Tajiri lakini masikini

Ufunuo 3:14-19. “Na kwa malaika wa kanisa lililoko Laodikia andika; Haya ndiyo anenayo yeye aliye Amina, Shahidi aliye mwaminifu na wa kweli, mwanzo wa kuumba kwa Mungu. Nayajua matendo yako, ya kuwa hu baridi wala hu moto; ingekuwa heri kama ungekuwa baridi au moto. Basi, kwa sababu una uvuguvugu, wala hu baridi wala moto, nitakutapika utoke katika kinywa changu. Kwa kuwa wasema, Mimi ni tajiri, nimejitajirisha, wala sina haja ya kitu; nawe hujui ya kuwa wewe u mnyonge, na mwenye mashaka, na maskini, na kipofu, na uchi. Nakupa shauri, ununue kwangu dhahabu iliyosafishwa kwa moto, upate kuwa tajiri, na mavazi meupe upate kuvaa, aibu ya uchi wako isionekane, na dawa ya macho ya kujipaka macho yako, upate kuona.Wote niwapendao mimi nawakemea, na kuwarudi; basi uwe na bidii, ukatubu.”

Utangulizi:

Katika kitabu cha Ufunuo 3:17 “Kwa kuwa wasema, Mimi ni tajiri, nimejitajirisha, wala sina haja ya kitu; nawe hujui ya kuwa wewe u mnyonge, na mwenye mashaka, na maskini, na kipofu, na uchi.”

Kutoka katika kifungu kikuu cha somo letu tunakutana na maneno mazito ya Yesu Kristo kwa kanisa lililokuwako Laodikia. Katika mstari huo Yesu anakemea na kutujulisha hali ya kiroho ya Kanisa lililokuwako Laodikia ya kuwa wamepoteza kabisa hali yao ya kuwa matajiri wa kiroho na badala yake wamekuwa wakijivunia utajiri wa mwilini na kusahau kile ambacho wanatakiwa kukipa kipaumbele, katika maisha ya kiroho. Katika ujumbe huu leo Roho Mtakatifu ambaye ndiye Mwalimu wetu mkuu anataka kutukumbusha umuhimu wa maneno hayo kwa kutufundisha ili tuweze kujifunza na kuchukua tahadhari katika siku zetu za leo, tutajifunza somo hili “Tajiri lakini masikini” kwa kuzingatia vipengele vikuu vitatu vifuatavyo:-

·         Kwa kanisa lililoko Laodikia

·         Hali ya kiroho katika kanisa lililokuwako Laodikia

·         Tajiri lakini Masikini     

  

Kwa Kanisa lililoko Laodikia

Laodekia ulikuwa ni moja ya miji mikubwa sana na mizuri iliyokuwako katika Asia katika bonde la Lycos jimbo la Phrygia eneo ambalo yalikuwako makanisa saba yanayotawa katika kitabu cha ufunuo ambayo kimsingi yalikuwako kijiografia katika Adia ndogo yaani eneo la Asia linalopakana na ulaya iliko inchi ya Uturuki leo.au Eneo lililojulikana kama Kapadokia, Eneo hilo lilibarikiwa sana nyakati za karne ya kwanza kwa kuikubali injili na kuwa maeneo yenye utajiri wa Kikristo kutokana na kuhudumiwa na mitume pamoja na watenda kazi waliokuwa wameiva vya kutosha katika kuifanya kazi ya Bwana kwa kueneza injili na kufundisha.

Ufunuo 1:11 “ikisema, Haya uyaonayo uyaandike katika chuo, ukayapeleke kwa hayo makanisa saba: Efeso, na Smirna, na Pergamo, na Thiatira, na Sardi, na Filadelfia, na Laodikia.”

Tofauti na historia ya miji mingine iliyotajwa katika maaandiko hayo hapo, Laodekia ni mji uliojengwa na mfalme Antiochus II kati ya mwaka 261-246 BC Kabla ya Kristo, na mji huu ukapewa jina la mke wa mfalme huyo Malikia aliyeitwa Laodikia, kwa kiingereza LAODICEA na kwa kiyunani Laodikia, Jina Laodikia ni muunganiko wa maneno mawili ya kiyunani “Laos” ambalo maana yake ni Common People ambalo kwa Kiswahili ni watu wa kawaida na neno “dike” ambalo maana yake ni Justice kwa Kiswahili haki kwa watu wa kawaida, Hiyyo maana kamili ya Laodikia ni watu wa haki au mtu mwenye haki, au Popular Judgement au Popular Approval ambalo maana yake mwenye kukubalika sana na watu wa kawaida, au wenye umaarufu, Mji huu uliundwa kwa pamoja na mkusanyiko wa Wayahudi na Wasiria ambao walisafirishwa kutoka Babeli mpaka katika miji ya Phrygia na Lydia huku Laodekia ukiwa ndio mji uliokuwa katika njia kuu, Kutokana na makazi ya kijiografia ulilokuwa mji huu, Mji ulikuwa na mafanikio makubwa sana kibiashara kiuchumi na viwanda, Kulikuwa na maendeleo makubwa ya viwanda vya nguo, chuo cha madawa ya tiba na hasa dawa za macho na dawa nyinginezo na mafanikio makubwa sana ya kiuchumi, Walaodikia walikuwa na ufugaji wa kondoo wazuri waliozalisha manyoya yaliopelekwa kiwandani na kuzalisha nguo za viwango vya juu sana, kwa hiyo watu wa Laodekia pia walivaa vizuri sana na kuuza nguo za hali ya juu, pia walikuwa watengenezaji wazuri wa Mazuria “Carpets” jambo ambalo mpaka siku za leo Mazuria kutoka Uturuki yamekuwa na umaarufu mkubwa sana duniani, kimsingi Laodekia pia ulikuwa ni mji wenye Benki kubwa yenye utajiri mkubwa wa fedha katika Asia na ulikuwa ni mji wa watu wenye mafanikio makubwa sana, Mji huu ulikuwa na bomba kubwa la maji yaliyotengenezwa kutoka katika chemichemi iliyokuwa ikitoa maji ya moto huko Hierapolis mji ulioko maili sita hivi kutoka Laodikia, maji hayo yalifika mjini na wanawake walikuwa wakichota maji hayo na kupeleka majumbani mwao, maji yao yalifika nyumbani yakiwa vuguvugu, na au wakati mwingine yakiwa yamepoa. Paulo Mtume aliwahi kuwaandikia waraka wakristo waliokuwako Laodikia, katika kanisa lililokuwako huko na kuagiza kuwa wausome kwa kubadilishana na ule wa Wakolosai, Hata hivyo kwa bahati mbaya waraka huo wa Paulo Mtume kwa Walaodikia haukuweza kupatikana zaidi ya maelezo yake, kwa hiyo inakisiwa ya kuwa waraka wa Paulo mtume kwa walaodikia huenda ulipotea au kuna uwezekano ukawa ni pamoja na ule wa Wakolosai.  

Wakolosai 4:15-16 “Wasalimuni ndugu walioko Laodikia, na Nimfa, na kanisa lililo katika nyumba yake.Waraka huu ukiisha kusomwa kwenu fanyeni kwamba usomwe katika kanisa la Walaodikia pia; na ule wa Laodikia usomwe na ninyi.”

Kutokana na Mafanikio makubwa ya ukazi wa mji huu watu wake nao walifanikiwa sana na kuwa matajiri mno, Kanisa lilipoanzishwa katika mji huu lilikuwa na washirika waliokuwa vizuri kifedha na wenye mafanikio makubwa sana ya utajiri na umiliki wa mali za dunia, Kanisa lilianzishwa hapa na moja ya watenda kazi pamoja na Paulo Mtume aliyeitwa Epafra, kwa hiyo wakati Paulo mtume anaandika waraka kwa Wakolosai alikuwa bado hajautembelea mji huu wa Kolosai na Laodikia na kanisa lililokuwako, Kama tunavyoweza kuona akitamani kuwatembelea wale ambao hawakuwa wameuona uso wake, Paulo mtume wakati huu alikuwa Efeso kwa hiyo ni wazi kuwa Epafra mtenda kazi pamoja naye alihubiri katika miji hiyo na kufungua makanisa katika Kolosai, Laodikia na Hierapoli na kutoa ripoti kwa Paulo mtume ambaye aliamua kuwaandikia kwa kusudi la kuwatia moyo waamini wa eneo hilo. Akifurahishwa na maendeleo yao kiroho na utumishi wa Epafra. Angalia:-

Wakolosai 1:3-8 “Twamshukuru Mungu, Baba yake Bwana wetu Yesu Kristo, siku zote tukiwaombea; tangu tuliposikia habari za imani yenu katika Kristo Yesu, na upendo mlio nao kwa watakatifu wote; kwa sababu ya tumaini mlilowekewa akiba mbinguni; ambalo habari zake mlizisikia zamani kwa neno la kweli ya Injili; iliyofika kwenu, kama ilivyo katika ulimwengu wote, na kuzaa matunda na kukua, kama inavyokua kwenu pia, tangu siku mlipoisikia mkaifahamu sana neema ya Mungu katika kweli; kama mlivyofundishwa na Epafra, mjoli wetu mpenzi, aliye mhudumu mwaminifu wa Kristo kwa ajili yenu; naye alitueleza upendo wenu katika Roho.”

Wakolosai 2:1-3 “Maana nataka ninyi mjue jinsi ilivyo kuu juhudi yangu niliyo nayo kwa ajili yenu, na kwa ajili ya wale wa Laodikia, na wale wasioniona uso wangu katika mwili; ili wafarijiwe mioyo yao, wakiunganishwa katika upendo, wakapate utajiri wote wa kufahamu kwa hakika, wapate kujua kabisa siri ya Mungu, yaani, Kristo; ambaye ndani yake yeye hazina zote za hekima na maarifa zimesitirika.”

Wakolosai 4:12-13 “Epafra, aliye mtu wa kwenu, mtumwa wa Yesu Kristo, awasalimu, akifanya bidii siku zote kwa ajili yenu katika maombi yake, ili kwamba msimame wakamilifu na kuthibitika sana katika mapenzi yote ya Mungu. Maana namshuhudia kwamba ana juhudi nyingi kwa ajili yenu, na kwa ajili ya hao walioko Laodikia, na kwa ajili ya hao walioko Hierapoli.”        

Kutokana na mafanikio waliyokuwa nao watu hao walijiamini sana kwa sababu hata kanisa lilikuwa na hali nzuri ya kifedha na kiuchumi, na kimsingi Mungu anapenda sana watu wake wafanikiwe wamiliki fedha na uchumi kwa sababu kazi ya Mungu pia hufanikiwa sana kama tutakuwa na waamini ambao wako vizuri kiuchumi na kifedha, watu wa Laodekia walikuwa watu wavumilivu sana na waaminifu mno, mji wao ulikuwa na historia ya kukumbwa na matetemeko, na uko wakati mji huu uliathiriwa vibaya na tetemeko kubwa na kuharibiwa na uongozi wa Rumi ulitaka kuwapa msaada wa kifedha kwaajili ya kuujenga tena mji huo, lakini wakazi wake waliamua kujichangisha wenyewe na wakaujenga mji huo kwa ubora zaidi ya kwanza tukio hili  lilikuwa ni kati ya mwaka wa 60-68 AD kwa hiyo unaweza kupata picha kuwa walikuwa ni watu wanaojitosheleza na hawakuhitaji msaada hali iliyowapa kujiamini sana. Kwa hiyo Kanisa la Laodikia walikuwa matajiri sana.

Hali ya kiroho katika kanisa lililokuwako Laodikia

Kimsingi hali ya kanisa wakati linaanzishwa ilikuwa ni nzuri na njema sana Epafra alimpa Paulo mtume taarifa njema ya maendeleo ya makanisa hayo na Paulo Mtume alikubali na kuwandikia waraka wa kuwatia moyo akiwaombea neema ya kupata kumjua Yesu zaidi, na kuwa na hekima na ufahamu wa hazina zote za mbinguni, hata hivyo baada ya miaka mingi baadaye kutoka mwaka wa 60 mpaka wakati kitabu cha ufunuo kinaandikwa yaani mwaka wa 95-100 hivi Kanisa hili lilianza kuathiriwa na tabia za mkuu wa anga wa mji ule, na hivyo kanisa lilianza kupoteza sifa njema lililokuwa nazo awali, na ndio maana Yesu katika waraka wake kupitia Yohana kwenye kitabu cha ufunuo aliwakemea ili aweze kuwarekebisha na kuwatia moyo ili waweze kuwa washindi apate kukaa nao katika kiti cha enzi mbinguni, Kanisa lilianza kufunga mlango kwa Kristo na kuamini ya kuwa wanajitosheleza kwa kila hali jambo lililopelekea kubaki na utajiri wao wa kiuchumi lakini kuwa masikini sana katika maswala ya kiroho na kuanza kutia aibu kama watu walio uchi mbele za Kristo.

Ufunuo 3:14-21 “Na kwa malaika wa kanisa lililoko Laodikia andika; Haya ndiyo anenayo yeye aliye Amina, Shahidi aliye mwaminifu na wa kweli, mwanzo wa kuumba kwa Mungu. Nayajua matendo yako, ya kuwa hu baridi wala hu moto; ingekuwa heri kama ungekuwa baridi au moto. Basi, kwa sababu una uvuguvugu, wala hu baridi wala moto, nitakutapika utoke katika kinywa changu.Kwa kuwa wasema, Mimi ni tajiri, nimejitajirisha, wala sina haja ya kitu; nawe hujui ya kuwa wewe u mnyonge, na mwenye mashaka, na maskini, na kipofu, na uchi. Nakupa shauri, ununue kwangu dhahabu iliyosafishwa kwa moto, upate kuwa tajiri, na mavazi meupe upate kuvaa, aibu ya uchi wako isionekane, na dawa ya macho ya kujipaka macho yako, upate kuona. Wote niwapendao mimi nawakemea, na kuwarudi; basi uwe na bidii, ukatubu.Tazama, nasimama mlangoni, nabisha; mtu akiisikia sauti yangu, na kuufungua mlango, nitaingia kwake, nami nitakula pamoja naye, na yeye pamoja nami. Yeye ashindaye, nitampa kuketi pamoja nami katika kiti changu cha enzi, kama mimi nilivyoshinda nikaketi pamoja na Baba yangu katika kiti chake cha enzi.”    

Katika kifungu hiki tunaweza kuona ni changamoto gani ambazo zilikuwa zinalikumba kanisa la Laodikia na jinsi Yesu Kristo alivyokuwa akishughulikia changamoto zao ambazo zilikuwa zikiwasumbua

1.       Ufahamu finyu kuhusu Yesu Kristo – Kanisa la Laodikia lilikuwa limeathiriwa na baadhi ya mafundisho ya waanostisizim na waariyan (Gnosticism and Arians) ambao kimsingi walimuona Yesu Kristo kama ambaye hayuko sawa na Mungu, na kuwa Kristo ni Roho iliyoumbwa na Mungu, na ambaye yuko juu kidogo ya wanadamu na malaika lakini yuko chini ya Mungu, kwa hiyo kulikuwa na mashaka sana kuhusu uungu wa Yesu Kristo, kama tu leo tunavyoweza kuona baadhi ya watumishi wa Mungu wakianza kuropoka na kupoteza muelekeo kuhusu uungu wa Yesu Kristo, wao walianza vizuri wakiamini katika uungu wa Yesu Kristo na katika hali duni na ya umasikini, lakini walipofanikiwa kupitia jina la Yesu na kufanikiwa na kuwa matajiri na kuwa na kila kitu, mavazi, magari, na kadhalika wanaaza kutamka wazi wazi na kukanusha uwepo wa Mungu Baba na Mwana na Roho Mtakatifu wakilihesabu fundisho hilo kuwa ni mapokeo, Mafanikio yoyote ya kimwili yakitupa kiburi na kuanza kupuuzia misingi ya Imani ikiwepo uungu wa Yesu au utatu wa Mungu na kudhani kuwa fundisho hili ni la kizushi huo ni mwanzo wa kujifikiria kuwa tumetajirika, na kuwa tuna mavazi mazuri, na kuwa tuna akiba ya kutosha lakini kwa Mungu ni uchi masikini na mnyonge na mwanzo wa kufilisika kiroho.

 

Yesu aliwaeleza Walaodikia ya kuwa Yeye ni Amina, na ni shahidi aliye mwaminifu na mwanzo wa kuumba kwa Mungu. Ona 

 

Ufunuo 3:14 “Na kwa malaika wa kanisa lililoko Laodikia andika; Haya ndiyo anenayo yeye aliye Amina, Shahidi aliye mwaminifu na wa kweli, MWANZO WA KUUMBA KWA MUNGU.”  

 

Yesu alikuwa na maana gani katika kifungu hiki? Yesu alikuwa anajifunua kwa Walaodikia kwamba wanapaswa kumuamini yeye, wanapaswa kuamini fundisho la kweli walilopata kulisikia kutoka kwa Mitume kuhusu Yesu ya kwamba yeye ni Bwana, kwa hiyo hawapaswi kumpuuzia Yesu na kuanza kumfungia mlango kwa kudhani ya kuwa Yesu, Yeye sio wa kuaminiwa, yeye yuko chini ya Mungu, na yuko juu ya malaika kiasi tu, wao waliacha kumuona Yesu kama kiini cha Baraka zao na mafanikio yao na hivyo waliweka Imani katika uchumi na maendeleo makubwa waliyokuwa nayo.  Kwa hiyo Yesu aliwajibu:-

 

a.       Yeye ni Amina – Hali ya kiroho ya washirika wa Laodikia ilikuwa mbaya wengi wa wanafunzi wake Pale Laodikia walikuwa tayari wametia shaka kuhusu Yesu Kristo iwapo kweli yeye ni Mungu? Licha ya mafanikio yao makubwa ya kimwili lakini hali yao ya kiroho ilianza kuwa mbaya kwa sababu walianza kuukana uungu wa Yesu Kristo na kumshushia thamani, Yesu akitaka kusema na watu hawa ili apate mwitikio wao anajiita yeye ni Amina – Neno amina maana yake ni Hakika, Ni kweli, Kwa hiyo Yesu alitaka kuwahakikishia kuwa anazungumza kweli na kuwathibitishia ukweli kuwa Yeye ni Mungu, Licha ya kuwa yeye ni Mungu lakini pia ni Msema kweli na kila kinachozungumzwa katika neno lake ni hakika na kweli na kila kilichoahidiwa katika neno lake ni kweli, Yesu ni wa uhakika na hakuna ubabaishaji kumuhusu yeye,  Matumizi ya Amina kwa Yesu Kristo yalikuwa ni uthibitisho ya kuwa yeye ni Mungu kamili na wa kweli na ndio ufunuo mkamilifu na wa mwisho wa Mungu.Yeye kweli ni Alpha na Omega.

 

2Wakorintho 1:20 “Maana ahadi zote za Mungu zilizopo katika yeye ni Ndiyo; tena kwa hiyo katika yeye ni Amin; Mungu apate kutukuzwa kwa sisi.”

 

b.      Shahidi aliye Mwaminifu – Yesu alikuwa kweli anamwakilisha Mungu, yeye ni chapa ya nafsi ya Mungu akiwakilisha asili na tabia ya uungu, Hakuna ufunuo mwingine zaidi wa Mungu Zaidi ya Yesu Kristo, Mungu alizungumza na manabii kwa njia nyingi na namna nyingi lakini siku hizi za mwisho amejifunua kwa Yesu Kristo, Yesu anaposema yeye ni Amina, Shahidi aliye mwaminifu, alikuwa akifafanua ukweli kwamba hakuna Zaidi yake na kuwa walaodikia wanapaswa kumuamini kwani Mungu hawezi kusema uongo. “Pistos martus” Shahidi mwaminifu, mfia Imani wa kweli.

 

Waebrania 1:1-2 “Mungu, ambaye alisema zamani na baba zetu katika manabii kwa sehemu nyingi na kwa njia nyingi, mwisho wa siku hizi amesema na sisi katika Mwana, aliyemweka kuwa mrithi wa yote, tena kwa yeye aliufanya ulimwengu.”               

 

Tito1:2 – “katika tumaini la uzima wa milele, ambao Mungu asiyeweza kusema uongo aliuahidi tangu milele;”

       

Wakolosai 1:13-15 – “Naye alituokoa katika nguvu za giza, akatuhamisha na kutuingiza katika ufalme wa Mwana wa pendo lake; ambaye katika yeye tuna ukombozi, yaani, msamaha wa dhambi; naye ni mfano wa Mungu asiyeonekana, mzaliwa wa kwanza wa viumbe vyote.”

 

Yohana 14:6 – “Yesu akamwambia, Mimi ndimi njia, na kweli, na uzima; mtu haji kwa Baba, ila kwa njia ya mimi.”

 

Yesu alikuwa akimaanisha kuwa kumfungia mlango yeye ni kwenda upotevuni, kama kanisa linaamua kumuona Yesu kuwa sio kitu basi ni lazima kanisa lielewe kuwa linajifungia njia ya kumfikia Mungu baba kwa namna yoyote ile, Yesu anajiita Amina, na anajiita Shahidi aliye mwaminifu ili kulithibitishia kanisa ya kuwa hakuna wokovu katika mwingine isipokuwa yeye, na kuwa ni yeye aliye juu ya yote na hivyo wanapaswa kumuamini na kuonda shaka kumuhusu. Kiongozi yeyote wa kanisa au kanisa lolote lile linalopunguza Heshima ya Yesu Kristo linapunguza Heshima ya Mungu vile vile na ufunuo wa kweli ambao Mungu amejifunua katika neno lake!

 

c.       Mwanzo wa kuumba kwa Mungu – maneno Mwanzo wa kuumba kwa Mungu na maneno Mzaliwa wa kwanza wa viumbe vyote yote yana maana moja, waalimu wa uongo walieneza habari ya kuwa Yesu ni mwanadamu wa kawaida tu na kuwa tofauti yake na viumbe wengine ni kuwa yeye aliumbwa kwanza,  Lakini Yesu alijitambulisha kuwa yeye ni mwanzo wa kuumba kwa Mungu sawa tu na kusema ni mzaliwa wa Kwanza wa viumbe vyote, kwa hiyo walaodikia waliamini kuwa Yesu hayuko sawa na Mungu wala sio Mungu, bali ni kiumbe cha kwanza kuumbwa na Mungu, sawa na Adamu kama mwanadamu wa kwanza kuumbwa na Mungu, Yesu aliliweka sawa fundisho hilo kwa kuwajibu kuwa Yeye ni Mwanzo wa kuumba kwa Mungu ona:-

 

Ufunuo 3:14 “Na kwa malaika wa kanisa lililoko Laodikia andika; Haya ndiyo anenayo yeye aliye Amina, Shahidi aliye mwaminifu na wa kweli, MWANZO WA KUUMBA KWA MUNGU.”

 

Maneno hayo mwanzo wa kuumba kwa Mungu yanasomeka hivi katika Biblia ya kiingereza ya King James Version (KJV) na Katika Biblia ya kiingereza ya New Internation Version (NIV)

 

Revelation 3:14 “And unto the angel of the church of Laodiceans write; these this saith the Amen, the faithful and true witness, THE BEGINNING OF CREATION OF GOD”

 

Revelation 3:14 “To the angel of the church in Laodicea write; these are the words of the Amen, The faithful and true witness, THE RULER OF GOD’S CREATION”

 

Na yanasomeka hivi katika biblia ya kiyunani

 

Revelation 3:14 “Kai angelos ekklēsia Laodikeus grapho; hode hēde tode lego Amēn, pistos kai alēthinos martus, archē ktisis theos”

 

Neno hilo Archē maana yake ni Chief or rank or application of order in terms of time and place

 

Sawa na matumizi ya neno

 

Wakolosai 1:15 “naye ni mfano wa Mungu asiyeonekana, mzaliwa wa kwanza wa viumbe vyote.” “Hos hē ho esti eikōn aoratos Theos prōtotokos pas ktisis”

 

Kwa hiyo neno Archē ambalo ni Oder na neno prōtotokos kwa kiingereza protocal  yanamaanisha WA KWANZA KATIKA CHEO na sio wa kwanza kuumbwa kwa hiyo Yesu ni Mungu ni kwa kwanza kuwepo kabla hata ya kuweko kwa Muda, yuko juu ya kila kitu, Kwa hiyo Yesu ni Mungu sawa tu na yanavyoeleza maandiko, Lakini watu wa Laodikia walikuwa wamedanganyika wakifikiri kuwa Yesu aliumbwa kwanza na kwa hiyo walianza kupoteza Imani na Yesu, walipoteza Imani kwa neno lake na wakidhani ya kuwa yeye sio shahidi wa kweli, Kristo alikuwa akiwaonyesha ya kuwa yeye ni wakuaminiwa, na alikuwa kwaajili ya kweli na kuwa yeye ni Mungu, “Mimi ni Amina, shahidi aliye muaminifu mwanzo wa kuumbwa kwa Mungu”

 

Fundisho kuhusu uungu wa Yesu Kristo sio fundisho la uzushi, wala fundisho hilo halikuingizwa kwa hila na mkutano wa aina yoyote wa viongozi, fundisho kuhusu uungu wa Yesu ni fundisho la kibiblia tangu wakati wa agano la kale na kuthibitishwa na wakati wa agano jipya, malengo yote na kusudi lote la maandiko ni kumuhusu Yesu Kristo yeye ndio Mwokozi wa wanadamu, wanadamu hawawezi kujikoa wenyewe, wanadamu wanahitaji Mungu kwaajili ya wokovu. Na kwa sababu hiyo kama Yesu angelikuwa mwanadamu wa kawaida asingeliweza kufaa kuwa mwokozi.

 

Maandiko yenyewe ndiyo yanayomuelezea Yesu Kristo kuwa ni Mungu na jambo hili liko wazi hata bila kuhitaji ufafanuzi mwingi kwa mfano nabii Isaya alipotabiri kuhusu kuzaliwa kwa masihi haya ndio maneno yake ambayo kimsingi aliyatumia kumuelezea Yesu Kristo ona:-

 

Isaya 7:14 “.Kwa hiyo Bwana mwenyewe atawapa ishara. Tazama, bikira atachukua mimba, atazaa mtoto mwanamume, naye atamwita jina lake Imanueli.”

 

Isaya 9:6-7 “Maana kwa ajili yetu mtoto amezaliwa, Tumepewa mtoto mwanamume; Na uweza wa kifalme utakuwa begani mwake; Naye ataitwa Jina Lake, Mshauri wa ajabu, Mungu mwenye nguvu, Baba wa milele, Mfalme wa amani. Maongeo ya enzi yake na amani Hayatakuwa na mwisho kamwe, Katika kiti cha enzi cha Daudi na ufalme wake; Kuuthibitisha na kuutegemeza Kwa hukumu na kwa haki, Tangu sasa na hata milele. Wivu wa Bwana wa majeshi ndio utakaotenda hayo.”

 

Mfalme Daudi anamuona Yesu kuwa sio mwanae bali ni Mungu ona

 

Mathayo 22:41-45 “Na Mafarisayo walipokusanyika, Yesu aliwauliza, akisema, Mwaonaje katika habari za Kristo? Ni mwana wa nani? Wakamwambia, Ni wa Daudi. Akawauliza, Imekuwaje basi Daudi katika Roho kumwita Bwana, akisema, Bwana alimwambia Bwana wangu, Uketi mkono wangu wa kuume, Hata niwawekapo adui zako Kuwa chini ya miguu yako? Basi, Daudi akimwita Bwana, amekuwaje ni mwanawe? ”

 

Maandiko yanatuthibitishia kuwa Yesu ni Mungu, na ni muumbaji wa kila kitu na kuwa kila kitu kilitokana na Yeye

 

Yohana 1:1-3,14 “Hapo mwanzo kulikuwako Neno, naye Neno alikuwako kwa Mungu, naye Neno alikuwa Mungu.Huyo mwanzo alikuwako kwa Mungu.Vyote vilifanyika kwa huyo; wala pasipo yeye hakikufanyika cho chote kilichofanyika.14 Naye Neno alifanyika mwili, akakaa kwetu; nasi tukauona utukufu wake, utukufu kama wa Mwana pekee atokaye kwa Baba; amejaa neema na kweli.”

 

Kwa hiyo ni wazi kuwa Yesu alikuwa akijitambulisha kama Mungu kwa Kanisa la Laodikia akiwataka wamuamini, Kristo alikuwa akijimbainisha kuwa kanisa ni mali yake na kwa sababu hiyo ana mamlaka ya kuwakemea na kuwarekebisha na kuwa anajua mapungufu yao na anawaona jinsi ambavyo wamepoa kiroho na kuwa vuguvugu na kuwa na mapungufu Hakuna jambo la hatari sana duniani kama kanisa lililopoa yaani wakristo wa kimwili, Kanisa au wakristo waliopoa wanajijua kuwa wamepoa na wanaweza kutubu, lakini wale walio vuguvugu hujihesabia haki na kujidhani ya kuwa hawahitaji kutubu, Yesu analionya kanisa la Laodikia ambao wanajidhani kuwa wako salama wakijifikiri kuwa ni matajiri wa kiroho lakini walikuwa wakijidanganya wenyewe, kwa sababu katika uhalisia Yesu alikuwa anawaona kuwa Masikini, wanyonge na vipofu na uchi, maana yake hawakuwa na vazi la haki ya Mungu, Mji wao waliokuwa wakiuishi na mazingira yake yaliathiri hali zao za kiroho, hii ni wazi kuwa mkuu wa anga wa eneo Fulani kwa sifa zozote alizonazo huathiri hali ya kiroho ya mazingira yake, Laodikia uliitwa mji wa haki lakini Kanisa lilikuwa halina haki, Laodikia ulikuwa na viwanda vya nguo Lakini kanisa Yesu analiona liko uchi, Laodikia walikuwa hodari katika tiba hasa za macho, lakini Yesu analiona kanisa likiwa kipofu, Kulikuwa na maji ya vugu vugu na chemichemi za maji ya moto, Lakini Yesu alikuwa analiona kanisa liko vuguvugu, Laodikia ulikuwa mji wenye dhahabu lakini Yesu aliwashauri kununua kwake dhahabu iliyo safi Zaidi, kiburi cha mafanikio ya mwilini waliyokuwa nayo kiliwapiga upofu wa kiroho na wakajikuta wanamfungia Kristo Yesu nje ya mioyo yao, Yesu alikuwa bado anawapenda na ndio maana aliwakemea na bado aliahidi kuwa anaendelea kugonga mlango na kuwa wakikubali kumfungulia ataingia kwao na kufanya makazi nao.

                         

2.       Mimi ni tajiri, nimejitajirisha, wala sina haja ya kitu;

 

Kanisa la Laodikia lilikuwa katika eneo tajiri sana lililojulikana kwa Benki kubwa ya fedha, viwanda vya nguo, shule za utabibu na madawa, jambo ambalo lilikuwa na mchango mkubwa sana katika mafanikio ya kimaisha ya waamini wa kanisa pia, kwa hiyo walijivunia Utajiri na walijiona kuwa hawahitaji kitu, hawahitaji msaada Neno tajiri katika kiyunani linatumika kama neno “plousios” ambalo lina maana ya Material wealth and abundance yaani utajiri wa mali na mafanikio mengi ya mwilini, mafanikio haya yaliwapa kujiamini na kujiona kuwa wanatosha, jambo lililopelekea wawe na upofu wa kujiona katika hali zao za kiroho, Yesu aliwakemea na kuwajulisha kuwa walikuwa duni mno kuliko walivyokuwa wakijifikiri.

 

Ufunuo 3:17 “Kwa kuwa wasema, Mimi ni tajiri, nimejitajirisha, wala sina haja ya kitu; nawe hujui ya kuwa wewe u mnyonge, na mwenye mashaka, na maskini, na kipofu, na uchi.”

 

Yesu aliwakemea kwa kiburi na majivuno ya mwilini kiroho walikuwa ni wanyonge, wenye mashaka, na masikini na kipofu na uchi. Kimsingi walikuwa wanamuhitaji Yesu kwa wingi kama alivyotamani Paulo mtume katika dua yake kwamba waijue siri ya Mungu yaani Yesu Kristo. Lakini badala yake changamoto zifuatazo ziliwaandama walikuwa:-

 

Wanyonge – Wretched - talaiporos - wenye msiba na mateso, wasioridhika na wasio na Amani.

Wenye mashaka – Pitiable - eleeinos - wenye kutia huruma kwa sababu ya hali yao

Masikini - Poor – Ptochos – masikini wa kutupwa na mtu liyefilisika, chikoraa

Kipofu - Blind – typhlos – kipofu asiyeweza kuona kwa macho wala kupambanua kwa akili

Uchi- Naked- gymnos – aliyewekwa wazi aliyefumaniwa – akiwa hana nguo, kwa aibu

 

Wakati kanisa la Laodikia wakizungukwa na mazingira yanayoonekana kuwa na mafanikio makubwa kiukweli hali yao ya kiroho ilikuwa tofauti na mwonekao wao wa ndani, Yesu alikuwa akiliona kanisa hili kama kanisa lililoathiriwa na majivuno na kiburi, kwa sababu ya mafanikio ya nje wakati hali yao ya kutembea na Yesu ni mbaya sana, hawakuwa na lolote ambalo Yesu aliliona na kulisifia tofauti na makanisa mengine yale sita, Hali yao ya kujifikiri hawahitaji kitu iliwaongoza katika kupoa kiroho na kuwa vuguvugu, kuchukuliana na mafundisho potofu, kutokuitetea imani, na kupoa kiroho huku wakibaki na hali ya udunia uliokithiri jambo ambalo lilipelekea Yesu awakemee.

 

Ufunuo 3:16 “Basi, kwa sababu una uvuguvugu, wala hu baridi wala moto, nitakutapika utoke katika kinywa changu.”

               

Yesu aliwataka watubu na kubadilika aliwataka waifahamu hali yao ya ndani ambayo ni mbaya sana 

 

Ufunuo 3:18 “Nakupa shauri, ununue kwangu dhahabu iliyosafishwa kwa moto, upate kuwa tajiri, na mavazi meupe upate kuvaa, aibu ya uchi wako isionekane, na dawa ya macho ya kujipaka macho yako, upate kuona.”

 

Utajiri wa kweli ni utajiri wa kiroho ambao unapatikana kwa Imani na uvumilivu, Yesu anawashauri wanunue kwake vazi lililo bora, jeupe, waufunike uchi wao, Huku akiwataka wapate dawa ya kuona vizuri kwani macho yao na akili zao zimepofushwa, haki ya kweli ni ile inayopatikana kwa njia ya imani katika Kristo Yesu, na ni kupitia yeye tunaweza kuangaziwa na kuiona nuru ya Mungu itakayotupa ufahamu utakaotufanya tutembee kwa unyenyekevu. Haimaanishi kuwa Yeu yuko kinyume na utajiri na mafanikio ya mwilini, Lakini Yesu alitaka hali yao ya nje ingeanzia ndani yaani wangekuwa matajiri ndani katika roho zao kwanza lakini badala yake ikawa kinyume, Bwana alipe neema kanisa la leo, kuwa na utajiri wa rohoni na mwilini na mafanikio ya rohoni na mwilini pia.

Tajiri lakini Masikini

Kanisa la Laodikia linaweza kuwa linawakilisha mtu fulani au kanisa fulani, katika siku za leo watu huoanisha mafanikio ya kimwili na mafanikio ya kiroho, wanadhani kumiliki mali na kuwa na mafanikio ni kuwa sawa kiroho au ni kuwa na baraka kubwa za Rohoni, jambo ambalo linawapelekea watu kuwa na kiburi na majivuno, Hali ya mafanikio ya kimwili na kuwa na vitu vingi vya mwilini sio mbaya lakini vina mchango mkubwa sana wa kutupa kiburi na majivuno na zaidi sana kuziba masikio yetu na macho yetu ya rohoni yanayoweza kusaidia kuona uhalisia wetu na hali zetu za kiroho, Lazima wakati wote tukumbuke kujipima kuwa ujasiri wetu unatokana na nini? mali tulizo nazo au hali yetu ya kiroho, Yesu Kristo akiwa ndio mzabibu wa kweli?

Maneno ya Bwana Yesu yanamkumbusha kila mmoja wetu leo kujipima kiroho chake na kujiangalia hali yake ya kiroho na kutafuta kwa kina na mapana na marefu utajiri wa Rohoni, na uhusiano wenye nguvu na Yesu Kristo Bwana wetu Bwana wa utukufu, hatuna budi kuwa na moyo mkubwa wa kuutafuta mafanikio ya kiroho yaani utajiri wa imani na mengine yakawa ni maswala yanayofuata tu

Yakobo 2:5 “Ndugu zangu wapenzi, sikilizeni, Je! Mungu hakuwachagua maskini wa dunia wawe matajiri wa imani na warithi wa ufalme aliowaahidia wampendao? ”

Mathayo 6:33 “Bali utafuteni kwanza ufalme wake, na haki yake; na hayo yote mtazidishiwa.”

Yesu analitaka kanisa la Laodikia kubadilika au kugeuka, toba maana yake ni kugeuka, na kuwa waendelee kuutafuta uhusiano wao na yeye, ili waweze kuvikwa haki ya Kristo na kufuata muongozo wake, na kupata ufahamu wa Rohoni, na kubaki wakiwa wanyenyekevu, kutambua kuwa hakuna kitu wanahitaji na cha Muhimu duniani kama uhusiano wetu na Mungu, Tunamuhitaji Mungu katika kila eneo la maisha yetu, sisi wenyewe na mali zetu hatutoshi bila Mungu, tunamuhitaji Mungu. Mungu ndiye kila kitu katika maisha yetu!

Mungu sio kuwa hafurahii mafanikio Yetu, Mungu anafurahia sana sisi tufanikiwe lakini kamwe hatupaswi kumsahau Mungu wakati wa mafanikio, tatizo kubwa la kanisa la Laodikia walimfungia Yesu Mlango, walimuona hana maana tena, kwa sababu ya mafanikio yao kielimu, kimazingira, na mavazi na madawa na mabenki na maendeleo ya viwanda na uchumi imara na kila kitu hivyo walifikiri kuwa na hali zao za ndani zimebaki salama walijiona ni matajiri kumbe walikuwa masikini sana na uchi, wanyonge na wenye kuhitaji hifadhi, kujiona bora kuliko wengine ni kiburi na majivuno, kuwalaumu wengine kwa sababu zozote zile ni kujiona una kila kitu, wako watu leo wanaofikiri kuwa sasa hawamuhitaji Yesu kwa sababu wamejitosheleza katika kila kitu lakini Yesu akiwaangalia ni masikini, wako uchi na ni wanyonge, lolote lile ambalo linatupa kiburi katika maisha yetu lazima tuliweke kando na kutembea kwa unyenyekevu, tukimtegemea Mungu, na kumuamini yeye kwaajili ya mahitaji yetu yote.

Leo hii unawasikia watu wakisema Yesu Sio Mungu na ni watumishi wa Mungu lakini wanapata wapi ujasiri wa kutamka hayo leo hii ni kwa sababu sasa wametajirika kimwili, wameshiba ni kwa sababu wamefanikiwa na kwa sababu wamekuwa maarufu, na wamekuwa maarufu mpaka kufikia ngazi ya kupunguza umaarufu wa Yesu Kristo, lakini kiroho wamefilisika, hawasomi biblia kwa kina na kujua ya kuwa maandiko yenyewe ndio yanayosema Yesu ni Mungu na sio watu Fulani walioamua kuwa Yesu awe Mungu hiyo maana yake ni nini ni kwa sababu wameshiba, wamefanikiwa, ni maarufu, wanajulikana sasa wanaanza kumkufuru yeye aliyewaita na kumfungia mlango kaa nje Yesu wewe ni kiumbe tu wewe sio Mungu! Kanisa la Laodikia linawakilisha kanisa la leo ambao walifikiri kuwa wanaweza kujitosheleza, na Yesu alikuwa amefungiwa nje, ni wazi kuwa kanisa la Laodikia linawakilisha kanisa la siku za mwisho kihistoria ambalo litakumbwa na ukengeufu mkubwa, pamoja na kuwa na mafaniko ya kiuchumi na utajiri wa vitu vyenye kuonekana.

Utajiri mwingine ambao watu wanajivunia ni ule wa kufikiri kuwa wametimiza sheria yote ya Mungu na kuwa hakuna kitu wamebakiza! Lakini Kristo anapowaangalia anaona kuwa kuna changamoto kubwa zimebakia ndani yao.

Luka 18:18-24 “Tena, mtu mkubwa mmoja alimwuliza, akisema, Mwalimu mwema, nifanye nini ili nipate kuurithi uzima wa milele? Yesu akamwambia, Mbona unaniita mwema? Hakuna aliye mwema ila mmoja, naye ndiye Mungu. Wazijua amri; Usizini, Usiue, Usiibe, Usishuhudie uongo, Waheshimu baba yako na mama yako. Akasema, Hayo yote nimeyashika tangu utoto wangu. Yesu aliposikia hayo alimwambia, Umepungukiwa na neno moja bado; viuze ulivyo navyo vyote, ukawagawanyie maskini, nawe utakuwa na hazina mbinguni; kisha, njoo unifuate. Lakini aliposikia hayo alihuzunika sana, maana alikuwa na mali nyingi. Yesu alipoona vile alisema, Kwa shida gani wenye mali watauingia ufalme wa Mungu! ”

Hii ni aina nyingine ya utajiri, ni utajiri ambao mafarisayo wengi walikuwa nao, sijui kama watu wa leo wanaweza kuwa na utajiri huu, huu ni utajiri wa kujihesabia haki, kuishi maisha ya haki ni mpango wa Mungu lakini hatupaswi kutembea katika kiburi cha kidini na kudhani kuwa tunaweza kumnunua Mungu kwa matendo yetu, ni vigumu sana kujiona namna tulivyo na kiburi lakini Mungu anakiona na kwa Roho wake Mtakatifu anaweza kuikagua mioyo yetu na kuchunguza nia zetu na kutuonyesha namna na jinsi tunavyojifikiria kuwa ni bora kwa sababu tumetimiza kila kitu ambacho tunadhani ni matakwa ya sheria za kidini kama alivyokuwa mtu huyo hapo juu lakini kumbe dhambi ya ubinafsi ilikuwa inamuandama na hakuweza hata kushinda akionya juu ya tatizo hilo Yesu alitoa mfano huu kabla katika sura hiyo hiyo

Luka 18:9-14 “Akawaambia mfano huu watu waliojikinai ya kuwa wao ni wenye haki, wakiwadharau wengine wote. Watu wawili walipanda kwenda hekaluni kusali, mmoja Farisayo, wa pili mtoza ushuru. Yule Farisayo akasimama akiomba hivi moyoni mwake; Ee Mungu, nakushukuru kwa kuwa mimi si kama watu wengine, wanyang'anyi, wadhalimu, wazinzi, wala kama huyu mtoza ushuru. Mimi nafunga mara mbili kwa juma; hutoa zaka katika mapato yangu yote. Lakini yule mtoza ushuru alisimama mbali, wala hakuthubutu hata kuinua macho yake mbinguni, bali alijipiga-piga kifua akisema, Ee Mungu, uniwie radhi mimi mwenye dhambi.Nawaambia, huyu alishuka kwenda nyumbani kwake amehesabiwa haki kuliko yule; kwa maana kila ajikwezaye atadhiliwa, naye ajidhiliye atakwezwa.”

Hii ni aina nyingine ya mtu kujifikiri kuwa amejitosheleza lakini Yesu akipima anaona kuna changamoto kubwa ya watu kujihesabia haki, linapokuja swala la kuwa mbele za Mungu sisi ni masikini na vipofu na uchi, ni haki yake Yesu Kristo tu inayotosha kutusaidia kufanya kuhesabiwa haki mbele za Mungu na wala sio kwa juhudi zetu. Wakati unapojifikiria kuwa u tajiri kumbe Yesu anakuona ni masikini, wakati unapofikiri kuwa u mwenye haki, Yesu anakuona u uchi kabisa Bwana ampe neema kila mmoja wetu kumfanya Yesu Kristo kuwa utoshelevu wetu katika jina la Yesu Kristo amen!

Na Rev. Innocent Samuel Kamote

Mkuu wa wajenzi mwenye hekima.      

Bwana, ni nani atakayekaa Katika hema yako?

Zaburi 15:1-5 “Bwana, ni nani atakayekaa Katika hema yako? Ni nani atakayefanya maskani yake Katika kilima chako kitakatifu? Ni mtu aendaye kwa ukamilifu, Na kutenda haki. Asemaye kweli kwa moyo wake, Asiyesingizia kwa ulimi wake. Wala hakumtenda mwenziwe mabaya, Wala hakumsengenya jirani yake. Machoni pake mtu asiyefaa hudharauliwa, Bali huwaheshimu wamchao Bwana Ingawa ameapa kwa hasara yake, Hayabadili maneno yake. Hakutoa fedha yake apate kula riba, Hakutwaa rushwa amwangamize asiye na hatia. Mtu atendaye mambo hayo Hataondoshwa milele.”

 

Utangulizi:

Mojawapo ya siri muhimu ya mafanikio yetu na ustawi wetu wa kiroho na kimwili ni pamoja na kuwepo katika uwepo wa Mungu, uwepo wa Mungu katika maisha ya mwanadamu unaunganishwa na uhai wake, adhabu kubwa na mbaya kuliko zote anazoweza kuwa nayo mwanadamu ni kufukuzwa katika uwepo wa Mungu au Mungu kuondoa uwepo wake katika maisha yetu, Mungu akiondoa uwepo wake katika maisha yetu yeyote yule atakayetuona atatuua, Kaini alielewa ubaya wa kuondoka au kuondolewa katika uwepo wa Mungu (Kusitirika mbali na Uso wake).

Mwanzo 4:11-14 “Basi sasa, umelaaniwa wewe katika ardhi, iliyofumbua kinywa chake ipokee damu ya ndugu yako kwa mkono wako; utakapoilima ardhi haitakupa mazao yake; utakuwa mtoro na mtu asiye na kikao duniani. Kaini akamwambia BWANA, Adhabu yangu imenikulia kubwa, haichukuliki. Tazama, umenifukuza leo katika uso wa ardhi, nitasitirika mbali na uso wako, nami nitakuwa mtoro na mtu asiye na kikao duniani; hata itakuwa kila anionaye ataniua.”

Kuwa mbali na Uso wa Mungu kungeweza kusababisha kifo wakati wowote cha kiroho na kimwili pia, sio hivyo tu mambo yetu kuharibika, Na kutembea na kuwa katika uwepo wa Mungu kungeweza kusababisha mafanikio na ustawi katika maisha ya kila mwanadamu, na ndio maana kutengwa na Mungu ni kifo, ni adhabu mbaya na ya juu kabisa katika mamlaka ya uungu, tunawezaje kutoboa katika maisha haya, huduma, familia, uchumi na kila kitu bila uwepo wa Mungu?, Na ndio maana mwandishi wa zaburi anatupa kanuni kadhaa zitakazotusaidia kuendelea kukaa katika uwepo wa Mungu kwa kujibu swali hilo Bwana ni nani atakayekaa katika hema yako? Kwa msingi huo basi leo tutachukua muda kujifunza namna na jinsi tunavyoweza kukaa katika uwepo wa Mungu katika maisha yetu, na tutajifunza somo hili Bwana ni nani atakayekaa katika hema yako kwa kuzingatia vipengele vitatu vifuatavyo:-

·         Maana ya kukaa katika Hema ya Bwana

·         Bwana ni nani atakayekaa katika hema yako?

·         Faida za kukaa katika Hema ya Bwana.

Maana ya kukaa katika Hema ya Bwana.

Nyakati za agano la kale Mungu alipotaka kukutana au kuzungumza na kujifunua kwa watu wake alitoa maelekezo maalumu kwa Musa namna na jinsi ya kutengeneza nyumba maalumu yaani Hema ambayo ilitengenezwa kwa maelekezo ya Mungu kwa kusudi la kukutana na watu wake, au kwa kusudi la kuwa pamoja nao, Hema hii ilijulikana kama Hema ya kukutania, yaani mahali ambapo Mungu alikutana na watu wake kwa sababu zozote zile za kimwili na kiroho, kwa sababu hiyo awaye yote alipokuwa na changamoto yoyote na akawa anataka kusikia kutoka kwa Bwana alimjilia Musa na kuhani mkuu  Haruni ambaye angeingia katika hema hiyo na kupata maekezo kutoka kwa Bwana

Hesabu 12:4-5 “Bwana akanena ghafula na Musa, na Haruni na Miriamu, na kuwaambia, Tokeni nje ninyi watatu, mwende hemani mwa kukutania. Basi hao watatu wakatoka nje.Bwana akashuka katika nguzo ya wingu akasimama pale mlangoni pa Hema, akawaita Haruni na Miriamu, nao wakatoka nje wote wawili.”            

Kwa hiyo kimsingi hema ya Bwana ilikuwa ni mahali Muhimu pa kukutanisha uwepo wa Mungu na wanadamu hususani Israel kwa wakati ule walipokuwa safarini jangwani, na ni katika uwepo wa Mungu majibu ya changamoto zozote za kibinadamu yangeweza kutatuliwa, kwa ufupi hema ya bwana ilikuwa inawakilisha UWEPO WA MUNGU, na kwa bahati nzuri sasa uwepo huu wa Mungu katika nyakati za agano jipya unakaa ndani yetu. Kwa hiyo tunapodumisha uhusiano wetu na Mungu pia tunadumisha uwepo wake kwetu

Neno uwepo wa Mungu, katika kiingereza Gods’ Presence katika lugha ya kiebrania linatumika neno “Pānīm” ambalo maana yake ni USO yaani uwepo wa Mungu pia ulitambulika kama uso wa Mungu

Kutoka 33:14-16 “Akasema, Uso wangu utakwenda pamoja nawe, nami nitakupa raha. Naye akamwambia, Uso wako usipokwenda pamoja nami, usituchukue kutoka hapa. Kwa maana itajulikanaje kuwa nimepata neema mbele zako, mimi na watu wako? Siyo kwa sababu unakwenda pamoja nasi, hata mimi na watu wako tutengwe na watu wote walio juu ya uso wa nchi?”

Unaona? Kwa hiyo nyakati za agano la kale watu waliotutangulia walikuwa na ufahamu wa kutosha kuwa bila uso wa Mungu, bila uwepo wa Mungu hawawezi kufanikiwa na wala hawawezi kupata neema, lakini sio hivyo tu uwepo wa Mungu ungeweza kuwatofautisha watu wa Mungu na watu wengine wote wakaao juu ya uso wa nchi.

Uwepo wa Mungu au uso wa Mungu pia ulikuwa unamwakilisha Roho Mtakatifu ambaye katika agano la kale vilevile alijulikana kama Malaika wa uso wake. (The Angel of his Presence).

Isaya 63:9-10 “Katika mateso yao yote yeye aliteswa, na malaika wa uso wake akawaokoa; kwa mapenzi yake, na huruma zake, aliwakomboa mwenyewe; akawainua, akawachukua siku zote za kale. Lakini wakaasi, wakamhuzunisha Roho yake Mtakatifu; kwa hiyo akawageukia, akawa adui, akapigana nao.”

Unaweza kuona; Kwa hiyo swali kama hili la mwandishi wa zaburi Bwana ni nani atakayekaa katika hema yako? Ni sawa na kuuliza ni nani atakayetembea na uwepo wa Mungu, ni nani atakayekaa mbele za uso wako, ni nani atakuwa na Roho wako Mtakatifu, kwa hiyo ni zaburi Muhimu inayotuonyesha na kutukumbusha namna ya kukaa katika uwepo wa Mungu na kuhakikisha kuwa katika maisha yetu Bwana hatuondolei Roho wake Mtakatifu ambaye kimsingi tukitengwa naye kila kitu kitakuwa kimefikia mwisho na mafanikio yetu ya kiroho na hata kimwili yanaweza kuwa matatani, kwa hiyo kutengwa na Uso wa Mungu ilikuwa pia ina maana ya kuondoka kwa Roho Mtakatifu katika maisha yetu Bwana ampe neema kila mmoja wetu kuendelea kukaa katika uwepo wa Mungu siku zote za maisha yetu Katika jina la Yesu Kristo Amen

Zaburi 51:10-12 “Ee Mungu, uniumbie moyo safi, Uifanye upya roho iliyotulia ndani yangu Usinitenge na uso wako, Wala roho yako mtakatifu usiniondolee. Unirudishie furaha ya wokovu wako; Unitegemeze kwa roho ya wepesi.”

1Samuel 16:14 “Basi, roho ya Bwana ilikuwa imemwacha Sauli, na roho mbaya kutoka kwa Bwana ikamsumbua.”

 

Bwana ni nani atakayekaa katika hema yako?

Zaburi 15:1-5 “Bwana, ni nani atakayekaa Katika hema yako? Ni nani atakayefanya maskani yake Katika kilima chako kitakatifu? Ni mtu aendaye kwa ukamilifu, Na kutenda haki. Asemaye kweli kwa moyo wake, Asiyesingizia kwa ulimi wake. Wala hakumtenda mwenziwe mabaya, Wala hakumsengenya jirani yake. Machoni pake mtu asiyefaa hudharauliwa, Bali huwaheshimu wamchao Bwana Ingawa ameapa kwa hasara yake, Hayabadili maneno yake. Hakutoa fedha yake apate kula riba, Hakutwaa rushwa amwangamize asiye na hatia. Mtu atendaye mambo hayo Hataondoshwa milele.”

Mwandishi wa zaburi ameandika katika mtindo wa kuuliza swali, na kisha anajaribu kutoa majibu ya swali hilo yeye mwenyewe, anauliza ni Ni mtu wa namna gani anayeweza kudumisha uhusiano wa ukaribu na Mungu, ni nani anayeweza kutunza uwepo wa Mungu, ni mtu wa namna gani ambaye Roho Mtakatifu atapenda kufanya makazi naye na anataja maswala kadhaa ambayo kwa mtazamo wake yanaweza kuleta huzuni kwa Roho Mtakatifu au kusababisha uwepo wake upungue au kuondoka katika maisha yetu? Kwani kupoteza uwepo wa Mungu ni kupoteza kila kitu katika maisha yetu Mwandishi anatupa mambo kadhaa ya kufanya au ya kujiepusha nayo ili kutunza uwepo wa Mungu katika maisha yetu na kunufaika na uwepo wa Mungu ambao ni wa Muhimu sana katika maisha yetu.

1.       Kuenenda kwa ukamilifu – Mwandishi anaeleza kuwa sifa mojawapo ya mtu anayeweza kukaa katika uwepo wa Mungu ni pamoja na mtu aendaye kwa ukamilifu hii maana yake ni nini? Tunawezaje kuenenda kwa ukamilifu, neno kwa ukamilifu katika biblia ya kiebrania linasomeka kama “tâmîym” ambalo maana yake mtu aendaye kwa usahihi katika mawazo na maneno na matendo, huyu ni mtu ambaye anachokisema ndicho alichokimaanisha na ndicho atakachotenda kwa hiyo ni mtu asiye na hila, tunaishi katika nyakati ambazo watu wengi wamekuwa wanafiki au wenye hila, kile anachokisema na moyo wake hauendani au muonekano wake na matendo yake ni vitu viwili tofauti, tabia ya unafiki ambao kimsingi anayeweza kuichungulia ni Mungu ni tabia inayomuhuzunisha sana Roho Mtakatifu, Dunia inakabiliwa na ombwe kubwa la watu ambao hawajanyooka Jambo ambalo Yesu aliliona katika mioyo na matendo ya Mafarisayo

 

Mathayo 23:1-3 “Kisha Yesu akawaambia makutano na wanafunzi wake, akasema, Waandishi na Mafarisayo wameketi katika kiti cha Musa; basi, yo yote watakayowaambia, myashike na kuyatenda; lakini kwa mfano wa matendo yao, msitende; maana wao hunena lakini hawatendi.”

 

2.       Kutenda Haki – Kutenda haki katika lugha ya kiebrania wanatumia neno “tsedeq” ambalo kwa kiingereza ni “equity” au Fairness au Justice in the way people are treated yaani ni kutenda haki, na usawa unapowahudumia watu yaani bila upendeleo, kwa hiyo kama mtu huyu ni hakimu basi maana yake anasimamia haki, kama ni mwana siasa anasimamia usawa anatoa haki sawa, Katika agano jipya neno hilo linaenda mbali zaidi kwani neno linalotumika katika kiyunani ni “Poieō” ambalo maana yake ni kutoa haki ya mtu kwa uwazi bila kuichelewesha to make an apparently justice or equity without prolonged, Mtu anayetenda haki bila kuichelewesha hakuna udhalimu kwake amenyooka siku za leo kuna changamoto kubwa sana katika sehemu nyingi kwa sababu hata kama kitu ni haki yako unaweza ukakipata kwa kucheleweshwa sana, au kwa kuzungusha zungushwa njoo leo njoo kesho hii ni aina ya udhalimu ambayo inaondoa sana na kupoteza uwepo wa Mungu kila mahali kuna urasimu, wengine wanapewa haki yao upesi wengine unawachelewesha, kutokutoa haki ya mtu upesi ni mojawapo ya udhalimu mkubwa kimaandiko:-

 

Luka 18:1-8 “Akawaambia mfano, ya kwamba imewapasa kumwomba Mungu sikuzote, wala wasikate tamaa. Akasema, Palikuwa na kadhi katika mji fulani, hamchi Mungu, wala hajali watu. Na katika mji huo palikuwa na mwanamke mjane, aliyekuwa akimwendea-endea, akisema, Nipatie haki na adui wangu. Naye kwa muda alikataa; halafu akasema moyoni mwake, Ijapokuwa simchi Mungu wala sijali watu, lakini, kwa kuwa mjane huyu ananiudhi, nitampatia haki yake, asije akanichosha kwa kunijia daima. Bwana akasema, Sikilizeni asemavyo yule kadhi dhalimu. Na Mungu, je! Hatawapatia haki wateule wake wanaomlilia mchana na usiku, naye ni mvumilivu kwao? Nawaambia, atawapatia haki upesi; walakini, atakapokuja Mwana wa Adamu, je! Ataiona imani duniani? ”

 

Haki iliyocheleweshwa ni sawa na haki iliyonyimwa, Mungu hacheleweshi haki ya Mtu, lakini watu dhalimu wasiomcha Mungu huchelewesha huduma kwa watu, unaweza kucheleweshwa hospitali, unaweza kucheleweshwa polisi, unaweza kucheleweshwa mahakamani, unaweza kuchelewesha benki na fedha ni ya kwako, unaweza kucheleweshwa kwenye maofisi ya watu na asiwepo wa kukujali wala kukuhudumia, unaweza kuchelewesha standi na mnasafiri lakini basi haliondoki kwa wakati, mnaweza kucheleweshwa malipo yako ya kustaafu, mnaweza kucheleweshwa mshahara, na kadhalika wako watu ambao wakifanya hayo na kuweka mlolongo mrefu wa kuwahudumia watu wanadhani ndio sifa lakini maandiko yanaonyesha ya kuwa urasimu na upendeleo sio tabia ya uungu na inafifisha uwepo wake wahudumie watu kwa haraka sana wapatie haki yao upesi, na usione sifa kuwapanga watu kwenye foleni, au kuchelewesha malipo ya watu na hili ni mojawapo ya tatizo kubwa sana hasa kwa wahasibu katika maeneno mbalimbali.

 

1Yohana 3:7 “Watoto wadogo, mtu na asiwadanganye; atendaye haki yuna haki, kama yeye alivyo na haki;”

 

3.       Asemaye kweli kwa moyo wake -  Mtu anayesema kweli moyoni mwake kwa kiebrania anaitwa “Emeth” yaani ni mtu wa kuaminika “trustworthiness” mtu anayesema anachokitenda, changamoto kama hii ilimgharimu sana Sauli na huenda Daudi alikuwa amejifunza kuwa ni lazima mtu usimamie kile unachokitamka,  watu wanaovunja ahadi sio watu wa kuaminika, lakini wale wanaotunza ahadi hao tunaweza kuwaamini na uwepo wa Mungu hukaa na watu ambao wanasema kweli, kutoka moyoni anachokisema ndicho atakachokitekeleza, je kiongozi wako wewe anachokisema ndicho anachotekeleza? Wewe mwenyewe na mimi je tunaweza kuaminiwa hata katika ngazi ya familia yetu? Mumeo, mkeo au watoto wako wanaweza kukuamini kwamba ukisema kitu unakisimamia? Kiongozi wa kisiasa uliyemchagua au kokote kule je anasema kweli kwa moyo wake? Anachokiahidi anakitekeleza? Dunia inakosa watu wa aina hii katika nyakati za leo ambao anachokisema sio wanachokitekeleza, Mungu anasikitishwa sana na uwepo wake unaweza kumuacha mtu asiyeaminika, mtu ambaye ndio yake si ndio na sio yake ni ndio  ndumilakuwili

 

1Samuel 15:1-14 “Wakati huo Samweli akamwambia Sauli, Bwana alinipeleka nikutie mafuta, uwe mfalme wa watu wake Israeli; basi sasa, isikilize sauti na maneno ya Bwana. Bwana wa majeshi asema hivi, Nimeyatia moyoni mwangu mambo hayo Amaleki waliyowatenda Israeli, jinsi walivyowapinga njiani, hapo walipopanda kutoka Misri. Basi sasa enda ukawapige Amaleki, na kuviharibu kabisa vitu vyote walivyo navyo, wala msiwaachilie; bali waueni, mwanamume na mwanamke, mtoto naye anyonyaye, ng'ombe na kondoo, ngamia na punda. Ndipo Sauli akawaita watu, akawahesabu huko Telemu, askari waliopanda farasi mia mbili elfu, na watu wa Yuda kumi elfu. Sauli akaufikilia mji wa Amaleki, akauvizia bondeni. Sauli akawaambia Wakeni, Haya! Enendeni zenu, mkashuke ili kujitenga na Waamaleki, nisije nikawaangamiza ninyi pamoja nao; maana mliwatendea wana wa Israeli mema, walipopanda kutoka Misri. Basi hao Wakeni wakaondoka, wakajitenga na Waamaleki. Sauli akawapiga Waamaleki, toka Havila uendapo Shuri, unaokabili Misri. Akamkamata Agagi, mfalme wa Waamaleki, yu hai, akawaangamiza hao watu wote kwa upanga. Lakini Sauli na watu wake wakamwacha Agagi hai, na katika kondoo walio wazuri, na ng'ombe, na vinono, na wana-kondoo, na cho chote kilicho chema, wala hawakukubali kuwaangamiza; bali cho chote kilichokuwa kibaya na kibovu, ndicho walichokiangamiza kabisa. Ndipo neno la Bwana likamjia Samweli, kusema, Najuta kwa sababu nimemtawaza Sauli awe mfalme; maana amerudi nyuma, asinifuate, wala hakufanya nilivyomwamuru. Samweli akasikitika, akamlilia Bwana usiku kucha. Samweli akaondoka asubuhi na mapema ili aonane na Sauli; Samweli akaambiwa ya kwamba, Sauli alifika Karmeli, na tazama, akajisimamishia ukumbusho, akageuka, akapita, akatelemkia Gilgali. Samweli akamwendea Sauli; naye Sauli akamwambia, Ubarikiwe na Bwana, nimeitimiza amri ya Bwana. Samweli akasema, Maana yake nini, basi, hiki kilio cha kondoo masikioni mwangu, na huu mlio wa ng'ombe ninaousikia? ”

 

4.       Asiyesingizia kwa ulimi wake - Kusingizia kwa ulimi katika lugha ya kiebrania linatumika neno “Râgal” ambalo kwa kiingereza tunapata neno “Slander” na “backbite” ambalo maana yake ni kusengenya, au kumtengezea mtu Kashfa, kutengeneza maswala ya uongo dhidi ya mtu mwingine kwa kusudi la kuharibu sifa zake au kumchafua au kumuharibia hii iko kinyume na amri ya Mungu usishuhudie uongo Kutoka 20:16 “Usimshuhudie jirani yako uongo.” Mtu anayesengenya na kutoa ushahidi wa uongo kwa nia ya kuharibu heshima ya mtu mwingine mtu huyo anaingizwa kwenye kundi la vitu vinavyomchukiza sana Mungu, Roho Mtakatifu ni Roho wa kweli, tunaposhuhudia uongo anaumia sana na anaweza kujiondoa taratibu katika maisha yetu na ukakosa kukaa katika uwepo wake, watu wengi waliookoka wanasengenya sana, wamepona katika maeneo mengi lakini kusengenya inaonekana kama jambo la kawaida hakuna anayechukia kusengenya, unakuta watu waliookoka ndio wanaongoza kusema mabaya ya walokole wenzao na kuwachafua, Masengenyo, kusingizia kuwchafua watu na kuwaema watu vibaya ni kawaida tu katika kanisa

 

Mithali 6:16-19 “Kuna vitu sita anavyovichukia Bwana; Naam, viko saba vilivyo chukizo kwake. Macho ya kiburi, ulimi wa uongo, Na mikono imwagayo damu isiyo na hatia; Moyo uwazao mawazo mabaya; Miguu iliyo myepesi kukimbilia maovu; Shahidi wa uongo asemaye uongo; Naye apandaye mbegu za fitina kati ya ndugu.”

 

Dalili za kilele cha uharibifu wa moyo wa mwanadamu, au kuonyesha kuwa watu ni waovu ni pamoja na kusingizia, Je leo hakuna malalamiko ya watu wanaowasingizia wengine? Au kuzungumza mambo ambayo hawana uhakika nayo, wala wasiyoyajua kwa usahihi, Wako watu wengi sana wamesingiziwa mambo yasiyofaa, wengine wamefungwa kwa sababu ya kusingiziwa, wengine wameharibiwa heshima zao, Daudi anaona kuwa kusingizia watu kutengenezea watu uongo (skendo) kama moja ya changamoto itakayomkosesha mtu anayetaka kukaa katika hema ya Mungu, kumbuka Yezebeli alivyofanya kwa Nabothi na kusababisha mauti yake kwa sababu ya moyo wa tamaa, wako watu wengi sana wanaumizwa katika maisha kwa sababu tu ya watu ambao wanasingizia wengine, au kutoa ushahidi wa uongo na kuharibia watu maisha yao na haki kupindishwa, usitoe maneno ya uwongo kwa kusudi la kumdhuru mtu mwingine.

 

1Wafalme 21:1-16 “Ikawa baada ya hayo, Nabothi Myezreeli alikuwa na shamba la mizabibu katika Yezreeli, karibu na nyumba ya kifalme ya Ahabu mfalme wa Samaria. Ahabu akasema na Nabothi, akamwambia, Nipe shamba lako la mizabibu nilifanye shamba la mboga, maana ni karibu na nyumba yangu; nami nitakupa badala yake shamba la mizabibu lililo zuri zaidi; au ukipenda, nitakupa fedha sawasawa na thamani yake. Nabothi akamwambia Ahabu, Bwana apishe mbali nikupe wewe urithi wa baba zangu. Basi Ahabu akaenda nyumbani kwake, ana moyo mzito, tena amekasirika, kwa sababu ya neno lile aliloambiwa na Nabothi Myezreeli, akisema, Sitakupa urithi wa baba zangu. Akajilaza kitandani pake, akageuza uso wake, akakataa kula. Lakini Yezebeli mkewe akamwendea, akamwambia, Kwa nini roho yako ina huzuni hata usile chakula? Akamwambia, Kwa sababu nimesema na Nabothi Myezreeli, nikamwambia, Unipe shamba lako la mizabibu kwa fedha, au, ukipenda, nitakupa shamba la mizabibu lingine badala yake. Akajibu, Sitakupa shamba langu la mizabibu. Yezebeli mkewe akamwambia, Je! Sasa wewe unaumiliki ufalme wa Israeli? Ondoka, ule chakula, moyo wako ufurahi; mimi nitakupa shamba la mizabibu la Nabothi Myezreeli. Basi, akaandika nyaraka kwa jina la Ahabu, akazitia muhuri yake, akazipeleka zile nyaraka kwa wazee, na kwa watu wenye nguvu waliokuwa katika mji wake, waliokaa pamoja na Nabothi. Akaandika katika zile nyaraka, akasema, Pigeni mbiu ya watu kufunga, mkamweke Nabothi juu mbele ya watu, mkainue watu wawili, watu wasiofaa, ili wamshitaki, na kumshuhudia, kunena, Umemtukana Mungu na mfalme. Kisha mchukueni nje, mkampige kwa mawe, ili afe. Wale wazee wa mji wake, na walio wenye nguvu waliokaa mjini mwake, wakafanya kama Yezebeli alivyowaagiza, kama ilivyoandikwa katika nyaraka alizowapelekea. Wakapiga mbiu ya watu kufunga, wakamweka Nabothi juu mbele ya watu.Na hao watu wawili, watu wasiofaa, wakaingia, wakaketi mbele yake; wale watu wasiofaa wakamshuhudia Nabothi mbele ya watu, wakasema, Nabothi amemtukana Mungu na mfalme. Ndipo wakamchukua nje ya mji, wakampiga kwa mawe hata akafa. Wakampelekea Yezebeli habari, wakasema, Nabothi amepigwa kwa mawe, amekufa.Ikawa Yezebeli aliposikia ya kwamba Nabothi amepigwa kwa mawe na kufa, Yezebeli akamwambia Ahabu, Inuka, ulitamalaki shamba la mizabibu la Nabothi Myezreeli, alilokataa kukupa kwa fedha, maana Nabothi hako hai, lakini amekufa.Ikawa Ahabu aliposikia ya kwamba Nabothi amekufa, akaondoka, alitelemkie shamba la mizabibu la Nabothi Myezreeli, ili alitamalaki.”       

 

5.       Wala hakumtenda mwenziwe mabaya – Kumtenda mtu mabaya katika lugha ya kiebrania kunatumika neno “ra’ râ’âh” kwa kiingereza wickedness, bad au evil ni mtindo mzima wa maisha yasiyo ya haki, yasiyoheshimu utu, yasiyo ya kweli, ya tamaa, ya uovu, yaliyojaa dhambi, ni mfumo mzima usiokubalika kwa Mungu, kuanzia mawazo mabaya mpaka na matendo yake hali hii inaweza kupelekea Mungu kuangamiza ulimwengu au kuondoa uwepo wake kwa mwanadamu na kumuacha aenende katika upotofu wake.

 

Mwanzo 6:5-6 “BWANA akaona ya kuwa maovu ya mwanadamu ni makubwa duniani na kwamba kila kusudi analowaza moyoni mwake ni baya tu sikuzote. BWANA akaghairi kwa kuwa amemfanya mwanadamu duniani, akahuzunika moyo.”

 

Hakisha wakati wote haumleti mwanadamu mwenzio katika hatua ambayo atajutia na kuhuzunkia na kuwa na msongo wa mawazo na kusikitika kutokana na dhuluma atakayokuwa ametendewa

 

6.       Muovu ni muovu na mwema ni mwema – Zaburi 15:4 “Machoni pake mtu asiyefaa hudharauliwa, Bali huwaheshimu wamchao Bwana Ingawa ameapa kwa hasara yake, Hayabadili maneno yake.”  Uwepo wa Mungu unakaa na watu ambao kwao sheria ya Mungu na maneno yao hayabadiliki, kama kitu ni uovu husimama kama kiovu na kama kitu ni chema husimama katika wema huo, uwepo wa Mungu haukai na watu wanaobadili haki ya Mungu kuwa kitu kingine wala hawana upendeleo, hawawezi kuwafurahia wanaotenda udhalimu na kuwakubali kana kwamba wanasimama na kweli, wao husimama na kweli na kuifurahia kweli wakati wote,  wanadamu wanapoharibika huwa na tabia ya kubadilisha mambo, jambo linaweza kuwa baya na jamii iliyokengeuka ikaona kuwa jambo hilo ni sawa tabia za aina hiyo huondoa uwepo wa Mungu, mfano kule Korintho katika kanisa lililokuwako kuna mtu alikuwa na mke wa baba yake na kanisa lilikuwa linaona poa tu, watu wanavaa nusu uchi na unaona poa tu, watu wanakula rushwa na unaona poa tu yaani hawasikitiki pale ukengeufu unapotokea, maovu yanaweza kutendeka na ikaonekana sawa tu

 

1Wakorintho 5:1-3 “Yakini habari imeenea ya kuwa kwenu kuna zinaa, na zinaa ya namna isiyokuwako hata katika Mataifa, kwamba mtu awe na mke wa babaye. Nanyi mwajivuna, wala hamkusikitika, ili kwamba aondolewe miongoni mwenu huyo aliyetenda jambo hilo. Kwa maana kweli, nisipokuwapo kwa mwili, lakini nikiwapo kwa roho, mimi mwenyewe nimekwisha kumhukumu yeye aliyetenda jambo hilo, kana kwamba nikiwapo.”

 

Isaya 5:20 “Ole wao wasemao kwamba uovu ni wema, na kwamba wema ni uovu; watiao giza badala ya nuru, na nuru badala ya giza; watiao uchungu badala ya utamu, na utamu badala ya uchungu! ”

 

Mungu anapendezwa na jamii iliyonyooka hakuna kubadili badili, kama ndoa za jinsi moja ni mbaya dunia isimame na kukemea kuwa huu ni uovu usiokubalika, haiwezekanani jambo likawa baya alafu kanisa linapata kigugumizi cha kukemea na kusema hili ni baya ndoa za jinsi moja haziruhusiwi kufungwa kanisani wala kanisa haliwezi kuhalalisha ni muhimu kulikemea hilo kama lilivyo bila kupaka mafuta kwa kisingizi cha haki za binadamu, kama kitu ni kiovu tukikemee, na kama kitu ni chema tikitie moyo, Mtu atakayekaa katika uwepo wa Mungu ni mtu asiyepinda pinda kwake yeye mwema ni mwema na muovu ni muovu hakuna kupaka rangi, hakuna kujivunia, kumekuweko na makanisa ambayo yanatetea ushoga na usagaji ati kwa sababu watu hao wana fedha sana na kwa hila wanaingiza aina ya mafundisho Fulani ya kutaka kanisa likubaliane na jambo hilo Maandiko yanasema hata sadaka na malipo ya watu hao yasipokelewe wala kuletwa katika nyumba ya Mungu angalia maandiko

 

Kumbukumbu 23:18 “Usilete ujira wa kahaba, wala mshahara wa mbwa, katika nyumba ya Bwana, Mungu wako, kwa ajili ya nadhiri yo yote; kwani haya ni machukizo kwa Bwana, Mungu wako, yote mawili.”

 

Fedha za makahaba na mshahara wa mbwa ni fedha za watu wanaoishi maisha ya kimalaya, kisagaji na kishoga hawa Mungu amekataa kukubaliana nao na kusema ni watu wema tukikaribisha hali hii kokote pale uwepo wa Mungu utaondoka, tuwanyooshee maelezo kwamba watubu na kubadilika na kumpokea Yesu na kuwa watu wema vinginevyo neno la Mungu halikubali kuchukuliana na uovu, uovu ni uovu na wema ni wema

 

7.       Hakutoa fedha yake apate kula riba – Nyakati za Agano la kale Mungu alikuwa amewakataza wana wa Israel, wanapokopesha waisrael wenzao wasitwae riba, lakini wangeweza kuchukua riba kwa wageni, sheria hii inafanya kazi pia kwa waislamu, muislamu hapaswi kumkopesha muislamu mwenzake kwa riba, na hata akiweka fedha Benki na ikazalisha faida hachukui ile faida na ndio maana wana benki maalumu za kutokuchukua riba, hii inaweza kuwa sawa kwa Mkristo pia kwamba asichukue riba kwa Mkristo mwenzake, leo hii dunia imeingia katika wimbi kubwa sana la mikopo yenye riba kubwa sana na ambazo zimesababisha mateso makubwa sana katika jamii, iko mikopo ambayo ina riba kubwa sana kwa sababu watu wanataka faida kubwa kupitia fedha aliyoazimisha, maisha ya watu wengi yameumizwa, watu wameweka rehani vitu vyao na watu wameaibishana kwa sababu ya moyo wa tamaa wa kutaka Riba, watu wengi sana wamejikosesha Baraka kwa sababu ya kutaka riba kubwa na faida kubwa hata  kwa ndugu zao bila kujali uchaji wa Mungu, na ndio maana hali inazidi kuwa mbaya duniani kila iitwapo leo, unakopa laki moja mtu anataka arudishiwe laki na nusu au zaidi, kwa hiyo kwa sababu ya shida watu hukopa lakini wanashindwa kuzalisha ile riba na hivyo kujikuta wakiwa wahanga wa mikopo na kudhalilika vibaya Mungu alikataa jambo hili.  Unaweza kulifanya kwa mtu asiye wa imani yako lakini sio kwa ndugu yako kumbuka hilo usisahau. Daudi anasema atoaye fedha ili apate kula riba uwepo wa Mungu huondoka kake na Bwana hawezi kufanya maskiani na mtu wa namna hiyo, mikopo imetesa wengi katika miaka ya hivi karibuni kuliko lolote, tumesikia leo hii mikopo yenye majina ya kukomoa sana na kusikitisha mfano mkopo kausha damu, au mikopo umiza na kadhalikamikopo hiyo imeumiza watu  na  watu wanadaiana mpaka wanauana, huku ndiko jamii inakokwenda leo kwa sababu ya kutaka riba kubwa sana wakati wa marejesho,  na wakati mwingine mikopo hiyo umiza ina masharti yasiyo wazi na wala haioneshi kiwango cha marejesho, watu wamedhalilishwa, watu wamepoteza mali zao, watu wamekimbia miji, na wengine kupoteza maisha wengine nyumba zimeandikwa ukutani nyumba inauzwa, au rejesha mkopo wa watu banki na kadhalika maumivu haya wanayoyapata watu yanachangia kuleta laana katika taifa na kuondoa uwepo wa Mungu, ndio maana Mungu hakutaka riba.

 

Kumbukumbu 23:19-20 “Usimkopeshe ndugu yako kwa riba; riba ya fedha, riba ya vyakula, riba ya kitu cho chote kikopeshwacho kwa riba; mgeni waweza kumkopesha kwa riba, ila usimkopeshe ndugu yako kwa riba; ili Bwana, Mungu wako, apate kukubarikia katika yote utiayo mkono wako, katika nchi uingiayo kuimiliki.”                           

 

8.       Hakutwaa rushwa amwangamize asiye na hatia – Moja ya changamoto kubwa ambayo inaikabli jamii inayoharibika ni pamoja na Rushwa, rushwa katika mazingira yoyote ile inaaathiri utoaji wa haki na kusababisha dhuluma, lakini sio hivyo tu upendeleo pia ni dhuluma ni rushwa maandiko yamekataza, ni kupitia rushwa unaweza kuona jamii ikiumziwa kila iitwapo leo na haki ikipindishwa rushwa ni adui wa haki

 

Kumbukumbu 16:18-20 “Weka waamuzi na maakida katika malango yako yote akupayo Bwana, Mungu wako, kwa hesabu ya kabila zako; nao wawaamue watu kwa maamuzi ya haki.Usipotoe maamuzi; wala usipendelee uso wa mtu; wala usitwae rushwa; kwa kuwa rushwa hupofusha macho ya wenye akili, na kugeuza daawa ya wenye haki.Yaliyo haki kabisa ndiyo utakayoyafuata, ili upate kuishi na kuirithi nchi upewayo na Bwana, Mungu wako.”

 

Yakobo 2:1-4 “Ndugu zangu, imani ya Bwana wetu Yesu Kristo, Bwana wa utukufu, msiwe nayo kwa kupendelea watu.Maana akiingia katika sinagogi lenu mtu mwenye pete ya dhahabu na mavazi mazuri; kisha akiingia na maskini, mwenye mavazi mabovu; nanyi mkimstahi yule aliyevaa mavazi mazuri, na kumwambia, Keti wewe hapa mahali pazuri; na kumwambia yule maskini, Simama wewe pale, au keti miguuni pangu, je! Hamkufanya hitilafu mioyoni mwenu, mkawa waamuzi wenye mawazo mabovu? ”

 

Je wewe unapokea rushwa? Je wewe unapendelea watu? Ukitaka kujua ubaya wa maamuzi mabaya shabikia mpira kisha uone timu yako ikifungwa goli la uonevu tu aidha kwa sababu refa yaani mwamuzi ameamua kuipendelea timu Fulani,  au kuibeba ule uchungu na maumivu yanayowapata wale waliofungwa kwa kukosa haki ndio uchungu ambao maandiko unataka tuyaepuke, au pale mnaenda kwenye sanduku la kura na kumchagua mtu Fulani kisha anayetangwazwa kwenye matokeo kama mshindi ni mtu mwingine ndio maana neno linatutaka kuhakikisha kuwa tunatenda haki na kutokupokea rushwa au kupendelea watu na kupotosha hukumu ya yule asiye na hatia, Bwana ni nani atakayekaa katika uwepo wa bwana ni mtu asiyepotosha hukumu mtu atendaye haki.

 

Faida za kukaa katika Hema ya Bwana

Neno la Mungu linahitimisha kwa kuonyesha ya kuwa kama tutayatendea kazi yale ambayo Mungu ametufunza hapo maana yake ni nini kila kitu katika maisha yetu kitadumu na uwepo wa Mungu utakuwa pamoja nasi siku zote hata milele angalia Daudi anasema atendayo hayo hataondoshwa.

Zaburi 15:1-5 “Bwana, ni nani atakayekaa Katika hema yako? Ni nani atakayefanya maskani yake Katika kilima chako kitakatifu? Ni mtu aendaye kwa ukamilifu, Na kutenda haki. Asemaye kweli kwa moyo wake, Asiyesingizia kwa ulimi wake. Wala hakumtenda mwenziwe mabaya, Wala hakumsengenya jirani yake. Machoni pake mtu asiyefaa hudharauliwa, Bali huwaheshimu wamchao Bwana Ingawa ameapa kwa hasara yake, Hayabadili maneno yake. Hakutoa fedha yake apate kula riba, Hakutwaa rushwa amwangamize asiye na hatia. Mtu atendaye mambo hayo Hataondoshwa milele.”

Unaona mtu atendaye mambo hayo hataondoshwa milele, mtu huyu atakuwa imara katika roho, mwili na ustawi kwa sababu uwepo wa Mungu utakuwa pamoja naye, uhusiano wake na Mungu utadumu na Mungu atakaa na mtu huyo, kwa vyovyote vile mtu hawezi kuna na sifa alizozitaja Daudi katika zaburi yake kama halijui neno la Mungu, maagizo hayo yote yako katika neno na ni mtu anayeyaangalia maagizo ya Bwana ni lazima atakuwa mtu mwenye roho iliyopondeka na anayelicha jina la Bwana au kutetemeka asikiapo neno lake mtu wa namna hii Bwana ameahidi kukaa naye katika uwepo wake

Isaya 66:2 “Maana mkono wangu ndio uliofanya hivi vyote, vitu hivi vyote vikapata kutokea, asema Bwana; lakini mtu huyu ndiye nitakayemwangalia, mtu aliye mnyonge, mwenye roho iliyopondeka, atetemekaye asikiapo neno langu.”

Mtu wa namna hii ni lazima atakuwa anamjua sana Mungu, na ni lazima atafanikwa na amani ya Mungu itakuwa juu yake, Ayubu 22:21 “Mjue sana Mungu, ili uwe na amani; Ndivyo mema yatakavyokujia.” Unapokuwa na uwepo wa Mungu Amani ya Mungu inakuwa ni sehemu ya maisha yako.

Mtu wa namna hii ni lazima atakuwa ni mtu anayemtumainia Mungu, na hana namna ya kupita shortcut – njia ya mkato kwa rushwa na kupindisha hukumu za watu, wala kutoa ushahidi wa uongo, kuishi kwa haki na ukamilifu wa moyo kunataka wakati wote uwe ni mtu unayemtegemea Mungu na Mungu hataacha kumbariki mtu wa namna hiyo kwa hiyo mtu huyo hufunikwa na Baraka za Mungu.

Yeremia 17:7-8. “Amebarikiwa mtu yule anayemtegemea Bwana, Ambaye Bwana ni tumaini Lake. Maana atakuwa kama mti uliopandwa kando ya maji, Uenezao mizizi yake karibu na mto; Hautaona hofu wakati wa hari ujapo, Bali jani lake litakuwa bichi; Wala hautahangaika mwaka wa uchache wa mvua, Wala hautaacha kuzaa matunda.”

Zaidi ya yote mtu huyu ataurithi uzima wa milele kukaa katika hema ya Mungu maana yake sio tu kufurahia uwepo wake tuwapo duniani, lakini vile vile Mungu atakaa pamoja nasi Daima kumbuka wazo la Mungu la ile hema ya kukutania ilikuwa ile maskani ya Mungu iwe pamoja na wanadamu Milele.

Ufunuo 21:3 “Nikasikia sauti kubwa kutoka katika kile kiti cha enzi ikisema, Tazama, maskani ya Mungu ni pamoja na wanadamu, naye atafanya maskani yake pamoja nao, nao watakuwa watu wake. Naye Mungu mwenyewe atakuwa pamoja nao.”   

Hitimisho:

Zaburi hii ya 15 inatupa picha ya wazi ya Mtu ambaye Mungu angependa kumkaribisha katika uwepo wake, Neema ya Mungu inamualika kila mmoja wetu kujifunza na kukubali kuitikia mwitikio huu na kujiuliza na kujipima kama tunaishi kile ambacho Mungu Roho Mtakatifu anatufundisha kubwa zaidi na lenye furaha ni kukaa katika uwepo wa Mungu na kuwa na urafiki wa kudumu na Mungu. Uongezewe neema unapoyatendea kazi maneno ya Mungu.

 

Na. Rev. Innocent Samuel Kamote

Mkuu wa wajenzi mwenye hekima.