Kama Mungu angekuwa Baba yako!

Yohana 8: 42 “Yesu akawaambia, Kama Mungu angekuwa baba yenu, mngenipenda mimi; kwa maana nalitoka kwa Mungu, nami nimekuja; wala sikuja kwa nafsi yangu, bali yeye ndiye aliyenituma.”

Utangulizi

Ni muhimu kwa kila mmoja wetu kujiuliza je Mungu ni baba yetu? Ni muhimu kufahamu kuwa sio kila mmoja wetu Mungu ni baba yake?, Yesu aliwahi kuwaambia ukweli mafarisayo na masadukayo pamoja na waalimu wa Torati waliodhani kuwa Mungu ni Baba yao kwamba wao sio wa Mungu, na aliwakemea kwa kuwaeleza wazi kuwa wao baba yao ni Ibilisi Yohana 8:44 “Ninyi ni wa baba yenu, Ibilisi, na tamaa za baba yenu ndizo mpendazo kuzitenda. Yeye alikuwa mwuaji tangu mwanzo; wala hakusimama katika kweli, kwa kuwa hamna hiyo kweli ndani yake. Asemapo uongo, husema yaliyo yake mwenyewe; kwa sababu yeye ni mwongo, na baba wa huo.” Kama Mungu ni baba yetu tutampenda Yesu, tutamkubali Yesu, na tunaweza kuthibitisha kwamba sisi ni wa baba katika njia kuu saba zifuatazo:-

1.       Tutamwanimi yeye kama tunavyomwamini Mungu:-

Ni jambo la kusikitisha kwamba Yesu alitoka kwa Mungu, lakini hata hivyo wakuu wa dini, mafarisayo na masadukayo pamoja na waandishi yaani walimu wa torati hawakuwa wamemwamini, huwezi kusema kuwa unampenda mtu, lakini hata hivyo humuamini, kuamini kunaendana na kupenda Yesu anataka tumwamini yeye kwa kiwango kilekile cha kumuamini Mungu Yohana 14:1 “Msifadhaike mioyoni mwenu; mnamwamini Mungu, niaminini na mimi.”

Ishara kubwa ya kwamba tunamkubali Yesu na kwamba tunamwamini Mungu na tunampenda ni pamoja na kumuamini, na kama tunamwamini Yesu ni sawa na kuwa tumekubali zawadi kubwa ambayo Mungu amewapa wanadamu kupitia yeye na hivyo tutampenda.

2.       Tutazitii amri zake:-

Kiwango kikubwa na cha juu zaidi cha upendo wetu kwa Yesu ni pamoja na kutii amri zake, Yesu aliliweka wazi hili mapema tu ya kwamba kama Mungu ni baba yetu na amemtuma mwanaye wa pekee sio tu ili tumwamini lakini vilevile tumsikilize yeye ni ukweli ulio wazi kuwa Torati iliagiza kuwa Nabii huyu mkubwa aliyetumwa kwa mfano wa Musa anapaswa kusikilizwa maana yake tumtii Kumbukumbu la Torati 18:15,18-19 “Bwana, Mungu wako, atakuondokeshea nabii miongoni mwa ndugu zako kama nilivyo mimi; msikilizeni yeye., Mimi nitawaondokeshea nabii miongoni mwa ndugu zao mfano wako wewe, nami nitatia maneno yangu kinywani mwake, naye atawaambia yote nitakayomwamuru.Hata itakuwa, mtu asiyesikiliza maneno yangu atakayosema yule kwa jina langu, nitalitaka kwake” Yesu alikuwa ndiye nabii yule ajaye aliyetabiriwa na Musa katika torati na katika manabii na swala hili lilieleweka wazi Yohana 1:45. “Filipo akamwona Nathanaeli, akamwambia, Tumemwona yeye aliyeandikiwa na Musa katika torati, na manabii, Yesu, mwana wa Yusufu, mtu wa Nazareti” ni ukweli ulio wazi kuwa ilieleweka kwamba Yesu ndiye masihi lakini hata hivyo baadhi ya watu licha ya kuwa walikataa kumuamini lakini pia hawakuzishika amri zake, Yesu anaweka wazi kuwa kama tunampenda yeye basi tutazitii amri zake Yohana 14:15 “Mkinipenda, mtazishika amri zangu” Unaona kama Mungu ni baba yetu tutamwanini Yesu Kristo na tutazishika mari zake.Yesu hafurahii kuitwa Bwana na watu ambao hawako tayari kuyatenda asemayo Luka 6:46 “Na kwa nini mnaniita, Bwana, Bwana, walakini hamyatendi nisemayo?” unaona Yesu kristo anahitaji kuaminiwa lakini vilevile kuyatii maagizo yake.

3.       Tutadumisha Ushirika wetu na Yesu!

Ni muhimu kufahamu kuwa uhusiano wetu na Mungu na bwana wetu Yesu Kristo ni uhusiano wa kudumu, awaye yote ambaye atamwamini Yesu au aliyeamua kumfuata Yesu hana budi kuhakikisha kuwa anashikamana na ushirika na Yesu bila kugeuka nyuma, Mungu anatarajia uhusiano wetu nay eye uwe wenye kudumu, na hafurahii kugeuka nyuma, kimsingi mtu anayemuacha Mungu biblia inamuita mtu mwenye moyo mbovu Waebrania 3:12-14 “Angalieni, ndugu zangu, usiwe katika mmoja wenu moyo mbovu wa kutokuamini, kwa kujitenga na Mungu aliye hai. Lakini mwonyane kila siku, maadamu iitwapo leo; ili mmoja wenu asifanywe mgumu kwa udanganyifu wa dhambi.  Kwa maana tumekuwa washirika wa Kristo, kama tukishikamana na mwanzo wa uthabiti wetu kwa nguvu mpaka mwisho;” Kuanza safari ya kumuamini Yesu sio tatizo, watu wengi hulipokea neno kwa furaha na kumkubali Bwana yesu kwa msisimko, lakini hata hivyo kuendelea kukaa ndani yake ndio jambo la muhimu na zaidi ya umuhimu ni kustahimili mpaka mwisho na kuumaliza mwendo pamoja naye, Mathayo 24:13 “Lakini mwenye kuvumilia hata mwisho, ndiye atakayeokoka.”  Unaweza kuona kwamba mtu anamalizaje hilo ndio jambo la muhimu, Katika kutuongoza kuifuata imani Biblia inatutia moyo kuwaiga watu waliotuongoza na kuiiga imani yao Waebrania 13:7 “Wakumbukeni wale waliokuwa wakiwaongoza, waliowaambia neno la Mungu; tena, kwa kuuchunguza sana mwisho wa mwenendo wao, iigeni imani yao.” Kumbe tunaweza kuiiga imani ya kiongozi wetu, wachungaji wetu, mashemasi wetu wazee wetu, maaskofu wetu na kadhalika lakini baada ya kuchunguza namna walivyohitimu katika imani, Mungu anataka tudumishe uhusiano nay eye hata mwisho.

4.       Tutazinena habari zake!

Hakuna namna yoyote ambayo kwayo tunaweza kusema kuwa tunampenda Mungu na Yesu Kristo kama hatuzisemi habari zake, Mitume walidhihirisha wazi kuwa wanampenda sio kwa kunyamaza kimya bali walizinena habari zake  kila siku na kila mahali Matendo 5:41-42 “Nao wakatoka katika ile baraza, wakifurahi kwa sababu wamehesabiwa kuwa wamestahili kuaibishwa kwa ajili ya Jina hilo.  Na kila siku, ndani ya hekalu na nyumbani mwao, hawakuacha kufundisha na kuhubiri habari njema za Yesu kwamba ni Kristo.” Maandiko yanawasifia watu wanaonena habari za Yesu kuwa ni watu wema na kuisifia miguu yao kuwa ni mizuri, Yesu anataka tusambaze habari zake kwa watu wote ili waliitie jina lake na kuokolewa Warumi 10:14-15 “Basi wamwiteje yeye wasiyemwamini? Tena wamwaminije yeye wasiyemsikia? Tena wamsikieje pasipo mhubiri? Tena wahubirije, wasipopelekwa? Kama ilivyoandikwa, Ni mizuri kama nini miguu yao wahubirio habari ya mema!” Nyakati za kanisa la kwanza watu walimpenda sana Yesu na hivyo hawakuacha kuzungumza habari zake kila walikokwenda hata pale walipotawanyika kwa sababu ya dhiki bado walikuwa waaminifu kuelezea habari za Yesu Matendo 8:1-5 “Siku ile kukatukia adha kuu ya kanisa lililokuwa katika Yerusalemu; wote wakatawanyika katika nchi ya Uyahudi na Samaria, isipokuwa hao mitume.  Watu watauwa wakamzika Stefano, wakamfanyia maombolezo makuu. Sauli akaliharibu kanisa, akiingia kila nyumba, na kuwaburuta wanaume na wanawake na kuwatupa gerezani. Lakini wale waliotawanyika wakaenda huko na huko wakilihubiri neno. Filipo akatelemka akaingia mji wa Samaria, akawahubiri Kristo.”  Kama Mungu ni baba yaetu tutampenda Yesu Kristo na kama tunampenda Yeu Kristo tutazungumza habari zake, Biblia inatutaka tuwe tayari wakati wote na siku zote 1Petro 3:15 “Mwe tayari siku zote kumjibu kila mtu awaulizaye habari za tumaini lililo ndani yenu; lakini kwa upole na kwa hofu.” Wote waliompenda Yesu walikuwa tayari kuzishuhudia habari zake na hawakuona aibu.

5.       Tutakuwa tayari kuteseka kwaajili yake

Kile unachokipenda wakati mwingine unaweza kuwa tayari kukigharimikia, wazazi wanatoa nguvu zao na muda wao kujinyima kwaajli ya watoto wao kwa vile wanawapenda, wako watu ambao wako tayari kuyatoa maisha yao kwaajili ya wapendwa wao, katika hali kama hii wote wanaompenda Yesu wote ambao Mungu ni aba yao watakuwa tayari pia kuteseka kwaajili ya Yesu Kristo , Yeye alitupatia zawadi kuu ya wokovu kwa njia ya Mateso Waebrania 5:7-9 7. “Yeye, siku hizo za mwili wake, alimtolea yule, awezaye kumwokoa na kumtoa katika mauti, maombi na dua pamoja na kulia sana na machozi, akasikilizwa kwa jinsi alivyokuwa mcha Mungu; na, ingawa ni Mwana, alijifunza kutii kwa mateso hayo yaliyompata; naye alipokwisha kukamilishwa, akawa sababu ya wokovu wa milele kwa watu wote wanaomtii;” unaweza kuona jinsi ambayo kiongozi mkuu wa wokovu wetu yaani Bwana Yesu alikamilishwa kwa njia ya Mateso, kila mmoja wetu ambaye ameitwa kumwandama Bwana ni lazima pia awe tayari kuteseka kwaajili yake kuwa ndani ya Yesu ni kukubali mateso ni kujiunga  na mateso yake 2Timotheo 1:7-12 “7. Maana Mungu hakutupa roho ya woga, bali ya nguvu na ya upendo na ya moyo wa kiasi. Basi usiuonee haya ushuhuda wa Bwana wetu, wala usinionee haya mimi mfungwa wake, bali uvumilie mabaya pamoja nami kwa ajili ya Injili, kwa kadiri ya nguvu ya Mungu; ambaye alituokoa akatuita kwa mwito mtakatifu, si kwa kadiri ya matendo yetu sisi, bali kwa kadiri ya makusudi yake yeye na neema yake. Neema hiyo tulipewa katika Kristo Yesu tangu milele, na sasa inadhihirishwa kwa kufunuliwa kwake Mwokozi wetu Kristo Yesu; aliyebatili mauti, na kuufunua uzima na kutokuharibika, kwa ile Injili; ambayo kwa ajili ya hiyo naliwekwa niwe mhubiri na mtume na mwalimu. Kwa sababu hiyo nimepatikana na mateso haya, wala sitahayari; kwa maana namjua yeye niliyemwamini, na kusadiki ya kwamba aweza kukilinda kile nilichokiweka amana kwake hata siku ile.” Unaweza kuona njia nyingine pekee yenye kuonyesha kuwa tunampenda Mungu na kwamba Mungu ni baba yetu ni kukubali kushiriki mateso kwaajili ya injili yake.

6.       Tutatamani kufanana naye.  

     

Lengo kubwa la neno la Mungu na mafundisho ya mitume ni sisi kuwa kama Yesu Kristo Wagalatia 4:19 “Vitoto vyangu, ambao kwamba nawaonea utungu tena mpaka Kristo aumbike ndani yenu;” Unaona Kristo kuumbika ndani yetu maana yake ni ile hali ya kukomaa na katika tabia na mwenendo na kufikia hatua ya kuwa kama Yesu Kristo mwenyewe, hili ndilo kusudi kuu kama tunampenda Yesu ni lazima tutafanana naye, mwelekeo na mkazo mkuu wa mitume na manabii ni kuhakikisha kuwa tunawafuata wao kama wanavyomfuata Kristo 1Wakoritho 11:1 “Mnifuate mimi kama mimi ninavyomfuata Kristo.” Watoto wakati wote hujifunza kwa kuigiza tunaweza kuwaigiza wazazi wetu katika kila jambo liwe jema au baya, kwa sababu tunawapenda, sisi nasi kama tunampenda Bwana Yesu tutamuiga katika kila eneo la tabia na mwenendo wake, kuitwa wakristo kunatokana na mwenendo unaomfanania Yesu Kristo, Wakolosai 3:9-11 “Msiambiane uongo, kwa kuwa mmevua kabisa utu wa kale, pamoja na matendo yake;           mkivaa utu mpya, unaofanywa upya upate ufahamu sawasawa na mfano wake yeye aliyeuumba. Hapo hapana Myunani wala Myahudi, kutahiriwa wala kutokutahiriwa, mgeni wala mshenzi, mtumwa wala mwungwana, bali Kristo ni yote, na katika yote.” Unaona tunapaswa kuvaa utu mpya sawasawa na mfano wa yeye aliyetuumba, wakati wote ni lazima tulenge kuwa kama Yesu na kufanana naye.

7.       Tutatamani kumpendeza Yeye.

Ni muhimu kufahamu kuwa watu wanaopendana hutamani sana kufurahishana, sisi nasi ni muhimu kuhakikisha kuwa tunatamani kumpendeza Bwana wetu Yesu, yeye alitupenda upeo nasi hatuna budi kumpenda 2Wakoritho 5:14-15 “Maana, upendo wa Kristo watubidisha; maana tumehukumu hivi, ya kwamba mmoja alikufa kwa ajili ya wote, basi walikufa wote; tena alikufa kwa ajili ya wote, ili walio hai wasiwe hai tena kwa ajili ya nafsi zao wenyewe, bali kwa ajili yake yeye aliyekufa akafufuka kwa ajili yao.” Unaweza kuona haya ndio yalikuwa madai makubwa ya Bwana Yeye kuwa kila ambaye Mungu ni baba yake angampenda yeye maana yeye ametoka kwa Baba      Yohana 8: 42 “Yesu akawaambia, Kama Mungu angekuwa baba yenu, mngenipenda mimi; kwa maana nalitoka kwa Mungu, nami nimekuja; wala sikuja kwa nafsi yangu, bali yeye ndiye aliyenituma.”

Hitimisho:

Ukweli ulio wazi ni kuwa kama mtu hampenzi Yesu nasikitika kumjulisha mtu huyo kuwa maandiko yanasema amelaaniwa 1Wakoritho 16:22 “Mtu awaye yote asiyempenda Bwana, na awe amelaaniwa. Maran atha.” Na kwa sababu hiyo hii kama humpendi Yesu Mungu sio baba yako na kama Mungu sio baba yako wewe ni wa ibilisi na unawezaje kuwa mwana wa Mungu ni kwa imani kupitia Yesu Kristo, Wagalatia 3:26 “Kwa kuwa ninyi nyote mmekuwa wana wa Mungu kwa njia ya imani katika Kristo Yesu.” Ni kupitia yeye pekee tunaweza kumfikia Mungu na ndio maana Yesu aliwataka viongozi wa dini kuelewa wazi kuwa hawana budi kumkubali yeye endapo wanadai wanamjua Mungu lakini kama wanamkataa Yeye hawawezi kwa njia yoyote kuwa wana wa Mungu.

“Kama Mungu angekuwa baba yenu, mngenipenda mimi”

Rev. Innocent Kamote

Mkuu wa wajenzi mwenye Hekima.

Mambo Muhimu saba unayopaswa Kujaa.

Mstari wa Msingi: Matendo 6:3-5


“Basi ndugu, chagueni watu saba miongoni mwenu, walioshuhudiwa kuwa wema, wenye kujawa na Roho, na hekima, ili tuwaweke juu ya jambo hili; na sisi tutadumu katika kuomba na kulihudumia lile Neno.Neno hili likapendeza machoni pa mkutano wote; wakamchagua Stefano, mtu aliyejaa imani na Roho Mtakatifu, na Filipo, na Prokoro, na Nikanori, na Timoni, na Parmena, na Nikolao mwongofu wa Antiokia;”  

 

Mungu kamwe hamtumii mtu ambaye yuko tupu, awaye yote ambaye yuko tupu ni rahisi kutumiwa na shetani na mapepo Mathayo 12: 43-45 “Pepo mchafu, amtokapo mtu, hupitia mahali pasipo maji, akitafuta mahali pa kupumzika, asipate. Halafu husema, Nitarudi nyumbani kwangu nilikotoka; hata akija, aiona tupu, imefagiwa, na kupambwa.Mara huenda, akachukua pamoja naye pepo wengine saba walio waovu kuliko yeye mwenyewe, nao huingia na kukaa humo; na mtu yule hali yake ya mwisho huwa mbaya kuliko ya kwanza. Ndivyo itakavyokuwa kwa kizazi hiki kilicho kibaya.”

Yesu Kristo mwana wa Daudi kutoka katika ukoo wa Yese alitumiwa sana na Mungu kwa viwango kwa sababu Hakuwa tupu alijaa Roho Mtakatifu katika ukamilifu wake Isaya 11:1-2 “Basi litatoka chipukizi katika shina la Yese, na tawi litakalotoka katika mizizi yake litazaa matunda. Na roho ya Bwana atakaa juu yake, roho ya hekima na ufahamu, roho ya shauri na uweza, roho ya maarifa na ya kumcha Bwana;”

Mungu anataka kumtumia mtu aliyejaa mambo muhimu saba yafuatayo:-

1.        “Kujaa utimilifu wa Mungu”Be filled with the fullness of God.

Waefeso 3:14-19 “Kwa hiyo nampigia Baba magoti, ambaye kwa jina lake ubaba wote wa mbinguni na wa duniani unaitwa, awajalieni, kwa kadiri ya utajiri wa utukufu wake, kufanywa imara kwa nguvu, kwa kazi ya Roho wake katika utu wa ndani.       Kristo akae mioyoni mwenu kwa imani mkiwa na shina na msingi katika upendo; ili mpate kufahamu pamoja na watakatifu wote jinsi ulivyo upana, na urefu, na kimo, na kina; na kuujua upendo wake Kristo, upitao ufahamu kwa jinsi ulivyo mwingi, mpate kutimilika kwa utimilifu wote wa Mungu.”

Kwa lugha nyepesi kusudi kubwa la Mungu ni kutupeleka katika hatua ya kuwa watu wazima, kukomaa kutokuwa wachanga kiufahamu na kiroho, kuwa wakamilifu kama Kristo Waefeso 4:11-13 “Naye alitoa wengine kuwa mitume, na wengine kuwa manabii; na wengine kuwa wainjilisti na wengine kuwa wachungaji na waalimu; kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe; hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo; ili tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukizifuata njia za udanganyifu.”

Kujaa utimilifu wa Mungu ni kujaa ujuzi kuhusu Mungu na kuigiza kila kitu na kila tabia aliyokuwa nayo Yesu Kristo kwa sababu katika yeye na katika tabia zake na mtindo wake wa maisha tunajifunza utimilifu wa Mungu Wakolosai 2:9 “Maana katika yeye unakaa utimilifu wote wa Mungu, kwa jinsi ya kimwili.”

Kama utimilifu wa Mungu utajaa ndani yetu kuna faida kubwa sana nyingi tutakazoweza kufaidika nazo

a.       Tutajaaa upendo wenye kujitoa kwaajili ya wengine Yohana 15:13 “Hakuna aliye na upendo mwingi kuliko huu wa mtu kuutoa uhai wake kwaajili ya rafiki zake” Upedno wenye kujidhabihu kwaajili yaw engine PHILEO, STORGE, EROS,  AGAPE., Mother Teresa, Will Pooley and Maximilian Kolbe. Ni mifano ya kuigwa duniani katika upendo wenye kujitoa kwaajili ya watu wengine upendo wa aina hii hatuwezi kuwa nao kama hatujajaa utimilifu wa uungu ndani yetu tuone mifano ya watu hao:-

Mama Teresa wa Culcuta India (1910-1997) anaheshimika sana duniani kwa kuwahurumia wengine,alipewa nishani ya Nobel 1979,alianza akiwa masikini lakini alianzisha vituo vya ukarimu kwa ajili ya kuwasaidia yatima na wajane,wasiojiweza na wenye njaa, leo hii kuna matajiri wengi sana wasio na huruma kwa wengine wanaongoza kwa dhuluma na ufisadi wewe utalifanyia nini taifa upendo wenye kujitoa tu ndio  unaweza kukusaidia kuhisi maumivu ya wengine.

Daktari  mmoja wa Uingereza aitwaye Will Pooley alikuwa ni moja ya madaktari waliokuwa mstari wa mbele Nchini “Sierra Leone” huko walikuwa na wenzake wengi wakipambana na wagonjwa wa EBOLA na virusi vyake  katika  harakati hizo Madaktari wengi sana na Manesi wengi sana wakiwemo wa Afrika Magharibi waliambukizwa virusi vya ebola wakati walipokuwa wakiwauguza wagonjwa na wengi wao walikufa

Ugonjwa utokanao na kirusi cha Ebola ni ugonjwa hatari wenye uwezo wa kusababisha kifo kwa asilimia 90.  Shirika la afya duniani, WHO katikatovuti yake inasema kwa mara ya kwanza ulibainika mwaka 1976 huko Jamhuri ya Kidemokrasia ya Congo, DRC na Sudan. Chanzo cha kirusi hiki hadi sasa hakijulikani lakini popo aina ya (Pteropodidae) wanaonekana kuwa wabebaji wa kirusi hicho, kwa mujibu wa ushahidi uliopo sasa.

Maambukizi hupatikana kwa kila aina ya majimaji yanayotoka katika mwili wa binadamu ni ugonjwa hatari na unaoua kwa haraka na hauna tiba

Will Pooley alipoupata ugonjwa huu alirejeshwa katika ndege maalumu na kuanza kutibiwa chini ya uangalizi maalumu huko uingereza

Jambo la kushangaza ni kuwa baada ya kupona kwa bahati tu Will Pooley alitangaza nia yake ya kurudi tena Sierra Leone kusaidiana na wenzake kupambana na ugonjwa huo.

Mtu huyu aliwashangaza wengi sana na kuwaogopedha wengi sana akiwa amepona kwa asilimia 100%alisema atarudi Africa kusaidia zaidi maana alizaliwa kwaajili ya hayo, jambo hili lilimfanya aandikwe kama shujaa na mwanadamu mwenye uwezo wa kujitoa kwa kiwango cha juu.

Maximilian Kolbe alikuwa ni Padre aliyetokea Poland aliuawa kama mfungwa tarehe 14 August 14,1941, Jeshi la wa NAZI waligundua kuwa baadhi ya wafungwa wamejaribu kutoroka na hivyo waliamua kuwaua wafungwa kadhaa, walijaribu kuwaua kwa njia mbalimbali, na hivyo walichagua wafungwa 10 ili wauawe na kifo chao kiliamuriwa kuwa kifo cha njaa, wafungwa waliamuriwa kujitoa mmoja mmoja yeye mwenyewe na mfungwa wa kwanza kuchaguliwa alijulikana kama Franciszek Gajowinczek mfungwa huyu alipochaguliwa alilia kwa huzuni kubwa akimtaja mkewe, watoto wake na familia yake na kusikitika kuwa hatowaona tena kutokana na swala hili Maximillian alisimama na kusogea mbele na kuomba afe yeye kwa niaba ya Franciszek ombi lake lilikubaliwa, wafungwa waliwekwa kizuizini kwa muda wa siku kadhaa bila kula wengine walikunywa mikojo yao ili waweze kuishi, Maximillian alikaa kwa wiki mbili bila kufa huku wengine wote wakiwa wamekufa, walimchoma sindano ya kufa hakufa na hivyo waliamua kukata kichwa Pope John Paul II alimtangaza kuwa Mtakatifu kutokana na moyo wake.

Hawa walijitoa maisha yao kwaajili ya wengine kutokana na upendo wenye kujitoa na kujidhabihu, Yesu Kristo aliyatoa maisha yake kwaajili yetu sisi nasi hatuna budi kujitoa kwaajili yaw engine katika upendo. 

b.      Tutajaa Unyenyekevu!

Yesu Kristo alikuwa mnyenyekevu lakini vilevile alikuwa mtii, aliyatii mapenzi ya Mungu hata katika namna yenye kuumiza, hakujihesabu kuwa ni Bora wala hakujikweza na hivyo Mungu alimheshimu sana Wafilipi 2:3-5 “Msitende neno lo lote kwa kushindana wala kwa majivuno; bali kwa unyenyekevu, kila mtu na amhesabu mwenziwe kuwa bora kuliko nafsi yake.  Kila mtu asiangalie mambo yake mwenyewe, bali kila mtu aangalie mambo ya wengine.  Iweni na nia iyo hiyo ndani yenu ambayo ilikuwamo pia ndani ya Kristo Yesu; ambaye yeye mwanzo alikuwa yuna namna ya Mungu, naye hakuona kule kuwa sawa na Mungu kuwa ni kitu cha kushikamana nacho; bali alijifanya kuwa hana utukufu, akatwaa namna ya mtumwa, akawa ana mfano wa wanadamu; tena, alipoonekana ana umbo kama mwanadamu, alijinyenyekeza akawa mtii hata mauti, naam, mauti ya msalaba. Kwa hiyo tena Mungu alimwadhimisha mno, akamkirimia Jina lile lipitalo kila jina;”

Njia ya kuinuliwa na kupelekwa juu na Mungu ni unyenyekevu, kama tutajifikiri wenyewe kuwa ni bora kuliko wengine tutapoteza neema ya Mungu kwetu Mungu huwapinga wenye kiburi bali huwapa wanyenyekevu neema, Injili ilikuja kwaajili ya watu wanyenyekevu Luka 4:17-19 “Akapewa chuo cha nabii Isaya, akakifungua chuo, akatafuta mahali palipoandikwa, Roho wa Bwana yu juu yangu, Kwa maana amenitia mafuta kuwahubiri maskini habari njema. Amenituma kuwatangazia wafungwa kufunguliwa kwao, Na vipofu kupata kuona tena, Kuwaacha huru waliosetwa, Na kutangaza mwaka wa Bwana uliokubaliwa.”

Watafasiri wa Biblia za kiingereza na kiswahili walionukuu Yesu walikuwa na mawazo ya kufikiri kuwa Yesu alikuja kwa ajili ya masikini hivyo walitumia neno “Poor” hii haikuwa tafasiri sahii ya andiko hili kwa vile andiko hili lilinukuliwa kutoka katika kitabu cha Isaya mwenyewe anazungumzia wanyenyekevu na sio masikini, Isaya 61:1-3 “Roho ya Bwana MUNGU i juu yangu; kwa sababu Bwana amenitia mafuta niwahubiri WANYENYEKEVU habari njema; amenituma ili kuwaganga waliovunjika moyo, kuwatangazia mateka uhuru wao, na hao waliofungwa habari za kufunguliwa kwao. Kutangaza mwaka wa Bwana uliokubaliwa, na siku ya kisasi cha Mungu wetu; kuwafariji wote waliao;”

 

Ukweli wa kibiblia unaonyesha wazi kuwa Mungu anafanya kazi na wanyenyekevu na anapendezwa nao na kuwapa neema na kuwaangalia Isaya 66:1-2 “Bwana asema hivi, Mbingu ni kiti changu cha enzi, na dunia ni mahali pa kuweka miguu yangu; mtanijengea nyumba ya namna gani? Na mahali pangu pa kupumzikia ni mahali gani? Maana mkono wangu ndio uliofanya hivi vyote, vitu hivi vyote vikapata kutokea, asema Bwana; lakini mtu huyu ndiye nitakayemwangalia, mtu aliye mnyonge, mwenye roho iliyopondeka, atetemekaye asikiapo neno langu.” 

Kama hatutakuwa wanyenyekevu ni vigumu kuhudumiana, ni vigumu kutambua uweza alionao mtu mwingine endapo kila mtu atajifikiri kuwa ni bora katika nafsi yake , lakini biblia pia inataka watu wenye umri mdogo kuwaheshimu wenye umri mkubwa  1Petro 5:5 “Vivyo hivyo ninyi vijana, watiini wazee. Naam, ninyi nyote jifungeni unyenyekevu, mpate kuhudumiana; kwa sababu Mungu huwapinga wenye kiburi, lakini huwapa wanyenyekevu neema. Basi nyenyekeeni chini ya mkono wa Mungu ulio hodari, ili awakweze kwa wakati wake;” 

Unyenyekevu ni nini hasa ?-  unyenyekevu ni hali ya kutokujifikiri kuwa wewe ni wa muhimu kuliko wengine, Humble or Humility ni hali ya kutokufikiri kuwa wewe ni bora kuliko wengine, hali ya kutokutumia mamlaka uliyo nayo kufanya lolote kwa mtu unayeweza hata kumdhuru.

Kwa Mungu hali hii inakubalika kama namna ya kujifunza kutoka kwa Yesu Kristo.    

c.       Hakutakuwa na Mafarakano!

Kama hatutakuwa katika utimilifu wa Mungu, kutakuwa na mafarakano kwetu, migawanyiko na hii ni dalili ya uchanga, nyakati za kanisa la kwanza huko Koritho kulikuwa na migawanyiko, watu walisahau kuwa wao ni kitu kimoja na wakaanza kushabikia wanadamu Paulo mtume aliwakemea 1Koritho 1:10-13a “Basi ndugu, nawasihi, kwa jina la Bwana wetu Yesu Kristo, kwamba nyote mnene mamoja; wala pasiwe kwenu faraka, bali mhitimu katika nia moja na shauri moja. Kwa maana, ndugu zangu, nimearifiwa habari zenu na wale walio wa nyumbani mwa Kloe, ya kwamba iko fitina kwenu. Basi, maana yangu ni hii, ya kwamba kila mtu wa kwenu kusema, Mimi ni wa Paulo, na, Mimi ni wa Apolo, na, Mimi ni wa Kefa, na, Mimi ni wa Kristo.  Je! Kristo amegawanyika?”

Paulo mtume aliyakemea mafarakano haya na kuwaeleza wazi kuwa kama watu kanisa, familia, shirika lina mafarakano basi ni wazi kuwa hawajakomaa 1Wakoritho 3:1-9 “Lakini, ndugu zangu, mimi sikuweza kusema nanyi kama na watu wenye tabia ya rohoni, bali kama na watu wenye tabia ya mwilini, kama na watoto wachanga katika Kristo. Naliwanywesha maziwa sikuwalisha chakula; kwa kuwa mlikuwa hamjakiweza. Naam, hata sasa hamkiwezi, kwa maana hata sasa ninyi ni watu wa tabia ya mwilini. Maana, ikiwa kwenu kuna husuda na fitina, je! Si watu wa tabia ya mwilini ninyi; tena mnaenenda kwa jinsi ya kibinadamu? Maana hapo mtu mmoja asemapo, Mimi ni wa Paulo; na mwingine, Mimi ni wa Apolo, je! Ninyi si wanadamu? Basi Apolo ni nani? Na Paulo ni nani? Ni wahudumu ambao kwao mliamini; na kila mtu kama Bwana alivyompa. Mimi nilipanda, Apolo akatia maji; bali mwenye kukuza ni Mungu. Hivyo, apandaye si kitu, wala atiaye maji, bali Mungu akuzaye. Basi yeye apandaye, na yeye atiaye maji ni wamoja, lakini kila mtu atapata thawabu yake mwenyewe sawasawa na taabu yake mwenyewe. Maana sisi tu wafanya kazi pamoja na Mungu; ninyi ni shamba la Mungu, ni jengo la Mungu. kila mmoja katika mwili wa Kristo ana nafasi yake na hivyo hatupaswi kuwa na mafarakano na kufikiri kuwa fulani ni bora kuliko mwingine”

2.       Kujaa Roho Mtakatifu. “Be filled with the Spirit.”

Hakuna jambo muhimu katika maisha ya mwanadamu na maisha ya Ukristo kama kujaa Roho Mtakatifu, katika maswala yaliyokaziwa sana na maandiko ni pamoja na kujaa Roho Mtakatifu biblia inasema katika Waefeso 5:18 “Tena msilewe kwa mvinyo, ambamo mna ufisadi; bali mjazwe Roho;” Kwa nini ni Muhimu kujaa Roho Mtakatifu?  Mungu anatumia watu waliojaa Roho, ni muhimu sana kukubali kwamba maisha yetu yaongozwe na Roho Mtakatifu, Roho Mtakatifu akiyaongoza maisha yetu au akiachiwa aongoze maisha yetu tunakuwa na amani, tutakuwa na furaha, tutakuwa na ujasiri, hatutapoteza tumaini, tutakuwa wavumilivu, tutakuwa watu wema, tutakuwa wanyenyekevu au wapole. Na hakutakuwa na bahati mbaya katika maisha yetu Luka 4:1-2 “Na Yesu, hali amejaa Roho Mtakatifu, alirudi kutoka Yordani, akaongozwa na Roho muda wa siku arobaini nyikani, akijaribiwa na Ibilisi. Na siku hizo alikuwa hali kitu; hata zilipotimia, aliona njaa.” Roho wa Mungu atatupa maisha ya furaha na ushindi hata kama utakutana na changamoto za aina yoyote, nyakati tulizonazo watu wengi sana wamekuwa wakilalamika na kushindwa kusimama katika nafasi zao kwa sababu ya kumuacha Roho pembeni, hii haimaanishi kuwa hawana Roho wa Mungu hapana, wanaye lakini hawataki kijizoeza maisha ya kuongozwa na Roho mtakatifu na wanataka kujiongoza wenyewe na hivyo wanashindwa na hivyo wanaishi maisha yasiyo na furaha,  Mtu aliyejaa Roho wa Mungu

·         Atakupa ujasiri wa kuwa shahidi wa Yesu Kristo hata kifo Matendo 1:8 “Lakini mtapokea nguvu, akiisha kuwajilia juu yenu Roho Mtakatifu; nanyi mtakuwa mashahidi wangu katika Yerusalemu, na katika Uyahudi wote, na Samaria, na hata mwisho wa nchi.”

·         Anawezeshwa kufanya mambo ya kupita kawaida Matendo 6:8 “Na Stefano, akijaa neema na uwezo, alikuwa akifanya maajabu na ishara kubwa katika watu.”

·         Anapewa ujasiri wa kupita kawaida na kukuwezesha kushinda majaribu Matendo 4:8-13 “Ndipo Petro, akijaa Roho Mtakatifu, akawaambia, Enyi wakubwa wa watu na wazee wa Israeli, kama tukiulizwa leo habari ya jambo jema alilofanyiwa yule mtu dhaifu, jinsi alivyoponywa, jueni ninyi nyote na watu wote wa Israeli ya kuwa kwa jina la Yesu Kristo wa Nazareti, ambaye ninyi mlimsulibisha, na Mungu akamfufua katika wafu, kwa jina hilo mtu huyu anasimama ali mzima mbele yenu. Yeye ndiye jiwe lile lililodharauliwa na ninyi waashi, nalo limewekwa kuwa jiwe kuu la pembeni. Wala hakuna wokovu katika mwingine awaye yote, kwa maana hapana jina jingine chini ya mbingu walilopewa wanadamu litupasalo sisi kuokolewa kwalo. Basi walipoona ujasiri wa Petro na Yohana, na kuwajua ya kuwa ni watu wasio na elimu, wasio na maarifa, wakastaajabu, wakawatambua ya kwamba walikuwa pamoja na Yesu.” 

·         Atakuongoza katika kweli ya neno la Mungu ili kwamba mjaribu asikushinde Yohana 16:13 “Lakini yeye atakapokuja, huyo Roho wa kweli, atawaongoza awatie kwenye kweli yote; kwa maana hatanena kwa shauri lake mwenyewe, lakini yote atakayoyasikia atayanena, na mambo yajayo atawapasha habari yake.”

·         Atakufariji na kukushauri wakati wa maswala magumu Yohana 14:16 “Nami nitamwomba Baba, naye atawapa Msaidizi mwingine, ili akae nanyi hata milele; “

3.       Kujazwa maarifa ya Mapenzi yake “Be filled with the knowledge of His will”

Wakolosai 1:9 “Kwa sababu hiyo sisi nasi, tangu siku ile tuliposikia, hatuachi kufanya maombi na dua kwa ajili yenu, ili mjazwe maarifa ya mapenzi yake katika hekima yote na ufahamu wa rohoni;”  Kuyajua mapenzi ya Mungu ni jambo la Muhimu, watu wengi sana wanashindwa kujua kuwa wanachokifanya au walipo ni mapenzi ya Mungu au hapana kwa kujaa neno lake na kulielewa na kulifahamu itatusaidia kuyajua mapenzi ya Mungu,  kila mmoja anahitaji kujua maarifa ya mapenzi yake

Angalia kwamba Paulo mtume anawaombea kanisa la kolosai ili wajazwe maarifa ya mapenzi yake katika hekima yote na ufahamu wa Rohoni, kumbe kwamba pamoja na kuwa tumeokolewa bado kuna maswala ya msingi tunapaswa kuyafahamu, mojawapo ni kujazwa maarifa ya mapenzi yake, ni nini maana ya maarifa ya mapenzi yake?

Nyakati za kanisa la kwanza katika Asia ndogo na ulaya kulikuwa na kiu kubwa sana kuhusu kujaa maarifa na falsafa za aina mbalimbali, watu walijaa maarifa ya maswala mbalimbali “Gnosticism” waliamini kuwa ukiwa na maarifa tayari umeokoka na kukosa maarifa ni dhambi, kwa vile walikuwa wameiamini injili Paulo sasa alitaka wajae maarifa ya mapenzi ya Mungu na waweze kuyaishi ni kama Paulo anawaambia kuwa maarifa pekee hayatoshi, lakini mtu akiyajua mapenzi ya Mungu atajua namna na jinsi ya kuenenda kwa hekima katika ulimwengu huu “Hekima ni matumizi sahii ya maarifa” “wisdom is the application of Knowledge” kwamba kama watajaa maarifa ya mapenzi ya Mungu na kuyatumia watakuwa na ufahamu wa maswala ya Rohoni pia kama Paulo anavyowaombea wakolosai ni wazi kuwa moja ya maombi muhimu ambayo tunaweza kuwaombea wenzetu ni pamoja na kujaa maarifa ya ujuzi wa mapenzi ya Mungu.

4.       Be filled with joy “Ujawe na Furaha”

2Timotheo 1:3-4 “Namshukuru Mungu, nimwabuduye kwa dhamiri safi tangu zamani za wazee wangu, kama vile nikukumbukavyo wewe daima, katika kuomba kwangu usiku na mchana. Nami natamani sana kukuona, nikiyakumbuka machozi yako, ili nijae furaha;”Ni ukweli ulio wazi kuwa waraka huu Paulo aliandika akiwa kifungoni akiwa anakaribia kunyongwa au kuuawa na huku ndugu wengi wakiwa wamemuacha huenda jambo hili lilikuwa limemliza sana Timotheo ambaye aliishi vema na Paulo mtume kama mtu na baba yakewakati huu Paulo anatamani sana kumuona Timotheo ili kwamba aweze kujawa na furaha, Kujawa na futaha ni mapenzi ya Mungu hususani tunapokuwa katika mapito ya aina mbali mbali Shetani anapenda kuona kwamba tunahuzunika na kukata tamaa ni furaha ya maadui pia kuona machozi yako lakini hupaswi kuhuzunika Biblia inasema kama tunafanya kwaajili ya Bwana basi furaha ya Bwana ndio nguvu zetu Nehemia 8:10 “Kisha akawaambia, Enendeni zenu, mle kilichonona, na kunywa kilicho kitamu, tena mpelekeeni sehemu yeye asiyewekewa kitu; maana siku hii ni takatifu kwa Bwana wetu; wala msihuzunike; kwa kuwa furaha ya Bwana ni nguvu zenu.” Biblia inaamuru tuwe na furaha siku zote  1Wathesalonike 5:16 “Furahini siku zote;” Shetani na maajenti wake siku zote watataka uwe na huzuni usikubali hakikisha kuwa unapigania furaha yako kwa gharama yoyote.

5.       “Jaa imani”Be filled with Faith 

Mtualiyejaa imani hi mtu wa kiwango kingine na kamwe hapotezi mwelekeo hata siku moja mtu aliyejaa imani anaona kwa mlango wa sita wa fahamu ambao wengine hawaoni, mtu wa imani anaona kuwa aliyekufa amelala tu, uwezo wa mtu wa imani ni tofauti na uoni wa mtu wa mwilini, mtu wa imani anakuwa imara zaidi wakati wa maswala magumu kwa vile anaona upenyo mahali ambapo wengine hawaoni, Stefano alikuwa moja ya watu mashujaa waliokuwa tayari kufa kwaajili ya kristo kwa vile alikuwa anaona kwa uhakika kuwa kifo ni hatua ya kumpeleka sehemu nyingine yeye anasifiwa katika maandiko kuwa mtu aliyejaa imani  Matendo 6:5 “Neno hili likapendeza machoni pa mkutano wote; wakamchagua Stefano, mtu aliyejaa imani na Roho Mtakatifu, na Filipo, na Prokoro, na Nikanori, na Timoni, na Parmena, na Nikolao mwongofu wa Antiokia;” Biblia inasema pasipo imani haiwezekani kumpendeza Mungu, Mungu anataka mwenye haki wake aishi kwa imani na akisistasita roho yake haina furaha naye Habakuki 2:4 “Tazama, roho yake hujivuna, haina unyofu ndani yake; lakini mwenye haki ataishi kwa imani yake.”

Imani ni nini hasa? Waebrania 11:1 “Basi imani ni kuwa na hakika ya mambo yatarajiwayo, ni bayana ya mambo yasiyoonekana.” Mungu anataka tujawe na imani imani inaleta kujitegemeza kwa Mungu na kuonyesha nguvu ya mtu anayemtegemea Mungu na huleta utukufu kwa Mungu.

6.       “ mjazwe  Neema”Be filled with Grace 

Nyakati za kanisa la kwanza walikuwa na ufahamu sana kuhusu umuhimu wa neema na hivyo mara kwa mara moja ya Baraka kubwa sana iliyotolewa na mitume ilikuwa ni pamoja na kuwatakiwa watu neema angalia  1Koritho 1:3 Neema na iwe kwenu, 2wakoritho 1:2 Neema na iwe kwenu,Wagalatia 1:3 Neema na iwe kwenu, Waefeso 1:2 Neema na iwe kwenu, Wafilipi 1:2 Neema na iwe kwenu, Wakolosai 1:2 Neema na iwe kwenu,2Thesalonike 1:2 Neema na iwe kwenu, Tito 1:4 Neema na iwe kwako, Filemoni 1:3 Neema na iwe kwenu, Je unadhani ni kwa nini Neema inaonekana kuwa ni kitu cha Muhimu na Baraka kubwa sana ? neema ikiwa juu yako wewe sio mtu wa kawaida, wewe utatenda maajabu na mambo ya kushangaza, watu wote na mashujaa wote wa biblia walikuwa ni watu waliojaa neema, ukiwa na neema wewe una ngekewa, wewe una bahati, wewe ni wa tofauti, utapata kibali kwa Mungu na wanadamu, Mungu mwenyewe atakutumia kwa viwango vya kupita kawaida ni muhimu kwetu kumuomba Mungu atujaze neema, neema itatuwezesha kutenda mambo makubwa chini ya uvuli na msaada wa Mungu Yesu alijaa neema, Stefano alijaa Neema , Paulo mtume alijaa neema, Musa alipata neema na wote walifanyamambo makubwa duniani na katika mwili wa kristo

Matendo 6:8 “Na Stefano, akijaa neema na uwezo, alikuwa akifanya maajabu na ishara kubwa katika watu. “ Luka 2;40 “Yule mtoto akakua, akaongezeka nguvu, amejaa hekima, na neema ya Mungu ilikuwa juu yake.” Yohana 1:14 “Naye Neno alifanyika mwili, akakaa kwetu; nasi tukauona utukufu wake, utukufu kama wa Mwana pekee atokaye kwa Baba; amejaa neema na kweli.”  Ni watu waliojaa neema tu ndio walioweza kutumiwa na Mungu kwa namna ya kutisha na kushangaza, kama mtu anataka mafanikio ni muhimu kujitafutia neema ya Mungu, ukijazwa neema wewe ni tajiri wa ajabu wewe utatenda mambo makuu na hakuna mtu anaweza kushindana na mtu aliyepewa neema Paulo mtume alipewa neema kubwa sana na Mungu na akafanya kazi kubwa sana ya kulijenga kanisa kwa mafundisho yake 1Wakoritho 3:10 “Kwa kadiri ya neema ya Mungu niliyopewa, mimi, kama mkuu wa wajenzi mwenye hekima, naliuweka msingi, na mtu mwingine anajenga juu yake. Lakini kila mtu na aangalie jinsi anavyojenga juu yake.” mwenyewe alitambua wazi kuwa alikuwa amepewa neema kusimamia ujenzi wa kazi ya Mungu na kuweka msingi ambao ni yesu Kristo. Musa alijaa neema Kutoka 33:12 “Musa akamwambia BWANA, Angalia, wewe waniambia, Wachukue watu hawa; nawe hukunijulisha ni nani utakayemtuma pamoja nami. Walakini umesema, Nakujua jina lako, nawe umepata neema mbele zangu.” Bwana na ampe kila mmoja wetu kujaa neema katika jina la Yesu Kristo amen

7.       “Ujazwe wema” Be filled with goodness. 

Warumi 15:14. “Ndugu zangu, nimehakikishwa mimi mwenyewe kwa habari zenu ya kuwa ninyi nanyi MMEJAA WEMA, mmejazwa elimu yote, tena mwaweza kuonyana.” Paulo mtume alikuwa badohajaonana na wakristo waliokuwa Rumi lakini alikuwa amesikia sifa zao kuwa wamejaa wema , ni muhimu kwa kila mmoja kujiuliza katika maisha yake kuwa amejaa nini? Watu wanasema nini kukuhusu, je wewe ni mwema? Mtumishi wa Mungu Tito  na mwenzake walikuwa watu wema na sifa zao zilienea  makanisani na sehemu mbalimbali Munhgu anataka tujae wema wako watu wengine kila unakokwenda unasikia habari zao aidha njema au mbaya , wengina hata kabla hujawaona unasikia habari zao, je wewe umejaa wema una sifa za aina gani kila mahali, wengine wana sifa mbaya,  nimewahi kufika mahali nikasikia watu waliomba yule hata akifa sitalia,yule afadhali afe hiki ni kiwango kibaya sana cha sifa haiwezekani watu watatu au wane waseme tunatamani afe Wakristo wanapaswa kuwa na sifa nzuri kila mahali 2Wakoritho 8:16-21 “Lakini ahimidiwe Mungu atiaye bidii ile ile kwa ajili yenu katika moyo wa Tito. Maana aliyapokea kweli yale maonyo; tena, huku akizidi kuwa na bidii, alisafiri kwenda kwenu kwa hiari yake mwenyewe. Na pamoja naye tukamtuma ndugu yule ambaye sifa zake katika Injili zimeenea makanisani mwote. Wala si hivyo tu, bali alichaguliwa na makanisa asafiri pamoja nasi katika jambo la neema hii, tunayoitumikia, ili Bwana atukuzwe, ukadhihirike utayari wetu. Tukijiepusha na neno hili, mtu asije akatulaumu kwa habari ya karama hii tunayoitumikia; tukitangulia kufikiri yaliyo mema, si mbele za Bwana tu, ila na mbele ya wanadamu.”

Bwana ampe neema kila mmoja wetu kuweza kujawa na mambo haya ya msinhgi saba katika jina la Yesu Kristo

Na Rev. Innocent Kamote.

Mkuu wa wajenzi mwenye Hekima!