Kuondolewa kwa kinara cha Kanisa katika mahali pake!

Ufunuo 2:2-5 “Nayajua matendo yako, na taabu yako, na subira yako, na ya kuwa huwezi kuchukuliana na watu wabaya, tena umewajaribu wale wajiitao mitume, nao sio, ukawaona kuwa waongo; tena ulikuwa na subira na kuvumilia kwa ajili ya jina langu, wala hukuchoka. Lakini nina neno juu yako, ya kwamba umeuacha upendo wako wa kwanza. Basi, kumbuka ni wapi ulikoanguka; ukatubu, ukayafanye matendo ya kwanza. Lakini, usipofanya hivyo, naja kwako, NAMI NITAKIONDOA KINARA CHAKO KATIKA MAHALI PAKE, usipotubu.”

Utangulizi:

Mojawapo ya Kanisa ambalo lilikuwa na historia nzuri sana nyakati za Kanisa la kwanza pamoja na makanisa mengine lilikuwa ni Kanisa la Efeso, Kanisa hili lilikuwa ni kanisa la watu wenye bidii katika kazi ya Mungu, wavumilivu, waliokuwa na uwezo mkubwa wa kupima walimu (Mitume) wa uongo na kutokuchukuliana na watu wabaya, walikuwa na subira kwaajili ya Yesu Kristo na wala hawakuchoka, watu wa Efeso waliupokea wokovu kwa gharama kubwa na kwa upendo mkuu sana wakichoma vitabu vya uganga vya gharama kubwa sana kwa wakati huo vikikadiriwa kuwa na thamani ya vipande vya fedha 50,000. Sawa na shillingi za kitanzania zipatazo milioni 846 (845,908,525.00 TZS) katika tafasiri ya siku za leo. Kitendo kilichoonyesha toba ya kweli na upendo mkubwa kwa Yesu Kristo kwa hiyo lilikuwa ni kanisa lililojitoa kwa Mungu kwa moyo wote!

Matendo 19:18-20 “Na wengi wa wale walioamini wakaja wakaungama, wakidhihirisha matendo yao. Na watu wengi katika wale waliotumia mambo ya uganga wakakusanya vitabu vyao, wakavichoma moto mbele ya watu wote; wakafanya hesabu ya thamani yake, wakaona ya kwamba yapata fedha hamsini elfu. Hivyo ndivyo neno la Bwana lilivyozidi na kushinda kwa nguvu.”

Kitendo hiki kiliashiria upendo wa dhati kwa Mungu na kusababisha neno la Mungu kuenea kwa nguvu kubwa zaidi na imani hii iliheshimiwa na watu wengi kila mahali, kwani huu ulikuwa ni ushuda wa hadharani unaodhihirisha kuwa watu hawa waliamua kuwa kielelezo na nuru katika Asia, wakiacha ibada za sananu na miungu maarufu na kumgeukia Kristo. Hata hivyo pamoja na maswala kadhaa mema yaliyokuwako katika kanisa hili Yesu katika waraka wake kupitia kitabu cha Ufunuo analikemea kanisa hili kuwa limeuacha upendo wa Kwanza na kulitaka litubu lakini swala la kuogopesha zaidi ni kuwa Yesu analitahadharisha kanisa hili kuwa “nitakiondoa kinara chako katika mahali pake, usipotubu”, hili onyo linatupa kutafakari kwa kina sana nini maana ya kuondolewa kwa kinara cha kanisa katika mahali pake, kumbe basi kanisa linaweza kuwa na shughuli nyingi za kidini, wahubiri wengi, ibada nyingi, makongamano mengi, mipango mingi, na mafanikio mengi yanayoweza kuonekana kwa macho lakini tukapoteza kitu muhimu ambacho huenda Kristo anakitamani zaidi, tutajifunza somo hili Kuondolewa kwa kinara cha Kanisa katika mahali pake kwa kuzingatia vipengele muhimu vikuu vitatu vifuatavyo:-

·         Maana ya Kinara.

·         Kuondolewa kwa kinara cha Kanisa katika mahali pake.

·         Mambo ya kufanya ili kinara kisiondolewe.

Maana ya Kinara.

Ufunuo 2:4-5 “Lakini nina neno juu yako, ya kwamba umeuacha upendo wako wa kwanza. Basi, kumbuka ni wapi ulikoanguka; ukatubu, ukayafanye matendo ya kwanza. Lakini, usipofanya hivyo, naja kwako, nami NITAKIONDOA KINARA CHAKO katika mahali pake, usipotubu.”

Neno kinara linalotumika katika maandiko yetu ya msingi hapo katika lugha ya Kiyunani (Greek) linatumika neno “luchnia” ambalo kwa kiingereza ni “lampstand” kwa Kiswahili ni “kinara cha taa” Katika lugha ya Kiebrania kinara hicho kiliitwa “Menora” ambacho kimsingi kilitengenezwa kwa dhahabu yenye uzito wa Paund 75 kikiwa na umbile la mmea wa mlozi (Almond) huku kukiwa na matawi sita matatu upande huu na matatu upande huu na sehemu ya katikati hivyo kufanya kinara hicho kubeba taa saba, kifaa hiki kiliwekwa upande wa kusini mwa Hekalu katika eneo la patakatifu sehemu iliyokuwa ikihusisha makuhani katika kazi zao za kila siku ikikabiliana na meza ya mikate ya wonyesho kazi yake kubwa ilikuwa ni kuwapa makuhani mwanga wa kuendelea na shughuli zao za kiibada katika eneo hilo muhimu la Hekalu liitwalo patakatifu, kinara hiki taa zake ziliwaka kupitia mafuta ya mti wa mzeituni!

Kutoka 25:31-40 “Nawe fanya kinara cha taa cha dhahabu safi; hicho kinara na kifanywe cha kazi ya kufua, tako lake, na mti wake, vikombe vyake, na matovu yake, na maua yake, vyote vitakuwa vya kitu kimoja nacho; nacho kitakuwa na matawi sita yenye kutoka ubavuni mwake; matawi matatu ya kinara upande wake mmoja, na matawi matatu ya kinara upande wake wa pili vikombe vitatu vilivyofanywa mfano wa maua ya mlozi katika tawi moja; tovu na ua; na vikombe vitatu vilivyofanywa mfano wa maua ya mlozi katika tawi la pili, tovu na ua; vivyo hivyo hayo matawi yote sita yatokayo katika kile kinara; na katika hicho kinara vikombe vinne vilivyofanywa mfano wa maua ya mlozi, matovu yake, na maua yake; na tovu chini ya matawi mawili la kitu kimoja nacho, na tovu chini ya matawi mawili la kitu kimoja nacho, na tovu chini ya matawi mawili la kitu kimoja nacho, kwa hayo matawi sita yatokayo katika kile kinara. Matovu yake na matawi yake yatakuwa ya kitu kimoja nacho; kiwe chote pia kazi moja ya kufua, ya dhahabu safi. Nawe zifanye taa zake saba; nao wataziwasha hizo taa zake, zitoe nuru mbele yake. Na makoleo yake, na visahani vyake, vyote vitakuwa vya dhahabu safi. Kitafanywa cha talanta moja ya dhahabu safi, pamoja na vyombo hivi vyote. Nawe angalia ya kwamba uvifanye kama mfano wake, ulioonyeshwa mlimani.”

Kutoka 37:17-23 “Kisha akakifanya kile kinara cha taa cha dhahabu safi, akakifanya kile kinara cha taa cha kazi ya kufua, tako lake, na mti wake; vikombe vyake, na matovu yake, na maua yake, vyote vilikuwa vya kitu kimoja nacho, nacho kilikuwa na matawi sita yaliyotoka ubavuni mwake; matawi matatu ya kinara yalikuwa upande huu, na matawi matatu ya kinara yalikuwa upande huu; vikombe vitatu, vilivyofanywa mfano wa maua ya mlozi vilikuwa katika tawi moja, tovu na ua; na vikombe vitatu, vilivyofanywa mfano wa maua ya mlozi, katika tawi la pili, tovu na ua; yalikuwa ni vivyo hivyo yale matawi sita yaliyokuwa katika hicho kinara. Katika kinara mlikuwa na vikombe vinne, vilivyofanywa mfano wa maua ya mlozi, matovu yake na maua yake; kisha chini ya matawi mawili mlikuwa na tovu iliyokuwa ya kitu kimoja nacho, na chini ya matawi mawili mengine mlikuwa na tovu ya kitu kimoja nacho, tena chini ya matawi mawili hayo mengine mlikuwa na tovu ya kitu kimoja nacho; kwa ajili ya hayo matawi sita, yaliyotokana nacho. Hayo matovu yake na matawi yake yalikuwa ya kitu kimoja nacho; kinara hicho kizima chote pia ni kazi moja ya kufua ya dhahabu safi. Kisha akafanya taa zake saba, na makoleo yake, na visahani vyake, vya dhahabu safi.”

Zekaria 4:2-6 “Akaniuliza, Unaona nini? Nikasema, Nimeona, na tazama, kinara cha taa cha dhahabu tupu, nacho kina bakuli juu yake, na taa zake saba juu yake; tena iko mirija saba ya kuleta mafuta, kwa taa zote zilizo juu yake; na mizeituni miwili karibu yake, mmoja upande wa kuume walile bakuli, na mmoja upande wake wa kushoto. Nami nikajibu, nikamwambia yule malaika aliyesema nami, nikasema, Ee Bwana wangu, vitu hivi ni nini? Ndipo malaika aliyesema nami akajibu, akaniambia, Hujui vitu hivi ni nini? Nikasema, La, Bwana wangu. Akajibu akaniambia, akisema, Hili ndilo neno la Bwana kwa Zerubabeli, kusema, Si kwa uwezo, wala si kwa nguvu, bali ni kwa roho yangu, asema Bwana wa majeshi.”

Kinara hiki kimsingi ambacho kilijulikana pia kama taa yenye vinara saba katika agano la kale ilikuwa inawakilisha Nuru ambayo ilikuwa inaondoa giza lote katika patakatifu ili kuwasaidia makuhani kufanya wajibu wao wa ibada za upatanisho kati ya watu na Mungu, aidha taa hii ilikuwa inawakilisha Ustawi na ukuaji wa maisha ya watu wa Mungu na ndio maana iliundwa ikifanana na mti wa mlozi, lakini pia ilikuwa ikiwakilisha kuchanua au kufufuka  zaidi ya yote  taa hii ilikuwa inawakilisha uwepo wa Roho Mtakatifu ambaye alikuwa akimiminika kila siku na kusababisha uhai na uwepo wa nuru katika maisha na ustawi wa watu wake, lakini katika maono ya Yohana taa hii ilikuwa inawakilisha makanisa saba yaliyokuwa katika Asia ndogo yakiwakilisha uwepo wa Mungu duniani, kanisa ni nuru ya ulimwengu ndio ujumbe mahususi uliokuwa unatolewa na kinara hiki na kama kikiondolewa maana yake kutakuwa na giza kuu!

Ufunuo 1:19-20 “Basi, uyaandike mambo hayo uliyoyaona, nayo yaliyopo, na yale yatakayokuwa baada ya hayo. Siri ya zile nyota saba ulizoziona katika mkono wangu wa kuume, na ya vile vinara saba vya dhahabu. Zile nyota saba ni malaika wa yale makanisa saba; na vile vinara saba ni makanisa saba.”

Kwa msingi huo tunapozungumzia maana ya kinara, tunazungumzia wajibu mzima wa kanisa, katika kuondoa giza duniani, katika kuifanya kazi ya ukuhani na upatanisho kwa watu na Mungu, kazi ya kanisa ni kusimamia ustawi wa jamii kimwili, na kiroho na kisaikolojia, ukuaji wa watu wa Mungu, uwepo wa Roho Mtakatifu na ustawi wa kiroho wa watu wa Mungu na uwezo au nguvu ya kanisa kuwaondoa watu katika giza na kuwaleta katika nuru, unaona?

Kuondolewa kwa kinara cha Kanisa katika mahali pake.

Katika waraka wake kwa Kanisa Yesu Kristo mwenyewe aliliandikia Barua Kanisa la Efeso kupitia Mtume Yohana katika kitabu cha ufunuo akiwa na uelewa kamili wa mambo yote mazuri yaliyokuwa yakifanywa na kanisa hilo, lakini vile vile alilionya kanisa hilo kuwa limeuacha upendo wa kwanza na kuwaonya kuwa endapo hawatatubu atakiondoa kinara cha kanisa hilo mahali pake, Kanisa hili lilikuwa na mambo mengi mazuri, na Yesu aliyatambua hayo yote lakini kulikuwa na onyo kali NITAKIONDOA KINARA CHAKO MAHALI PAKE kama usipotubu!

Ufunuo 2:1-6 “Kwa malaika wa kanisa lililoko Efeso andika; Haya ndiyo anenayo yeye azishikaye hizo nyota saba katika mkono wake wa kuume, yeye aendaye katikati ya vile vinara saba vya dhahabu. Nayajua matendo yako, na taabu yako, na subira yako, na ya kuwa huwezi kuchukuliana na watu wabaya, tena umewajaribu wale wajiitao mitume, nao sio, ukawaona kuwa waongo; tena ulikuwa na subira na kuvumilia kwa ajili ya jina langu, wala hukuchoka. Lakini nina neno juu yako, ya kwamba umeuacha upendo wako wa kwanza. Basi, kumbuka ni wapi ulikoanguka; ukatubu, ukayafanye matendo ya kwanza. Lakini, usipofanya hivyo, naja kwako, nami nitakiondoa kinara chako katika mahali pake, usipotubu, Lakini unalo neno hili, kwamba wayachukia matendo ya Wanikolai, ambayo na mimi nayachukia.”

Mji wa Efeso ulikuwa ni mji mkubwa na wenye bandari, ujenzi na maendeleo makubwa sana katika Uturuki (Turkey) ya kale, mji huu kwa sasa umehifadhiwa kama mjawapo ya miji ya kale ambayo ni urithi wa dunia na shirika la kimataifa liitwalo UNESCO, mji huu uko magharibi ya Uturuki zamani Ugiriki, ulikuwa ni moja ya miji mikubwa ya kale na mji uliokuwa na Ukristo wenye nguvu wakati wa utawala wa Kirumi.

Kabla ya wokovu katika mji huu, ulikuwa ni mji uliogubikwa na ibada za sanamu, miungu ya kipagani, dini za kienyeji Aminism na Hekalu kubwa la mungu mke aliyejulikana kama Artemis, au Diana, Hekalu hilo kubwa lilivunja rekodi za kiujenzi na maajabu na kuingizwa katika rekodi ya maajabu saba ya kale ya dunia, Atemi alikuwa ni mungu wa maswala ya uzazi, kwa hiyo alikuwa ni mungu mke “goddess” na wafua vyuma wa Efeso waliyeyusha vyuma na kutengeneza sanamu ndogo ndogo za Artemis na kuziuza na kupata faida kubwa sana, Injili ilipoingia jamaa hawa walipata hasara kwani watu walimgeukia Mungu aliye hai na sananu zikakosa biashara, uganga na uchawi ukapoteza soko. Miji ikapunduliwa na mageuzi makubwa na mioyo ya watu kuacha ibada za miungu na kumgeukiza Yesu Kristo!

Matendo 19:33-38 “Wakamtoa Iskanda katika mkutano, Wayahudi wakimweka mbele ya watu. Iskanda akawapungia mkono, akitaka kujitetea mbele ya wale watu. Lakini walipotambua ya kuwa yeye ni Myahudi, wakapiga kelele wote pia kwa sauti moja kwa muda wa kama saa mbili, wakisema, Artemi wa Waefeso ni mkuu. Na karani wa mji alipokwisha kuwatuliza watu, akasema, Enyi wanaume wa Efeso, ni mtu gani asiyejua ya kuwa mji wa Efeso ni mtunzaji wa hekalu la Artemi, aliye mkuu, na wa kitu kile kilichoanguka kutoka mbinguni? Basi kwa kuwa mambo haya hayawezi kukanushwa, imewapasa kutulia; msifanye neno la haraka haraka. Kwa maana mmewaleta watu hawa, wasioiba vitu vya hekalu wala kumtukana mungu mke wetu. Basi ikiwa Demetrio na mafundi walio pamoja naye wana neno juu ya mtu, baraza ziko, na maliwali wako; na washitakiane.”

Kanisa katika mji wa Efeso lilianzishwa na Paulo katika safari yake ya tatu ya kitume na watu wengi waliokolewa na kumpokea Yesu huku wakidhihirisha matendo yao kwa kuchoma vitabu vyao vya uganga (uchawi) na kukubali mabadiliko.

Matendo 19:18-20 “Na wengi wa wale walioamini wakaja wakaungama, wakidhihirisha matendo yao. Na watu wengi katika wale waliotumia mambo ya uganga wakakusanya vitabu vyao, wakavichoma moto mbele ya watu wote; wakafanya hesabu ya thamani yake, wakaona ya kwamba yapata fedha hamsini elfu. Hivyo ndivyo neno la Bwana lilivyozidi na kushinda kwa nguvu.”

Paulo mtume alikaa Efeso kwa karibu miaka mitatu akiifanya kazi kubwa sana ya kuwafundisha na kuwaimarisha na kuwaonya kuwa utakuja wakati ambapo mbwa mwitu wakali wataingia na hawatakuwa na huruma dhidi ya Kanisa!

Matendo 20:28-31. “Jitunzeni nafsi zenu, na lile kundi lote nalo, ambalo Roho Mtakatifu amewaweka ninyi kuwa waangalizi ndani yake, mpate kulilisha kanisa lake Mungu, alilolinunua kwa damu yake mwenyewe. Najua mimi ya kuwa baada ya kuondoka kwangu mbwa-mwitu wakali wataingia kwenu, wasilihurumie kundi; tena katika ninyi wenyewe watainuka watu wakisema mapotovu, wawavute hao wanafunzi wawaandamie wao. Kwa hiyo kesheni, mkikumbuka ya kwamba miaka mitatu, usiku na mchana, sikuacha kumwonya kila mtu kwa machozi.”

Baadaye Kanisa hili alilisimamia Timotheo ili kukemea mafundisho potofu yaliyoletwa na baadhi ya waamini tofauti na injili halisi iliyokuwa imehubiriwa na kufundishwa na Paulo Mtume Hivyo Timotheo alitumwa kwa kusudi la kulichunga na kulitunza Kanisa hilo zuri la Efeso. Kwa hiyo unaweza kupata picha kuwa lilikuwa, Kanisa imara kiimani

 

1Timotheo.1:1-3. “Paulo, mtume wa Kristo Yesu, kwa amri ya Mungu Mwokozi wetu na Kristo Yesu, taraja letu; kwa Timotheo, mwanangu hasa katika imani. Neema na iwe kwako, na rehema, na amani, zitokazo kwa Mungu Baba na kwa Kristo Yesu Bwana wetu. Kama vile nilivyokusihi ukae Efeso, nilipokuwa nikisafiri kwenda Makedonia, ili uwakataze wengine wasifundishe elimu nyingine;”

 

Kwa ujumla lilikuwa ni Kanisa zuri, Yesu analisifia kuwa walikuwa na bidii, walikuwa wavumilivu, hawakuvumilia uovu, walikemea dhambi, walikuwa na uwezo wa kuwajaribu wao waliojiita kuwa mitume kwa hiyo kulikuwa na uwezo mkubwa wa kupambanua mafundisho ya kweli na potofu, hawakuchukuliana na mafundisho ya Wanikolao ambao waliamini kuwa Mwanamke ni kwaajili ya jamii na sio mali  ya mtu binafsi “Woman is For social not Personal” Pia Wanikolai walifundisha kuwa mtu anaweza kuwa ameokoka lakini akashiriki maswala na maisha yote ya kipagani na hata ibada za miungu bila shida, walifundisha kuwa zinaa na uasherati hauathiri maswala ya kiroho, Yesu alionyesha kuchukizwa na fundisho hilo lisilozingatia usafi na Kanisa la Efeso pia walilikataa fundisho hilo,

 

Ufunuo 2:14-16 “Lakini ninayo maneno machache juu yako, kwa kuwa unao huko watu washikao mafundisho ya Balaamu, yeye aliyemfundisha Balaki atie ukwazo mbele ya Waisraeli, kwamba wavile vitu vilivyotolewa sadaka kwa sanamu, na kuzini. Vivyo hivyo wewe nawe unao watu wayashikao mafundisho ya Wanikolai vile vile. Basi tubu; na usipotubu, naja kwako upesi, nami nitafanya vita juu yao kwa huo upanga wa kinywa changu.”

 

Efeso lilikuwa ni Kanisa lenye subira hawakuchoka katika kusubiri kurudi kwa Kristo huku wakijiandaa na kuwa tayari, kwa hiyo lilikuwa ni Kanisa lililoonyesha kumpenda Mungu sana huku wakisubiria kurudi kwa Yesu  

 

Historia ya Kanisa inaonyesha kuwa baadae Mtume Yohana aliishi katika mji huu na ndiko alikoandika injili yake ijulikanayo kama injili ya Yohana na aliishi na Mariamu mama yake Yesu maili chache kiasi na ambako ndiko kulikuwa makazi yake ya mwisho.              

 

Waefeso waliipokea Injili kwa nguvu kubwa na kwa upendo mkubwa sana, waliihubiri injili kwa watu wote, walihakikisha kuwa watu wote wanaokolewa, walijitoa katika maombi, walijitoa katika mafundisho, walikuwa wakarimu na watu waliosaidiana na kupitia wao ushuhuda wa Kristo ulienea sana Efeso ulikuwa nuru ya Asia ndogo kwa wakati ule na kwa kweli ushuhuda wao ulikuwa wa msingi na wa muhimu ni Kanisa la Kwanza kutajwa na Yesu katika waraka wake.

 

Yesu analionya Kanisa hili kuwa walikuwa wameuacha upendo wa Kwanza, maana yake ile nguvu ya upendo wa ndani (zeal) waliyokuwa wameanza nayo, kule kujitoa na ule upendo na bidii waliyokuwa nayo katika kumpenda Yesu ilikuwa imetoweka na wameanza kupoa maswala mengi sasa yalianza kufanyika kama mazoea na taratibu za kawaida na wala haikuwa kutoka moyoni, mambo yalikuwa yanaendeshwa kitaasisi tu na katika hali ya kawaida ya taratibu za kawaida. Kanisa hili lilianzishwa kati ya mwaka 53-56 Baada ya Kristo na waraka wa Yesu kutoka kitabu cha Ufunuo uliandikwa kati ya mwaka wa 95-96 Baada ya Kristo kwa hiyo ni kati ya miaka 40-43 tayari kanisa hili lilianza kupoteza ladha yake na kile walichokuwa wamekipokea mimi sijui kanisa lako lina miaka mingapi? Unaweza kuchungulia historia ya kanisa lako na ukapata picha kuwa je ule moto, ile nuru, ule uwepo, ile kiu na ule uwakilishi na ule ushawishi wa kanisa hapa duniani kama kinara bado unaendelea kuwepo? Si kanisa lako tu je wewe mwenyewe na mimi pia tuna muda gani katika wokovu na katika huduma ulikuwaje miaka kadhaa iliyopita na sasa ukoje? Muulize jirani yako hapo KINARA bado kipo? Au kimeondolewa? Ni jambo la kusikitisha kuwa eneo hili la Efeso leo sasa hakuna Ukristo ni eneo linalotawaliwa na Uislamu katika nchi ya Uturuki, kila mahali imekuwa misikiti, mpaka kwenye viwanja vya ndege, Waturuki wa leo hawa tunaweza kusema ni wajukuu wa waliokuwa wakristo zamani! tukipoa, tukiuacha upendo wa kwanza tukibaki na desturi za kawaida tu za kidini nataka nikuhakikishie kuwa Yesu atatuacha gizani, ataondoa mafuta, ataondoa ukuaji, ataondoa ukomavu, ataondoa Baraka zake kwa kanisa na giza kubwa litaingia, lakini sio hivyo tu atainua wengine watakaojali, kwa sababu yeye kusudi lake ni lazima litimie, Yesu alikuwa hatanii alikuwa akitoa maonyo halisi ambayo yanaweza kulihusu kanisa la leo, chuja kweli, acha kukemea dhambi, acha desturi za kawaida ziendelee katika kanisa, kinara kitaondolewa na tutapoteza ushawishi katika jamii na dini za uongo zitachukua nafasi, Kanisa ni lazima tujitathimini kila mmoja wetu ajitathimini na kuchukua hatua kwani kama tusipotubu kinara kitaondolewa mahali pake, ujumbe huu wa toba ni kwa kanisa la kila mahali na ni ujumbe kwa kila mtu, Kanisa likiacha kuwaambia watu ukweli, Mungu atatuacha na atatafuta njia nyingine mbadala na kusudi lake litaendelea nimeshuhudia kwa macho yangu Mungu akiyaacha baadhi ya makanisa  na Mungu akiwaacha wachungaji kwa sababu watu hawataki mabadiliko na wanataka kung’angami mapokeo yao, Yesu anajua ni wapi alipokutoa na anajua ni njia gani unapaswa kutembea nayo na anajua wapi tumepungua ni wakati wa toba kwa kila mmoja kila mahali ambapo tumepungua tunapaswa kufanya marekebisho haraka, liko wapi leo kanisa la Ulaya, liko wapi leo Kanisa la Marekani?, iko wapi leo Ufaransa nchi iliyokuwa na ushawishi mkubwa kutokana na misimamo ya Kikristo, Yesu ni mkali sana linapokuja swala la Kanisa lake ni lazima tusimame imara!

 

Ufunuo 2:2-5 “Nayajua matendo yako, na taabu yako, na subira yako, na ya kuwa huwezi kuchukuliana na watu wabaya, tena umewajaribu wale wajiitao mitume, nao sio, ukawaona kuwa waongo; tena ulikuwa na subira na kuvumilia kwa ajili ya jina langu, wala hukuchoka. Lakini nina neno juu yako, ya kwamba umeuacha upendo wako wa kwanza. Basi, kumbuka ni wapi ulikoanguka; ukatubu, ukayafanye matendo ya kwanza. Lakini, usipofanya hivyo, naja kwako, nami nitakiondoa kinara chako katika mahali pake, usipotubu.”

Hatupaswi kuvumilia mafundisho ya uongo, hatupaswi kupoa, hatupaswi kuacha kuitetea imani, hatupaswi kuvumilia uasherati, hatupaswi kuwa na jina la uhai huku tumekufa, hatupaswi kujivunia dhehebu letu na kuacha kujivunia Yesu Kristo, hatupaswi kuliozea neno, hatupaswi kulipua lipua ibada wala maandalizi yake, hatupaswi kuwa vuguvugu, hatupaswi kujidhani ya kuwa sisi ni matajiri na kuacha kumtegemea Mungu kumbe kiroho ni masikini, hatupaswi kuacha upendo wa Kwanza maonyo haya yote ambayo Yesu alilionya Kanisa yanaweza kusababisha kinara kiondolewe kama hatutazingatia; Bwana atupe neema kinara kisiondolewe mahali pake katika jina la Yesu Kristo!

Mambo ya kufanya ili kinara kisiondolewe.

Kimsingi Yesu hakuwa anazungumza na Kanisa la Efeso pekee, onyo kwa kanisa la Efeso na mengineyo ni kwa kila mmoja wetu na ni ujumbe kwaajili ya kizazi chetu kwa hiyo kila mmoja wetu hana budi kujiuliza kama anavyompenda Kristo leo ndio namna ile ile alivyokuwa anampenda zamani, je unahuzunika kiasi gani leo watu wanapopotea bila wokovu, je unahuzunika kiasi gani leo watu wanaporudi nyuma, je unawapa vyeo watu kwa sababu ya hali ya kiroho au kwa sababu ya fedha, je tunaishi maisha matakatifu leo au tumepoa, je huduma zetu zinatokana na upendo au kwaajili ya kulinda maslahi yetu, Je Kristo anapendezwa na maisha yetu na Kanisa letu? Tunajivunia Kristo au historia yetu? Tunajivunia majengo huku tumempoteza Kristo? Tunajivunia idadi huku tumeacha upendo wa kwanza, tuna shughuli nyingi kuliko kuutafuta uwepo wa Mungu; Mungu hajafunga mlango, analitaka kanisa ligeuke na kutubu lirudie matendo yake ya Kwanza vinginevyo kinara kitaondolewa ni jambo la kusikitisha kama tutakuwa na Historia nzuri mbele ya wanadamu lakini Kristo akapoteza nafasi yake katika mioyo yetu, Kanisa lisipimwe tu kwa ukubwa wa idadi ya watu lakini lipimwe kwa ukuaji wa upendo wa Mungu na kiu ya watu kuishi maisha matakatifu, ukomavu wa kiroho na kuzaa matunda ya roho, Kanisa lisipimwe kwa mafanikio ya vitu vya nje tu japo tunavihitaji, lakini lipimwe kwa nuru inayowaangazia wasio na matumaini, kanisa lisipimwe kwa wingi wa shughuli lakini lipimwe kwa wingi wa wale wanaoketi miguuni pa Yesu na kumsikiliza na kuyatendea Kazi yote aliyotuagiza. Tukifanya hayo na kuyazingatia Kinara cha kanisa letu hakitaondolewa mahali pake na tutaendelea kuwa Nuru ya ulimwengu! 

Ufunuo 2:1-6 “Kwa malaika wa kanisa lililoko Efeso andika; Haya ndiyo anenayo yeye azishikaye hizo nyota saba katika mkono wake wa kuume, yeye aendaye katikati ya vile vinara saba vya dhahabu. Nayajua matendo yako, na taabu yako, na subira yako, na ya kuwa huwezi kuchukuliana na watu wabaya, tena umewajaribu wale wajiitao mitume, nao sio, ukawaona kuwa waongo; tena ulikuwa na subira na kuvumilia kwa ajili ya jina langu, wala hukuchoka. Lakini nina neno juu yako, ya kwamba umeuacha upendo wako wa kwanza. Basi, kumbuka ni wapi ulikoanguka; ukatubu, ukayafanye matendo ya kwanza. Lakini, usipofanya hivyo, naja kwako, nami nitakiondoa kinara chako katika mahali pake, usipotubu, Lakini unalo neno hili, kwamba wayachukia matendo ya Wanikolai, ambayo na mimi nayachukia.”

 

Na. Rev. Innocent Samuel Kamote

Mkuu wa wajenzi mwenye Hekima

Katika waovu hutoka uovu!

1Samuel 24:9-13 “Daudi akamwambia Sauli, Kwa nini unasikiliza maneno ya watu wasemao, Tazama, Daudi anataka kukudhuru? Tazama, leo hivi macho yako yameona jinsi Bwana alivyokutia mikononi mwangu pangoni, na watu wengine wakaniambia nikuue; lakini nikakuacha; nikasema, Sitaki kuunyosha mkono wangu juu ya bwana wangu; kwa maana yeye ni masihi wa BWANA.Tena, baba yangu, tazama, tafadhali, tazama upindo wa vazi lako mkononi mwangu; maana ikiwa nimeukata upindo wa vazi lako, nisikuue, ujue, na kuona ya kuwa hakuna uovu wala kosa mkononi mwangu, wala sikukukosa neno; ingawa wewe unaniwinda roho yangu ili kuikamata. Bwana atuamue, mimi na wewe, na Bwana anilipizie kisasi changu kwako; lakini mkono wangu hautakuwa juu yako. Kama vile walivyosema watu wa kale katika mithali yao, Katika waovu hutoka uovu; ila mkono wangu hautakuwa juu yako.”

 

Utangulizi:

 

Wote tunakuwa tunakumbuka jinsi ambavyo Sauli alikuwa anamfuatilia sana Daudi akiwa na majemadari zaidi ya 1000 makomandoo walioteuliwa ili ikiwezekana aweze kumuangamiza hata ingawa Daudi hakuwahi kumkosea kitu Sauli

 

1Samuel 24:1-2 “Ikawa, Sauli aliporudi baada ya kuwafuatia Wafilisti, aliambiwa ya kwamba, Daudi yuko katika nyika ya Engedi. Ndipo Sauli akatwaa watu elfu waliochaguliwa katika Israeli wote, akaenda kumtafuta Daudi na watu wake juu ya majabali ya mbuzi-mwitu.”

 

Wakati majeshi ya Sauli na Sauli mwenyewe wanaelekea huko Engedi kumtafuta Daudi, Sauli aliingia  katika pango mojawapo peke yake na Daudi alikuwako katika Pango lile pamoja na watu wake na akawa ana nafasi ya kumuua, watu wake Daudi walimshawishi na kumtia moyo Daudi ammalize Sauli  na inaonekana wazi kuwa huenda kulikuwa na neno la kinabii kwa Daudi kuwa siku mmoja Bwana atamtia adui yake chini ya mikono yake na anaweza kumfanya kama atakavyo, Hata hivyo Daudi alikataa kufanya jambo hilo na badala yake aliukata upindo tu wa vazi la Sauli na hata kwa tendo hilo moyo wake ulimshitaki.

 

1Samuel 24:3-7 “Akafika penye mazizi ya kondoo kando ya njia, na huko kulikuwa na pango; Sauli akaingia ndani ili kuifunika miguu. Na Daudi na watu wake walikuwa wakikaa mle pangoni ndani sana. Nao watu wa Daudi wakamwambia, Tazama, hii ndiyo siku ile aliyokuambia Bwana, Angalia, nitamtia adui yako mikononi mwako, nawe utamtenda yo yote utakayoona kuwa mema. Basi Daudi akainuka, akaukata upindo wa vazi lake Sauli kwa siri.Lakini halafu, moyo wake Daudi ukamchoma, kwa sababu amekata upindo wa vazi lake Sauli. Akawaambia watu wake, Hasha! Nisimtendee bwana wangu, masihi wa BWANA, neon hili, kuunyosha mkono wangu juu yake,kwa maana yeye ni masihi wa BWANA. Basi Daudi akawazuia watu wake kwa maneno hayo, asiwaache kumwondokea Sauli. Kisha Sauli akatoka pangoni, akaenda zake.”

 

Baadaye Daudi akasimama mbali na kumuita Baba yangu akamwonyesha pindo hilo kama ushahidi kwamba hakuwa na nia ya kumuua kama jinsi alivyokua anafikiri au watu wanavyomdanganya na kisha akampa somo kutoka katika mithali ya wazee isemayo Katika waovu hutoka uovu! Na hili ndilo somo tunalojifunza leo, tutajifunza somo hili Katika waovu hutoka uovu kwa kuzingatia vipengele vikuu vitatu vifuatavyo:-

 

·         Maana ya maneno Katika waovu hutoka uovu!

·         Mifano ya watu waliofanya uovu na kupata uovu

·         Katika waovu hutoka uovu!

 

Maana ya maneno Katika waovu hutoka uovu!

 

Maneno katika waovu hutoka uovu yanatokana na mithali ya wazee wa Kiebrania ambayo inasomeka “Mershaim yetse resha” ambayo kwa kiingereza “Out of the wicked comes wickedness” kwa Kiswahili Katika waovu hutoka uovu, yakimaanisha kuwa matendo mabaya yanatoka kwa wabaya wenyewe, au mtu anayekusudia mabaya atapatwa na mabaya yeye mwenyewe, kwa hiyo maana yake mtu awaye yote mwenye nia ya kumdhuru mtu mwenye haki atadhurika mwenyewe, ni Kama wazee walikuwa wanasema kuwa atendaye uovu ataangamia kwa uovu wake mwenyewe, Kauli hii pia ina pande kuu nne zinazoshikamana ambazo zote zinatufundisha kitu kinafanana

 

-          Kimjazacho mtu ndicho kimtokacho, Kile kilichojaa katika moyo wa mtu ndicho kinachojitokeza katika maneno na matendo, ni kama Daudi alikuwa anamwambia Sauli kuwa kama mimi ningekuwa mwovu ungekuwa umekwishakufa leo, kwa kuwa sina uovu moyoni mwangu na ndio maana sikuweza kukufanyia maovu, Yesu alifundisha kuwa mtu mwovu katika hazina mbovu ya moyo hutoa yaliyo maovu

 

Luka 6:44-45. “kwa kuwa kila mti hutambulikana kwa matunda yake; maana, katika miiba hawachumi tini, wala katika michongoma hawachumi zabibu. Mtu mwema katika hazina njema ya moyo wake hutoa yaliyo mema, na mtu mwovu katika hazina mbovu ya moyo wake hutoa yaliyo maovu; kwa kuwa mtu, kinywa chake hunena yale yaujazayo moyo wake.”

 

-          Kila anayechimba shimo atatumbukia mwenyewe, Usemi huu naonyesha kuwa unapoandaa njama au mpango wa kumfanyia ndugu yako jambo baya unatengeneza sumu kwenye mikono yako mwenyewe, ambayo mwishoni itakugusa wewe mwenyewe, maandiko yanaonyesha hivyo na shuhuda za kibiblia zinaonyesha kuwa watu wengi ambao walikuwa wakiwaandalia wenzao au waliowafanyia wenzao mambo mabaya walipatwa na mabaya pia

 

Mithali 26:26-27 “Ingawa chuki hufunikizwa kwa hila; Uovu wake utadhihirika mbele ya kusanyiko. Achimbaye shimo atatumbukia mwenyewe; Naye abingirishaye jiwe litamrudia.”

 

Zaburi 7:14-16 “Tazama, huyu ana utungu wa uovu, Amechukua mimba ya madhara, amezaa uongo. Amechimba shimo, amelichimba chini sana, Akatumbukia katika handaki aliyoifanya! Madhara yake yatamrejea kichwani pake, Na dhuluma yake itamshukia utosini.”               

 

-          Yeye aushikaye upanga ataangamia kwa upanga, Usemi unamaanisha pia watu wanaotegema njia za uasi nguvu au za kikatili kutatua changamoto au wanaojipatia mamlaka au madaraka kwa nguvu wataangamia kwa jinsi ile ile ya nguvu uasi na ukatili, Daudi hakutaka kuingia madarakani kwa njia ya kumwaga damu au kuua mtu mwingine kama Mungu amempaka mafuta basi yeye mwenyewe ndiye atakayemuweka madarakani, lakini vile vile kile anachikifanya Sauli kutaka kumzima kwa kutumia upanga basi kitamrudia mwenyewe kwani naye atazimwa na upanga wa watu wengine Japokuwa usemi huu ulitamkwa na Yesu lakini unamfanano mkubwa na kile tunachojifunza hapa kuwa katika waovu hutoka uovu!

 

Mathayo 26:51-52 “Na tazama, mmoja wao waliokuwa pamoja na Yesu akanyosha mkono wake, akaufuta upanga wake, akampiga mtumwa wa Kuhani Mkuu, akamkata sikio. Ndipo Yesu akamwambia, Rudisha upanga wako mahali pake, maana wote waushikao upanga, wataangamia kwa upanga.”

 

1Samuel 31:1-6 “Basi Wafilisti wakapigana na Israeli; nao watu wa Israeli wakakimbia mbele ya Wafilisti, wakaanguka wameuawa katika mlima wa Gilboa. Wafilisti wakamfuatia sana Sauli na wanawe, Wafilisti wakawaua Yonathani, na Abinadabu, na Malkishua, wana wa Sauli. Tena vita vilikuwa vikali sana juu ya Sauli, na wapiga upinde wakampata; hata akafadhaika sana kwa sababu ya wapiga upinde. Ndipo Sauli akamwambia yule mchukua silaha zake, Futa upanga wako, unichome nao; wasije watu hawa wasiotahiriwa wakanichoma, na kunisimanga. Lakini huyo mchukua silaha zake akakataa; kwa sababu aliogopa sana. Basi Sauli akautwaa upanga wake, akauangukia. Na mchukua silaha zake alipoona ya kuwa Sauli amekufa, yeye naye akauangukia upanga wake, akafa pamoja naye. Hivyo Sauli akafa, na wanawe watatu, na mchukua silaha zake, na watu wake wote pamoja siku iyo hiyo.”           

       

-          Ogopa mtu anayesema anamwachia Mungu – Daudi hakukubali ushauri wa watu wala unabii uliomhakikishia kuwa iko siku Bwana atamtia adui yako mikononi mwako nawe utamtenda uonalo jema badala yake alisema Bwana na ahukumu kati yangu na yako lakini mkono wangu hautakuwa juu yako, aliomba Mungu amlipie kisasi, kwa hiyo usemi katika waovu hutoka uovu maana yake kwa kuwa Mungu ni Mungu wa haki ukimkabidhi yeye njama na nia za watu waovu na kumwachia basi hukumu ya Mungu ni tamu zaidi ya hukumu ya kibinadamu

 

1Samuel 24:12-15 “Bwana atuamue, mimi na wewe, na Bwana anilipizie kisasi changu kwako; lakini mkono wangu hautakuwa juu yako. Kama vile walivyosema watu wa kale katika mithali yao, Katika waovu hutoka uovu; ila mkono wangu hautakuwa juu yako. Na mfalme wa Israeli ametoka ili kumfuatia nani? Unamwinda nani? Ni kuwinda mbwa mfu, au kiroboto. Basi Bwana atuamue, akatuhukumu mimi na wewe, akaone, akanitetee neno langu, akaniokoe na mkono wako.”

 

Mifano ya watu waliofanya uovu na kupata uovu

 

Biblia imejaa mifano ya watu kadhaa ambao historia ya maandiko inaonyesha kuwa walikuwa wakatili na watu waliofanyia wengine mabaya au kuwalipa mabaya badala ya mema, maandiko yanaonyesha jeuri zao na mwisho wao namna ulivyokuwa, walijisahahu na kufanya maovu na maovu hayo yakawarudia mifano hii inatuthibitishia kweli katika wawovu hutoka uovu na sisi tusiwaige, wala tusijaribu kuwatendea watu wengine uovu yasije yakatukuta:-

 

Nabali – Daudi na timu yake walimtendea wema walipokuwa nyikani na wachungaji wa Nabali, Mtu huyu alikuwa tajiri sana Daudi na timu yake waliwahakikishia usalama walipokuwa nyikani, waliwalinda wachungaji wake dhidi ya uonevu na mifugo yao na huenda taarifa zilimfikia mzee huyu, hata hivyo siku moja wakati Daudi akiwa na shida aliagiza kuomba mikate yeye na timu yake waliokuwa nyikani na kumkumbusha Nabali wema wote waliomtendea mtu huyu hata hivyo kwa ujeuri alijifanya hatambui mchango wowote wa Daudi wala hamjui hata Daudi mwenyewe

 

1Samuel 25:4-11 “Basi Daudi akasikia huko nyikani ya kuwa Nabali alikuwa katika kuwakata manyoya kondoo zake. Daudi akatuma vijana kumi, Daudi naye akawaambia hao vijana, Kweeni mwende Karmeli, na kumwendea huyu Nabali ili mnisalimie; na hivi ndivyo mtakavyomwambia huyu aishiye salama, Amani na iwe kwako, na amani nyumbani mwako, na amani kwao wote ulio nao. Nami sasa nimesikia ya kuwa una watu wanaokata manyoya kondoo zako; haya! Wachungaji wako wamekuwa pamoja nasi, wala hatukuwadhuru, wala hawakukosa kitu wakati wote walipokuwako huko Karmeli. Waulize vijana wako, nao watakuambia; basi na wakubaliwe vijana hawa machoni pako; maana tumekujia katika siku ya heri; uwape, nakusihi, cho chote kitakachokujia mkononi, uwape watumwa wako na mwanao Daudi. Basi walipofika vijana wake Daudi, wakamwambia Nabali sawasawa na maneno hayo yote kwa jina la Daudi, kisha wakanyamaza. Naye Nabali akawajibu wale watumishi wa Daudi, akasema, Huyu Daudi ni nani? Na mwana wa Yese ni nani? Siku hizi kuna watumwa wengi wanaomtoroka kila mtu bwana wake! Basi mimi je! Nitwae mkate wangu, na maji yangu, na machinjo yangu niliyowachinjia hao watu wangu wakatao manyoya kondoo zangu, na kuwapa watu ambao siwajui wametoka wapi?”

               

1Samuel 25:36-38 “Kisha Abigaili alimjia Nabali; na tazama, alikuwa amefanya karamu nyumbani mwake, kama karamu ya kifalme; na moyo wake huyo Nabali ukafurahiwa ndani yake, kwa maana amelewa kabisa. Kwa sababu hiyo hakumwambia neno, dogo wala kubwa, hata kulipopambazuka. Ikawa asubuhi, divai ilipokuwa imemtoka Nabali, mkewe alimwambia mambo hayo, na moyo wake ukafa ndani yake, akawa kama jiwe. Tena ikawa, yapata siku kumi baadaye, Bwana alimpiga huyo Nabali, hata akafa.”

 

Adoni-Bezeki – Alikuwa mfalme katili sana mara kadhaa alipokuwa akipigana na wafalme wa mataifa mengine akiwakamata wafalme wale na alikuwa akiwakata vidole gumba huu ndio ulikuwa mfumo wake wa mateso na ukatili na jumla ya wafalme aliowahi kuwakata vidole gumba wanafikia 70, ukataji wa dole gumba ilikuwa njia ya kikatili sana ya zamani ya kumpunguzia mtu uwezo wa kufanya kazi zozote za kijeshi kwa sababu asilimia 50% ya utendaji wa mkono hutegema kidole gumba kwa hiyo mtu akitaka kukuharibiwa uwezo wako wa kutenda kazi alikukata kidole gumba (an ancient method of Physical incapacitation) lakini pia njia ya kudhalilisha hadharani public humiliation ona  

 

Waamuzi 1:4-7 “Yuda akakwea; naye Bwana akawatia Wakanaani na Waperizi mkononi mwao; nao wakawapiga huko Bezeki watu elfu kumi. Wakampata huyo Adoni-bezeki huko Bezeki; wakapigana naye, nao wakawapiga Wakanaani na Waperizi. Lakini Adoni-bezeki akakimbia; nao wakamwandamia na kumshika, wakamkata vyanda vyake vya gumba vya mikono na vya miguu. Adoni-bezeki akasema, Wafalme sabini, waliokuwa wamekatwa vyanda vyao vya gumba vya mikono na vya miguu, waliokota chakula chao chini ya meza yangu; kama nilivyofanya mimi, Mungu amenilipa vivyo. Wakamleta Yerusalemu naye akafa kuko.”

 

Farao – Mfalme katili sana aliyekuwa na mipango ya hila ya kuwaangamiza wana wa Israel kwa kuwaua watoto, kuamuru watoto wa kiume wa kiebrania watupwe kwenye maji ya mto Nile, na kuwatesa wana wa Israel kwa utumwa mzito sana, yeye na majeshi yake yote siku yao ya kufa walikufa katika maji ya bahari ya Shamu

 

Kutoka 1:22 “Kisha huyo Farao akawaagiza watu wake, akisema, Kila mtoto mwanamume atakayezaliwa mtamtupa mtoni, na kila mtoto mwanamke mtamhifadhi hai.”

 

Kutoka 14:27-28. “Musa akaunyosha mkono wake juu ya bahari, na kulipopambazuka, bahari ikarudi kwa nguvu zake; Wamisri wakakimbia mbele yake; na BWANA akawakukutia mbali hao Wamisri kati ya bahari. Yale maji yakarudi yakafunikiza magari na wapanda farasi, hata jeshi lote la Farao lililoingia katika bahari nyuma yao; hakusalia hata mtu mmoja.”

 

Ahabu na Yezebeli – Walikuwa na tamaa kwaajili ya shamba la mizabibu la Nabothi, Alipowakatalia kwa sababu za kisheria kwamba Torati haikuruhusu kuuza urithi, walikasirika na Yezebeli alitengeneza mashahidi wa uongo na wakamuua Naboth mtu huyu mwenye haki aliuawa kwa kupigwa mawe kwamba eti amemtukana mfalme na Mungu, na mbwa waliiramba damu yake, jambo hili lilimuudhi Mungu na Mungu aliwahukumu viongozi hao kuwa pale ambapo Mbwa waliramba damu ya Nabothi na ya kwao itarambwa na kwa hakika ikawa vilevile ilivyosemwa!

 

1Wafalme 21:19 “Ondoka, ushuke, ukutane na Ahabu mfalme wa Israeli, akaaye katika Samaria; yuko katika shamba la mizabibu la Nabothi, ndiko alikoshukia ili alitamalaki. Ukamwambie, ukisema, Bwana asema hivi, Je! Umeua, ukatamalaki? Nawe utamwambia, kusema, Bwana asema hivi, Mahali pale mbwa walipoiramba damu ya Nabothi, mbwa watairamba na damu yako, naam, damu yako.”

 

2Wafalme 9:32-36 “Akainua uso wake kulielekea dirisha, akasema, Aliye upande wangu ni nani? Matowashi wawili watatu wakachungulia. Akasema, Mtupeni chini. Basi wakamtupa chini; na damu yake ikamwagika nyingine juu ya ukuta, na nyingine juu ya farasi, naye akamkanyaga-kanyaga. Alipoingia, akala, na kunywa; kisha akasema, Haya! Mwangalieni mwanamke huyu aliyelaaniwa, mkamzike; kwa maana ni binti mfalme. Wakaenda ili kumzika; lakini hawakuona kitu ila kifuvu cha kichwa chake, na miguu yake, na vitanga vya mikono yake.Basi wakarudi, wakampasha habari. Akasema, Hili ndilo neno la Bwana, alilolinena kwa kinywa cha mtumishi wake Eliya, Mtishbi, kusema, Katika kiwanja cha Yezreeli mbwa wataila nyama ya Yezebeli.”

 

Hamani maarufu kama adui wa Wayahudi alimchukia sana Mordekai na Wayahudi wote na pamoja na kupitisha mswada ili kwamba Wayahudi wote wakaao Shushani Ngomeni na nchi nzima wauawe, pia alikuwa akiandaa msalaba kwa kusudi la kumtundika Mordekai lakini katika namna isiyoweza kuelezeka Mungu aliingilia kati na mtu huyu alitundikwa yeye katika msalaba ule ule aliomwandalia mwenzake!

 

Esta 7:8-10. “Kisha mfalme akarudi kutoka katika bustani ya ngome hata mahali pa karamu ya divai. Ikawa Hamani amejitupa chini penye kitanda alipokuwapo Esta. Mfalme akasema, Namna gani! Je! Atamfanyia malkia jeuri hata machoni pangu nyumbani mwangu? Na neno lilipotoka kinywani mwa mfalme, wakamfunika uso Hamani.Ndipo aliposema Harbona, msimamizi-wa-nyumba mmojawapo wa wale waliohudhuria mbele ya mfalme, Tazama, basi, mti wa mikono hamsini urefu wake, Hamani aliomwekea tayari Mordekai, ambaye alinena vema kwa ajili ya mfalme, upo umesimamishwa nyumbani kwa Hamani. Mfalme akasema, Mtundikeni juu yake. Basi wakamtundika Hamani juu ya mti aliomwekea tayari Mordekai. Ghadhabu ya mfalme ikatulia.”                  

 

Maandiko haya ndugu yangu na dada yangu ni ushahidi tosha ya kuwa Katika waovu hutoka uovu, Mungu anatufundisha hapo ya kuwa tujihadhari sana kuwatendea watu mabaya na pia tukitendewa sisi Mungu muhukumu mwenye haki yupo na atahukumu kwa haki nadhani hukumu ya Mungu ni bora sana kuliko hukumu za wanadamu.

 

Zaburi 7:11-13 “Mungu ni mwamuzi mwenye haki, Naam, Mungu aghadhibikaye kila siku. Mtu asiporejea ataunoa upanga wake; Ameupinda uta wake na kuuweka tayari; Naye amemtengenezea silaha za kufisha, Akifanya mishale yake kuwa ya moto.”

 

Katika waovu hutoka uovu!

 

Ni muhimu kujikumbusha tena na tena Mungu anataka tuwe watu wa haki duniani, tuache kiburi na kujiamini kulikopitiliza kutakakotufanywa tuwe na uonevu kwa wengine neno la Mungu limetuthibitishia kauli ya Daudi iliyonenwa na wazee kuwa ni kweli katika waovu hutoka uovu, Mungu hadhihakiwi chochote apandacho mtu hapa duniani atavuna unapowatendea wengine ukatili nawe utatendewa au watoto wako watatendewa acha uovu wako

 

Wagalatia 6:7-8 “Msidanganyike, Mungu hadhihakiwi; kwa kuwa cho chote apandacho mtu, ndicho atakachovuna.Maana yeye apandaye kwa mwili wake, katika mwili wake atavuna uharibifu; bali yeye apandaye kwa Roho, katika Roho atavuna uzima wa milele.”

 

Sauli alipoelezwa maneno yale ni kweli kuwa alilia na kukiri kuwa Daudi ni mwenye haki kuliko yeye, lakini hata hivyo hakuacha uovu wake kwani muda mfupi baadaye aliendelea kumsaka Daudi kwa kusudi lile lile la Kumwangamiza tena sasa akaongeza kikosi kutoka askari 1000-3000 kumsaka Daudi,

 

1Samuel 24:16-20 “Ikawa, Daudi alipokwisha kumwambia Sauli maneno hayo Sauli alisema, Hii ndiyo sauti yako, Daudi, mwanangu? Naye Sauli akapaza sauti yake, akalia. Akamwambia Daudi, Wewe u mwenye haki kuliko mimi; maana wewe umenitendea mema, nami nimekutenda mabaya.Nawe umeonyesha leo jinsi ulivyonitendea mema, kwani Bwana aliponitia mikononi mwako, hukuniua. Maana mtu akimwona adui yake, je! Atamwacha aende zake salama? Basi Bwana na akulipe mema kwa haya uliyonitendea leo.Na sasa, angalia, najua ya kuwa hakika utakuwa mfalme, na ufalme wa Israeli utafanyika imara mkononi mwako.”

 

1Samuel 26:2 “Basi hao Wazifi wakamwendea Sauli huko Gibea, wakasema, Je! Yule Daudi hakujificha katika kilima cha Hakila, kuelekea Yeshimoni? Basi Sauli akaondoka, akashuka nyikani kwa Zifu, naye alikuwa na watu elfu tatu, wateule wa Israeli, pamoja naye, ili kumtafuta Daudi katika nyika ya Zifu.”

 

Mikono ya Sauli tayari ilikuwa imejaa damu, kwa kuwaua makuhani wa Bwana huko Nobu wapatao 85 pamoja na wanawake na watoto wakati akimtafuta Daudi, mtu huyu alikuwa tayari amejaa maovu na alitaka kuendeleza uovu wake kama desturi yake, mikono yake ilikuwa imejaa damu ya makuhani 85 na familia zao ambao hawakuwa waovu

 

1Samuel 22:17-21. “Kisha mfalme akawaambia askari walinzi waliosimama karibu naye Geukeni, mkawaue hao makuhani wa Bwana, kwa sababu mkono wao u pamoja na Daudi, na kwa sababu walijua ya kuwa amekimbia, wasiniarifu. Lakini watumishi wa mfalme walikataa kunyosha mkono na kuwaangukia makuhani wa Bwana.Basi mfalme akamwambia Doegi, Geuka wewe, ukawaangukia hao makuhani. Basi Doegi, Mwedomi, akageuka, akawaangukia makuhani, akaua siku ile watu themanini na watano wenye kuvaa naivera ya kitani. Kisha akaupiga Nobu, mji wa makuhani, kwa makali ya upanga, wanaume na wanawake, watoto na wanyonyao, na ng'ombe, na punda, na kondoo. Na katika wana wa Ahimeleki, mwana wa Ahitubu, akaokoka mtu mmoja tu, aliyeitwa jina lake Abiathari, akamkimbilia Daudi. Naye Abiathari akamweleza Daudi ya kwamba Sauli amewaua makuhani wa Bwana.”

 

Unapata picha jinsi gani Sauli alikuwa mwovu, kwaajili ya kumsaka Daudi aliua watu wengi sana na hivyo kuifanya mikono yake kuwa yenye Damu, muuaji huyu hatimaye, Mungu akawa hajibu maombi yake kwa njia zote na akajikuta anawaendea wenye pepo, moyo wake haukuwa na toba wala hakuwa imara kwa Bwana Mungu wake, Upanga wake aliouchomoa kumtafuta Daudi ulimgeukia yeye mwenyewe na kumuua, na ufalme aliokuwa akiulinda kwa damu ukachukuliwa na Daudi. Kwa Amani kweli Kila aushikaye upanga ataangamia kwa upanga!

 

1Samuel 31:1-6 “Basi Wafilisti wakapigana na Israeli; nao watu wa Israeli wakakimbia mbele ya Wafilisti, wakaanguka wameuawa katika mlima wa Gilboa.Wafilisti wakamfuatia sana Sauli na wanawe, Wafilisti wakawaua Yonathani, na Abinadabu, na Malkishua, wana wa Sauli.Tena vita vilikuwa vikali sana juu ya Sauli, na wapiga upinde wakampata; hata akafadhaika sana kwa sababu ya wapiga upinde. Ndipo Sauli akamwambia yule mchukua silaha zake, Futa upanga wako, unichome nao; wasije watu hawa wasiotahiriwa wakanichoma, na kunisimanga. Lakini huyo mchukua silaha zake akakataa; kwa sababu aliogopa sana. Basi Sauli akautwaa upanga wake, akauangukia. Na mchukua silaha zake alipoona ya kuwa Sauli amekufa, yeye naye akauangukia upanga wake, akafa pamoja naye. Hivyo Sauli akafa, na wanawe watatu, na mchukua silaha zake, na watu wake wote pamoja siku iyo hiyo”

 

Hitimisho!

 

Tunajifunza nini katika somo hili Katika waovu hutoka uovu, tutende mema ndugu zangu, tuache kuwa sababu ya mbegu mbaya, wakati wote tuilinde mioyo yetu na mambo maovu, tumwambie Mungu atuumbie moyo safi kama alivyoomba Daudi, Daudi alikuwa mtu mwenye Moyo safi na aliisikiliza dhamiri yake na kulitii neno la Mungu, Moyo wake ulimchoma pale tu alipokata upindo wa vazi la Sauli na hakutaka kujichukulia sheria mikononi je dhamiri yako hukuambia nini pale unapowatendea wenzako yasiyo haki Je huoni hata dhamiri inakusuta? Unafanyaje kuhusu ushauri wa rafiki zako? Daudi alishauriwa kuwa afanye kitu kwa sababu Mungu alimtia Sauli katika mikono yake? Hata hivyo Daudi aliona aliachie jambo hilo katika mikono ya Mungu mwenyewe tuwe makini na wanaotushauri na ushauri unaotusukuma katika uovu, wivu, wizi, ulevi, ujambazi, ushirikina na chuki, heshimu uhai wa wengine, familia zao na majukumu waliyo nayo, usikimbilie kunyoosha mkono wako hata kama mtu huyo humpendi, jitafute katika tiba kwani kuacha na Mungu ni jambo baya kuliko yote, ukipanda mbegu ya wema unapanda mbegu ya kudumu kwako na uzao wako!  Sauli kwa kuwa alichagua upanga akafa kwa upanga, yeye na familia yake, Daudi alimchagua Mungu akawa mfalme mkao wa moyo wetu ndio unaoamua uhusiano wetu kwa Mungu na Baraka zake! Jilinde sana

 

Rev. Innocent Samuel Kamote.

 

Mkuu wa wajenzi mwenye Hekima.