga marago juu ya Yabesh-gileadi; na watu wote wa Yabeshi wakamwambia Nahashi, Fanya mapatano nasi, na sisi tutakutumikia. Huyo Nahashi, Mwamoni, akawaambia, Kwa sharti hii mimi nitapatana nanyi, kila mtu ang'olewe jicho la kuume; na kwa jambo hilo nitawashutumu Waisraeli wote pia. Basi wazee wa Yabeshi wakamjibu, Tuachie siku saba, ili tutume wajumbe waende mipakani mwote mwa Israeli; kisha, ikiwa hakuna atakayetuokoa, tutakutokea. Hivyo wajumbe wakafika Gibea ya Sauli, wakasema maneno hayo masikioni mwa watu; na watu wote wakainua sauti zao wakalia. Na tazama, Sauli akaja akifuata ng'ombe kutoka kondeni; naye Sauli akauliza, Watu hawa wana nini, hata wakalia? Wakamwambia maneno ya watu wale wa Yabeshi.”

 

Utangulizi:

Ni muhimu kufahamu kuwa hapa duniani kuna aina nyingi sana za uonevu na aina nyingine za uonevu kimsingi haziwezi kuvumilika!, Katika maandiko yetu ya msingi, tunapata picha ya aina hiyo ya uonevu iliyowahi kuwakuta watu wa Yabeshi-Gileadi, Mfalme wa wana wa Amoni aliyeitwa Nahashi, aliwatokea na kuwazingira watu wa Yabeshi-Gileadi akitaka kuwapiga vita, watu hao walipojipima waliona uwezo wao ulikuwa mdogo walikuwa wanyonge na wakataka amani na mfalme huyu, na kwa kuona kuwa watu hawa ni wanyonge na wanataka amani naye Nahashi mwamoni, alipata kiburi zaidi na kuwapa sharti la kikatili sana aliwataka ili wawe na amani na yeye basi Israel wote wang’olewe jicho la kulia, jambo hili liliwatia hofu sana wana wa Israel na wakaomba siku saba za kutafakari na kutafuta mtu wa kuwasaidia, walipofika mjini na hasa mji wa Sauli ulioitwa Gibea ya Sauli na kueleza taarifa hizo watu wote wakainua sauti zao wakalia, Sauli alikuwa akitokea mashambani kwa bahati alikokuwa amefuata ng’ombe na kukutana na kilio kikubwa sana na ndipo alipouliza “Watu hawa wana nini hata wakalia?“

Inawezekana unausikia ujumbe huu nawe ukiwa katika hali ya kulia  na unainua sauti yako kulia kwa sababu mbalimbali, umefanyiwa mambo ya kikatili, umedhulumiwa, umetapeliwa na mtu uliyemuamini, uko katika mateso yasiyoweza kuelezeka, unazingirwa na hali zinazokuzidi nguvu, umekata tamaa kuna maeneo unahitaji mwokozi, umefunga siku saba kutafuta msaada, uko kwenye maswali makubwa yasiyokuwa na majibu, unajiuliza msaada wako utatokea wapi, najua leo Sauli hayuko Lakini Roho Mtakatifu yupo na kwa jina la Yesu Kristo atakutokezea msaada leo Mwokozi wetu Yesu Kristo anauliza watu hawa wana nini hata wakalia? Tegemeo letu kuu na la uhakika sio wanadamu, tegemeo letu kuu linatoka kwa Mungu mwenyewe na Roho wa Mungu anaguswa na kilio chako!

Zaburi 121:1-4 “Nitayainua macho yangu niitazame milima, Msaada wangu utatoka wapi? Msaada wangu u katika Bwana, Aliyezifanya mbingu na nchi. Asiuache mguu wako usogezwe; Asisinzie akulindaye; Naam, hatasinzia wala hatalala usingizi, Yeye aliye mlinzi wa Israeli.”

Zaburi 124:6-8 “Na ahimidiwe Bwana; Asiyetutoa kuwa mawindo kwa meno yao. Nafsi yetu imeokoka kama ndege Katika mtego wa wawindaji, Mtego umevunjika, nasi tumeokoka. Msaada wetu u katika jina la Bwana, Aliyezifanya mbingu na nchi.”

Tutajifunza somo hili, “Watu hawa wana nini hata wakalia?” kwa kuzingatia vipengele muhimu vitatu vifuatavyo:-

 

·         Kilio chako sio ishara ya udhaifu!

·         Watu hawa wana nini hata wakalia?

·         Kilio chako ni mwanzo wa wokovu wako!

 

Kilio chako sio ishara ya udhaifu!

1Samuel 11:1-5 “Ikawa, kama baada ya mwezi mmoja, Nahashi, Mwamoni, akakwea na kupanga marago juu ya Yabesh-gileadi; na watu wote wa Yabeshi wakamwambia Nahashi, Fanya mapatano nasi,na sisi tutakutumikia. Huyo Nahashi, Mwamoni, akawaambia, Kwa sharti hii mimi nitapatana nanyi, kila mtu ang'olewe jicho la kuume; na kwa jambo hilo nitawashutumu Waisraeli wote pia. Basi wazee wa Yabeshi wakamjibu, Tuachie siku saba, ili tutume wajumbe waende mipakani mwote mwa Israeli; kisha, ikiwa hakuna atakayetuokoa, tutakutokea. Hivyo wajumbe wakafika Gibea ya Sauli, wakasema maneno hayo masikioni mwa watu; na watu wote wakainua sauti zao wakalia. Na tazama, Sauli akaja akifuata ng'ombe kutoka kondeni; naye Sauli akauliza, Watu hawa wana nini, hata wakalia? Wakamwambia maneno ya watu wale wa Yabeshi.”

Nimuhimu kufahamu kuwa wana wa Israel wakati huu walikuwa ni wanyonge, walikuwa hawana uhakika wa kupata utetezi kutoka kwa wana wa Amoni, na Nahashi alikuwa anajiamini sana na kwa sababu ya uonevu aliokuwa nao aliweka sharti la kikatili kwaajili ya uonevu tu, akijua kuwa sio rahisi kutokea mtu akawasaidia wana wa Israeli, na wana wa Israel walifahamu unyonge wao hivyo walilia, kilio chao kilichojawa na huzuni hakikuwa udhaifu kwani walimpa Nahashi siku saba, wao walilia kwa sababu walimuhitaji mwokozi, waliona kuwa Nahashi,  alionyesha ukatili uliopitiliza na kuwa kama hakuna wa kumshughulikia basi ilikuwa ni aibu kubwa sana kwa taifa, kwamba watu wa mji wa Gileadi na Israel nzima kila mwanajeshi ang’olewe jicho moja la upande wa kulia,  hii ilikuwa sio tu uonevu lakini adui alikuwa anataka kuweka alama ya milele na ya miaka mingi ya kuwashinda Israel,  wangwezaje kurusha mishale wakiwa na jicho moja, tena la kushoto, wangewezaje kujikinga na ngao, wangewezaje kutumia Kombeo, walilia na kupaza sauti kwa sababu walihitaji mkombozi katika janga hili, Mungu wa Israeli kamwe hangeweza kudharau machozi yao, kilio chao kilimfikia Mfalme mpya Sauli ambaye aliposikia watu wanalia Roho Mtakatifu alimshukia kwa nguvu na kuamsha nia na hari yake ya kutaka kuwasaidia, Maandiko yanatufundisha wazi kuwa Mungu huyajali machozi ya watu wake hasa wanapokuwa katika shida zao:-

Zaburi 34:17-19 “Walilia, naye Bwana akasikia, Akawaponya na taabu zao zote. Bwana yu karibu nao waliovunjika moyo, Na waliopondeka roho huwaokoa. Mateso ya mwenye haki ni mengi, Lakini Bwana humponya nayo yote.”

Zaburi 105:13-15 “Wakatanga-tanga toka taifa hata taifa, Toka ufalme mmoja hata kwa watu wengine. Hakumwacha mtu awaonee, Hata wafalme aliwakemea kwa ajili yao. Akisema, Msiwaguse masihi wangu, Wala msiwadhuru nabii zangu.”

Kutoka 3:7-9 “BWANA akasema, Hakika nimeyaona mateso ya watu wangu walioko Misri, nami nimekisikia kilio chao kwa sababu ya wasimamizi wao; maana nayajua maumivu yao; nami nimeshuka ili niwaokoe na mikono ya Wamisri, niwapandishe kutoka nchi ile, hata nchi njema, kisha pana; nchi ijaayo maziwa na asali; hata mahali pa Mkanaani, na Mhiti, na Mwamori, na Mperizi, na Mhivi, na Myebusi. Basi, tazama, kilio cha wana wa Israeli kimenifikilia; tena nimeyaona hayo mateso ambayo Wamisri wanawatesa.”

Inawezekana unausikia ujumbe huu au kuusoma ukiwa katika kuelemewa na huzuni, najua ya kuwa bila shaka unahitaji msaada wa Mungu na neno lake limeahidi kuwa anayajali machozi yako anajua maumivu yako, inawezekana machozi yako ni matokeo ya unyanyaswaji mahali, ni matokeo ya mateso mahali, ni matokeo ya dhuluma, ni matokeo ya uonevu wa pepo, uonevu wa wachawi, mateso yako ni matokeo ya majungu kazini, ni matokeo ya watu wasiopenda maendeleo yako, ni matokeo yauonevu wa unyonge wako, ni matokeo ya umasikini wako, ni maumivu ya moyo uliojeruhiwa, ni kukosa ada, ni kudhulumiwa shamba, kiwanja, nyumba, mirathi, ujane, yatima, uonevu nataka nikuhakikishie ya kuwa Mungu anasikia kilio chako anayajua maumivu yako na anayaona mateso yako, Mungu ameyahifadhi machozi yako na ameyaweka katika kichupa na bila shaka kimejaa

Zaburi 56:8-9 “Umehesabu kutanga-tanga kwangu; Uyatie machozi yangu katika chupa yako; (Je! Hayamo katika kitabu chako?) Ndipo adui zangu watarudi nyuma siku ile niitapo. Neno hili najua kuwa MUNGU yu upande wangu;”

Watu hawa wana nini hata wakalia?

Sauli alikuwa anarudi kutoka shambani na ng’ombe zake, hakuwa tayari kwa vita alikuwa anatokea kwenye shughuli zake za kawaida lakini alisikia watu wanalia kilio cha kukata tamaa, watu wanaombolezea macho yao, hata kabla hayajang’olewa, Roho Mtakatifu alimjia kwa nguvu mara tu aliposikia habari za mateso ya watu wake na kukatatamaa kwao, hasira yake ikamuwaka akawaambia watu wa Yabeshi-Gileadi wasilie kwani kesho watapata wokovu wakati wa jua kali yaani mchana kweupeee, leo nasema usilie, utapa wokovu wako wakati wa jua kali.

1Samuel 11:5-11. “Na tazama, Sauli akaja akifuata ng'ombe kutoka kondeni; naye Sauli akauliza, Watu hawa wana nini, hata wakalia? Wakamwambia maneno ya watu wale wa Yabeshi. Na roho ya Mungu ikamjilia Sauli kwa nguvu, hapo alipoyasikia maneno yale, na hasira yake ikawaka sana. Naye akatwaa jozi ya ng'ombe, akawakata-kata vipande, kisha akavipeleka vile vipande mipakani mwote mwa Israeli kwa mikono ya wajumbe, kusema, Ye yote asiyetoka nyuma ya Sauli na Samweli, ng'ombe zake watatendwa vivi hivi. Basi utisho wa Bwana ukawaangukia wale watu, wakatoka kama mtu mmoja. Naye akawahesabu huko Bezeki; Waisraeli walikuwa mia tatu elfu, na Wayuda thelathini elfu. Nao wakawaambia hao wajumbe waliokuja, Waambieni watu wa Yabesh-gileadi, Kesho, wakati wa jua kali, mtapata wokovu. Basi wale wajumbe wakaenda, wakawaarifu watu wa Yabeshi; nao walifurahiwa. Kwa hiyo watu wa Yabeshi walisema, Kesho tutawatokea, nanyi mtatufanyia yote myaonayo kuwa ni mema. Ikawa, kesho yake, Sauli akawapanga watu katika vikosi vitatu; nao wakaingia katikati ya marago kwenye zamu ya asubuhi, wakawapiga Waamoni hata wakati wa jua kali; kisha ikawa wale waliosalia wakatawanyika, hata wasiachwe wawili wao pamoja.”

Mungu anafanya hivyo hata leo, Mungu anaweza kuamsha watu kwaajili yako, Mungu anaweza kukufungulia mlango, Mungu anaweza kubadilisha hali yako ya kushindwa kuwa ushindi, Mungu anaweza kubadilisha hali yako ya unyonge kuwa ujasiri, Mungu anaweza kuwatumiwa wale wanaoonekana kuwa wa kawaida kuleta wokovu, Mungu anakuahidi leo kuwa adui zako watapigwa mchana kweupee, haitakuwa kwa kificho, haitakuwa wakati wa asubuhi, wala haitakuwa wakati wa jioni ni mchana wakati wa jua kali wokovu wako utaonekana na kila mtu

Zaburi 34:15-17 “Macho ya Bwana huwaelekea wenye haki, Na masikio yake hukielekea kilio chao. Uso wa Bwana ni juu ya watenda mabaya, Aliondoe kumbukumbu lao duniani. Walilia, naye Bwana akasikia, Akawaponya na taabu zao zote.”

Zaburi 46:1-3 “Mungu kwetu sisi ni kimbilio na nguvu, Msaada utakaoonekana tele wakati wa mateso. Kwa hiyo hatutaogopa ijapobadilika nchi, Ijapotetemeka milima moyoni mwa bahari. Maji yake yajapovuma na kuumuka, Ijapopepesuka milima kwa kiburi chake.”

Zaburi 136:10-12 “Yeye aliyewapiga Wamisri kwa kuwaua wazaliwa wa kwanza wao; Kwa maana fadhili zake ni za milele.  Akawatoa Waisraeli katikati yao; Kwa maana fadhili zake ni za milele. Kwa mkono hodari na mkono ulionyoshwa; Kwa maana fadhili zake ni za milele.”

Kumbukumbu 26:6-8 “Wamisri wakatuonea, wakatutesa, wakatutumikisha utumwa mzito.  Tukamlilia Bwana, Mungu wa baba zetu; Bwana akasikia sauti yetu, akaona na taabu yetu, na kazi yetu, na kuonewa kwetu.Bwana akatutoa kutoka Misri kwa mkono wa nguvu, na kwa mkono ulionyoshwa, na kwa utisho mwingi, na kwa ishara, na kwa maajabu;”

Wakati unapokuwa unalia na unahisi kama hujaona mabadiliko yoyote usufikiri ya kuwa Mungu amekusahau, kwa sababu bado hujaona dalili zozote Roho Mtakatifu hutulia lakini huamka na hasira zake hufurika yeye ndiye anayeitwa mkono ulionyooshwa yeye atafanyia kazi hitaji lako na atatumia njia mbalimbali kukuokoa na kukusaidia lakini kumbuka mkono wake ulionyooshwa utashughulika na kila aina ya uonevu Mungu hawezi kamwe kufumbia macho aina yoyote ya uonevu kilio chako kinamgusa kuliko unavyoweza kufikiri, yeye anauliza wakati wote watu hawa wana nini hata wakalia? Na hasira zake zinawaka akisha kujua ni kwanini unalia ananyoosha mkono wake na nikuhakikishie wokovu wako utapatikana mchana wakati wa jua kali!  Wazi wazi bila kificho adui wengine hawapaswi kushughulikiwa usiku wanapaswa kuoigwa mchana kweupee ili habari zienee mapema kuwa wametandikwa huku 

Kilio chako ni mwanzo wa wokovu wako!

Watu wa Yabeshi-Gilead walipoanza kulia ndipo Mungu alipowaletea msaada na kuwapa ushindi mkubwa, watu hawa waliokolewa kabisa na aibu iliyokuwa ikiwakabili, aibu yao ikageuzwa kuwa shangwe, ni muhimu kuwa na ufahamu kuwa unapoanza kulia leo sio ishara ya kushindwa, adui zako wanaweza kudhani kuwa wamekuweza kwa sababu ya sharti gumu walilokuwekea, lakini kumbe wanakuandalia safari ya kuelekea kwenye ushindi wako,  kilio chako ni sehemu ya mwanzo ya wokovu wako itakayokuletea ukombozi mkubwa, maandiko yanaonyesha kuwa unaweza kulia usiku na asubuhi ikawa ni furaha

Zaburi 30:2-5 “Ee Bwana, Mungu wangu, Nalikulilia ukaniponya. Umeniinua nafsi yangu, Ee Bwana, kutoka kuzimu. Umenihuisha na kunitoa Miongoni mwao washukao shimoni. Mwimbieni Bwana zaburi, Enyi watauwa wake. Na kufanya shukrani. Kwa kumbukumbu la utakatifu wake. Maana ghadhabu zake ni za kitambo kidogo, Katika radhi yake mna uhai. Huenda kilio huja kukaa usiku, Lakini asubuhi huwa furaha.”    

Mungu aliyewaokoa watu wa Yabeshi ni yule yule anayeweza kukuokoa na wewe kutoka katika ukatili, dhuluma, uonevu na maumivu unayoyapitia, kilio ulicho nacho sasa au leo kitageuzwa kuwa furaha! Kaka yangu na dada yangu unayelia usikate tamaa, swali la Sauli lilikuwa ni swali kutoka kwa Mungu watu hawa wana nini hata wakalia? Swali hili linajibiwa na Mungu mwenyewe yeye ndiye anajua ni kwa nini unalia, anayajua maumivu yako anaujua uchungu wako na yuko tayari kuingilia kati machana wa jua kali Bwana analeta wokovu! Mungu wangu aliyenilinda mimi na watu wabaya akamtuma malaika wake na kunitetea siku zote za maisha yangu atakutetea nawe pia katika jina la Yesu Kristo mwana wake aliye hai amen! Watu hawa wana nini hata wakalia?

Zaburi 56:8-11 “Umehesabu kutanga-tanga kwangu; Uyatie machozi yangu katika chupa yako; (Je! Hayamo katika kitabu chako?) Ndipo adui zangu watarudi nyuma siku ile niitapo. Neno hili najua kuwa MUNGU yu upande wangu; Kwa msaada wa MUNGU nitalisifu neno lake. Kwa msaada wa Bwana nitalisifu neno lake. Nimemtumaini Mungu, sitaogopa; Mwanadamu atanitenda nini?”

 

Rev. Innocent Samuel Kamote.

Mkuu wa wajenzi Mwenye Hekima.

Umuhimu wa Pango la Adulamu

1Samuel 22:1-2. “Basi Daudi akaondoka huko, akakimbilia pango la Adulamu; na ndugu zake na watu wote wa mbari ya baba yake waliposikia habari hiyo, wakamwendea huko. Na kila mtu aliyekuwa katika hali ya dhiki, na kila mtu aliyekuwa na deni, na watu wote wenye uchungu mioyoni mwao, wakakusanyika kwake; naye akawa jemadari wao; nao waliokuwa pamoja naye walipata kama watu mia nne.”

Utangulizi:

Wengi wetu tutakua tunafahamu kuhusu habari za Daudi kukimbilia katika pango la Adulamu, Pango hili liko maili 22.5 sawa na kilomita 36 kusini magharibi mwa jiji la Yerusalem na kilomita 13 magharibi mwa Bathelehemu, mipakani na nchi ya Wafilisti eneo hili ni maarufu na linajulikana kama Mahali pa kujificha, hasa kutokana na tukio la Daudi kukimbilia huko na kujificha alipokuwa anamkimbia mfalme Sauli aliyekuwa anataka kumuua, Adulamu pakawa mahali salama kwa Daudi na watu wote wenye huzuni, shida na madeni waliomuendea, Kimsingi Pango la Adulamu pamoja na tukio hili halisimami kama sehemu ya historia na usalama tu lakini linasimama kama eneo muhimu la maandalizi ya kiroho na uongozi na mabadiliko makubwa ya Daudi na watu wake, Kwa hiyo Adulamu pamejulikana kama eneo muhimu la kimchakato ambapo Mungu anawaandaa watu wake kabla hawajashika majukumu yao ya kimaongozi.

1Samuel 21:8-10 “Tena Daudi akamwambia Ahimeleki, Na hapa chini ya mkono wako, je! Hapana mkuki, au upanga? Kwa maana sikuleta upanga, wala silaha zangu, kwa sababu ile shughuli ya mfalme ilitaka haraka. Yule kuhani akasema, upanga wa Goliathi, yule Mfilisti, uliyemwua katika bonde la Ela, tazama, upo hapa, umefungwa ndani ya nguo nyuma ya naivera; ukipenda kuuchukua, haya! Uchukue, maana hapa hapana mwingine ila huo tu. Daudi akasema, Hapana mwingine kama ule; haya! Nipe. Basi Daudi akaondoka, akakimbia siku ile, kwa hofu ya Sauli, akamwendea Akishi, mfalme wa Gathi.”

1 Samweli 22:1-2 “Basi Daudi akaondoka huko, AKAKIMBILIA PANGO LA ADULAMU; na ndugu zake na watu wote wa mbari ya baba yake waliposikia habari hiyo, wakamwendea huko. Na kila mtu aliyekuwa katika hali ya dhiki, na kila mtu aliyekuwa na deni, na watu wote wenye uchungu mioyoni mwao, wakakusanyika kwake; naye akawa jemadari wao; nao waliokuwa pamoja naye walipata kama watu mia nne.”              

Kwa msingi huo leo tutachukua muda kujifunza somo hili muhimu, lenye kichwa “Umuhimu wa Pango la Adulamu” kwa kuzingatia vipengele vikuu vitatu muhimu vifuatavyo:-

·         Maana ya Adulamu

·         Umuhimu wa Pango la Adulamu

·         Matokeo ya kupita katika Pango la Adulamu

Maana ya Adulamu

Neno au jina Adulam linatokana na neno la asili la Kiebrania  “Adullām” ambalo lina uhusiano na eneo lililokuwa lililokaliwa na rafiki mkubwa wa Yuda  mwana wa Yakobo aliyeitwa Hira, Hira alikuwa rafiki mkubwa sana wa Yuda ambao walishirikiana katika kufuga wanyama na mambo yao mengine ya kimaisha, Rafiki huyu mkubwa wa Yuda aliishi eneo hilo.

Mwanzo 38:1-3, 12 “Ikawa wakati ule, Yuda akashuka kutoka kwa ndugu zake, akamfikia mtu Mwadulami, jina lake Hira. Yuda akaona huko binti wa mtu Mkanaani, jina lake Shua. Akamtwaa, akaingia kwake. Naye akapata mimba, akazaa mwana, akamwita jina lake Eri. 12 Siku nyingi zikapita, akafa binti Shua, mkewe Yuda. Yuda akafarijika, akaenda kwa watu wake wawakatao manyoya kondoo huko Timna, yeye na mwenzake Hira, Mwadulami.”

Neno au pango la “Adullām” limepata umaarufu sana baada ya Daudi kukimbilia huko kwaajili ya kuokoa uhai wake akimkimbia mfalme Sauli aliyekuwa anataka kumuua, huko aliungana na watu wengine wapatao  400 na baadae walifika 600 watu waliokuwa na madeni, waliokata tamaa na wale ambao hawakuridhishwa na hali ya mambo wakati wa utawala wa Sauli, kutokana na umaarufu wa tukio hili hata jina “Adullām” au Pango la Adulamu limebeba maana ya  Mahali pa siri,  au mahali pa makimbilio, au mahali pa kujificha, au mahali pa kujitenga na kujipanga kwa upya, au kimbilio la waliovunjika moyo, The secret place, The place of Refuge, the Hiding Place, Place of withdrawal, the place of retreat, or a place of brokenness.

Adulamu kumejipatia umaarufu kiroho kama mahali ambapo Mungu anamtenga mtu wake na kumuandaa kwaajili ya mpango wake mkuu wa baadae, ni eneo la utulivu, usalama na la kujipanga kwa upya ni kama shule ya Roho Mtakatifu, mahali ambapo ni kama Mungu anakuacha upoteze kila kitu, kisha uishi maisha ya ukimbizi, na kujiepusha na watu, kisha anakuweka na watu wanaoonekana kutokufaa ili uwabadilishe waweze kufaa, hivyo kwa jicho la kinabii Adulamu ni mahali muhimu ambapo sio tu kuwa mtu anakimbilia bali Mungu anampeleka mtu huko ili kumjenga na kumuandaa kwa huduma.

Umuhimu wa Pango la Adulamu

Mungu hakumruhusu Daudi kwenda Adulamu kama adhabu, lakini badala yake lilikuwa ni eneo muhimu kwaajili ya maandalizi ya kimkakati ya kumfanya kuwa mfalme mwenye nguvu sana, mwanadamu hajifunzi kuwa imara anapokuwa kwenye eno lenye starehe “Comfort zone” lakini mwanadamu anakuwa imara sana anapokuwa katika mazingira magumu na tatanishi yasiyo na faraja yoyote, kusudi kubwa Mungu anataka ukomae na usidumae, anataka ukue na hatimaye uje kuwa kiungo kizuri katika kutimiza mpango wake, wakati ambapo kimsingi Adulamu hakuonekani kuwa kwenye kufaa huko lakini ni shule ya Mungu ya kutengeneza sifa nzuri, na kuleta mabadiliko, kuondoa njia za zamani na mitazamo ya zamani na kupewa mipya itakayofaa kwaajili ya watu wa Mungu lakini zaidi ya mambo yote Adulamu ni mahali ambapo watu wa Daudi walijifunza kufunga na kuomba na kuabudu wakimtegemea Mungu, kuna mafunzo mengi ambayo Mungu aliwafunza watu wake waliokimbilia Adulamu

1.       Ni eneo la kukomazwa - Yakobo 1:2-3 “Ndugu zangu, hesabuni ya kuwa ni furaha tupu, mkiangukia katika majaribu mbalimbali; mkifahamu ya kuwa kujaribiwa kwa imani yenu huleta saburi. Saburi na iwe na kazi kamilifu, mpate kuwa wakamilifu na watimilifu bila kupungukiwa na neno.”

 

Waebrania 12:11 “Kila adhabu wakati wake haionekani kuwa kitu cha furaha, bali cha huzuni; lakini baadaye huwaletea wao waliozoezwa nayo matunda ya haki yenye amani.”

 

Kwa nini kukomazwa au kuwa na uzoefu ni kwa muhimu?  Kukomazwa na kuzoezwa ni jambo la Muhimu na ni mchakato ambao kimsingi hautokei kama muujiza inachukua muda au inahitaji muda fulani, lakini muda huo utakujengea ukuaji katika Hekima, imani na kuwa na tabia za uungu, jambo hili ni la Muhimu kwa sababu pia litakusaidia kukupa uwezo wa kukabiliana na changamoto za aina mbalimbali na kukujengea uwezo na ubora katika maswala ya mahusiano, upendo wa kujitoa, kumjua Mungu kwa undani kuwa na Amani katika mazingira yote  na kuwa na uhusiano wa ndani sana na Mungu na watu wengine, hakuna jambo baya duniani kama kuja kuongozwa na kiongozi aliyekosa mafunzo na ukomavu, viongozi wengi wasiopitia Adulamu wamejawa na ubinafsi, choyo, kujihami, kukosa kujiamini na kushindwa kuchukuliana lakini kwa Daudi Adulamu lilikuwa eneo zuri la kuishi na watu na kuwavumilia.         

 

2.       Ni eneo la kujifunza kumtegemea Mungu - Kumbukumbu 8:2-3 “Nawe utaikumbuka njia ile yote Bwana, Mungu wako aliyokuongoza miaka hii arobaini katika jangwa, ili akutweze, kukujaribu kuyajua yaliyo moyoni mwako, kwamba utashika amri zake, au sivyo. Akakutweza, akakuacha uone njaa, akakulisha kwa mana, usiyoijua wewe wala baba zako hawakuijua; apate kukujulisha ya kuwa mwanadamu haishi kwa mkate tu, bali huishi kwa kila litokalo katika kinywa cha Bwana.”

 

2Wakorintho 12:9 “Naye akaniambia, Neema yangu yakutosha; maana uweza wangu hutimilika katika udhaifu. Basi nitajisifia udhaifu wangu kwa furaha nyingi, ili uweza wa Kristo ukae juu yangu.”

 

Kujifunza kumtegemea Mungu kuna umuhimu wake kwa sababu kutakujengea msingi usiotikisika hata pale Amani yako inapotikiswa, matumaini yako yanapogeuka, kusudi linapoonekana kuchelewa na uwezo wako wa kufanya mambo kwa nafsi yako unapoachwa katika mikono ya Yeye mwenye uwezo wa kuamua majira na nyakati, hutaogopa, utakuwa na nguvu ya ndani, utapata muelekeo sahihi na utakuwa na moyo wa unyenyekevu, Adulamu inatufunza kumtegemea Mungu.

       

3.       Ni eneo la mabadiliko makubwa - Kabla Mungu hajaanza kumtumia mtu anaandaa mazingira ya kutubadilisha, Mungu anaondoa kabisa kiburi na ubinafsi, anakufundisha kumtegemea yeye na sio swala la kukubalika na dunia au walimwengu, kwa hiyo ataruhusu majaribu ya aina mbalimbali ili akunoe na kukutengeneza, wakati mwingine ataruhusu upoteze kila kitu, akupime katika hali zote akuone unapofanikiwa na unapokosa tabia yako inakuwaje na baada ya vipimo vingi sana Mungu anakuamini na kukupa majukumu anayoyakusudia kukupa kubwa ni mabadiliko!

 

Wafilipi 4:11-13 “Si kwamba nasema haya kwa kuwa nina mahitaji; maana nimejifunza kuwa radhi na hali yo yote niliyo nayo. Najua kudhiliwa, tena najua kufanikiwa; katika hali yo yote, na katika mambo yo yote, nimefundishwa kushiba na kuona njaa, kuwa na vingi na kupungukiwa. Nayaweza mambo yote katika yeye anitiaye nguvu.”

 

Daudi alikuwa ni kama mtu aliyepoteza kila kitu alipokimbiilia Adulamu, Lakini Mungu alimfundisha kumtegemea yeye aliishi alikula na aliendelea kuwa shujaa mwenye uwezo wa kuingia na kutoka na kuwasaidia watu wote duni waliokuwa wamemkimbilia, Daudi aliwatunza, aliwajenga kiroho na kuwafundisha vita, Mungu atatujaribu ili atunoe na kutupima kama dhahabu inavyopimwa ili tutoke tukiwa tunang’aa zaidi, Daudi na watu wake walijifunza vita, walijifunza ushujaa, walijifunza ukakamavu, walijifunza kufunga na kuomba, walijifunza kuabudu walijifunza kumtegemea Mungu na kuishi kijamaa na wakatoka huko wakiwa na mabadiliko makubwa tayari kwa kushika hatamu na kuwahudumia watu wa Mungu Ayubu 23:10 “Lakini yeye aijua njia niendeayo; Akisha kunijaribu, nitatoka kama dhahabu.”

 

4.       Ni eneo la maandalizi ya kishujaa - Mungu hutumia changamoto kutujengea maandalizi na ushujaa, ili tuwe na nidhamu, subira uvumilivu na ujasiri, anaruhusu mazingira ambayo wewe ndie utakuwa tegemeo lake na hutajitumainia kwa lolote, anakubadilisha mtazamo na fikra na kukuandaa kivita, wayahudi ni taifa vumilivu na imara zaidi duniani kwa sababu ya kukutana na changamoto kali na kadiri wanavyoshambuliwa ndivyo wanavyokuwa imara na kujijengea uwezo mkubwa siku hadi siku, kupigana kwao sio kwaajili ya kushambulia bali kwaajili ya kujihami.  

 

2Wakorintho 10:5 “Maana ingawa tunaenenda katika mwili, hatufanyi vita kwa jinsi ya mwili; (maana silaha za vita vyetu si za mwili, bali zina uwezo katika Mungu hata kuangusha ngome ;) tukiangusha mawazo na kila kitu kilichoinuka, kijiinuacho juu ya elimu ya Mungu; na tukiteka nyara kila fikira ipate kumtii Kristo; tena tukiwa tayari kupatiliza maasi yote, kutii kwenu kutakapotimia.”

 

Yeremia 29:10-13. “Maana Bwana asema hivi, Babeli utakapotimiziwa miaka sabini, nitawajilia ninyi, na kulitimiza neno langu jema kwenu, kwa kuwarudisha mahali hapa. Maana nayajua mawazo ninayowawazia ninyi, asema Bwana, ni mawazo ya amani wala si ya mabaya, kuwapa ninyi tumaini siku zenu za mwisho. Nanyi mtaniita, mtakwenda na kuniomba, nami nitawasikiliza. Nanyi mtanitafuta na kuniona, mtakaponitafuta kwa moyo wenu wote.”

 

5.       Ni eneo la kuondoa udumavu - Mungu hafurahii udumavu wetu kiroho, iwapo anaona ukuaji wetu unaweza kuathiriwa anaondoa watu na mahali  na hali zote zinazoonekana kuwa na umuhimu wa kukulazimisha wewe ukue na kukomaa, kama mtu au watu na mazingira yanayoonekana kuathiri ukuaji wako anakuondoa wewe, anaondoa ulinzi, anaondoa faraja, anaondoa kuthibitishwa na watu anaweza hata kukuhamisha mazingira kama anaona ni madogo kwake kukusaidia kwenda kwenye kiwango kingine  anaingilia mielekeo yako, anafunga mlango, anakuweka kwenye chumba cha kusubiria, anaruhusu upate maumivu, atakufanya uishi kwa imani, anaondoa udumavu na kukuoa ukuaji wa kiroho.

 

Hosea 2:13 -17 “Nami nitamwadhibu kwa sababu ya siku za Mabaali, aliowafukizia uvumba; hapo alipojipamba kwa pete masikioni mwake, na kwa vito asema Bwana. Kwa hiyo angalia, mimi nitamshawishi, na kumleta nyikani, na kusema naye maneno ya kumtuliza moyo. Nami nitampa mashamba yake ya mizabibu toka huko, na bonde la Akori kuwa mlango wa tumaini; naye ataniitikia huko, kama siku zile za ujana wake, na kama siku ile alipopanda kutoka nchi ya Misri. Tena siku hiyo itakuwa, asema Bwana, utaniita Ishi, Kwa maana nitayaondoa majina ya Mabaali kinywani mwake, wala hawatatajwa tena kwa majina yao.”

 

6.       Ni eneo la kutengwa -  Daudi alishakuwa mtu maarufu sana tangu siku alipomuua Goliath, watu wa mijini na vijijini walikuwa wanamtambua, wanawake waliimba na kumsifia kuwa amefanya kazi kubwa kuliko hata mfalme mwenyewe kwa hiyo alitajwa kama mtu shujaa aliyeiletea Israel ushindi mkubwa sana, aliozwa binti wa kifalme na alikuwa anakaa ikulu, na kwa kuwa alikuwa mtu wa kutegemewa alitakiwa kukaa katika uwanja wa vita akipigana vita mbalimbali mtu huyu mwenye sifa zote za kifalme badala ya kuwako ikulu sasa anaishi kama mkimbizi na kuishi katika pango huko Adulamu, Mungu alimtenga na umaarufu, Mungu alitaka kumtenga mtumishi wake kwa kazi maalumu

 

1Samuel 18:6-7 “Hata ikawa, walipokuwa wakienda, hapo Daudi aliporudi baada ya kumwua yule Mfilisti, wanawake wakatoka katika miji yote ya Israeli, kwa kuimba na kucheza, ili kumlaki mfalme Sauli; wakatoka na matari, na shangwe, na vinanda. Nao wale wanawake wakaitikiana wakicheza, wakasema, Sauli amewaua elfu zake, Na Daudi makumi elfu yake.”

 

Wimbo huu uliashiria kuwa Daudi ni Mpiganaji hodari zaidi kuliko Sauli kwani wanawake walijaribu kumlinganisha na mtawala aliyekuweko na kwa sababu ya wimbo huu Sauli alipatwa na wivu na kuanza njama na mikakati ya kummaliza na kumuua Daudi, Mungu anaamua kumtenga Daudi na hatari hizo, kwaajili ya kumuandaa kuwa kiongozi hodari zaidi, mnyenyekevu, mvumilivu mwenye kujua wakati na majira ya Mungu, Mungu anaweza kukutenga na kukupeleka mahali ambapo utapata muda na utaendeleza uwezo wa kumuomba na kujitambua na kukomaa zaidi kwa ajili ya kazi yake  

 

7.       Ni eneo la mafunzo ya kiroho - Huko Adulamu Daudi hakuwa Mchungaji wa kondoo tu na Shujaa wa vita bali sasa alikuwa kiongozi, alifanyika kiongozi wa watu waliovunjika moyo, watu wenye uchungu moyoni, wenye madeni na wenye mizigo. Mungu alimtumia Daudi kuwafanya watu hao wanyonge kuwa mashujaa, walijigundua wao ni kina nani bila ufalme na walijigundua wao ni akina nani bila sifa na umati wa watu, Adulamu inaondoa sifa na kufunua kuwa wewe ni nani, Adulamu inakupa nafasi ya kujitazama kwa jicho lingine na sio vile wanavyosema watu!

 

1Samuel 22:1-2. “Basi Daudi akaondoka huko, akakimbilia pango la Adulamu; na ndugu zake na watu wote wa mbari ya baba yake waliposikia habari hiyo, wakamwendea huko. Na kila mtu aliyekuwa katika hali ya dhiki, na kila mtu aliyekuwa na deni, na watu wote wenye uchungu mioyoni mwao, wakakusanyika kwake; naye akawa jemadari wao; nao waliokuwa pamoja naye walipata kama watu mia nne.”

 

2Samuel 23:8-39. ”Haya ndiyo majina ya mashujaa aliokuwa nao Daudi; Yashobeamu Mhakmoni,mkuu wa maakida ;huyo aliliinua shoka lake juu ya watu mia nane waliouawa pamoja.Na baada yake kulikuwa na Eleazari, mwana wa Dodai, Mwahohi, mmojawapo wa wale mashujaa watatu waliokuwa pamoja na Daudi; walipowatukana Wafilisti waliokuwa wamekusanyika huko ili kupigana, na watu wa Israeli walikuwa wamekwenda zao; huyo aliinuka, akawapiga Wafilisti hata mkono wake ukachoka, na mkono wake ukaambatana na upanga; naye Bwana akafanya wokovu mkuu siku ile; nao watu wakarudi nyuma yake ili kuteka nyara tu.Na baada yake kulikuwa na Shama, mwana wa Agee, Mharari; nao Wafilisti walikuwa wamekusanyika huko Lehi, palipokuwapo konde lililojaa midengu; nao watu wakawakimbia Wafilisti; ila huyo alisimama katikati ya konde lile, akalipigania, akawaua Wafilisti; naye Bwana akafanya wokovu mkuu. Tena, watatu miongoni mwa wale thelathini waliokuwa wakuu wakashuka, wakamwendea Daudi wakati wa mavuno mpaka pango la Adulamu, na kikosi cha Wafilisti walikuwa wamefanya kambi katika bonde la Warefai. Naye Daudi wakati ule alikuwako ngomeni, na jeshi la Wafilisti wakati ule walikuwako Bethlehemu. Daudi akatamani, akasema, Laiti mtu angeninywesha maji ya kisima cha Bethlehemu, kilicho karibu na lango! Basi hao mashujaa watatu wakapenya jeshi la Wafilisti, wakateka maji kutoka kile kisima cha Bethlehemu, kilicho karibu na lango, wakayachukua, wakamletea Daudi; walakini yeye hakukubali kuyanywa, akayamimina mbele za Bwana.  Akasema, Hasha, Bwana, nisifanye hivi; je! Si damu hii ya watu hao waliohatirisha nafsi zao? Kwa hiyo hakukubali kuyanywa. Hayo ndiyo waliyoyafanya wale mashujaa watatu. Tena, Abishai, nduguye Yoabu, mwana wa Seruya, alikuwa mkuu wa wale watatu. Huyo aliuinua mkuki wake juu ya watu mia tatu, akawaua, akawa na jina kati ya wale watatu.  Je! Huyo hakuwa na heshima maalumu miongoni mwa wale watatu? Kwa hiyo akawekwa kuwa akida wao; ila hakudiriki kuwamo katika wale watatu. Tena Benaya, mwana wa Yehoyada, mtu hodari wa Kabseeli aliyekuwa amefanya mambo makuu; aliwaua simba wakali wawili wa Moabu, pia akashuka akamwua simba katikati ya shimo wakati wa theruji. huyo naye akamwua Mmisri, mtu mrefu; naye huyo Mmisri alikuwa na mkuki mkononi; lakini yeye alimshukia na gongo, akamnyakulia Mmisri mkuki mkononi mwake, akamwua kwa mkuki wake mwenyewe. Hayo ndiyo aliyoyafanya Benaya, mwana wa Yehoyada, akawa na jina kati ya wale mashujaa watatu. Alikuwa mwenye heshima kuliko wale thelathini, ila hakudiriki kuwamo katika wale watatu. Naye Daudi akamweka juu ya walinzi wake. Asaheli, nduguye Yoabu, alikuwa mmojawapo wa wale thelathini; na Elhanani, mwana wa Dodo, wa Bethlehemu; na Shama, Mharodi, na Elika, Mharodi; na Helesi, Mpeloni, na Ira, mwana wa Ikeshi, Mtekoi; na Abiezeri, Mwanathothi, na Sibekai, Mhushathi; na Salmoni, Mwahohi, na Maharai, Mnetofathi; na Heledi, mwana wa Baana, Mnetofathi, na Itai, mwana wa Ribai, wa Gibea wa wana wa Benyamini; na Benaya, Mpirathoni, na Hurai, wa vijito vya Gaashi;na Abieli, Mwarbathi, na Azmawethi, Mbarhumi; na Eliaba, Mshaalboni, na wana wa Yasheni; na Yonathani, mwana wa Shama, Mharari, na Ahiamu, mwana wa Shalali, Mharari;  na Elifeleti, mwana wa Ahasbai, na Heferi, Mmaakathi, na Eliamu, mwana wa Ahithofeli, Mgiloni; na Hezro, Mkarmeli, na Paarai, Mwarbi; na Igali, mwana wa Nathani, wa Soba, na Bani, Mgadi; na Seleki, Mwamoni, na Naharai, Mbeerothi, ambao ni wachukua silaha wa Yoabu, mwana wa Seruya; na Ira, Mwithri, na Garebu, Mwithri; na Uria, Mhiti; jumla yao ilikuwa watu thelathini na saba.”

Matokeo ya kupita katika Pango la Adulamu

Adulamu kulizalisha Serikali yenye nguvu sana, Daudi na watu wake waliokuwa wamekataliwa katika jamii tena wanatafutwa kuuawa waligeuka kuwa watu wema, waadilifu, wenye uchungu na taifa lao, na viongozi wa ufalme na majeshi ya kifalme na mashujaa wenye nguvu, walitoka wakiwa watu wanaomcha Mungu na wanaomtegemea Mungu kwa asilimia miamoja, Daudi aliwafunza watu wake kuwa kama yeye alivyo na kuwa na moyo kama wake.

Zaburi 34:17-19 “Walilia, naye Bwana akasikia, Akawaponya na taabu zao zote. Bwana yu karibu nao waliovunjika moyo, Na waliopondeka roho huwaokoa. Mateso ya mwenye haki ni mengi, Lakini Bwana humponya nayo yote.”

Zaburi 57:1-3 “Unirehemu, Ee Mungu, unirehemu mimi, Maana nafsi yangu imekukimbilia Wewe. Nitaukimbilia uvuli wa mbawa zako, Hata misiba hii itakapopita. Nitamwita MUNGU Aliye juu, Mungu anitimiziaye mambo yangu. Atapeleka toka mbinguni na kuniokoa, Atukanapo yule atakaye kunimeza. Mungu atazipeleka Fadhili zake na kweli yake”

-       Adulamu Daudi na wenzake walitoka wakiwa mwenye nguvu zaidi – Daudi alikimbilia Adulamu akiwa Mkimbizi lakini alitoka akiwa kiongozi wa wakati mkamilifu uliokusudiwa na Mungu kwa Israel kuwa na kiongozi mcha Mungu, Adulamu iliwajenga, iliwapa uvumilivu, iliwafanya kuwa wa kiroho zaidi, iliwaimarisha kihisia, na kuwajengea ujasiri.

 

-     Adulamu iliimarisha uhusiano wao karibu na Mungu – Walikimbilia Adulamu wakiwa wenye mashaka, wenye wasi wasi, wenye woga na hofu, wakiwa na uchungu, wenye madeni na walikata tamaa lakini walitoka wakiwa mashujaa, Kule Adulamu Mungu atakuunganisha na watu utakaokuwa nao kiroho, watakaokupigania na watakaosimama na wewe na wito wako

 

-     Adulamu lilikuwa ni eneo la kuendeleza kipawa cha uongozi, - Daudi alijifunza jinsi ya kuongoza, jinsi ya kupangilia mfumo wa uongozi, jinsi ya kupanga wapiganaji, jinsi ya kuwatia moyo watu waliokata tamaa na jinsi ya kumtegemea Mungu, ukiweza kuongoza watu Adulamu hutasindwa kuongoza watu  Hebroni wala Yerusalem

 

-    Adulamu lilikuwa ni eneo la kuimarisha uhusiano na Mungu – Adulamu lilikuwa ni eneo la kujipanga upya kiroho, kulikuwa na ukimya, lilikuwa eneo la siri, sehemu ambayo unaweza kufurahia uwepo wa Mungu, walitoka wakiwa wamejifunza kuomba, kuimba zaburi, kumtegemea Mungu zaburi nyingi za Daudi zilitungwa na kuimbwa kutoka katika pango la Adulamu

Adulamu sio kuzuri lakini ni kwa Muhimu, ni kama sehemu ya upweke, ni kama sehemu ya kucheleweshwa, ni kama sehemu ya ukimya lakini kiroho ni eneo la kukujenga na sio la kukubomoa, Mungu akupeleke Adulamu lakini sio kwa kukutesa wala sio kwa adhabu wala sio kukuchosha lakini kwaajili ya kukuendeleza, unafichwa ili uandaliwe, unavunjwa ili utengenezwe, unasubiri ili utiwe nguvu, huwezi kuhitimu Adulamu kwa kuikimbia unahitimu Adulamu kwa kukubali kuwa kile Mungu alichokikusudia ndani yetu, kije kuwa dhahiri katika maisha yetu ya baadaye na kuwafaa watu wa Mungu.

Na. Rev. Innocent Samuel Kamote

Mkuu wa wajenzi mwenye Hekima

Mtu akiwa ndani ya Kristo!

 

2Wakorintho 5:16-17 “Hata imekuwa, sisi tangu sasa hatumjui mtu awaye yote kwa jinsi ya mwili. Ingawa sisi tumemtambua Kristo kwa jinsi ya mwili, lakini sasa hatumtambui hivi tena. Hata imekuwa, mtu akiwa ndani ya Kristo amekuwa kiumbe kipya; ya kale yamepita tazama! Yamekuwa mapya.”

Utangulizi:

Paulo mtume alikuwa anaandika waraka huu kwaajili ya kuitetea huduma yake ya upatanisho ambayo Mungu ameifanya kupitia Yesu Kristo, anaeleza jinsi ambavyo kifo cha Yesu Kristo na ushindi wake dhidi ya kifo jinsi unavyobadili kabisa maisha ya mwanadamu hususani wale wanaomuamini Yesu Kristo kama Bwana na mwokozi wa maisha yao, mtu huyo sio tu anaboreshwa au kukarabatiwa lakini ni ukweli ulio wazi kuwa amekuwa kiumbe kipya kisicho na historia ya kale au zamani zilizopita

Yohana 1:12-13 “Bali wote waliompokea aliwapa uwezo wa kufanyika watoto wa Mungu, ndio wale waliaminio jina lake; waliozaliwa, si kwa damu, wala si kwa mapenzi ya mwili, wala si kwa mapenzi ya mtu, bali kwa Mungu.”

Pamoja na mambo mengine leo tutachukua muda wa kutosha kutafakari fungu hili la msingi Mtu akiwa ndani ya Kristo amekuwa kiumbe kipya ya kale yote yamepita tazama yamekuwa mapya kwa kuzingatia vipengele muhimu vikuu vitatu vifuatavyo:-

·         Tangu sasa hatumjui mtu awayeyote kwa jinsi ya mwili.

·         Ingawa sisi tumemtambua Kristo kwa jinsi ya mwili, lakini sasa hatumtambui hivi tena

·         Mtu akiwa ndani ya Kristo.

Tangu sasa hatumjui mtu awayeyote kwa jinsi ya mwili.

2Wakorintho 5:16 “Hata imekuwa, sisi tangu sasa hatumjui mtu awaye yote kwa jinsi ya mwili. Ingawa sisi tumemtambua Kristo kwa jinsi ya mwili, lakini sasa hatumtambui hivi tena.”

Paulo mtume anaonyesha jinsi ambavyo injili ya Kristo ikipokelewa na mwanadamu inauwezo wa kufanya mageuzi makubwa ya kutisha na kushangaza, anaeleza kuwa mtu aliyeokolewa anakuwa na mtazamo mpya kabisa anapowatazama wenzake ambao wameokolewa, sijui wewe unamtazamaje mtu ndugu katika Bwana aliyeokoka lakini hiki ndicho Paulo mtume anachokitazama linapokuja swala la ndugu zake katika Bwana, Yeye hamwangalii mtu kwa jinsi ya mwili, Kulikuwa na shida katika Kanisa la Korintho Kanisa ambalo lilianzishwa na Paulo mwenyewe lakini kwa sababu ya changamoto za uchanga wao wa kiroho wako watu ambao walikuwa wanamkosoa na kumuona kama mtu asiye na uwezo wa kuzungumza kwa ufasaha, mtu ambaye ni mwoga kwa kuwa alijitegemea kifedha alipokuwa Korintho, mtu dhaifu, mwenye historia ya kuliudhi Kanisa mwoga, anapokuwa katika mwili lakini mkali anapoandika nyaraka zake, baadhi walimuona kama kiongozi wa kiroho mwenye mamlaka kamili na wakasema sisi ni wa Paulo, wengine walimuona sio mzungumzaji mzuri kwa sababu Wakorintho walikuwa wameathiriwa na tamaduni za Kigiriki zilizokuwa zikiheshimu wanenaji wazuri na wenye hekima, na walimuona yeye kuwa sio mzungumzaji kama hao,(wanafalsafa) na wengine walitilia mashaka utume wake,  kwa sababu hakuwa miongoni mwa wanafunzi walioambatana na Yesu alipokuwa duniani kabla ya kupaa mbinguni, akijibu hoja hizo katika waraka huu Paulo anaonyesha jinsi mtu aliyeokoka kwanza anavyopaswa kuwaangalia watu wengine, yeye anasema, mtu aliyebadilishwa na Yesu Kristo hamwangalii mtu yeyote kwa jinsi ya mwili neno hili lina maana gani hasa? Hebu tuone na kufanya uchunguzi wa kimaandiko kupata maana husika!

2Wakorintho 5:16 “Hata imekuwa, sisi tangu sasa hatumjui mtu awaye yote kwa jinsi ya mwili. Ingawa sisi tumemtambua Kristo kwa jinsi ya mwili, lakini sasa hatumtambui hivi tena.”

Maneno “Hata imekuwa, sisi tangu sasa hatumjui mtu awaye yote kwa jinsi ya mwili”, yanasomeka hivi katika Biblia ya kiingereza ya King James Version (KJV) “wherefore henceforth know we no man after the flesh”  kwa Kiyunani hatumjui mtu awaye yote kwa jinsi ya mwili linasomeka hivi  “eidō hēmeis de kata sarx” ambalo tafasiri yake ni kuwa watu waliookoka kweli kweli hawamwangalii mtu katika picha ya mtazamo wa kibinadamu bali katika jicho la Mungu aliyewaokoa “In salvation radically alters human perception not based on fleshly”  neno Flesh au mwili ndio kwa Kiyunani SARX, baada ya kuokolewa hatumwangalii mtu awaye yote kwa sababu ya rangi yake, utajiri wake, umasikini wake, kabila yake, elimu yake, taifa lake, wala hadhi yake wala historia yake ya nyuma, kila mtu aliyeokolewa anapaswa kumtazama mwingine katika namna ambayo Mungu anamtazama na tuache mara moja kujifikiri kuwa wewe unaweza kuwa bora kuliko wengine katika Kristo, leo hii unaweza kuona hata miongoni mwa watu wanaomuamini Yesu Kristo watu wa kabila fulani au dhehebu fulani wakijifikiri kuwa wao ni maalumu sana kuliko watu wa kabila nyingine au dhehebu lingine, wakati mwingine unaweza kubaki katika imani kwa sababu ya ujuzi wako kuhusu Kristo tu lakini wako watu wa makabila fulani, na madhehebu fulani, ambao wanadhani kuwa wao na babu zao na ukoo wao ndio wenye uwezo wa kumtumikia Mungu peke yao na akitokea mtu wa kabila lingine au dhehebu lingine ambaye anakiri kuwa ameokoka, wanadhani kuwa huyo hawezi na wanampiga vita, kuna wakati hata waimbaji wakiinuliwa kutokea kabila lingine watu waanza kuhoji kuwa hata wakabila hii nao wanaimba? Huku wakisahau kuwa kumbe Mungu anaweza kuinua waimbaji kutokea kabila lolote lile, unajua ni kwa nini ni kwa sababu wanadhani ni wao tu ndio wameitwa kumuimbia Mungu au ndio wanajua kuimba kuliko watu wa kabila zingine, Paulo mtume aliutetea utume wake ambao watu waliupiga vita wakifikiri kuwa hakuwa na Yesu kwa jinsi ya mwili na hivyo ana mapungufu, akilinganishwa na mitume wengine waliotembea na Bwana bega kwa bega, Ni muhimu kufahamu kuwa Mungu hapokei uso wa mwanadamu! Hatishwi na vyeo wala utajiri, wala wingi au ucheche wala mvuto wa nje, watu wote ambao Kristo amewafia msalabani wako sawa na hakuna aliye bora kuliko wengine hata kama injili ilianzia kwenu, kumbuka ilianza kwa Wayahudi na imetufikia sisi sote, Mungu sio wa Kusini na Kaskazini peke yake pia ni Mungu wa Mashariki na Magharibi, Mungu ni wa wote wenye mwili asomaye na afahamu yeye hana upendeleo!

Wagalatia 2:6-9 “Lakini wale wenye sifa ya kuwa wana cheo; (walivyokuwa vyo vyote ni mamoja kwangu; MUNGU HAPOKEI USO WA MWANADAMU); nasema, hao wenye sifa hawakuniongezea kitu; bali, kinyume cha hayo, walipoona ya kuwa nimekabidhiwa injili ya wasiotahiriwa, kama vile Petro ya waliotahiriwa; (maana yeye aliyemwezesha Petro kuwa mtume wa waliotahiriwa ndiye aliyeniwezesha mimi kwenda kwa Mataifa); tena walipokwisha kuijua ile neema niliyopewa; Yakobo, na Kefa, na Yohana, wenye sifa kuwa ni nguzo, walinipa mimi na Barnaba mkono wa kuume wa shirika; ili sisi tuende kwa Mataifa, na wao waende kwa watu wa tohara;”

Matendo 10:34-35 “Petro akafumbua kinywa chake, akasema, Hakika natambua ya kuwa MUNGU HANA UPENDELEO; bali katika kila taifa mtu amchaye na kutenda haki hukubaliwa na yeye.”

Warumi 2:5-11 “Bali kwa kadiri ya ugumu wako, na kwa moyo wako usio na toba, wajiwekea akiba ya hasira kwa siku ile ya hasira na ufunuo wa hukumu ya haki ya Mungu, atakayemlipa kila mtu kwa kadiri ya matendo yake; wale ambao kwa saburi katika kutenda mema wanatafuta utukufu na heshima na kutokuharibika, watapewa uzima wa milele; na wale wenye fitina, wasioitii kweli, bali wakubalio dhuluma, watapata hasira na ghadhabu; dhiki na shida juu ya kila nafsi ya mwanadamu atendaye uovu, Myahudi kwanza na Myunani pia; bali utukufu na heshima na amani kwa kila mtu atendaye mema, Myahudi kwanza na Myunani pia; KWA MAANA HAKUNA UPENDELEO KWA MUNGU.”

Waefeso 6:9 “Nanyi, akina bwana, watendeeni wao yayo hayo, mkiacha kuwaogofya, huku mkijua ya kuwa yeye aliye Bwana wao na wenu yuko mbinguni, WALA KWAKE HAKUNA UPENDELEO.”

Wakolosai 3:23-25 “Lo lote mfanyalo, lifanyeni kwa moyo, kama kwa Bwana, wala si kwa wanadamu,mkijua ya kuwa mtapokea kwa Bwana ujira wa urithi. Mnamtumikia Bwana Kristo. Maana adhulumuye atapata mapato ya udhalimu wake, WALA HAKUNA UPENDELEO.”

Tunajifunza ya kuwa Mungu hana upendeleo, na kuwa ndani ya Yesu Kristo kila mtu aliyeokolewa ana thamani kubwa sana mbele za Mungu thamani ambayo iko sawa na mwingine, tunatofautiana neema, vipawa na huduma kwa kadiri apendavyo Mungu yeye yule katika mwili wa Kristo, lakini hii haimaanishi kuwa mtu aliyeokoka anaweza kumdharau mwingine au kulinganisha mtu na mtu au mtu wa kabila fulani la kabila fulani au dhehebu fulani na fulani linalohubiri wokovu, ni mbaya sana katika wokovu kufikiri kuwa watu fulani tu ndio wana haki ya kumtumikia Mungu na wa aina fulani hawana haki, Katika wokovu hatumwangalii mtu kwa jinsi ya kibinadamu bali kama ndugu katika Kristo bila kujali mtu huyu ameitwa namna gani.

Ingawa sisi tumemtambua Kristo kwa jinsi ya mwili, lakini sasa hatumtambui hivi tena

2Wakorintho 5:16 “Hata imekuwa, sisi tangu sasa hatumjui mtu awaye yote kwa jinsi ya mwili. Ingawa sisi tumemtambua Kristo kwa jinsi ya mwili, lakini sasa hatumtambui hivi tena.”

Paulo anakwenda ndani zaidi sana kwamba mtu aliyeokoka vema sio tu kuwa hatazami watu kwa jinsi ya Mwili lakini pia hata utambuzi wake kuhusu Yesu Kristo unakwenda ndani zaidi ya kuwa hatumtambui Yesu kwa jinsi ya mwili “Ingawa sisi tumemtambua Kristo kwa jinsi ya mwili, lakini sasa hatumtambui hivi tena”

Wengine katika Korintho walijisifu kuwa wanamjua Kristo kwa jinsi ya mwili, na wengine waliokuwa wakijivunia walijivunia kwa sababu wao walimuona Kristo na walimjua kwa jinsi ya mwili walikuwa karibu naye ni wa kabila yao kwa hiyo baadhi ya watu kule Korintho walimuona Paulo mtume kama asiye na ubora kwa vile hakumuona Kristo kwa jinsi ya mwili wakati mitume wengine, walimuona Paulo anawaonyesha kuwa hilo pia halina maana na wala halina mashiko, wako watumishi ambao wamebahatika pia kumuona Kristo akiwatokea na kuwaita moja kwa moja katika wito maalumu wa kumtumikia na wanadhani kwa sababu hiyo wanaweza kuwa na umaalumu sana, Paulo anaonyesha ya kuwa ukiisha kuokolewa kuna namna unaweza kumtambua Yesu Kristo kwa jinsi nyingine na sio lazima iwe ile ya mwili, kutokewa na Kristo hakukufanyi wewe uwe maalumu  na wa kipekee sana kuliko asiyetokewa, kwa hiyo Paulo anaonyesha ya kuwa ingawa yeye hakutembea na Yesu moja kwa moja kama mitume wengine wakati wa maisha ya Yesu Duniani lakini Kristo alimtokea kwa njia ya pekee na kumteua kuwa mtume hata kama kule Korintho wanamuona yeye ni mdogo au hana sifa!

1Wakorintho 15:3-10 “Kwa maana naliwatolea ninyi hapo mwanzo yale niliyoyapokea mimi mwenyewe, ya kuwa Kristo alikufa kwa ajili ya dhambi zetu, kama yanenavyo maandiko; na ya kuwa alizikwa; na ya kuwa alifufuka siku ya tatu, kama yanenavyo maandiko; na ya kuwa alimtokea Kefa; tena na wale Thenashara; baadaye aliwatokea ndugu zaidi ya mia tano pamoja; katika hao wengi wanaishi hata sasa, ila baadhi yao wamelala; baadaye akamtokea Yakobo; tena na mitume wote; na mwisho wa watu wote, alinitokea mimi, kama ni mtu aliyezaliwa si kwa wakati wake. Maana mimi ni mdogo katika mitume, nisiyestahili kuitwa mitume, kwa sababu naliliudhi Kanisa la Mungu. Lakini kwa neema ya Mungu nimekuwa hivi nilivyo; na neema yake iliyo kwangu ilikuwa si bure, bali nalizidi sana kufanya kazi kupita wao wote; wala si mimi, bali ni neema ya Mungu pamoja nami.”

2Wakorinto 12:1-4 “Sina budi kujisifu, ijapokuwa haipendezi; lakini nitafikilia maono na mafunuo ya Bwana. Namjua mtu mmoja katika Kristo, yapata sasa miaka kumi na minne, (kwamba alikuwa katika mwili sijui; kwamba alikuwa nje ya mwili sijui; Mungu ajua). Mtu huyo alinyakuliwa juu mpaka mbingu ya tatu. Nami namjua mtu huyo, (kwamba alikuwa katika mwili sijui; kwamba alikuwa nje ya mwili sijui; Mungu ajua); ya kuwa alinyakuliwa mpaka Peponi, akasikia maneno yasiyotamkika, ambayo haijuzu mwanadamu ayanene.”

Yohana 20:29 “Yesu akamwambia, Wewe, kwa kuwa umeniona, umesadiki; wa heri wale wasioona, wakasadiki.”

Kila mtu ana namna yake anavyomjua Kristo, wale waliomuona kwa mwili au waliomuona kwa maono hawawezi kwa namna yoyote kuwa bora kuliko yule asiyemuona, lakini ameamini kwa hiyo kimsingi Yesu alisema amebarikiwa yule asiyeniona lakini akaniamini, hata kama ulimjua Kristo kwa jinsi ya mwili kuna namna kila mmoja anamjua kwa jinsi yake  na kuna namna kila mtu aliyeokolewa anamtambua si kwa namna ile ya mwilini tena, mtazamo wa mtu aliyeokoka baada ya kuwamini Yesu, haumtazami Yesu kihistoria tu wala kwa utamaduni na kabila yake ndani ya watu waliookoka kuna ufahamu mpya na mtazamo mpya wa kiroho kuhusu Yesu Kristo, hakuna mtu mwenye hati miliki ya Kristo yeye ni mwokozi wa ulimwengu, wako wanaomtazama kwa jinsi ya mwili na wanamjua kwa jinsi ya tamaduni na historia wako wanaomuona kama Mwanadamu, wako wanaomuona kama Myahudi, wako wanaomuona kama Rabi mkubwa, wako wanaomuona kama mwana wa Mariamu, wako wanaomuona kama mtume tu wa kawaida, Sisi tuliomuamini kuna namna yetu, tunavyomtambua, hatumtambui kwa jinsi ya mwili kuna namna nyingine tunamtambua Bwana Yesu wala si kwa akili za kibinadamu, uko ufunuo wa kipekee unaowekwa na Mungu ndani yetu, Ingawa sisi tumemtambua Kristo kwa jinsi ya mwili, lakini sasa hatumtambui hivi tena kuna namna mpya ambayo mtu aliyeokoka anamjua Yesu Kristo na hii ndio ya muhimu na ndiyo anayoizungumzia Paulo Mtume

Mathayo 16:13-17 “Basi Yesu akaenda pande za Kaisaria-Filipi, akawauliza wanafunzi wake akasema, Watu hunena Mwana wa Adamu kuwa ni nani? Wakasema, Wengine hunena u Yohana Mbatizaji, wengine Eliya, wengine Yeremia au mmojawapo wa manabii. Akawaambia, Nanyi mwaninena mimi kuwa ni nani? Simoni Petro akajibu akasema, Wewe ndiwe Kristo, Mwana wa Mungu aliye hai.Yesu akajibu, akamwambia, Heri wewe Simoni Bar-yona; kwa kuwa mwili na damu havikukufunulia hili, bali Baba yangu aliye mbinguni.”

Yohana 3:31 “Yeye ajaye kutoka juu, huyo yu juu ya yote. Yeye aliye wa dunia, asili yake ni ya dunia, naye anena mambo ya duniani. Yeye ajaye kutoka mbinguni yu juu ya yote.”

Mtu akiwa ndani ya Kristo

2Wakorintho 5:16-17 “Hata imekuwa, sisi tangu sasa hatumjui mtu awaye yote kwa jinsi ya mwili. Ingawa sisi tumemtambua Kristo kwa jinsi ya mwili, lakini sasa hatumtambui hivi tena. Hata imekuwa, mtu akiwa ndani ya Kristo amekuwa kiumbe kipya; ya kale yamepita tazama! Yamekuwa mapya.”

Paulo mtume anakwenda ndani zaidi na kumzungumzia sasa mtu aliyeokoka na ambaye anaendelea kudumisha uhusiano wake na Kristo kuwa mtu huyo sio wa kawaida maneno ya Kiyunani yanayotumika hapo ni “en Christō Kainē ktisis” maana yake mtu aliye ndani ya Kristo ni uumbaji mpya, ni maisha mapya, ni mwanzo mpya, ni tabia mpya, ni utambulisho mpya, mtu aliyeokoka hafanyiwi ukarabati au marekebisho kwa hiyo sahau utambulisho wake wa zamani, mwenendo wake wa zamani, dhambi zake za zamani  ya kale yanafutwa kabisa na hapo haimaanishi kuwa kumukumbuki zimefutika la hasha bali kila aina ya utawala na nguvu za zamani zimeharibiwa ni ukurasa mpya unaanza, kwa hiyo mtu asikuhukumu kwa maswala ya jana au juzi au historia yako ya zamani, Paulo mtume alikuwa na historia ngumu ya kuliudhi Kanisa lakini Mungu alipomuokoa na kumuita mambo ya kale yalipita hali kadhalika wewe na mimi kuna namna tunapaswa kutazamwa katika mtazamo mwingine baada ya kuokoka, waliookoka wanapaswa kutazamwa katika jicho lingine, hatupaswi kufikiri kwa sababu mtu huyu alikuwa muuaji basi hawezi kuwa chombo cha Mungu, Paulo mtume aliliudhi kanisa n ahata alipookolewa Mwanafunzi wa Bwana Anania aliogopa hata kumuhudumia lakini Mungu alimweleza kuwa mtu huyu ni chombo changui kiteule

Matendo 9:10-16 “Basi palikuwapo Dameski mwanafunzi jina lake Anania. Bwana akamwambia katika maono, Anania. Akasema, Mimi hapa, Bwana. Bwana akamwambia, Simama, enenda zako katika njia iitwayo Nyofu, ukaulize katika nyumba ya Yuda mtu aitwaye Sauli, wa Tarso; maana, angalia, anaomba; naye amemwona mtu, jina lake Anania, akiingia, na kumwekea mikono juu yake, apate kuona tena. Lakini Anania akajibu, Bwana, nimesikia habari za mtu huyu kwa watu wengi, mabaya mengi aliyowatenda watakatifu wako Yerusalemu; hata hapa ana amri itokayo kwa wakuu wa makuhani awafunge wote wakuitiao Jina lako. Lakini Bwana akamwambia, Nenda tu; kwa maana huyu ni chombo kiteule kwangu, alichukue Jina langu mbele ya Mataifa, na wafalme, na wana wa Israeli. Maana nitamwonyesha yalivyo mengi yatakayompasa kuteswa kwa ajili ya Jina langu.” 

Paulo mtume alibadilishwa kabisa kama kila mtu aliyemuamini Kristo anavyobadilishwa, mtuime ahkupaswa kutiliwa mashaka kuwa hayuko sawa na wengine kwa sababui kinachomtokea kila mtu aliyeokoka ndicho kilichomtokea na yeye, mtu aliyeokoka anapatwa na maswala yafuatayo ambayo humfanya kuwa kiumbe kipya:-

Amesamehewa dhambi zake – Wakolosai 1:13-14 “Naye alituokoa katika nguvu za giza, akatuhamisha na kutuingiza katika ufalme wa Mwana wa pendo lake; ambaye katika yeye tuna ukombozi, yaani, msamaha wa dhambi;”

Amekuwa mwana wa Mungu – Yohana 1:12-13 “Bali wote waliompokea aliwapa uwezo wa kufanyika watoto wa Mungu, ndio wale waliaminio jina lake; waliozaliwa, si kwa damu, wala si kwa mapenzi ya mwili, wala si kwa mapenzi ya mtu, bali kwa Mungu.”

Anahesabiwa haki -  Warumi 5:1-2 “Basi tukiisha kuhesabiwa haki itokayo katika imani, na mwe na amani kwa Mungu, kwa njia ya Bwana wetu Yesu Kristo, ambaye kwa yeye tumepata kwa njia ya imani kuifikia neema hii ambayo mnasimama ndani yake; na kufurahi katika tumaini la utukufu wa Mungu.”

Anatakaswa katika Kristo – 1Wakorintho 1:2 “kwa kanisa la Mungu lililoko Korintho, wale waliotakaswa katika Kristo Yesu, walioitwa wawe watakatifu, pamoja na wote wanaoliitia jina la Bwana wetu Yesu Kristo kila mahali, Bwana wao na wetu.”

Ana uzima wa milele – Yohana 3:16 “Kwa maana jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.”

Hana hukumu ya adhabu – Warumi 8:1 “Sasa, basi, hakuna hukumu ya adhabu juu yao walio katika Kristo Yesu.”

Na. Rev. Innocent Samuel Kamote

Mkuu wa wajenzi mwenye Hekima

Kadiri ya walivyowatesa ndivyo walivyoongezeka!

Kutoka 1:8-12. “Basi akainuka mfalme mpya kutawala Misri, asiyemjua Yusufu. Akawaambia watu wake, Angalieni, watu wa wana wa Israeli ni wengi tena wana nguvu kuliko sisi. Haya! Na tuwatendee kwa akili, wasije wakaongezeka; tena, ikitokea vita, wao nao wasije wakashikamana na adui zetu na kupigana nasi, na kutoka katika nchi hii. Basi wakaweka wasimamizi juu yao wawatese kwa mizigo yao. Nao wakamjengea Farao miji ya kuwekea akiba, Pithomu na Ramesesi. Lakini kwa kadiri ya walivyowatesa ndivyo walivyoongezeka na kuzidi kuenea. Nao walichukiwa kwa sababu ya wana wa Israeli.”

Utangulizi:

Ni muhimu ikafahamika tena na tena kwa wanadamu wote Duniani kuwa kusudi la Mungu kwa mtu yeyote duniani haliwezi kubatilishwa na mtu awaye yote hata kama mtu huyo ana nguvu kuliko tunavyofikiri, Stori ya wana wa Israeli Kutoka Misri inaanza kwa kuinuka kwa mfalme mpya ambaye kwa ujeuri tu alijifanya hafahamu Historia  na mchango wa Yusufu katika nchi ya Misri, Kwa hofu yake dhidi ya Waisraeli anapanga njama na kukusudia kuwatesa na kuwakandamiza Israel ili ikiwezekana waangamie na kupotelea mbali, Lakini jambo la kushangaza ni kuwa “Kadiri walivyowatesa ndivyo walivyoongezeka”, Kanuni ya Mungu hapa inatenda kazi ya kuwa huwezi kumlaani Mtu ambaye Mungu amembariki, na huwezi kumshusha mtu ambaye Mungu amemuinua.

Hesabu 23:5-8 “Bwana akatia neno katika kinywa chake Balaamu, akasema, Umrudie Balaki; ukaseme maneno haya. Akarudi kwake, na tazama, amesimama karibu na sadaka yake ya kuteketezwa, yeye na wakuu wote wa Moabu pamoja naye. Akatunga mithali yake, akasema, Balaki amenileta kutoka Aramu, Mfalme wa Moabu kutoka milima ya mashariki, Njoo! Unilaanie Yakobo, Njoo! Unishutumie Israeli. Nimlaanije, yeye ambaye Mungu hakumlaani? Nimshutumuje, yeye ambaye Bwana hakumshutumu?”

Mamlaka ya Mungu ni kubwa kuliko mamlaka za kibinadamu, uweza wa Mungu ni mkuu kuliko uweza wa wenye kuonea, Rehema za Mungu ni kubwa kuliko matendo ya wenye dhuluma, Njama za kibinadamu haziwezi kushindana na mpango kazi na mpango mkakati wa Mungu, Hofu ya mfalme wa Misri ilikuwa kubwa kwa sababu Mungu alikuwa amewabariki Israel na wakawa wengi na wenye nguvu kuliko Wamisri, si kuwa watu hao walikuwa waovu bali walikuwa wanastawi na ustawi wao ukawa ni tishio kubwa kwa wamisri na mfalme wao, lakini katika namna ya kushangaza sana Kadiri ya walivyowatesa ndivyo walivyoongezeka!, tutajifunza somo hili kwa kuzingatia vipengele muhimu vitatu vifuatavyo:-

·         Jinsi Baraka za Mungu zinavyokufanya uwe tishio.

·         Kadiri ya walivyowatesa ndivyo walivyoongezeka!.

·         Kusudi la Mungu haliwezi kufutwa na wivu wa wanadamu.

Jinsi Baraka za Mungu zinavyokufanya uwe tishio.

Ni muhimu kufahamu kuwa Israel kushuka kule Misri halikuwa tukio la bahati mbaya bali ulikuwa ni mpango wa Mungu, Mungu alimweleza wazi rafiki yake Abrahamu kuwa uzao wake utashuka Misri na kukaa huko kwa muda mrefu na kisha baadae angeliwapandisha katika inchi ya Kanaani nchi ambayo Bwana alikuwa amemwapia Ibrahimu ya kuwa atampa yeye na uzao wake.

Mwanzo 15:13-16 “BWANA akamwambia Abramu, Ujue hakika ya kwamba uzao wako utakuwa mgeni katika nchi isiyo yake, watawatumikia watu wale, nao watateswa muda wa miaka mia nne. Hata na taifa lile, watakaowatumikia, nitawahukumu; baadaye watatoka na mali mengi. Lakini wewe utakwenda kwa baba zako kwa amani, utazikwa katika uzee mwema. Na kizazi cha nne kitarudi hapa, maana haujatimia uovu wa Waamori bado.”

Kwa hiyo aliyopitia Israeli ulikuwa ni mpango na makusudi ya Mungu, Mungu alikuwa amefanya agano na Ibrahimu na Isaka na Yakobo kuhusu wao na uzao wao, kwa sababu hiyo isingelikuwa rahisi agano hilo kuvunjika kwa sababu yoyote ile, Mungu aliwabariki sana  na kuwapa mafanikio makubwa, Kimsingi Israel hawakuwa watu waovu walikuwa wema na watu wa Mungu hata hivyo walichukiwa kwa sababu Mungu alikuwa amewabariki, na Mungu aliwapa ustawi mkubwa, hata leo hii Mkono wa Mungu unapokuwa juu yako kwa sababu zozote zile mafanikio yako yatazaa wivu, chuki na upinzani na wakati mwingine majaribio ya kipumbavu ya watu kutaka kukuangamiza hili ni jambo la kawaida kwa mujibu wa mafundisho ya kibiblia Baraka zako zitakufanya uogopwe na kuwavutia maadui wenye wivu

Kutoka 1:7-10 “Na wana wa Israeli walikuwa na uzazi sana, na kuongezeka mno, na kuzidi kuwa wengi, nao wakaendelea na kuongezeka nguvu; na ile nchi ilikuwa imejawa na wao. Basi akainuka mfalme mpya kutawala Misri, asiyemjua Yusufu. Akawaambia watu wake, Angalieni, watu wa wana wa Israeli ni wengi tena wana nguvu kuliko sisi. Haya! Na tuwatendee kwa akili, wasije wakaongezeka; tena, ikitokea vita, wao nao wasije wakashikamana na adui zetu na kupigana nasi, na kutoka katika nchi hii.”

Unaona! Mungu anapokupenda na kuwekeza kitu cha ziada ndani yako watu hawapendi na hawawezi kufurahi na kwa sababu hiyo watatumia mamlaka zao na nguvu zao na hila zao na ubinadamu wao kukuletea upinzani au kujaribu kuharibu mpango wa Mungu ulioko ndani yako lakini jambo la ajabu ni kuwa kila wakati watakapojaribu kufanya hivyo wewe utaongezeka na hutazoofika lakini wao kwa upande wao watadhoofika na kupata hofu kubwa zaidi, kanuni hii imejitokeza mara kadhaa katika maisha ya watu wa Mungu na kwako sio jambo la ajabu ona;-

Mwanzo 26:12-16 “Isaka akapanda mbegu katika nchi ile, akapata mwaka ule vipimo mia kwa kimoja, BWANA akambariki. Na mtu huyu akawa mkuu, akazidi kusitawi, hata akawa mkuu sana. Akawa na mali ya kondoo, na mali ya ng'ombe, na watumwa wengi. Hao Wafilisti wakamhusudu. Na vile visima vyote walivyochimba watumwa wa baba yake, siku za Ibrahimu babaye, Wafilisti walikuwa wamevifukia, wakavijaza kifusi. Abimeleki akamwambia Isaka, Utoke kwetu, maana wewe una nguvu sana kuliko sisi.”

1Samuel 18:6-9 “Hata ikawa, walipokuwa wakienda, hapo Daudi aliporudi baada ya kumwua yule Mfilisti, wanawake wakatoka katika miji yote ya Israeli, kwa kuimba na kucheza, ili kumlaki mfalme Sauli; wakatoka na matari, na shangwe, na vinanda. Nao wale wanawake wakaitikiana wakicheza, wakasema, Sauli amewaua elfu zake, Na Daudi makumi elfu yake. Basi Sauli akaghadhibika sana, na maneno haya yakamchukiza; akasema, Wamempa Daudi makumi elfu, na mimi wamenipa elfu tu; kuna nini tena awezayo kupata, isipokuwa ni ufalme? Sauli akamwonea Daudi wivu tangu siku ile.”

Daniel 6:1-5 “Ilimpendeza Dario kuweka juu ya ufalme maliwali mia na ishirini, wawe juu ya ufalme wote; na juu yao akaweka wakubwa watatu, na Danieli alikuwa mmoja wao; ili maliwali hawa watoe hesabu kwao, mfalme asipate hasara. Basi Danieli huyo alipata sifa kuliko wakubwa na maliwali, kwa kuwa roho bora ilikuwa ndani yake; naye mfalme akaazimu kumweka juu ya ufalme wote. Basi mawaziri na maamiri wakatafuta sana kupata sababu za kumshitaki Danieli kwa habari za mambo ya ufalme; lakini hawakuweza kuona sababu wala kosa; kwa maana alikuwa mwaminifu, wala halikuonekana kosa wala hatia ndani yake. Ndipo wale watu wakasema, Hatutapata sababu ya kumshitaki Danieli huyo, tusipoipata katika mambo ya sheria ya Mungu wake.”

Unaona mkono wa Mungu unapokuwa juu yako, watu wanaweza kukuogopa, wanaweza kukufukuza, wanaweza kukuonea wivu na wanaweza kutengeneza majungu dhidi yako, kama uko au unazungukwa na watu wa mwilini hata mnaosali pamoja kanisani na wengine wanaweza kuwa na cheo kikubwa kabisa kuliko wewe na lakini ukuu wa Mungu ulioko ndani yako unawogopesha, unaonekana kama unaweza kuwa na madhara kwao hata kama huna lengo wala nia ya kuwadhuru, wataogopa sana wakiona mioyo ya watu inaambatana nawe, watajaribu kukufukia na kukukandamiza na hata kukusema ili uonekane kuwa wewe sio kitu lakini kama mkono wa Mungu uko juu yako na wewe ni uzao wa agano lake hawatakuweza na kadiri wanavyokutesa ndivyo unavyozidi kuongezeka  na kuwa tishio               

Kadiri ya walivyowatesa ndivyo walivyoongezeka!

Biblia inatuonyesha kanuni ambayo iko kinyume na mtazamo wa kibinadamu, kadiri Mfalme wa Misri alivyokuwa akifanya mpango wa kuwaangamiza Israel ndivyo Israel walivyozidi kuongezeka na kustawi sana, ingetegemewa kuwa mbinu ya chuki na njama za Farao zingeliweza kuwa na mafanikio makubwa na kuwafanya Israel kuwa dhaifu lakini hata hivyo Mungu alifanya kinyume na matazamio yake, Mungu hugeuza laana kuwa baraka, Waliwatesa ili wasiongezeke lakini Israel waliongezeka, waliwaumiza ili wasiwe na nguvu lakini wakawa na nguvu zaidi, waliwadhalilisha lakini Mungu aliwaheshimisha, walitaka kuwaua watoto wao lakini wanawake walizaa kwa uhodari, waliwakandamiza lakini Mungu aliwainua Mungu alisimamia kusudi lake na Agamo lake alilofanya na Ibrahimu.

Mwanzo 12:1-3 “BWANA akamwambia Abramu, Toka wewe katika nchi yako, na jamaa zako, na nyumba ya baba yako, uende mpaka nchi nitakayokuonyesha; nami nitakufanya wewe kuwa taifa kubwa, na kukubariki, na kulikuza jina lako; nawe uwe baraka; nami nitawabariki wakubarikio, naye akulaaniye nitamlaani; na katika wewe jamaa zote za dunia watabarikiwa.”

Mpango wa Mungu kwa maisha yetu uko Dhahiri kiimani na kihistoria na kivitendo, Mungu anapokuwa amekusudia kukubariki hakuna mtu anaweza kuufuta mpango huo, wakati watu wanataka kukushusha Mungu atakupandisha kwa nguvu, hakuna mbinu, njama wala silaha au hila itakayoweza kufanikiwa dhidi yako, Mungu atakubariki kupitiliza na utatoboa kimaisha utafanikiwa na utapanda juu sana na adui zako watakuogopa kila watakapojaribu kukushambulia watashambuliwa vikali na nguvu iletayo wokovu juu yako na kimsingi utaongezeka, mfano huu ni Dhahiri katika maisha yetu na katika taifa la Kiyahudi kwa sababu ya agano lake alilofanya na  baba yetu Ibrahimu

Mwaka 1967 mwezi June kuanzia Tarehe 5 mpaka Tarehe 10 pale mashariki ya kati palitokea vita kali sana kati ya Muungano wa mataifa ya kiarabu ikiwemo Misri, Jordani, na Syria na baadaye Iraq dhidi ya Israel, mataifa haya yalikuwa na mpango kabambe wa siri wa kuishambulia Israel na kuifuta katika ramani ya dunia kila taifa lilijiandaa thabiti kuhakikisha kuwa watu wakiamka asubuhi hakuna Israel, Katika namna ya kushangaza Israel iliwapiga vikali sana jirani zake na kupata ushindi wa ajabu ulioifanya Israel kuongezeka kiramani mara dufu zaidi, Israel iliendesha oeperesheni iliyoitwa kwa kiingereza “Operation Focus”  na kuipiga vibaya Misri na kuiteka ghuba ya Sinai, Jodran ilipigwa vibaya na kuachilia ukanda wa Gaza, huku Syria ikipoteza Milima ya Golan pamoja na hayo Misri ilipoteza ndege vita zaidi ya 338 masaa ya mwanzo tu ya vita, Sryria ikipoteza ndege vita 73 na Jordani ndege 29 Iraq ambao nao walijiunga baadae kwa kusudi la kujihami walipoteza ndege 29 Israel ikaibuka mshindi wa vita ile huku ikiwa imeongeza mipaka yake yote ikiwa na udhibiti kamili wa maeneo hayo waliposhambuliwa zaidi walijiongeza! Unaona

Kwa nini nimetoa mfano huo mtu wa Mungu usiogope kadiri adui zako wanavyojaribu kukusumbua na kukuundia zengwe wewe utazidi kuongezeka na hofu kubwa itawakalia wao, wewe utaendelea kustawi kama Israel inavyostawi leo, hakuna mtu atakayeweza kusimama mbele yako siku zote za maisha yako, wanadamu wanaweza kupinga kusudi la Mungu lilioko ndani yako lakini kamwe hawawezi kuufikia mpango wa Mungu ulioko juu yako kwa sababu wewe umebarikiwa! Kadiri wanavyopigana na wewe ndivyo na wewe unavooongezeaka!

Isaya 54:14-17 “Utathibitika katika haki; utakuwa mbali na kuonewa, kwa maana hutaogopa; na mbali na hofu, kwa maana haitakukaribia. Tazama, yamkini watakusanyana; lakini si kwa shauri langu. Watu wo wote watakaokusanyana juu yako wataanguka kwa ajili yako. Tazama, nimemwumba mhunzi avukutaye moto wa makaa, akatoa silaha kwa kazi yake; nami nimemwumba mharibu ili aharibu. Kila silaha itakayofanyika juu yako haitafanikiwa na kila ulimi utakaoinuka juu yako katika hukumu utauhukumu kuwa mkosa. Huu ndio urithi wa watumishi wa Bwana, na haki yao inayotoka kwangu mimi, asema Bwana.”

Ayubu 42:1-2 “Ndipo Ayubu akamjibu Bwana, na kusema. Najua ya kuwa waweza kufanya mambo yote, Na ya kuwa makusudi yako hayawezi kuzuilika.”     

Adui zako watakapojaribu kukushambulia na hatimaye watagundua kuwa hauwezekaniki na kuwa mkono wa Bwana uko juu yako watakuogopa kwa sababu watabaini ya kuwa Bwana Mungu wako yuko pamoja nawe

1Samuel 18:12-16 “Sauli akamwogopa Daudi, kwa sababu Bwana alikuwa pamoja naye, ila amemwacha Sauli. Kwa ajili ya hayo Sauli akamwondosha kwake, akamfanya awe akida wake juu ya askari elfu; naye akatoka na kuingia mbele ya watu. Naye Daudi akatenda kwa busara katika njia zake zote naye Bwana alikuwa pamoja naye. Sauli alipoona ya kwamba alitenda kwa busara sana, yeye alimwogopa. Lakini Israeli wote na Yuda wakampenda Daudi; kwa kuwa alitoka na kuingia mbele yao.”

Kusudi la Mungu haliwezi kufutwa na wivu wa wanadamu

Ni muhimu kufahamu kuwa kusudi la Mungu ndani yako haliwezi kufutwa na wivu wa wanadamu, Farao alipanga njama za kila aina kujaribu kuwaangamiza Israel lakini kila alichokikusudia kilikuwa kinyume na hakikuweza kufanikiwa hii ni kwa sababu Mungu alikuwa pamoja nao, Mungu akiwa upande wako hakuna mtawala mwenye nguvu, wala mwenye mamlaka wala mwenye kijicheo chochote cha Dunia hii atakayeweza kuuzuia mpango Mungu dhidi yako, walimuuza Yusufu na bado akawa mtawala, walimfukuza Daudi na bado akawa mfalme, walimtupa Daniel shimoni lakini akatukuzwa, walimuua Yesu lakini alifufuka siku ya tatu na kaburi halikuweza kumshika wewe kama mwana wa Mungu na Mungu ana kusudi na wewe usiogope kwa sababu Mungu yuko na yu aweza kukusaidia

Kutoka 1:8-12. “Basi akainuka mfalme mpya kutawala Misri, asiyemjua Yusufu. Akawaambia watu wake, Angalieni, watu wa wana wa Israeli ni wengi tena wana nguvu kuliko sisi.Haya! Na tuwatendee kwa akili, wasije wakaongezeka; tena, ikitokea vita, wao nao wasije wakashikamana na adui zetu na kupigana nasi, na kutoka katika nchi hii. Basi wakaweka wasimamizi juu yao wawatese kwa mizigo yao. Nao wakamjengea Farao miji ya kuwekea akiba, Pithomu na Ramesesi. Lakini kwa kadiri ya walivyowatesa ndivyo walivyoongezeka na kuzidi kuenea. Nao walichukiwa kwa sababu ya wana wa Israeli.”

Kila mtu aliyeko katika nafasi yoyote hapa duniani anapaswa kukumbuka kuwa Mungu ndiye anayetawala hatupaswi kuwa na kiburi na majivuno au kutumia nafasi tulizo nazo kwaajili ya kuwakandamiza wengine, Farao alijifikiri kuwa yeye ndiye mwenye mamlaka na kwa sababu hiyo aliyatumia vibaya dhidi ya Israel, Mungu alikuja kumfutilia mbali katika bahari ya Shamu na historia yake imeandikwa lakini yeye na majeshi yake walifutika, Mungu hataaachilia watu wake waonelewe kamwe na kama mtu anatafuta kupotea aendelee kucheza na watu wanaomtegemea Bwana!

Zaburi 105:14-15 “Hakumwacha mtu awaonee, Hata wafalme aliwakemea kwa ajili yao. Akisema, Msiwaguse masihi wangu, Wala msiwadhuru nabii zangu.”

Kama unamtegemea Mungu na umemfanya Mungu kuwa kimbilio lako, umemfanya bwana kuwa ngao yako, Basi elewa na kukumbuka ya kuwa, hakuna uchawi, wala fitina, wala chuki, wala mateso, wala njama zinazoweza kumuangamiza mtu wa Mungu, au mtu ambaye Mungu ameweka mkono wake, changamoto na mateso tunayoyapitia hayamaanishi kuwa Mungu amewatupa watu wake, Neno la Mungu linaonyesha wazi kuwa Israel walikuwa katika mapenzi ya Mungu lakini walionelewa tu na Mungu alikuja kuingilia kati kwaajili ya utukufu wake, usiwagope wanaokunyanyasa kwa sababu historia yao itafutika upesi, changamoto unazozipitia haziwezi kamwe kufuta mpango wa Mungu, na kwa bahati mbaya sasa kadiri wanavyokutesa ndivyo unavyozidi kuongezeka ila wao hawajui, Farao alipopanga kuwapunguza Mungu alipanga kuwaongeza, Farao alipokusudia kuwadhoofisha Mungu alikusudia kuwatia nguvu, Farao alipodhani kuwa atawamaliza Mungu alikuwa anakusudia kuutimiza mpango wake kwa msingi huo kama unapitia dhiki yoyote ile leo usiogope ni njia ya Mungu ya kukuongeza katika ulimwengu wa roho, kupigana na mtu ambaye Mungu ameweka mkono wake au kumtesa au kumzushia, au kufanya hila  na njama zozote hakuwezi kumfanya Mungu mwenye haki asimtokee Kadiri walivyowatesa ndivyo walivyoongezeka!

Na. Rev. Innocent Samuel Kamote

Mkuu wa wajenzi mwenye Hekima