Furahini na wanaofurahi, lieni na wanaolia

Warumi 12:15 “Furahini pamoja nao wafurahio; lieni pamoja nao waliao”.

“rejoice with Those who rejoice; mourn with those who mourn”

Utangulizi.

Mungu anapendezwa sana pale anapoona wanadamu wakisaidiana kupendana na kuchukuliana katika kila jambo, Mungu anamtegemea kila mwanadamu kuwa mbali na ubinafsi na kuishi kwa kusaidiana kwa kadiri ya neema yake, Furahini na wanaofurahi na lieni na wanaolia ni amri ya kibiblia inayotufunza kuwa na ushirika na wengine na kuwasaidia wengine ni amri inayohusu kuwa mbali na ubinafsi.

Israel walipokuwa karibu na kuingia katika inchi ya kanaani baadhi ya makabila ya wana wa Israel walikuwa na utajiri mkubwa sana wa mifugo kuliko kabila nyingine na waliona nchi nzuri inayofaa kuiweka mifugo yao ng’ambo ya Yordani hivyo walimuomba Musa kuwa wangependa  kukaa magharibi ya mto Yordan kwajili ya mifugo yao, Musa hakufurahi kwani alijua kuwa jambo hili lingeweza kuwavunja moyo wengine, Lakini wao waliahidi kuwa wako tayari kuvaa silaha na kupigana kwaajili ya ndugu zao mpaka nao wafanikiwe kupata urithi wao angalia :-

Hesabu 32:16-18 “Basi wakamwendea karibu, na kusema, Sisi tutafanya mazizi hapa kwa ajili ya wanyama wetu wa mifugo, na kujenga miji kwa ajili ya watoto wetu;  lakini sisi wenyewe tutakuwa tayari na silaha zetu kutangulia mbele ya wana wa Israeli, hata tutakapowafikisha mahali pao; na watoto wetu watakaa katika hiyo miji yenye maboma, kwa sababu ya wenyeji wa nchi.Sisi hatutarudia nyumba zetu, hata wana wa Israeli watakapokuwa wamekwisha kurithi kila mtu urithi wake.”

Mfano.

Huko Afrika ya kusini baadhi ya Wanafunzi wa chuo kimoja cha Ualimu waliamua kwenda katika vijiji vya ndani sana vya Wazulu ili kutoa msaada wa Elimu kwa watu waliokuwa hawana elimu, waliamua kuchagua vijiji vilivyokuwa juu kabisa katika milima katika makabila ya watu waishio milimani.

Walimu walipofika katika vijiji hivyo walipokelewa vizuri sana na kwa ukarimu mkubwa na kuchezewa ngoma, kisha walipelekwa mahali pa kupumzika, wanakijiji walikuwa na ukarimu na waliishi kwa furaha licha ya kuwa hawakuwa na umeme na vifaa vya kisasa, lakini walikuwa wakarimu kiasi ambacho walimu wale walifurahi sana.

Walimu walijieleza kwa mkuu wa kijiji juu ya kusudi lao na mpango wao wa kuwaelimisha watoto, Wanakijiji walifurahi sana kusikia hilo, waliwakusanya watoto na kutengeneza ratiba kwaajili ya kujifunza, hata hivyo walimu walipata changamoto ya kuwahamasisha sana wanafunzi wao kujifunza kwani ilikuwa ngumu sana, walitumia mbinu nyingi sana lakini wanafunzi wachache ndio walioonyesha mwitikio.

Mwalimu mmoja aliamua kutoa Chocolate kwa kila mtoto katika darasa lake, na wanafunzi wao waliipenda sana chocolate kwa vile hawajawahi kula hata siku moja tangu kuzaliwa, ilihamasisha sana hivyo waliamua kuanzisha shindano, ili kujipatia boxi la Chocolate waliweka Boxi moja la chocolate mbali karibu na mti kama mita 200 hivi ili kuhamasisha wanafunzi kupenda masomo.

Walitangaza kuwa mtoto atakayekuwa wa kwanza atapata chocolate boxi zima, walihesabu mojaaaa! Mbiliiiiii! Tatuuuu! 

Unajua kilichotokea?

Watoto wote wa kijiji kile walishikana mikono na wakakimbia kwa pamoja kama upepo na kuokota boxi la Chocolate kwa pamoja na wakagawana wote sawa kabisa.

Jambo hili liliwashangaza sana walimu wao kwani hakukuwa na mshindi, wote walikimbia kwa pamoja na wote waligawana sawa chocolate zile.

Mwalimu mmoja akawauliza wale watoto mbona mmefanya hivyo mwanafunzi yule akajibu “UBUNTU!”

Walimu waliuliza wanakijiji UBUNTU ndio nini wakaambiwa kuwa UBUNTU maana yake “When others are sad how can you Stay Happy?” yani kama wenzako wana huzuni wewe unafurahije?” UBUNTU NI UMOJA "UNITY" ni ushirikiano usio na ubinafsi.

Walimu walishangazwa sana!

Unawezaje kuwa na furaha hali wengine wana huzuni “When others are sad, how can you stay happy?’”

Huu ni wakati wa kusaidiana na kuinuana kama ni wakati wa mitihani unakaribia ni muhimu  kuhakikisha kuwa wenye uwezo mkubwa wanawasaidia wenye uwezo mdogo na kuwasaidia kuelewa, kuna faida gani mnapata division one huku wengine wana division IV ni muhimu kusaidiana katika masomo, kumbuka sisemi msaidiane vibomu wakati wa mitihani hapana tusaidiane kuelewa masomo wakati wa kujisomea, tusaidiane kuinuana kiuchumi kama wachaga na wahindi, mwingine anapoharibikiwa, tusaidiane kujengana katika ndoa wengine wanapokuwa na mafarakano, tusaidiane kuhakikisha kuwa watanzania wote, wakenya wote na majirani zetu Rwanda, Burundi, Kongo na kadhalika zinakuwa na amani, Mwalimu Nyerere alisema, Tanzania (Tanganyika) haiwezi kuwa huru Mpaka Afrika nzima imekuwa huru. 

Wana wa Reuben na Gadi na nusu ya Manase walitii  kile walichomuahidi Musa walishika silaha na kutangulia mbele ya Israel ili kuwapigania nao wapate urithi wao kama wao ilivyokua,  

Yoshua 4:12-13 “Na wana wa Reubeni, na wana wa Gadi na hiyo nusu ya kabila ya Manase, wakavuka, hali ya kuvaa silaha mbele ya wana wa Israeli, kama Musa alivyowaambia; walipata kama watu arobaini elfu hesabu yao, wenye kuvaa silaha tayari kwa vita, waliovuka mbele ya Bwana, waende vitani, hata nchi tambarare za Yeriko”.

Na. Rev. Innocent Kamote.

Mkuu wa wajenzi Mwenye Hekima.

Mnamwamini Mungu,Niaminini na mimi

Andiko:Yohana 14:1 “Msifadhaike mioyoni mwenu; mnamwamini Mungu, niaminini na mimi.”

Utangulizi.

Injili ya Yohana ni injili inayokazia kuhusu kumuamini kumuamini Yesu, kusudi kubwa la mkuandikwa kwa injili hii ni ili watu wapate kumuamini Yesu kuwa ni mwana wa Mungu  Yohana 20:30 -31 Biblia inasema “Basi kuna ishara nyingine nyingi alizozifanya Yesu mbele ya wanafunzi wake, zisizoandikwa katika kitabu hiki. Lakini hizi zimeandikwa ili mpate kuamini ya kwamba Yesu ndiye Kristo, Mwana wa Mungu; na kwa kuamini mwe na uzima kwa jina lake”

Katika andiko la msingi tunaona Yesu akiwatia moyo wanafunzi wake kwamba wasifadhaike mioyoni mwaoa na kuwa wanapaswa kumuamini yeye kama wanavyomuamini Mungu, kwa nini Yesu anasema swala hili kwa sababu alikwisha kuwaambia wazi kuwa Yuda atamsaliti Yohana 13:21, Petro atamkana mara tatu, Yohana 13:38, na pia kuwa na pia Yeye anakaribia kuondoka tena kupitia mauti, kwa ujumla hii ilikuwa hali ngumu kwa wanafunzi wa Bwana ambao walikuwa wameacha vyote ili kumfuata Yesu, Jambo hili liliwakatisha tamaa.

Mara kwa mara katika maisha yetu tunaweza tukawa na nyakati ngumu na za kukatisha tamaa katika maisha, tunaweza kukutana na hali zilizo ngumu na hata tukayaona maisha yetu kuwa giza mbele, tunaweza kujawa na hofu, kwamba mambo yatakuwaje Biblia inatoa jibu kuwa tumamini Yesu, Yesu anasema mnamwamini Mungu, niaminini na mimi, hii maana yake ni kuwa kumuamini Mungu ni sawa kabisa na kumuamini Yesu, Yesu ni Mungu na hivyo tunapaswa kumwamini na kumtegemea yeye, naye atatutokea na kutupa uzima

Mfano.

Kulikuwa na mkwea milima mmoja maarufu sana ambaye alikuwa na tabia ya kupanda milima mirefu duniani, siku moja mpanda milima huyu alichelewa kushuka mlimani, hivyo giza kuu lilimkuta akiwa juu, hakukuwa na mbara mwezi wala nyota na ilikuwa ngumu sana kuweza kuona anakokwenda kwa vile kulikuwa na wingu zito na giza nene

Mpanda milima huyu alijaribu kushuka kutokakatika mlima lakini kwa bahati mbaya aliteleza na akaanza kuanguka akiwa hewani kwa kasi ya ajabu, alikuwa akiona vitu vyeusi tu alipokuwa anakwenda chini kwa kasi, ilikuwa hali ya kutisha sana akajua kuwa ni kaburi tu ndilo linalomsubiri

Aliendelea kuanguka kuelekea chini akiwa na hofu kubwa sana akawaza kuwa sasa anakaribia kufa ghafla alisikia kamba ikiwa imekamata kiuno chake kwa nguvu sana na mara mwili wake ulianza kuning’inia alihisi kuwa kama imekamata bara bara kiuno chake na ikimshika kwa nguvu lakini alikuwa bado yuko hewani ananinginia, naye aliishikilia kwa nguvu zake zote, lakini alikumbuka kuliitia jina la Yesu na kuomba ee bwana Yesu nakuomba uniokoe na mauti hii

Mara moja alisikia sauti ikimwambia kutoka mbinguni Je unataka nikufanyie nini? Alisema uniokoe ee Mungu wangu, Yesu alimwambia unaamini kuwa naweza kukuokoa? Akasema ndio bwana nakuamini Yesu akamwambie kata kamba yako iliyokushika kiunoni uende zako

Baada ya sauti hiyo kulikuwa kimya kwa muda, na muda ukazidi kwenda mpanda milima yule aliendelea kushikilia kamba yake huku akinin’ginia na hakukubali kuiachia kamba aliishikilia kwa nguvu zake zote

Asubuhi waokoaji walimkuta mpanda milima akiwa amekufa huku akiwa ameshikilia kamba yake kwa nguvu kubwa sana watu walisikitika sana na kulia kwani ilikuwa ni futi moja tu kutoka ardhini

Wengi tumefungwa na vitu vidogo tu vinavyotuzuia kumuamini Mungu, ni lazima tuachie kama hiyo na kumtegemea Mungu mwokozi wetu, kamwe tusimuachie Mungu

Sijui unapitia hali gani katika maisha yako lakini najua jambo moja tu kuwa Mungu ataweka kila kitu sawa katika maisha yako kwa wakati mkamilifu, wakati mwingine unaweza kuchanganyikiwa na wakati mwingine unaweza kukosa faraja, lakini Mungu anabaki kuwa mwaminifu katika kututendea mema, kumbuka maneno ya bwana Yesu Usifadhaike, Unamwamini mungu muamini nay eye, usiogope, wakati wote nenola Mungu linatutaka tumwamini Mungu 

2Nyakati 20:20 “Wakaamka asubuhi na mapema, wakaenda nje katika jangwa la Tekoa; nao walipokuwa wakitoka, Yehoshafati akasimama, akasema, Nisikieni, enyi Yuda nanyi wenyeji wa Yerusalemu; mwaminini Bwana, Mungu wenu, ndivyo mtakavyothibitika; waaminini manabii wake, ndivyo mtakavyofanikiwa.”

Na Mkuu wa wajenzi mwenye Hekima

Rev. Innocent Kamote

“Wala msimpe Ibilisi Nafasi”

Waefeso 4: 27 “Wala msimpe Ibilisi nafasi”.

Utangulizi:

Ni muhimu kufahamu kuwa Kila mtu wa Mungu yuko katika vita na shetani, Shetani anatajwa katika maandiko kuwa ndiye adui yetu mkubwa yeye anatajwa kama simba aungurumaye akitafuta mtu apate kummeza  1Petro 5:8 “Mwe na kiasi na kukesha; kwa kuwa mshitaki wenu Ibilisi, kama simba angurumaye, huzunguka-zunguka, akitafuta mtu ammeze.” Shetani amejaa hila na mbinu za kuwasumbua watu wa Mungu kila wakati na kuhakikisha kuwa hakuna mtu anaishi kwa amani au kukaa kwa amani hivyo ni muhimu tukawa tayari kupambana naye kila wakati Waefeso 6:11 “Vaeni silaha zote za Mungu, mpate kuweza kuzipinga hila za Shetani.” 2Wakoritho 2:11 “Shetani asije akapata kutushinda; kwa maana hatukosi kuzijua fikira zake”. Biblia inatufundisha kuwa tuna uwezo wa kumshinda kwa sababu tunazijua sana fikra zake yaani mbinu anazozitumia ili aweze kutushinda

Paulo mtume anakazia kuwa tusimpe nafasi, tusimpe mlango, tusiifanye njia yake kuwa rahisi katika kutujia na kutushambulia, tumnyime njia kwa kuangalia kuwa tunambana kiasi ambacho ni lazima asiwe na nafasi hata ya kuchungulia

Mtu mmoja alikuwa anauza nyumba yake kwa shilingi za kitanzania milioni 30. Na mtu mmoja akajitokeza akasema yeye atainunua nyumba hiyo kwa kuwa amaeipenda sana lakini yeye alikuwa masikini na hakuwa na uwezo wote wa kuinunua nyumba ile, hivyo alibembeleza sana sana ili auziwe nyumba ile, na hivyo mwenye nyumba aliamua kumuuzia kwa nusu ya bei yaani miliioni 15 lakini kwa sharti moja tu kwamba anataka awe anamiliki msumari mmoja uliokuwa sebuleni mwa nyumba ile nyuma ya mlango hivyo walikubaliana.

Baada ya miaka kadhaa yule mwenye nyumba wa zamani alitaka kuinunua nyumba ile tena, lakini mwenye nyumba mpya hakukubali kuiuza, kwa hiyo mwenye nyumba wa zamani aliondoka na baada ya muda alirudi akiwa na mzoga wa mnyama aliyekufa na akaomba autundike katika msumari anaoumiliki, mara nyumba yote ikawa inanuka na imejaa harufu mbaya na nyumba ile ikawa ngumu sana kuishi familia ile ililazimika kuiuza nyumba ile tena kwa mmiliki wa msumari

Hivi ndivyo ilivyo ikiwa tutakubali kumpa ibilisi nafasi hata kama nafasi hiyo ni ndogo sana, ayaitumia nafasi hiyo hiyo kutuharibia maisha yetu na uhusiano wetu, shetani hutumia vitu vidogo vidogo kuharibu uhusiano wetu hatupaswi kumpa nafasi kwa namna yoyote kutushambulia.

Mungu ametupa nguvu ya kumpinga shetani, Biblia inaposema wala msimpe ibilisi nafasi ni wazi kuwa jambo hili liko katika uwezo wetu, Mungu ametupa mamlaka juu yake tunaweza kumkatalia kabisa asituguse wala asimguse awaye yote katika maisha yetu, hii ina maana kuwa shetani anaweza kutukaribia iwapo tu tutamruhusu kutusogelea Yakobo 4:7 Biblia inasema “Basi mtiini Mungu. Mpingeni Shetani, naye atawakimbia.”

Uwe hodari na ushujaa mwingi uwe na imani na ujasiri, unapokuwa vitani hupaswi kumpa kisogo adui ni muhimu kumkabili uso kwa uso tukishindwa adui atafurahi, ssisi ndio tunapaswa kumpa shetani wakati mgumu na sio yeye atupe sisi wakati mgumu Luka 10:19 “Tazama, nimewapa amri ya kukanyaga nyoka na nge, na nguvu zote za yule adui, wala hakuna kitu kitakachowadhuru.”

Wakristo wengi sana huwa wanasahau kuwa zile dhambi zinazofikiriwa kuwa ndogo kwamba zinamadhara makubwa sana kwani kuna uwezekano kabisa mtu asiwe mlevi, au mwesharati, au mchawi, au mpiganaji lakini wakawa na mawazo machafu, wakawa na uadui, wakawa na husuda na wivu, wakawa na uchungu, na ulafi na uzushi, na mafarakano, na kufitiniana, na majungu, na kusengenyana na kusemana vibaya na hasira na kiburi na majivuno na kujisifu, hivi vinapuuziwa lakini vina madhara Makubwa kwani ibilisi anaweza kabisa kuvitumia kwa kusudi la kuharibu maisha yetu.

Bwana na ampe neema kila mmoja wetu kutokumpa ibilisi nafasi katika jina la Yesu amen!

Na mkuu wa wajenzi mwenye hekima.

Rev. Innocent Kamote.

Kufanya kazi kwa Bidii

Mithali 12:24 “Mkono wa mwenye bidii utatawala; Bali mvivu atalipishwa kodi.”

Moja ya kusudi kubwa la kuumbwa kwetu sisi kama wanadamu ni ili tuweze kufanya kazi, hii ndio ulikuwa mpango mkuu wa Mungu kabla ya anguko la mwanadamu Mwanzo 2:15 “BWANA Mungu akamtwaa huyo mtu, akamweka katika bustani ya Edeni, ailime na kuitunza.” Agano jipya linakazia zaidi kuwa yeye asiyetaka kufanya kazi kula na asile 2Wathesalonike 3:10 “Kwa kuwa hata wakati ule tulipokuwapo kwenu tuliwaagiza neno hili, kwamba ikiwa mtu hataki kufanya kazi, basi, asile chakula.” Unaona biblia inatia moyo kufanya kazi kwa bidii, kufanya kazi kwa bidii ni ibada ya kwanza kabisa ambayo Mungu alikuwa amewakusudia wanadamu waifanye, Biblia iko kinyume sana na uvivu.Zaburi 128:2 “Taabu ya mikono yako hakika utaila; Utakuwa heri, na kwako kwema” unaonyesha kuwa Baraka za Mungu zinakaa katika kazi za mikono yetu.

Ujumbe.

Kulikuwa na mzee mmoja ambaye alikuwa na watoto wane wa kiume, hata hivyo kwa bahati mbaya watoto hao walikuwa wavivu.

Siku moja mzee huyu alianza kuugua sana na siku zake za kufa zikakaribia, alikuwa na hofu sana kuhusu maendeleo ya baadaye ya watoto wake kwani walikuwa wavivu na waliamini kuwa wana bahati kwa sababu ya mali ya baba yao.

Hali ya afya ya baba yao iliendelea kuwa mbaya siku hadi siku, na mwishoe mzee huyu aliamua kuwaita watoto wake na kuzungumza nao kuhusu maendeleo yao, lakini watoto wake hawakumsikiliza, Hatimaye mzee yule alipata wazo na akataka watoto wake watambue umuhimu wa kufanya kazi, aliwaita na kuwaambia kuwa alikuwa na box moja lenya mali za thamani kubwa sana la dhahabu na fedha na madini mengineyo ambalo alikuwa amewahifadhia na alikuwa anataka wagawame sawasaw.

Vijana walifurahi sana waliposikia kuwa baba yao ana mali nyingi kiasi kile kwaajili yao, Mzee aliendelea kueleza kuwa Tatizo kubwa sikumbuki ni wapi nilipoweka box hilo la thamani kwani alilizika kwenye ardhi yao shambani lakini amesahau kabisa aliliweka upande gani.

Hata hivyo vijana wavivu waliendelea kufurahia habari hiyo, ingawa walihuzunika tu kuwa mzee wao amesahau ni wapi alikoliweka, baada ya siku chache Mzee wao alifariki dunia, baada ya maziko vijana waliamua kulitafuta boxi la thamani, walifanya kazi kwa bidii wakichimba kila sehemu ya shamba lao, walichimba na kulima na kukata misitu na kujaribu kuchimbua kila mahali wakitafuta mali, hawakutaka kukodisha mtu kwani walijua wanaweza kuliona boxi na kuondoka nalo, hivyo walifanya wenyewe  lakini hawakufanikiwa kuona kitu.

Hatimaye waliamu kuchimba shimo kila pembe ya shamba lao na kwa bahati shimo moja walilolichimba lilitoa maji na chemichemi ikawa inabubujisha maji, Mtu mmoja alipita karibu na shamba lao na kuwapongeza kwa kugundua maji aliwashauri kulimba mboga mboga na kutumia maji hayo kumwagilia, vijana waliamua kulima mboga mboga na kumwagilia  na kuuza kwa watu mablimbali na walianza kupata fedha nyingi sana na wakawa matajiri wakubwa.

Hawakuweza kuliona boxi alilowaambia baba yao lakini hatimaye waligundua kuwa baba yao alikuwa amemaanisha wafanye kazi kwa bidii na kwamba kufanya kazi kwa bidii kunalipa. Walitambua kuwa kufanya kazi kwa bidii kuliwapa utajiri mkubwa.

Ndgu yangu Mungu anatutaka tufanye kazi kwa bidii, Mungu anataka kila tunalotia mkono wetu kufanya tulifenye kwa bidii, kusoma kwa bidii, kuomba kwa bidii, kazi, kwa bidii, kusali kwa bidii, kuabudu kwa bidii.

Kama tutafanya kila kitu kwa bidii Biblia inasema tutasimama mbele ya wafalme Mithali 22:29 “Je! Wamwona mtu mwenye bidii katika kazi zake? Huyo atasimama mbele ya wafalme; Hatasimama mbele ya watu wasio na cheo.”

Na. Rev. Innocent Kamote.

Mkuu wa wajenzi mwenye hekima.