Mungu na wakimbizi:

Ni muhimu kufahamu kuwa kuwahudumia wakimbizi ni mpango wa Mungu!, Leo tutachukua Muda wa kutosha kwa kina na upana na urefu kuangalia huduma muhimu kwaajili ya wakimbizi Duniani, Mwaka 2004 pekee karibia watu milioni tatu na nusu walikuwa ni wakimbizi barani Afrika pekee, ambao walikimbia na kuishi nje ya nchi zao, na wengine zaidi ya milioni kumi walikuwa ni wakimbizi ndani ya nchi zao, wengi walikuwa hawakimbii tumatukio ya majanga ya kiasili nlakini walikuwa wanakimbia matatizo ya kisiasa, ugomvi wa kimadaraka, matatizo ya kidini, ukabila na maswala mengineyo je neno la Mungu linasema nini kuhusu wakimbizi, kanisa limewahi kutafakari nini kuhusu wakimbizi? Tutajifunza somo hili kwa kuzingatia vipengele vitatu vifuatavyo:- 

 Kundi kubwa la wakimbizi wakiondoka Syria, wakimbizi nao ni watu

·         Neno la Mungu na wakimbizi

·         Mungu anawajali wakimbizi

·         Wakimbizi na mafundisho ya agano jipya

Neno la Mungu na wakimbizi:

Biblia inatambua kuweko kwa watu ambao wamewahi kukimbia huko na huko mbali na Nchi zao, kaini alikuwa mtu wa kwanza kufahamu madhara ya ukimbizi Mwanzo 4:12,”Utakapoilima ardhi haitakupa mazao yake, utakuwa mtoro na mtu asiye na kikao Duniani” Neno utakuwa mtoro ni sawa na utakuwa mkimbizi. Yakobo na Familia yake waliishimaisha ya ukimbizi kutokana na majanga ya njaa nchini kwao Mwanzo 47:3-4, “Farao akawauliza hao nduguze Kazi yenu ni nini? Wakamwambia Farao, Tumekuja kukaa ugenini katika nchi hii, kwa sababu wanyama wa watumwa wako hawana malisho, maana njaa ni nzito sana katika nchi ya kanaani, Basi twakusihi uturuhusu sisi watumwa wako tukae katika nchi ya gosheni” Yesu pia alikuwa mkimbizi huko Misri kwaajili ya kuokoa Maisha yake yaliyokuwa yakitafuta na mfalme Herode Mathayo 2:13-14. “Na hao walipokwisha kwenda zao tazama malaika wa Bwana alimtokea yusufu katika ndoto, akasema  Ondoka umchukue mtoto na mama yake , ukimbilie Misri, ukae huko hata nikuambie kwa maana Herode anataka amwangamize, Akaondoka akamchukua mtoto na mama yake usiku akaenda zake Misri” ziko sababu mbalimbali na mazingira ya aina mbalimbali yanayoweza kusababisha kila mmoja wetu kuwa mkimbizi kwa namna moja ama nyingine.

Mungu anawajali wakimbizi

Biblia iko wazi kuwa Mungu anawajali wakimbizi, alionyesha kujalia sana maisha ya Kaini hata pamoja na kuwa ukimbizi wake ulisababishwa na makosa yake mwenyewe Mwanzo 4:15. Mungu alimwambia Musa katika Torati kuandaa miji ya makimbilio kwaajili ya wakimbizi watakaokimbilia kutokana na sababu mbalimbali ama ambao watu wangelikuwa wanatafuta kuwaua, Kutoka  21:12-14, Hesabu 35:9-34, Kumbukumbu 4:41-43, 19:3-13, Nyakati 6:42-55. Mungu aliagiza pia kuwa wageni walioambatana na Israel pia wanahitaji kuheshimiwa kimsingi tunapaswa kuwajali aina zote za wakimbizi waliokimbia nchi zao kwa sababu zozote zile ziwe za kisiasa, vita uchumi njaa  na ugumu mwingine wote wanapaswa kuheshimiwa kuhifadhiwa kutunzwa vizuri, kupendwa na kuhifadhiwa,kwa heshima na usawa sawa na raia wengine tukiwahesabu kuwa ni ndugu na jamaa zetu Walawi 25, Isaya 16:1-4, Ezekiel 47:21-23 Lawi 19:33-34.

Wakimbizi na mafundisho ya agano jipya

Agano jipya linasisitiza sana kuwahudumia wageni kuwapenda na kuwajali wenye mateso na masikini Mathayo 25:31-40, tofauti ya ndugu na wakimbizi iliondolewa kabisa katika agano jipya Yohana 13:34 kutokana na umoja wa waamini Yohana 17:20-23 na kutokana na udugu na wote kuwa wanafunzi wa Yesu Kristo.

Hivyo ni muhimu kwa kanisa kujihusisha na kuwahudumia wakimbizi punde linapotokea swala la wakimbizi na kukutana na mahitaji yao ya muhimu haraka , kama usalama, upendo, chakula mavazi, malazi, maji safi,madawa, Kumbuka kuwa Yesu atakuja kubagua Kondoo na mbuzi kwa misingi ya namna tunavyowajudumia wengine au wenye uhitaji Mathayo 25:31-46, bila huduma hizi ni vigumu kwa wakimbizi kuikubali injili, wanyarwanda wana usemi usemao “Inda irimo ubusa ntigira amatwi” yaani tumbo tupu halina masikio, Ni muhimu kanisa likakumbuka hilo likakumbuka kuwahubiri injili lakini pia kusikiliza injili kutoka kwao ikiwa wanauwezo wa kuhudumu ili kuwalea na kukuza huduma zao punde warudipo au kuwa wamisionari katika taifa letu, hivi ndivyo nyakati za kanisa la kwanza walivyofanya pia Matendo 8;1-4, 18:1-2, Hali hii itainua heshima yao na kuwatia moyo, kanisa pia linapaswa kufanya kitu cha ziada sio tu kuwaletea maji katika birika bali kuwaelekeza namna wanavyoweza kuchimba visima wenyewe ili kujipatia maji, kanisa linapaswa pia kujihusisha katika swala zima la kuangalia chanzo cha ukimbizi na kukishughulikia hii ina maana kuwa kanisa linapaswa kujishughulisha na swala la kufanya upatanisho na kutafuta majibu ya matatizo ili kuyatatua na watu waweze kurejea katika nchi zao kwa amani badala ya kuiacha kazi hiiikafanywa na serikali zaidi, Kanisa ni lazima lisimamie demokrasia, Haki, upatanisho na mswala ya uongozi kwa ujumla, unaweza kufikiri kuwa kazi hii ni ya kiserikali zaidi nay a kijamii zaidi kuliko ya kiroho, lakini nataka nikuambie kuwa ni ya Kiroho zaidi na inapaswa kanisa kuwa sambamba na mashirika ya kiserikali na yasiyo ya kiserikali yanayojihusisha na huduma kwa wakimbizi

Ni muhimu kuwahudumia vema wakimbizi wao pia ni binadamu, kuna historia za kutisha kuwa sehemu nyingine wakimbizi wanabakwa, wanakataliwa, wanawekewa uzio, au wanafanyiwa hila wafe,n.k. hivi karibuni katika nchi ya Syria kutokana na vita kumekuwa na wakimbizi wengi wanaokimbilia ulaya na wengine wanapitia Libiya lakini wengi wamefanyiwa hila wakikimbia kuokoa maisha yao wengine wameuawa na mataifa mengine yameingia hofu ya kuwapokea Mungu isaidie Dunia kuwa mahali panapofaa kukaa ni wajibu wetu kupiga vita kila kinachosababisha watu kukimbia nchi zao na kujaribu kutatua migogoro iliyoko Duniani ili kila Nchi ipate Ustawi unaokusudiwa na Mungu.

Yeye aliye na sikio na alisikie neno hili ambalo Roho aliambia kanisa.

Mafundisho Kuhusu Ubatizo:-

Ni muhimu kufahamu kuwa Mafundisho kuhusu Ubatizo katika nyakati hizi tulizonazo yamechakachuliwa sana,  na hivyo kuliweka kanisa katika wakati mgumu wa kuamua watu wabatizwe vipi kutokana na kila mtu kubatiza katika namna anayoiona kuwa iko sahii na kujenga hoja za kibinadamu hata kuliko kuliangalia Neno la Mungu linasema nini kuhusu Ubatizo, Mungu na ampe neema kila mmoja wetu na moyo uliopondeka ili wote kwa pamoja tuache tofauti zetu na kuliangalia neno la Mungu linasema nini kuhusu Ubatizo, tuchukulie kana kwamba tumeokota Biblia na sisi wote hatujui Neno la Mungu na tunaisoma hiyo Biblia na tunagundua kuwa tunaweza kumuamini Mungu na tukabatizwa je unafikiri tungebatizwa vipi?  Hii ndio aina ya ubatizo ninayotaka kuizungumzia sawa na Neno la Mungu linavyojieleza na sio sawa na tamaduni za watu na historia za kipagani.

 watu wengi sana hubatizwa pale alipobatiziwa Yesu mto Jordan (Jordan river) huko Israel.

Kwa msingi huo leo tutachukua Muda pamoja na mkuu wa wajenzi mwenye hekima kuchambua kwa kina somo kuhusu ubatizo kwa upana na urefu, ili tuweze kufahamu kwa undani kuhusu ubatizo na kuondoa utata ulioko miongoni mwa jamii ya Kikristo.

Yesu aliamuru kwamba wote watakaomuamini na kubatizwa wataokoka, Biblia inasema katika Mathayo 28:18-20 “18. Yesu akaja kwao, akasema nao, akawaambia, Nimepewa mamlaka yote mbinguni na duniani. 19. Basi, enendeni, mkawafanye mataifa yote kuwa wanafunzi, mkiwabatiza kwa jina la Baba, na Mwana, na Roho Mtakatifu;    20. na kuwafundisha kuyashika yote niliyowaamuru ninyi; na tazama, mimi nipo pamoja nanyi siku zote, hata ukamilifu wa dahari.” Unaweza pia kuona katika Marko 16:15-16 “Akawaambia, Enendeni ulimwenguni mwote mkaihubiri injili kwa kila kiumbe, aaminiye na kubatizwa ataokoka asiyeamini atahukumiwa”

Ni muhimu kwetu basi tukachukua muda kuchambua agizo hili la Yesu la kubatiza na kuangalia kwa undani kile tuilichoagizwa ili kukifanyia kazi kama Mungu alivyoagiza. Tutajifunza somo hili Mafundisho kuhusu Ubatizo kwa kuzingatia Vipengele vitano vifuatavyo:-

• ·         Maana ya Neno Ubatizo
• ·         Maana na Historia ya Ubatizo
• ·         Kanuni na jinsi ya kubatiza
• ·         Sifa ya mtu anayestahili kubatizwa
• ·         Namna ya kubatiza.

Maana ya Neno Ubatizo:-

Kwa kuwa tunazungumzia ubatizo ni vema kwanza tukaelewa asili ya neno Ubatizo neno Ubatizo tulilo nalo kwa Kiswahili katika kiingereza wanatumia neno “Baptize” au “Baptisms” ambalo kwa asili limetokana na Neno la kiyunani yaani KIGIRIKI  “Baptizo” Batizo,  ambalo maana yake ni Kuzamisha au kudumbukiza, “to dip or sink” or “immerse” pia ubatizo unaweza kufananishwa na kuchovya kama mtu anavyoweza kudumbukiza tonge la ugali katika mchuzi, nyakati za Biblia pia lilitumika kumaanisha kuchovya na kufyonza kabisa asili ya kitu kwa mfano nguo ya kitani ilipowekwa katika rangi ili kuibadili iwe na rangi ingine ilidumbukizwa katika rangi na nguo hiyo ilitoka ikiwa imebadilika kutoka weupe wake wa asili kuingia katika rangi iliyodumbukizwa kwayo tendo hilo pia liliitwa Ubatizo unaweza kuona, hii ndio maana halisi ya ubatizo hata kwa mujibu wa “Strong concordance” na “NAS Exhaustive Concordance”  na vyanzo vingine vya Lugha za kiyunani.

Maana na Historia ya Ubatizo:

Kama tulivyoweza kuona maana ya Ubatizo hapo juu ni wazi kuwa hii ndio maana halisi ya ubatizo na maana hii imathibitishwa na hata kukubaliwa kuwa ndio maana halisi ya ubatizo kwa mujibu wa wataalamu na wasomi wa Lugha ya kigiriki yaani kiyunani, na wanahistoria waliobobea katika maswala ya kanisa, ingawa ni muhimu pia kufahamu kuwa wayahudi walioishi nyakati za Kanisa la kwanza walibatiza pia kwenye maji mengi au kwa kuzamisha kwa kusudi la kuwabadilisha wale waliokuwa mataifa wa kawaida walioamini katika dini ya kiyahudi ambao waliitwa “Proselyte’s” ubatizo wao ulikuwa na maana ya kuwa wameacha miungu yao na kumuamini Mungu wa wayahudi, kitamaduni inaelezwa kuwa mwongofu alisimama katika maji na kisha kuzamisha kichwa chake katika maji huku sheria au Torati ya Musa ikisomwa, na tendo hilo pia lilimuhesabu kuwa ametakaswa na  na ameanza kuishi maisha mapya  kama mtu wa watu wa agano la Mungu.

Katika tamaduni za kiyunani pia kulikuwako na biashara zilizoshamiri za uuzaji wa nguo za rangi ya zambarau soma Matendo 16:11-14 nguo hizi zilikuwa mfano wa batiki zilizamishwa katika sufuria za maji yenye rangi na hivyo nguo hizo zlifyonza maji na rangi kabisa na kusababisha rangi kupenya katika nguo na nguo ilitoka ikiwa na rangi iliyokusudiwa kitendo hiki pia kiliitwa UBATIZO.

Ni wazi kutokana na maana na historia na tamaduni, swala la kunyunyizia maji au kumwagia maji binadamu kwa madai kuwa unabatiza haliko katika historia nzima ya kubatiza, lakini liko katika tamaduni za kitorati za kutakasa kitu au vitu, pia kibiblia swala hilo halimaanishi ubatizo, Kibiblia kuhani alitakasa vitu au vyombo vilivyotumika kwa kazi maalumu hekaluni, lakini linapokuja swala zima la Ubatizo kubatiza kwa kunyunyizia hakuna mashiko ya kihistoria wala ya kimaandiko, kuna uwezekano tu kuwa aina hii ya ubatizo ilifanywa kwa wagonjwa mahututi ama ambao walikuwa hawawezi kuelekea eneo la Ubatizo na pia ama kwa kuheshimu watu wenye nyadhifa kubwa kama wafalme, au pia kwa sa babu ya kubatiza wakristo waliokimbilia mafichoni wakati wa mateso, hata hivyo kwa sababu zozote zile kama zilizoainishwa hapo juu, haziwezi kuhalalisha ubatizo huo kuwa wa kibiblia ama wa kihistoria, na kwa vyovyote vile ubatizo huo sio agizo la kibiblia na uko uwezekano kuwa uliingizwa kwa mitazamo ya kipagani au kwa kuweko na mwingiliano wa kipagani.

Iko wazi kuwa ubatizo wa kimaandiko kabisa ambao hata wapagani yaani watu wasio na dini wakiokota biblia leo wakajifunza neno na kubatizana basi ni wazi ubatizo halisi utahitaji maji mengi na ya kuzamisha, ambayo ndio maana halisi ya kibiblia kwa mujibu wa Maandiko Warumi 6:1-4.

Ubatizo unafanana na tendo la kuzika mwanadamu Warumi 6:1-4

Ubatizo ni picha ya wokovu

Ubatizo ni kivuli cha kufanana na Bwana Yesu kiroho

Ubatizo ni alama ya kuoshwa ni alama ya kile ambacho kimekwisha kufanyika ndani ya moyo Matendo 22:16

Ubatizo ni ushuhuda Wagalatia 3:27

Umuhimu wa ubatizo, kanisa halipaswi kupuuzia swala zima kuhusu ubatizo, hata ingawa ubatizo wenyewe hauokoi, wala hauna nguvu ya kuokoa, watu hawabatizwi ili waokoke, lakini wanabatizwa kwa sababu wameokoka, kwa hiyo ubatizo sio tiketi ya wokovu lakini ni tendo muhimu katika kumkiri Yesu hadharani na ni muhimu katika kuonyesha utii, kama vile Rais anapoteuliwa anathibitika kuwa Rais kamili pale anapoapishwa, tunapokuwa tumemuamini Yesu kuwa ni bwana na mwokozi wetu, kokote pale tunamkiri Yesu kuwa ni bwana na Mwokozi hadharani kwa kukubali kubatizwa.

Kanuni na Jinsi ya kubatiza

Ni muhimu kufahamu kuwa kanini kuu ya kubatiza ni kile kilichoagizwa na Bwana Yesu tu Mathayo 28:19 Kubatiza kwa jina lka Baba na la mwana na la Roho Mtakatifu. Haya ndio Maneno yanayopaswa kutamkiwa mtu anayebatizwa sawa na Yesu alivyoagiza, mtu anapomwamini Yesu anakiri hadaharani kwa njia ya ubatizo na mbatizaji atatamka maneno haya Kwa kuwa Fulani…….bin Fulani…..umemwamini Bwana Yesu Kristo kuwa alikufa msalabani kwaajili ya ondoleo la dhambi na kuwa amekuwa bwana na mwokozi wa maisha yako kwa mamlaka niliyopewa na Mungu mimi nakubatiza kwa jina la baba na la Mwana na la Roho Mtakatifu amen!, Maneno wakabatizwa kwa jina lake Yesu Kristo yaliyotumiwa na petro katika Matendo 2:28, hayawakilishi kanuni ya kubatizia, bali yanazungumzia Mamlaka ya ubatizo mara baada ya mtu kumuamini Yesu Kristo, kwa Mfano “Didache” yaani maandiko ya nyakati za zamani wakati wa mitume yaliyoandikwa mika 100 baada ya Kristo (100 AD) yanataja Ubatizo ulioagizwa na Yesu kama Ubatizo wake Yesu Kristo lakini katika ufafanuzi wake jinsi walivyobatiza walitumia kanuni ya kubatiza kwa Jina la Baba na la Mwana na la Roho Mtakataifu, Hivyo kanuni iliyotumika kubatiza ilizingatia utatu wa Mungu. Paulo anapozungumzia ubatizo wa wana wa Israel katika bahari ya shamu anataja Ubatizo wake Musa hii haimaanishi Paulo alikuwa anataja juu ya Kanuni bali mamlaka ya Musa kwa vile kila mmoja baada ya kuvuka bahari ya shamu alikubali wazi kuwa Musa ni mjumbe wa Mungu wa Mbinguni kwaajili yao, “1Koritho 10:2” ni katika mtazamo huohuo unapozungumzia ubatizo wa Yesu Kristo unazungumzia sio kubatizwa kwa jina lake Yesu tu, bali kubatizwa kwa Mamlaka au agizo lake Yesu Kristo baada ya kumkubali na kumuamini kama kiongozi wetu mkuu wa wokovu wetu, kubatizwa kwa jina lake Yetu kungemaanisha vilevile kama alivyoagiza, kubatizwa kwa Jina la Baba , Mwana na Roho Mtakatifu, hivyo si sahii katika kanuni ya ubatizo kutaja jina la Yehova tu au jina la Yesu tu, kanuni ya ubatizo inabaki kubatizwa kwa jina la Baba, mwana na Roho, Mtakatifu.

Uatatu wa Mungu ulikuwa ni jambo muhimu sana kutajwa katika nyakati za mitume kwaajili ya kuwakilisha upatikanaji wa neema na ushirika na upendo 2Wakoritho 13:14. Aidha tendo la ubatizo nyakati za Biblia na kama ilivyo maana halisi kibiblia ilikuwa ni lazima lihusishe maji mengi  “Yohana 3:22-23”

Ubatizo kwa kuwa ulifanyika katika maji mengi ulihusisha kupandana kushuka kutoka majini, wakati wote Biblia ilipotaja swala la ubatizo au mtu kubatizwa lugha za kushuka na kupanda kutoka kwenye maji zilitawala kama unavyoweza kuona katika mazingira yafuatayo:-

-          Marko 1:9-11

-          Mathayo 3:16

-          Matendo 8: 36-39

-          Matendo 16:13-15

-          Matendo 16:30-34

Sifa ya mtu anayestahili kubatizwa:

Watu wenye sifa ya kubatizwa ni wale ambao kwa moyo wa dhati wametubu dhambi zao kwa kumaanisha kuziacha na wanaishi maisha ya utakatifu sawa na injili ya Bwana Yesu Kristo, ni watu waliomwamini Yesu na wameisikia injili na kuiamini, hao wana sifa ya kubatizwa, Nyakati za kanisa la Kwanza swala la ubatizo liliambatana na maswala makuu matatu yafuatayo;-

1.       Kumwamini Yesu kwa moyo wako wote kuwa ndiye Mwana wa Mungu Matendo 8:36-39

2.       Kuliitia jina la Bwana yaani kuomba Matendo 22:16

3.       Kujiweka wakfu kutoka matendo maovu na kuishi kwaajli ya Mungu 1Petro 3:20-21

Kwa msingi huo mtu mwenye sifa ya kubatizwa anapaswa kuwa na sifa za kuweza kuisikia injili, kusikiliza mahubiri, na kisha kuyaamini na ndipo inapowezekana mtu huyo kubatizwa Marko 16:15-16 “Akawaambia Enendeni ulimwenguni mwote mkaihubiri injili kwa kila kiumbe, aaminiye na kubatizwa ataokoka asiyeamini atahukumiwa” Mtu aliye na sifa za kubatizwa ni lazima awe na uwezo wa kusikia injili na kuipambanua na kuikubali yaani kuiamini na kutubu dhambi zake yeye mwenyewe, ni lazima ahubiriwe, ni lazima aamini ni lazima akiri ni lazima aliitie jina la Bwana, ni lazima asikie kutoka kwa muhubiri Warumi 10:10-17 “10. Kwa maana kwa moyo mtu huamini hata kupata haki, na kwa kinywa hukiri hata kupata wokovu. 11. Kwa maana andiko lanena, Kila amwaminiye hatatahayarika. 12. Kwa maana hakuna tofauti ya Myahudi na Myunani; maana yeye yule ni Bwana wa wote, mwenye utajiri kwa wote wamwitao; 13. kwa kuwa, Kila atakayeliitia Jina la Bwana ataokoka. 14. Basi wamwiteje yeye wasiyemwamini? Tena wamwaminije yeye wasiyemsikia? Tena wamsikieje pasipo mhubiri? 15. Tena wahubirije, wasipopelekwa? Kama ilivyoandikwa, Ni mizuri kama nini miguu yao wahubirio habari ya mema! 16. Lakini si wote walioitii ile habari njema. Kwa maana Isaya asema, Bwana, ni nani aliyeziamini habari zetu? 17. Basi imani, chanzo chake ni kusikia; na kusikia huja kwa neno la Kristo.” Utaweza kuona sifa za namna hiyo zikijirudia kwa mkazo katika maandiko unaweza kusoma Matendo 8:36-39, Matendo.2:38-41, Matendo 16:14-15, Matendo 16:29-34. Kwa Msingi huo basi watu wenye sifa ya kubatizwa ni wale wenye uwezo wa kupambanua injili moyoni wenye uwezo wa kujua mema na mabaya. Kwa kuwa watoto wadogo hawana dhambi na hawana ujuzi au wezo wa kupambanua jema au baya na hawana uwezo wa kuamua kuamini au kutokuamini ni wazi tu kuwa ubatizo wa maji mengi hauwahusu  kwa ufupi watoto hawabatizwi, hii haimaanishi kuwa tunawazuia kuja kwa Kristo au kuingia katika ufalme wa Mungu hapana Yesu alisema watoto kama hawa ufalme wa Mungu ni wao, kwa msingi huo wanayo tiketi ya kuingia katika ufalme wa Mungu Mathayo 19:13-14 watoto wadogo huwekwa wakfu kwa Mungu katika ibada lakini hawabatizwi wao hubarikiwa tu.Luka 18:15-16.

Namna ya kubatiza.

Yeye anayebatiza na wanaobatizwa watafika nga’mbo ya maji yenye uhai yaani yaliyo safi na yanayotembea na kama ni kisima kiwe kina uwezo wa kuruhusu maji kuingia mapya na yaliyotumika kutoka, wataimba kama sehemu ya ibada na baada ya nyimbo maandiko kadhaa au mojawapo yanayohusiana na ubatizo yatasomwa na kisha Maji yatabarikiwa na eneo la kubatizia litawekwa wakfu, mbatizazi ataingia katika maji mengi na kuhakikisha kuwa anasimama vema mahali ambapo ataweza kuwazamisha wanaobatizwa, wabatizwaji wanaweza kuwa na mavazi maalumu ya kubatiziwa au kuwa na nguo za kubadilisha mara baada ya kubatizwa, aidha ni vema wakaweko wahudumu wenye nguo maalumu ambao watawahifadhi wanaobatizwa mara baada ya kupanda kutoka majini kuwazinga kwa nguo hizo na kuwasindikiza mahali pa kubadilisha nguo kavu, mbatizaji atakapokwisha kuyatakasa maji kwa kuyaweka wakfu, wanaobatizwa watajipanga mstari na kuanza kubatizwa kwa zamu ni vema wahudumu wakawa karibu kabisa na anayebatiza kwaajili ya kutoa msaada wa huduma zinazojitokeza wakati wa ubatizaji kama woga wa maji, kujazwa Roho Mtakatifu wakati wa kubatizwa na kuondoka kwa Pepo wabaya wakati wa kubatizwa haya ni matendo ya kawaida ambayo hujitokeza wakati watu wanabatizwa.

Wanaobatizwa waelekezwe namna ya kujihami wasinywe maji au maji kuwaingia puani, waelekezwe namna ya kuwa wepesi na kutokusababisha kuangukia majini tendo la ubatizaji lifanyike kwa utaratibu bila papara.

Mbatizaji atauliza majina kamili ya anayebatizwa nakama kuna jina jipya analotaka kulituimia kubatizwa kama alitokea katika uislamu na imani nyinginezo

Mbatizaji atamuuliza anayebatizwa kama amemkubali Yesu kuwa Bwana na mwokozi na kama anaamini kazi aliyoifanya Yesu Msalamabani ikiwa ndivyo mbatizaji atatamka yafuatayo

Kwa kuwa …………………..Umemkubali Yesu Kristo kuwa Bwana na mwokozi wa maisha yako na kuiamini kazi aliyoifanya Msalabani kwaajili yetu

Mimi kwa mamlaka niliyopewa nakubatiza kwa jina la Baba na la Mwana na la Roho Mtakatifu na kisha atamzamisha kwenye maji, mfano wa mtu anayezikwa ardhini na kisha atamtoa katika maji, wakati huu kila sehemu ya mwili wa anayebatizwa itapaswa kuzama kabisa katika maji mfano wa marehemu anavyolazwa, baada ya kitendo hicho utamuinua kwa haraka na kusimama katika hali ya kawaida na kisha utamuombea neema kwa maisha yake na kumbariki katika sehemu ya maisha yake ya wokovu  na kumuacha aende zake.

Laiti ningekunywa maji ya kisima cha Bethelehemu !

  1Nyakati 11:17.

“1Nyakati 11:10 – 19”

Ni muhimu kwetu kufahamu kuwa hakuna kitu au jambo linatokea tu hivihivi duniani, bila baadhi ya watu, kuhatarisha Maisha yao, ili kwamba wengine waweze kufikia Ndoto zao, Ndoto za kila mmoja wetu haziwezi kufikiwa ikiwa kwa msaada wake peke yake, ni lazima wengine wahusike, katika kuzifanikisha ndoto hizo!.

 Kisima cha Daudi Mjini Bethelehemu

Unapoona mataifa Mengi yako huru leo ni lazima ufahamu kuwa uhuru huo, haukupatikana kirahisi, wako walioupigania, unapoona kuna haki zimepatikana mahali Fulani ambako hakukuwa na haki, ni lazima ujue kuwa, kuna watu waliopigania haki hizo hata zikapatikana na wakati mwingine iligharimu maisha yao na hata kufa!, Uhai, Elimu na mafanikio yamtu moja moja pia yatategemea kwa namna moja ama nyingine kujitoa kwa watu wengine ili kutimiza azima ya mafanikio yetu na kuishi kwetu.

Askari mmoja Nchini Marekani wakati wa kimbunga kikali sana kijulikanacho kama Hurricane Sandy alijitosa katika mafuriko na kuokoa watu wazima sita na mjomba wake mdogo sana na baada ya kufika Ng’ambo aligundua kuwa Baba yake hakuweko, hivyo alirudi tena ili amuokoe Baba yake aliporejea, hakufanikiwa kumuona na baba yake kwa bahati njema alikuwa ameokolewa kwa njia nyingine na kufika n’gambo lakini baadaye ilibainika kuwa Artur Kasprizak alikuwa amefariki dunia alipokuwa akijaribu kumtafuta baba yake.

Mtakatifu Maximilian Kolbe wakati wa vita vya wanazi WANAZI wa Hitler waliamua kujaribu kuuwa waqtu kumi kwa njaa ili waona itakavyokuwa, wafungwa hawa kila mmoja alikuwa akiogopa , Wanazi walichagua mtu mmoja mfungwa aanze zoezi la kufa na Njaa na mtu huyu alilia sana akiitaja Familia yake Ndipo Maximilian Kolbe aliamua kujitoa yeye ili achukue nafasi ya mfungwa huyo, na akaanza zoezi la kushinda na njaa, Kolbe aliimba na kuomba kwa sauti kwa wiki tatu ili kuokoa roho za wengine lakini wanazi walidhihaki na wakaamua kumchoma sindano ya sumu akafa na baadaye Kanisa Katoliki lilimtangaza kuwa Mtakatifu.

 Mtakatifu Maximilian Kolbe

Mwaka 1984 mwezi kama wa tano na wa sita hivi mwaka huo nikiwa kijana mdogo sana niliugua sana, wakati huo tulisafiri na baba kutoka Lindi mjini tulipanda Ndege na kuja Dar es Salaam, kisha tulipanda basi kuja hapa Muheza kumpa Pole shangazi kwani alikuwa amefiwa na Mumewe, kwa bahati mbaya nilianza kuugua njiani huku nikiishiwa na nguvu na nilumwa sana sana, hali yangu ilikuwa ngumu kiasi ambacho Madaktari walikata tamaa na kusema labda tukajaribu maswala ya nyumbani, mama alikuwa amebaki Lindi na kaka na mdogo wangu mdogo sana aliyekuwa na miaka mitatu tu, Shangazi aliyekuwa amefiwa na ndio tumekuja kumpa pole alilazwa name katika Hospitali ya teule hapa Muheza, likizo yote iliishia hospital mama yangu alipoambiwa kuwa ninaumwa sana alipiga magoti na kumuomba Mungu sana, aliambiwa kuwa wakati wowote lolote lingeweza kutokea, “Mama yangu aliomba Ee Mungu tafadhali unichukue mimi badala ya Mwanangu!” Nilipona kwa njia ambazo Mungu alikuwa anajua na tulifanikiwa kurudi Lindi nikiwa salama lakini nilikuwa Nimekonda sana mama alifurahi kuniona lakini kabla ya mwezi kumalizika July 19 Alhamis 1984, Mama yangu alifariki baada ya Operesheni ya kidole tumbo kushindikana”

Maisha yalianza kuwa tofauti, tulianza kuishi katika mikono ya watu wasio na Huruma, na wakatutenda kila walichojisikia, Nafahamu wazi kuwa Maisha yangu yaligharimiwa na watu Hata sasa sifahamu kuwa nitampata wapi Mama japo nilipe fadhila, ama nifanye nini ili niweze kuifurahisha roho yake, 

Katika Maandiko wote tunafahamu kuwa Daudi alikuwa ni shujaa na ni mtu wa Vita, alimpiga Goliath, aliuwa wafilisti wapatao Miambili alipoagizwa na Sauli kuwa anataka Govi za wafilist mia moja ili amuoze Binti yake.

Lakini hata hivyo Ushujaa wa Daudi hauwezi kukamilishwa na Daudi peke yake, huwezi kuamilisha Jambo lolote mwenyewe, wala kwa kudharau wengine wanaokuzunguka, mafanikio yako hayatokani na wewe mwenyewe na akili zako na nguvu zako bali pamoja na wale Mungu anaokupa kukuzunguka, wako wanaokuombea, wako wanaochukuliana nawe, wako waliokusamehe, wako wanaokutia moyo, wako waliokuelekeza wako wanaokutetea, na mengineyo.

Daudi aliweza kutiwa Moyo na makamanda ambao walikuwa wapiganaji Hodari sana kupita kawaida licha ya kupigana kwaajili yake pia walimlinda na Mungu alimpa Ushindi ushindi Daudi kupitia wao.

1.       Yashobeamu mhakmoni 1Nyakati 11:10-11

2.       Eleazar mwana wa Dodai 1Nyakati 11:12

3.       Mwingine aliitwa Abishai 1Nyakati 11:20 

Majemadari hao ndio waliosababisha Ufalme wa Daudi kuwa Imara

Siku Moja Daudi alifanya jambo la kipumbavu sana hatujui ilikuwa ni kwa sababu Gani, lakini alitamani kunywa maji ya Kisima cha Bethelehemu, Daudi alizaliwa Bethelehemu, alikulia hapo alitumia maji ya kisima kile huenda yalikuwa matamu au aliyazoea na hivyo aliyakumbuka

Hata hivyo wakati huu alipokuwa akiyadai, hali ilikuwa ni Mbaya kulikuwa na Vita kali sana kati yao na Wafilisti na kisima kile pale kilipokuweko ndiko kulikokuwa na Ngome ya Wafilisti yaani maadui wa Israel lakini wakati huohuo Ndio Daudi anatamani maji ya kisima kile tena anayadai kwa Nguvu kubwa LAITI NINGEKUNYWA MAJI YA KISIMA CHA BETHELEHEMU ! 

Majemadari wake Daudi waliposikia kauli ya mfalme wao, bila kujalia kuwa wanajidhihirisha kwa maadui zao na kuhatarisha Maisha yao, tena bila ya kuuliza haya maji yana tofauti gani na mengine? Mfalme leo ana wazimu au inakuwaje anataka maji ya Bethelehemu ni Udhaifu wa namna gani huu? Hawakuwa na maswala dhidi ya kutii, walisema liwalo na liwe wakapenya ngome ya Wafilisti safari hii sio kuokoa taifa au kuokoa mtu aliyetekwa hapana ni kuleta maji kwa mfalme mwenye kiu ya kijinga tu!

Daudi alipogundua kuwa amefanya Ujinga wa kipuuzi, aliamua naye kujitesa aliyapokea maji yale na kuyatoa dhabihu kwa Bwana, Hakukubali kuyanywa akasema MUNGU wangu apishie Mbali, nisifanye Hivi je “NINYWE DAMU YA WATU WALIOHATARISHA MAISHA YAO”,  hatuwezi kumpuuzia bwana wetu Yesu alikufa Msalabani akamwaga Damu yake, tunatumia jina lake, kupata ushindi na mafanikio mbalimbali ni muhimu kumuenzi Bwana wetu, Tukumbuke wote waliotusaidia kufikia hapo tulipofikia, tuache kupuuza maswala na michango ya watu wengine, wako watu wenye dharau Duniani ambao hawaoni michango ya watu wengine katika jamii, wanatamani hata kufuta Historia zao, hawataki kuona hata picha za waasisi na waliopoteza maisha kwaajili yao, Kusoma kwetu na kulipiwa kwetu Ada kuna michango ya watu mbalimbali ambao wanataka kufurahia ndoto zako kufikiwa wanataka kuhakikisha kuwa kiu yako inatimilizwa na wako tayari wao wafe ili wewe uisho usihesabu mchango wao kuwa ni Upuuzi.

Ujumbe na Mkuu wa Wajenzi mwenye Hekima.