Msidanganyike!

 

Wagalatia 6:7-8 “Msidanganyike, Mungu hadhihakiwi; kwa kuwa cho chote apandacho mtu, ndicho atakachovuna. Maana yeye apandaye kwa mwili wake, katika mwili wake atavuna uharibifu; bali yeye apandaye kwa Roho, katika Roho atavuna uzima wa milele.”

Utangulizi:

Mojawapo ya maonyo yanayotolewa na neno la Mungu upande wa agano la kale na agano jipya ni pamoja na kuionya jamii kuhusu kudanganyika, katika ulimwengu huu tulio nao chanzo cha kila uovu duniani kilisababishwa na udanganyifu uliofanywa na shetani kwa Mwanamke, na kupitia udanganyifu dhambi ikaingia ulimwenguni na tangu wakati huo udanganyifu umekuwa ni moja ya silaha kubwa sana ya shetani kuwaingiza wanadamu katika mtego wa mateso na changamoto nyingi.

1Timotheo 2:13-14 “Kwa maana Adamu ndiye aliyeumbwa kwanza, na Hawa baadaye. Wala Adamu hakudanganywa, ila mwanamke alidanganywa kabisa akaingia katika hali ya kukosa.”

Ni kwaajili hiyo maandiko yana maonyo mengi sana ambayo yanayotuonya kuhusu uwezekano wa kuingizwa kwenye udanganyifu, leo basi tutachukua muda kujifunza maeneo kadhaa ambayo kwa hayo maandiko yametuonya kwamba tuwe makini kwa sababu uko uwezekano wa kudanganyika katika hayo, na kwa sababu hiyo tutaweza kuchukua tahadhari katika maisha yetu ya kiroho, na kimwili, tutajifunza somo hili Msidanyanyike kwa kuzingatia vipengele vitatu vifuatavyo:-

·         Maana ya neno Msidanganyike.

·         Jinsi mwanadamu anavyoweza kudanganyika.

·         Jinsi ya kufanya ili kuepuka udanganyifu.

Maana ya neno Msidanganyike.

Ni muhimu kufahamu kuwa mojawapo ya sababu kubwa ya Bwana wetu Yesu Kristo kuweka wengine katika kanisa kuwa Mitume, Manabii, Wainjilisti, Wachungaji na Waalimu ni ili waujenge mwili wa Kristo, hata kazi ya huduma itendeke, hata sote tukue na kufikia katika cheo cha kimo cha utumilifu wa Kristo, lakini zaidi pia wakristo wasiwe tena wachanga na kuchukuliwa na kila aina ya upepo wa elimu kwa kufuata njia za udanganyifu, hii maana yake ni kuwa kanisa tusiposimama vizuri uwezekano wa watu kudanganywa upo, uwezekano wa watu kufuata mafundisho ya uongo upo ona

Waefeso 4:11-14 “Naye alitoa wengine kuwa mitume, na wengine kuwa manabii; na wengine kuwa wainjilisti na wengine kuwa wachungaji na waalimu; kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe; hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo; ili tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukizifuata njia za udanganyifu”.

Udanganyifu hasa ni nini? Neno udanganyifu katika agano la kale linasomeka kwa lugha ya kiebrania kama “nāshā”  na linasomeka hivyo katika agano jipya kwa kiyunani kama neno “planáō” ambayo kwa kiingereza maana yake hufafanuliwa kwa neno Deceivableness ambalo maana yake ni kudanganyika au kukengeushwa “to be lead astray” au neno la kiebrania “pāthāh”  kudanganywa kwa kuvutiwa “to be entice” au “to be tempted by attract”, kujaribiwa kwa ushawishi, kwa hiyo shetani na watumishi wake yaani manabii wa uongo, na walimu wa uongo, na mitume wa uwongo, hawatakuja katika namna ambayo wewe utashituka kuwa huu ni uwongo, lakini watakuja katika namna ya kushawishi, kwa kusudi la kuleta ukengeufu, shetani hatakuja katika namna ya kutisha kwanza hatishi, kwa sababu yeye aliumbwa kama malaika, haji kwa vitisho, lakini atakuja kama malaika wa nuru,  na akitumia njia ya ushawishi.

2Wakorintho 11:13-15 “Maana watu kama hao ni mitume wa uongo, watendao kazi kwa hila, wanaojigeuza wawe mfano wa mitume wa Kristo. Wala si ajabu. Maana Shetani mwenyewe hujigeuza awe mfano wa malaika wa nuru. Basi si neno kubwa watumishi wake nao wakijigeuza wawe mfano wa watumishi wa haki, ambao mwisho wao utakuwa sawasawa na kazi zao.”

Mwanzo 3:4-6 “Nyoka akamwambia mwanamke, Hakika hamtakufa, kwa maana Mungu anajua ya kwamba siku mtakayokula matunda ya mti huo, mtafumbuliwa macho, nanyi mtakuwa kama Mungu, mkijua mema na mabaya. Mwanamke alipoona ya kuwa ule mti wafaa kwa chakula, wapendeza macho, nao ni mti wa kutamanika kwa maarifa, basi alitwaa katika matunda yake akala, akampa na mumewe, naye akala.”

Kwa hiyo kila mtu mwenye nia ya kumtafuta Mungu kwa dhati anapaswa kuchukua tahadhari, kuhusiana na uwezekano wa kudanganywa, kunakoratibiwa na shetani na watumishi wake, hii maana yake ni nini wako mitume wa kweli, manabii wa kweli, wainjilishi wa kweli na wachungaji na walimu wa kweli, na hata washirika wa kweli, lakini pia wako watumishi wa uwongo wakiwakilisha au wakitumia majina hayo hayo, na wote sisi ni walengwa wa kudanganywa, unaweza kudanganywa hata na mtumishi mwenzako, lakini pia unaweza kudanganywa hata na washirika wa uwongo, kwa hiyo onyo la kuchukua tahadhari tusidanganyike linatuhusu wote.           

Jinsi mwanadamu anavyoweza kudanganyika

Yako mambo kadhaa wa kadhaa ambayo kimsingi tusipoyatilia maanani tunaweza kujikuta kuwa tumedanganyika, Maandiko yameorodhesha maswala kadhaa ambayo kama tutayazingatia tunaweza kuwa salama na kama tusipoyazingatia tunaweza kujikuta kuwa tumeingia matatani na kudanyanyika, kumbuka udanganyifu ambao shetani anaukusudia licha ya kuwalenga wanadamu wote lakini kusudi kubwa hasa ni kuwalenga wale waliookolewa ili wote kwa ujumla waweze kupotea, sasa tunawezaje kudanganyika hapa neno la Mungu linaelezea namna mwanadamu anavyoweza kudanganyika:-

·         Tukisema kwamba hatuna dhambi – Moja ya njia hatari sana anayoitumia shetani hasa kwa watu tuliookoka ni kutuingizia mawazo ya kijinga ya kujifikiri kuwa hatuna dhambi au tumekuwa wakamilifu, huku ni kudanganyika, haijalishi tunajitahidi kwa kiasi gani hatuwezi kamwe kufikia ngazi ya kujitangaza kuwa tumekamilika na hatuna dhambi, Mungu ni Mtakatifu sana na kamwe kwa utakatifu wake hakuna mwanadamu anayeweza kufikia viwango anavyovihitaji, kila wakati unapomsogelea Mungu utaweza kuhisi mapungufu yako na kwa sababu hiyo hakuna mwanadamu anayeweza kukiri kuwa yeye ni mkamilifu na amemaliza ukamilifu wetu na kuhesabiwa kwetu haki mbele za Mungu kunatokana na ukamilifu wa Yesu Kristo na sio sisi wenyewe, wala juhudi zetu hazina mchango wowote, furaha yetu ya wokovu tunaweza kusema ni kwa sababu tumesamehewa dhambi zetu na kuhesabiwa haki bure kwa Imani na kwa kuzaliwa mara ya pili na kwa kutakaswa kwa damu yake Yesu, kwa hiyo kusema kuwa hatuna dhambi ni kujidanganya

 

1Yohana 1: 8-10 “Tukisema kwamba hatuna dhambi, twajidanganya wenyewe, wala kweli haimo mwetu. Tukiziungama dhambi zetu, Yeye ni mwaminifu na wa haki hata atuondolee dhambi zetu, na kutusafisha na udhalimu wote.Tukisema kwamba hatukutenda dhambi, twamfanya Yeye kuwa mwongo wala neno lake halimo mwetu.”

 

Isaya 65:5 “watu wasemao, Simama peke yako, usinikaribie mimi, kwa maana mimi ni mtakatifu kuliko wewe; watu hao ni moshi puani mwangu, moto uwakao mchana kutwa.”

 

Tabia ya kutokunyenyekea na kujihesabia haki inamuudhi sana Mungu, kimsingi neno la Mungu halitutii moyo kutenda dhambi hata kidogo, lakini Mkristo wa kweli ni yule ambaye ataendelea kujitakasa kila siku, na kuendelea kumuomba Mungu msamaha, kila iitwapo leo, na kuendelea mbele kwa kuishi maisha matakatifu bila ya kujikweza kwa Mungu na kujifikiri kuwa tumekamilika, Mitume walikuwa wanyenyekevu sana hawakuwahi kujikweza na kujiweka katika kundi la watu waliokamilika badala yake walionyesha kuwa wanaendelea kupambana, Kristo Yesu katika mafundisho yake alionya wazi tabia ya kujifikiri kuwa umefika na kufikiri ya kuwa tunafaa na wakati mwingine ukijilinganisha na wengine na kujijengea tabia ya kiburi ya kujidhania kuwa wewe umekamilika haya yakijengeka ndani yetu ni rahisi kukataliwa.

 

Yakobo 3:2 “Maana twajikwaa sisi sote pia katika mambo mengi. Mtu asiyejikwaa katika kunena, huyo ni mtu mkamilifu, awezaye kuuzuia na mwili wake wote kama kwa lijamu.”

 

Wafilipi 3:12-14 “Si kwamba nimekwisha kufika, au nimekwisha kuwa mkamilifu; la! Bali nakaza mwendo ili nipate kulishika lile ambalo kwa ajili yake nimeshikwa na Kristo Yesu. Ndugu, sijidhanii nafsi yangu kwamba nimekwisha kushika; ila natenda neno moja tu; nikiyasahau yaliyo nyuma, nikiyachuchumilia yaliyo mbele; nakaza mwendo, niifikilie mede ya thawabu ya mwito mkuu wa Mungu katika Kristo Yesu.”

 

Luka 18:10-14 “Watu wawili walipanda kwenda hekaluni kusali, mmoja Farisayo, wa pili mtoza ushuru. Yule Farisayo akasimama akiomba hivi moyoni mwake; Ee Mungu, nakushukuru kwa kuwa mimi si kama watu wengine, wanyang'anyi, wadhalimu, wazinzi, wala kama huyu mtoza ushuru. Mimi nafunga mara mbili kwa juma; hutoa zaka katika mapato yangu yote. Lakini yule mtoza ushuru alisimama mbali, wala hakuthubutu hata kuinua macho yake mbinguni, bali alijipiga-piga kifua akisema, Ee Mungu, uniwie radhi mimi mwenye dhambi. Nawaambia, huyu alishuka kwenda nyumbani kwake amehesabiwa haki kuliko yule; kwa maana kila ajikwezaye atadhiliwa, naye ajidhiliye atakwezwa.”

 

Luka 6:41-42. “Basi, mbona wakitazama kibanzi kilicho ndani ya jicho la ndugu yako, na boriti iliyo ndani ya jicho lako mwenyewe huiangalii? Au, utawezaje kumwambia ndugu yako, Ndugu yangu, niache nikitoe kibanzi kilicho ndani ya jicho lako, nawe huiangalii boriti iliyo ndani ya jicho lako mwenyewe? Mnafiki wewe, itoe kwanza ile boriti katika jicho lako mwenyewe, ndipo utakapoona vema kukitoa kile kibanzi kilichomo katika jicho la ndugu yako.”

 

Mungu ndiye anayetuhesabia haki, ni yeye ndiye aliyetufia, na ni yeye ndiye aliyetuokoa na kutusafisha na kutuhesabia haki na ni yeye ndiye anayetuombea na ameketi mkono wa kuume wa Mungu, kwa hiyo kila mtu aliyeokolewa anapaswa kuwa mnyenyekevu, na kuacha kujivunia neema ya Mungu, badala yake kuipokea kwa shukurani na unyenyekevu, na kuendelea kujitakasa kila iitwapo leo huku tukiacha kabisa tabia ya kuwanyooshea wengine vidole, na kujihesabia haki. Endapo tutajipima wenyewe na kujifikiri kuwa tunafaa tutakuwa tumedanganyika.

 

·         Tukijifikiri kuwa tuna hekima ya dunia – Hekima ya dunia hii maana yake ni Elimu za fani mbalimbali hapa duniani, kuwa na elimu sio jambo baya kwa sababu maandiko yanatia moyo swala zima la kusoma, lakini tukiwa na kiburi kwa sababu ya elimu ya dunia hii, na kupuuzia maswala ya Mungu eti kwa sababu tumesoma maandiko yanatuambia huko ni kudanganyika, awaye yote ambaye hataki kuongozwa na neno la Mungu ni mpuuzi bila kujali kuwa ana elimu kiasi gani, Neno la Mungu linasema kuwa Mungu ameifanya hekima ya dunia hii kuwa ni upuuzi, kwa hiyo kujivunia elimu ni kujidanganya, Elimu ni nyenzo ya kuturahisishia kazi na sio nyenzo ya kutujengea kiburi dhidi ya Mungu na watu wengine.

 

1Wakorintho 3:18-20 “Mtu asijidanganye mwenyewe; kama mtu akijiona kuwa mwenye hekima miongoni mwenu katika dunia hii, na awe mpumbavu, ili apate kuwa mwenye hekima. Maana hekima ya dunia hii ni upuzi mbele za Mungu. Kwa maana imeandikwa, Yeye ndiye awanasaye wenye hekima katika hila yao.Na tena, Bwana anayafahamu mawazo ya wenye hekima ya kwamba ni ya ubatili.”

 

·         Kama tukiongozwa na Mapokeo ya wanadamu – mapokeo ya wanadamu ni utaratibu wa fulani wa kijamii katika imani, ni muundo wa desturi zilizorithiwa katika kundi fulani au dhehebu fulani na kuingizwa katika imani huku yakiwa sio msingi uliojengeka katika neno la Mungu, mapokeo haya yamekuwa sababu ya kudanganyika kwa watu wengi sana  baadhi ya mapokeo haya ni kama vile ubatizo kwa watu wasioamini kama watoto wachanga, kuomba kwa kutumia Rozali, kuabudu kwa kuhusisha sanamu, pamoja na kuandama mwezi na kuutiisha mwili kwa ukali, kutawadha  na kadhalika watu wanaofuata mapokeo hayo wamedanganyika

 

Wakolosai 2:4-8 “Nasema neno hili, mtu asije akawadanganya kwa maneno ya kuwashawishi. Maana nijapokuwa sipo kwa mwili, lakini nipo pamoja nanyi kwa roho, nikifurahi na kuuona utaratibu wenu na uthabiti wa imani yenu katika Kristo. Basi kama mlivyompokea Kristo Yesu, Bwana, enendeni vivyo hivyo katika yeye; wenye shina na wenye kujengwa katika yeye; mmefanywa imara kwa imani, kama mlivyofundishwa; mkizidi kutoa shukrani. Angalieni mtu asiwafanye mateka kwa elimu yake ya bure na madanganyo matupu, kwa jinsi ya mapokeo ya wanadamu, kwa jinsi ya mafundisho ya awali ya ulimwengu, wala si kwa jinsi ya Kristo.”

 

Mathayo 15:7-9 “Enyi wanafiki, ni vema alivyotabiri Isaya kwa habari zenu, akisema, Watu hawa huniheshimu kwa midomo; Ila mioyo yao iko mbali nami. Nao waniabudu bure, Wakifundisha mafundisho Yaliyo maagizo ya wanadamu.”

 

·         Kufikiri kuwa unaweza kuurithi ufalme wa Mungu huku unaendelea na maisha ya dhambi – mtu awaye yote anayedhani ya kuwa anaweza kuurithi ufalme wa Mungu huku akiwa anaendelea na maisha ya dhambi mtu wa namna huyo amedanganyika, mtu aliyeokoka ni lazima aishi mbali na dhambi, lazima uache kuvuta bangi, kula madawa ya kulevywa, kujihusisha na maswala ya utoaji wa mimba, kuuza baa, kutoa huduma za guest house za kufanyia ngozo, kuuza pombe, kujihusisha na duluma, kuishi maisha ya uasherati, kuabudu sanamu, kuzini, kujihusisha na  ufiraji, ulawiti, ulevi, tamaa mbaya, ushoga, usagaji, kutukana, wizi na utapeli, uchafu, mapenzi ya jinsia moja, uchawi, ushirikina, uadui, ugomvi, wivu wenye uchungu, fitina, majungu, mafarakano, uzushi, husuda, ulafi, picha za ngono na maswala yote yanayofanana na hayo kama wakristo watayatenda hayo neno la Mungu liko wazi watakuwa wamedanganyika na hawataweza kuurithi ufalme wa Mungu

 

1Wakorintho 6:9-10 “Au hamjui ya kuwa wadhalimu hawataurithi ufalme wa Mungu? Msidanganyike; waasherati hawataurithi ufalme wa Mungu, wala waabudu sanamu, wala wazinzi, wala wafiraji, wala walawiti, wala wevi, wala watamanio, wala walevi, wala watukanaji, wala wanyang'anyi.”

 

Wagalatia 5:19-21 “Basi matendo ya mwili ni dhahiri, ndiyo haya, uasherati, uchafu, ufisadi, ibada ya sanamu, uchawi, uadui, ugomvi, wivu, hasira, fitina, faraka, uzushi, husuda, ulevi, ulafi, na mambo yanayofanana na hayo, katika hayo nawaambia mapema, kama nilivyokwisha kuwaambia, ya kwamba watu watendao mambo ya jinsi hiyo hawataurithi ufalme wa Mungu.”

 

·         Tukiwa wasikiaji wa neno na sio watendaji – Kusikia neno la Mungu sio kitu kibaya kila mtu anapaswa kuwa msikivu kwa neno la Mungu lakini hiyo pekee haitoshi, ni lazima tulitii neno la Mungu, kutii ndio kulifanyia kazi, ndio kuwa watendaji wa neno, Mungu hakutuokoa kwaajili ya kusikia, Mungu ametuokoa kwa sababu tumeamini, na kama tumeamini basi kila mwamini wa kweli ni yule anayelitendea kazi neno la Mungu na kulitendea kazi kunahusisha kutii

 

Yakobo 1:22-25 “Lakini iweni watendaji wa neno, wala si wasikiaji tu, hali mkijidanganya nafsi zenu. Kwa sababu mtu akiwa ni msikiaji wa neno tu, wala si mtendaji, mtu huyo ni kama mtu anayejiangalia uso wake katika kioo. Maana hujiangalia, kisha huenda zake, mara akasahau jinsi alivyo. Lakini aliyeitazama sheria kamilifu iliyo ya uhuru, na kukaa humo, asiwe msikiaji msahaulifu, bali mtendaji wa kazi, huyo atakuwa heri katika kutenda kwake.”

 

Katika ufalme wa Mungu utendaji una tmanani kubwa sana kuliko maneno na Muitikio, kimsingi kutendea kazi neno la Mungu ni hekima na kutokulitendea kazi neno la Mungu ni upumbavu, Bwana ampe neema kila mmoja wetu asidanganyike kwa kutokulitendea kazi neno

 

Mathayo 21:28-31 “Lakini mwaonaje? Mtu mmoja alikuwa na wana wawili; akamwendea yule wa kwanza, akasema, Mwanangu, leo nenda kafanye kazi katika shamba la mizabibu. Akajibu akasema, Naenda, Bwana; asiende. Akamwendea yule wa pili, akasema vile vile. Naye akajibu akasema, Sitaki; baadaye akatubu, akaenda. Je! Katika hao wawili ni yupi aliyefanya mapenzi ya babaye? Wakamwambia, Ni yule wa pili. Basi Yesu akawaambia, Amin nawaambia, watoza ushuru na makahaba wanatangulia mbele yenu kuingia katika ufalme wa Mungu.”

 

Mathayo 7:24-27 “Basi kila asikiaye hayo maneno yangu, na kuyafanya, atafananishwa na mtu mwenye akili, aliyejenga nyumba yake juu ya mwamba; mvua ikanyesha, mafuriko yakaja, pepo zikavuma, zikaipiga nyumba ile, isianguke; kwa maana misingi yake imewekwa juu ya mwamba. Na kila asikiaye hayo maneno yangu asiyafanye, atafananishwa na mtu mpumbavu, aliyejenga nyumba yake juu ya mchanga; mvua ikanyesha, mafuriko yakaja, pepo zikavuma, zikaipiga nyumba ile, ikaanguka; nalo anguko lake likawa kubwa.”

 

·         Kujifikiri kuwa kitu – kujifikiri kuwa kitu mbele za Mungu ni kujidanganya, Neno kujifikiri kuwa kitu  katika lugha ya kiyunani linatumika neno “tis” kwa kiingereza linatumika neno “enclitic” kwa kiyunani “enklitikos” au “enkilinesthai” kwa lugha nyepesi “to lean on”  au “to rely on” hii ni tabia ya kufikiri kuwa mambo hayawezi kwenda bila mtu huyo kuwepo, ni kujifikiri kuwa wewe ni maalumu sana na kuwa wewe ni wa kutegemewa, usipokuwepo wewe mambo hayaendi, huku ndio kujiona kuwa kitu, hii  nitabia ya kiburi cha uzima, na kiburi cha kibinadamu, mtu moja alisema hakuna mtu anayeweza kujifikiri kuwa yeye ni wa muhimu sana na kama unafikiri kuwa wewe ni wa muhimu sana kufa na utaona mambo yote yataenda, yataenda bila msaada wako, mkeo au mumeo ataishi, watoto wako wataishi, wazazi wako maisha yataendelea lakini zaidi ya yote kazi ya Mungu itaendela bila kujali wewe ni wa muhimu kiasi gani, kujiona kuwa kitu ni dhambi na ni kiburi, dumia imewahi kuwa na watu mashuhuri sana na wamepita na mambo yanaenda hata bila wao, wewe na mimi sio wa kujiona kuwa kitu na kufikiri kuwa bila wewe na mimi mambo hayatakwenda yataenda na utakachoambulia ni kupewa neno RIP tu ukizikwa tu habari yako inaishia hapo n ahata waliokuwa wakikulilia hawalii tena.

 

Wagalatia 6:2-3 “Mchukuliane mizigo na kuitimiza hivyo sheria ya Kristo. Maana mtu akijiona kuwa ni kitu, naye si kitu, ajidanganya nafsi yake.”

 

·         Kupuuzia dalili za siku za mwisho – Maandiko hayajatuelezea siku ya kurudi kwa Yesu Kristo, lakini yametupa dalili za siku za mwisho na kurudi kwake Bwana wetu Yesu Kristo, kupuuzia dalili tulizopewa na kuhusu kurudi kwa Bwana Yesu na Matukio ya mwisho wa dunia ni kudanganyika, wako watu wanapuuzia swala zima la kurudi kwa bwana wetu Yesu huku wakilichukulia swala hili kama mzaha, Kristo Yesu alionya kuwa ni lazima tuchukue tahadhari kwa kadiri tuonavyo dalili zile zikiwa zinakaribia, maandiko yanaonyesha kutakuwa na udanganyifu wa aina nyingi sana kuhusiana na nyakati za mwisho na ujio wa Bwana Yesu.

 

Luka 21:7-8 “Wakamwuliza wakisema, Mwalimu, mambo hayo yatakuwa lini? Nayo ni nini ishara ya kuwa mambo hayo ya karibu kutukia? Akasema, Angalieni, msije mkadanganyika, kwa sababu wengi watakuja kwa jina langu, wakisema, Mimi ndiye; tena, Majira yamekaribia. Basi msiwafuate hao.”          

               

2Wathesalonike 2:3-4 “Mtu awaye yote asiwadanganye kwa njia yo yote; maana haiji, usipokuja kwanza ule ukengeufu; akafunuliwa yule mtu wa kuasi, mwana wa uharibifu; yule mpingamizi, ajiinuaye nafsi yake juu ya kila kiitwacho Mungu ama kuabudiwa; hata yeye mwenyewe kuketi katika hekalu la Mungu, akijionyesha nafsi yake kana kwamba yeye ndiye Mungu.”

 

·         Kupuuzia swala la marafiki wabaya – Marafiki wabaya wanaweza kuchangia swala zima la kudanganyika kiimani, Paulo mtume aliwaonya wakorintho kutokuwa na marafiki wabaya “Bad company” biblia ya Kiswahili imetumia neno mazungumzo mabaya, hawa walikuwa ni waalimu wa uwongo, watu waliokuwa wanafundisha kuwa hakuna ufufuo wa wafu, jambo ambalo lingepelekea kuondoa tumaini la muhimu duniani na kuwafanya watu waishi vile wanavyotaka, au kwa anasa kwa sababu ya kutckuwa na matumaini, kimsingi maandiko yanatuonya kutokuwa na ufungamanifu wa ndani sana na watu ambao wanaonekana kuwa na imani potofu au iliyo kinyume na yetu au ile misingi uliyojifunza, kwani kwa kuruhusu hayo tunaweza kudanganyika na kupokea ukengeufu, udanganyifu.

 

1Wakorintho 15:32-34 “Ikiwa, kwa jinsi ya kibinadamu, nalipigana na hayawani wakali kule Efeso, nina faida gani? Wasipofufuliwa wafu, na tule, na tunywe, maana kesho tutakufa. Msidanganyike; Mazungumzo mabaya huharibu tabia njema.Tumieni akili kama ipasavyo, wala msitende dhambi; kwa maana wengine hawamjui Mungu. Ninanena hayo niwafedheheshe.”

 

2Wakorintho 6:14-18 “Msifungiwe nira pamoja na wasioamini, kwa jinsi isivyo sawasawa; kwa maana pana urafiki gani kati ya haki na uasi? Tena pana shirika gani kati ya nuru na giza? Tena pana ulinganifu gani kati ya Kristo na Beliari? Au yeye aaminiye ana sehemu gani pamoja na yeye asiyeamini? Tena pana mapatano gani kati ya hekalu la Mungu na sanamu? Kwa maana sisi tu hekalu la Mungu aliye hai; kama Mungu alivyosema, ya kwamba, Nitakaa ndani yao, na kati yao nitatembea, nami nitakuwa Mungu wao, nao watakuwa watu wangu. Kwa hiyo, Tokeni kati yao, Mkatengwe nao, asema Bwana, Msiguse kitu kilicho kichafu, Nami nitawakaribisha. Nitakuwa Baba kwenu, Nanyi mtakuwa kwangu wanangu wa kiume na wa kike,”

 

·         Kuzungumza maneno yasiyo na maana ya uasi – Uasi ni sumu inayoenea kwa haraka sana, neno la Mungu linatuelekeza kuwa kufuata maneno ya kuasi  yasiyo na maana ni kudanganyika, maandiko yanatutaka wakati wote tuzungumze maneno yenye kujenga na wala sio ya kubomoa, wala hatupaswi kufuata mkumbo wa wale wanaoasi ili tuweze kuwa salama, kuchochea kwa gharama yoyote ile maneno ya uasi kunatuweka katika nafasi ya kudanganyika na kuruhusu hasira ya Mungu kuja juu yetu

 

Waefeso 5:6-11 “Mtu asiwadanganye kwa maneno yasiyo na maana; kwa kuwa kwa sababu ya hayo hasira ya Mungu huwajia wana wa uasi. Basi msishirikiane nao. Kwa maana zamani ninyi mlikuwa giza, bali sasa mmekuwa nuru katika Bwana; enendeni kama watoto wa nuru, kwa kuwa tunda la nuru ni katika wema wote na haki na kweli; mkihakiki ni nini impendezayo Bwana. Wala msishirikiane na matendo yasiyozaa ya giza, bali myakemee;”

 

Mathayo 12:34-37 “Enyi wazao wa nyoka, mwawezaje kunena mema, mkiwa wabaya? Maana, kinywa cha mtu huyanena yaujazayo moyo wake. Mtu mwema katika akiba njema hutoa mema; na mtu mbaya katika akiba mbaya hutoa mabaya. Basi, nawaambia, Kila neno lisilo maana, watakalolinena wanadamu, watatoa hesabu ya neno hilo siku ya hukumu. Kwa kuwa kwa maneno yako utahesabiwa haki, na kwa maneno yako utahukumiwa.”

 

·         Kujivunia Dini au dhehebu kuliko utakatifu – Maandiko yanaonyesha wazi kuwa kujivunia dini kuliko maisha matakatifu ni aina nyingine ya udanganyifu, nyakati za leo watu husifia dini zao na madhehebu yao na wameacha kabisa kumuinua Kristo kwa maneno yao na kwa matendo yao, Nyakati za kanisa la kwanza watu walijivunia dini, huku Yatima na wajane wakiishi katika wakati mgumu, hakukuwa na watu wa kuwatunza, na hali ya kipato ilikuwa mbaya na dini zilikuwepo, badala ya watu kuonyesha upendo kivitendo kwa kushughulika na kujali masikini na wenye mahitaji ya kijamii, wao walijikita katika kutangaza dini zao na madhehebu yao huku wakijisifia kuwa ni madhehebu bora, Yakobo aliwafundisha kurudi katika upendo wa kweli kujali, jamii yenye uhitaji na kuishi maisha safi yasiyo na taka na kutokuifuata dunia hii, kama tutajisifia kuwa tuna madehebu mazuri na dini nzuri, huku kanisa letu likiwa limejaa ubinafsi na kutokujali, na huku watu wake hawana upendo yaani hawajali hayo yote yatakuwa ni kazi bure na ni kujidanganya

 

Yakobo 1:26-27 “Mtu akidhani ya kuwa anayo dini, wala hauzuii ulimi wake kwa hatamu, hali akijidanganya moyo wake, dini yake mtu huyo haifai. Dini iliyo safi, isiyo na taka mbele za Mungu Baba ni hii, Kwenda kuwatazama yatima na wajane katika dhiki yao, na kujilinda na dunia pasipo mawaa.”

 

1Wakorintho 13:1-7 “Nijaposema kwa lugha za wanadamu na za malaika, kama sina upendo, nimekuwa shaba iliayo na upatu uvumao.Tena nijapokuwa na unabii, na kujua siri zote na maarifa yote, nijapokuwa na imani timilifu kiasi cha kuweza kuhamisha milima, kama sina upendo, si kitu mimi.Tena nikitoa mali zangu zote kuwalisha maskini, tena nikijitoa mwili wangu niungue moto, kama sina upendo, hainifaidii kitu. Upendo huvumilia, hufadhili; upendo hauhusudu; upendo hautakabari; haujivuni; haukosi kuwa na adabu; hautafuti mambo yake; hauoni uchungu; hauhesabu mabaya; haufurahii udhalimu, bali hufurahi pamoja na kweli; huvumilia yote; huamini yote; hutumaini yote; hustahimili yote.”

               

·         Kuufuta moyo kuliko neno la Mungu – aina nyingine ya kudanyanyika ni ile tabia ya kuutii moyo kuliko neno la Mungu, wako watu duniani ambao huujali sana moyo kuliko kanuni na taratibu za kutusaidia zilizoko katika neno la Mungu, wanasema upe moyo kitu unapenda, huku ni kuufuata mwili na ni kutaka kufa, maandiko yanaonya kuwa kuufuata moyo ni kufuata kifo kwa sababu moyo una ugonjwa wa kuua, Kwa hiyo ukitii kila kitu ambacho moyo unakuongoza unajikuta umeingia pabaya na kwa kweli utakuwa umedanganyika, moyo ni chombo cha tamaa ambacho mara nyingi huwaongoza watu wa dunia hii na sio wana wa Mungu hatuna budi kumuomba Mungu aweke sheria zake katika mioyo yetu tusiifuate tamaa na kudanganyika kwa sababu tamaa hukaa moyoni

 

Yeremia 17:9-10 “Moyo huwa mdanganyifu kuliko vitu vyote, una ugonjwa wa kufisha; nani awezaye kuujua? Mimi, Bwana, nauchunguza moyo, navijaribu viuno, hata kumpa kila mtu kiasi cha njia zake, kiasi cha matunda ya matendo yake.”

 

Tito 3:3-5 “Maana hapo zamani sisi nasi tulikuwa hatuna akili, tulikuwa waasi, tumedanganywa, huku tukitumikia tamaa na anasa za namna nyingi, tukiishi katika uovu na husuda, tukichukiza na kuchukiana. Lakini wema wake Mwokozi wetu Mungu, na upendo wake kwa wanadamu, ulipofunuliwa, alituokoa; si kwa sababu ya matendo ya haki tuliyoyatenda sisi; bali kwa rehema yake, kwa kuoshwa kwa kuzaliwa kwa pili na kufanywa upya na Roho Mtakatifu;”       

 

Yakobo 1:13-15 “Mtu ajaribiwapo, asiseme, Ninajaribiwa na Mungu; maana Mungu hawezi kujaribiwa na maovu, wala yeye mwenyewe hamjaribu mtu. Lakini kila mmoja hujaribiwa na tamaa yake mwenyewe huku akivutwa na kudanganywa.Halafu ile tamaa ikiisha kuchukua mimba huzaa dhambi, na ile dhambi ikiisha kukomaa huzaa mauti.”

 

Jambo kubwa na la msingi ni kuujaza moyo wetu kwa neno la Mungu ili lituongoze lenyewe ndani ya moyo wetu badala ya kuufuata moyo, bila neno la Mungu moyo utatuendesha sawa na kawaida ya ulimwengu huu, Mwandishi wa Zaburi anaonyesha jinsi alivyoliweka neno la Mungu moyoni mwake na kumuomba Mungu asiongozwe na moyo kusudi kubwa ni ili asimtende Mungu dhambi.

 

Zaburi 119:9-11 “Jinsi gani kijana aisafishe njia yake? Kwa kutii, akilifuata neno lako. Kwa moyo wangu wote nimekutafuta, Usiniache nipotee mbali na maagizo yako. Moyoni mwangu nimeliweka neno lako, Nisije nikakutenda dhambi.”

                 

·         Kupenda kutiwa moyo kuliko kukemewa na Bwana – Ni muhimu kufahamu kuwa ni rahisi sana kudanganyika pale watu wanapotutia moyo zaidi kuliko kutukemea, mojawapo ya kazi za kinabii ni pamoja na kutia moyo na kukemea, Neno la Mungu limeweka wazi kuwa Mwana yule anayependwa na baba yake hukemewa, na ikiwa hakuna kukemewa basi unakuwa mwana wa haramu

 

Waebrania 12:5-8 “tena mmeyasahau yale maonyo, yasemayo nanyi kama kusema na wana, Mwanangu, usiyadharau marudia ya Bwana, Wala usizimie moyo ukikemewa naye; Maana yeye ambaye Bwana ampenda, humrudi, Naye humpiga kila mwana amkubaliye. Ni kwa ajili ya kurudiwa mwastahimili; Mungu awatendea kama wana; maana ni mwana yupi asiyerudiwa na babaye? Basi kama mkiwa hamna kurudiwa, ambako ni fungu la wote, ndipo mmekuwa wana wa haramu ninyi, wala si wana wa halali.”

 

Nyakati za biblia kama ilivyo nyakati za leo watu wengi wakiwemo wafalme hawakuwa wanafurahia sana kukemewa, na badala yake wengi walipenda kutiwa moyo na kuambiwa kila wakati Amani, Amani Amani, jambo hili lilimuudhi sana Mungu na hivyo Mungu aliwaachia manabii wa uwongo wawadanganye, hawa ni manabii ambao kimsingi Mungu hakuwatuma lakini walijikinai wakijua mioyo ya watu inataka nini na wakafanya kama watakavyo na kuwatabiria mema, tu kumbe pepo wa uongo walikuwa wamechukua nafasi ya kuwadanganya

 

Yeremia 29:8-9 “Maana Bwana wa majeshi, Mungu wa Israeli, asema hivi, Manabii walio kati yenu, na wabashiri wenu, wasiwadanganye ninyi, wala msisikilize ndoto zenu, mnazootesha. Kwa maana kwa jina langu hutabiri maneno ya uongo kwenu; mimi sikuwatuma, asema Bwana.”

 

Yeremia 23:25-28 “Nimesikia waliyoyasema manabii wanaotabiri uongo kwa jina langu, wakisema, Nimeota ndoto; nimeota ndoto. Je! Mambo hayo yatakuwa katika mioyo ya manabii wanaotabiri uongo hata lini, manabii hao wenye udanganyifu katika mioyo yao wenyewe? Wanaodhania ya kuwa watawasahaulisha watu wangu jina langu kwa ndoto zao, wanazomhadithia kila mtu jirani yake, kama vile baba zao walivyolisahau jina langu, kwa ajili ya Baali. Nabii aliye na ndoto, na aseme ndoto yake; na yeye aliye na neno langu, na aseme neno langu kwa uaminifu. Makapi ni kitu gani kuliko ngano? Asema Bwana.”

 

1Wafalme 22:2-23 “Ikawa, mwaka wa tatu Yehoshafati mfalme Wa Yuda akamshukia mfalme wa Israeli. Mfalme wa Israeli akawaambia watumishi wake, Je! Hamjui ya kuwa Ramoth-Gileadi ni yetu? Nasi tumenyamaza tusiitwae mkononi mwa mfalme wa Shamu? Akamwambia Yehoshafati, Je! Utakwenda nami tupigane na Ramoth-gileadi? Yehoshafati akamwambia mfalme wa Israeli, Mimi ni kama wewe, na watu wangu ni kama watu wako na farasi zangu ni kama farasi zako.Yehoshafati akamwambia mfalme wa Israeli, Uulize leo, nakusihi, kwa neno la Bwana. Ndipo mfalme wa Israeli akawakusanya pamoja manabii, kama watu mia nne. Akawaambia Je! Niende juu ya Ramoth-Gileadi kuupiga vita, au ninyamaze? Wakasema Kwea; kwa kuwa Bwana atautia mkononi mwa mfalme. Lakini Yehoshafati akasema, Je! Hayupo hapa nabii wa Bwana tena, ili tumwulize yeye? Mfalme wa Israeli akamwambia Yehoshafati, Yupo mtu mmoja, ambaye tungeweza kumwuliza Bwana kwa yeye, yaani Mikaya mwana wa Imla; lakini namchukia; kwa sababu hanibashirii mema, ila mabaya. Yehoshafati akasema, La! Mfalme asiseme hivi. Ndipo mfalme wa Israeli akamwita akida, akamwambia, mlete hima Mikaya mwana wa Imla. Basi mfalme wa Israeli na Yehoshafati mfalme wa Yuda walikuwa wakikaa kila mtu katika kiti chake cha enzi, wamevaa mavazi yao, katika sakafu langoni pa Samaria; na manabii wote wakafanya unabii mbele yao. Na Zedekia mwana wa Kenaana akajifanyia pembe za chuma, akasema, Bwana asema hivi, Kwa hizo utawasukuma Washami, hata waharibike. Na manabii wote wakasema hivyo kwa unabii, wakisema, Kwea Ramoth-Gileadi, ukafanikiwe; kwa kuwa Bwana atautia mkononi mwa mfalme. Na yule mjumbe, aliyekwenda kumwita Mikaya, akamwambia, akasema, Angalia sasa, maneno ya manabii kwa kinywa kimoja husema mema kwa mfalme; neno lako na liwe, nakusihi, kama neno la mmojawapo wao, ukaseme mema. Mikaya akasema, Kama Bwana aishivyo, neno lile Bwana aniambialo, ndilo nitakalolinena. Na alipokuja kwa mfalme, mfalme alimwambia, Je! Mikaya, tuende Ramoth-Gileadi kupiga vita, au tunyamaze? Akamwambia, Kwea, ufanikiwe; kwa kuwa Bwana atautia mkononi mwa mfalme. Mfalme akamwambia, Mara ngapi nikuapishe usiniambie neno ila yaliyo kweli, kwa jina la Bwana? Akasema, Naliwaona Waisraeli wote wametawanyika milimani, kama kondoo wasio na mchungaji. Bwana akasema, Hawa hawana bwana; na warudi kila mtu nyumbani kwake kwa amani. Mfalme wa Israeli akamwambia Yehoshafati, Je! Sikukuambia, hatanibashiria mema, ila mabaya? Mikaya akasema, Sikia basi neno la Bwana; Nalimwona Bwana ameketi katika kiti chake cha enzi, na jeshi lote la mbinguni wamesimama upande wa mkono wake wa kuume na wa kushoto. Bwana akasema, Ni nani atakayemdanganya Ahabu, ili akwee Ramoth-Gileadi akaanguke? Basi huyu akasema hivi; na huyu hivi. Akatoka pepo, akasimama mbele za Bwana, akasema, Mimi nitamdanganya. Bwana akamwambia, Jinsi gani? Akasema, Nitaondoka, na kuwa pepo wa uongo kinywani mwa manabii wake wote. Akasema, Utamdanganya, na kudiriki pia; ondoka ukafanye hivyo. Basi angalia, Bwana ametia pepo wa uongo kinywani mwa manabii wako hawa wote; naye Bwana amenena mabaya juu yako.”

 

Unaona Mungu ni baba yetu mwenye upendo, sio kila wakati atatutia moyo tu, kuna wakati atatukemea na kutukaripia ili kutuchonga tuweze kukamilika kwaajili ya utukufu wake, kwa hiyo kila mtu aliyeokolewa anapaswa kukubali makemeo, makemeo hutupeleka katika ngazi nyingine, na hutusaidia kujiangalia na kujiona kama tuko sawa na kama hatuko sawa ni lazima tukubali kutubu, ikiwa hatutakuwa tunapenda kukemewa Mungu ataruhusu manabii wa uongo watudanganye na kwa sababu hiyo ni rahisi kujikuta tumepotea kumbuka wakati wote lililotukuka kwa wanadamu ni chukizo kwa Mungu, tusidanganyike na kusifiwa na wanadamu wakati wote na badala yake tukubali pia na kukosolewa badala ya kujaa sifa tu.

 

Luka 6:26 “Ole wenu ninyi watu wote watakapowasifu, kwa kuwa baba zao waliwatenda manabii wa uongo mambo kama hayo.Lakini nawaambia ninyi mnaosikia, Wapendeni adui zenu, watendeeni mema wale ambao wawachukia ninyi, wabarikieni wale ambao wawalaani ninyi, waombeeni wale ambao wawaonea ninyi.”

 

Luka 16:15 “Akawaambia, Ninyi ndinyi mnaojidai haki mbele ya wanadamu, lakini Mungu awajua mioyo yenu; kwa kuwa lililotukuka kwa wanadamu huwa chukizo mbele za Mungu.”

 

·         Kuamini kuwa miujiza ilikoma – iko dhana ya baadhi ya jamii za kikristo ambao hawaamini kuwepo kwa miujiza na uponyaji, na wanaamini katika kukoma kwa karama za rohoni baada ya mitume na maandiko wanayoyatumia ni

 

1Wakorintho 13:8-13 “Upendo haupungui neno wakati wo wote; bali ukiwapo unabii utabatilika; zikiwapo lugha, zitakoma; yakiwapo maarifa, yatabatilika. Kwa maana tunafahamu kwa sehemu; na tunafanya unabii kwa sehemu; lakini ijapo ile iliyo kamili, iliyo kwa sehemu itabatilika. Nilipokuwa mtoto mchanga, nalisema kama mtoto mchanga, nalifahamu kama mtoto mchanga, nalifikiri kama mtoto mchanga; tokea hapo nilipokuwa mtu mzima, nimeyabatilisha mambo ya kitoto. Maana wakati wa sasa tunaona kwa kioo kwa jinsi ya fumbo; wakati ule tutaona uso kwa uso; wakati wa sasa nafahamu kwa sehemu; wakati ule nitajua sana kama mimi nami ninavyojuliwa sana. Basi, sasa inadumu imani, tumaini, upendo, haya matatu; na katika hayo lililo kuu ni upendo.”

 

Kuwa na imani ya namna hiyo kwa tafasiri hii mbaya ya kimaandiko ni kudanganyika hakuna mahali popote pale katika maandiko ambapo inathibitishwa kwa vinywa vya mashahidi wawili au watatu kuwa miujiza, ishara na uponyaji ulikoma wakati wa mitume, Mungu hajaacha kuwatendea mema watu wake na kama wako wanaoamini hivyo basi wamepotoka

 

Yakobo 1: 16-17 “Ndugu zangu wapenzi, msidanganyike. Kila kutoa kuliko kwema, na kila kitolewacho kilicho kamili, hutoka juu, hushuka kwa Baba wa mianga; kwake hakuna kubadilika, wala kivuli cha kugeuka-geuka.”

 

Dhana ya kwamba ishara na miujiza na karama za utendaji wa Roho Mtakatifu kukoma havijawahi kuthibitishwa kokote katika maandiko, Neno la Mungu linaonyesha wazi kuwa miujiza, uponyaji na karama za Rohoni ni utendaji wa Mungu na ni sehemu ya kazi ya Mungu kupitia kanisa lake hata leo, maandiko yanaonyesha kuwepo kwa ishara na miujiza na karama za Roho Mtakatifu kwanza ikiwa ni pamoja na ahadi ya Yesu Kristo mwenyewe

 

Yohana 14:12 “Amin, amin, nawaambieni, Yeye aniaminiye mimi, kazi nizifanyazo mimi, yeye naye atazifanya; naam, na kubwa kuliko hizo atafanya, kwa kuwa mimi naenda kwa Baba.”

 

Kukanusha kuwa hakuna ishara na miujiza na karama za Roho Mtakatifu ni sawa tu na kukanusha au kukataa kazi za Roho Mtakatifu, karama hizi ni zawadi zinazotolewa na Roho Mtakatifu kwa kanisa, naelewa kuwa zinatenda kazi kwa kadiri ya viwango vya Imani, lakini haimaanishi kuwa hakuna uponyaji huu wa kiungu.  

 

1Wakorintho 12:4-11 “Basi pana tofauti za karama; bali Roho ni yeye yule.Tena pana tofauti za huduma, na Bwana ni yeye yule. Kisha pana tofauti za kutenda kazi, bali Mungu ni yeye yule azitendaye kazi zote katika wote. Lakini kila mmoja hupewa ufunuo wa Roho kwa kufaidiana. Maana mtu mmoja kwa Roho apewa neno la hekima; na mwingine neno la maarifa, apendavyo Roho yeye yule; mwingine imani katika Roho yeye yule; na mwingine karama za kuponya katika Roho yule mmoja; na mwingine matendo ya miujiza; na mwingine unabii; na mwingine kupambanua roho; mwingine aina za lugha; na mwingine tafsiri za lugha; lakini kazi hizi zote huzitenda Roho huyo mmoja, yeye yule, akimgawia kila mtu peke yake kama apendavyo yeye.”

 

Maandiko aidha yanaonyesha ushahidi kuwa sio mitume peke yao waliofanya miujiza na kwa sababu hiyo awaye yote ambaye anadai kuwa karama zilikoma mara baada ya mitume hana uwezo wa kutosha kuwa Mwalimu wa neno la Mungu, maandiko yana ushahidi wa kutosha kuwa waamini wengine wasiokuwa mitume walitumiwa na Mungu kwa karama mbali mbali kama ilivyokuwa kwa kanisa la korintho na mengineyo

 

Matendo 6:8 “Na Stefano, akijaa neema na uwezo, alikuwa akifanya maajabu na ishara kubwa katika watu.”

 

Matendo 8:5-7 “Filipo akatelemka akaingia mji wa Samaria, akawahubiri Kristo. Na makutano kwa nia moja wakasikiliza maneno yale yaliyosemwa na Filipo walipoyasikia na kuziona ishara alizokuwa akizifanya. Kwa maana pepo wachafu wakawatoka wengi waliopagawa nao, wakilia kwa sauti kuu; na watu wengi waliopooza, na viwete, wakaponywa.”

 

Hao wanaotajwa katika maandiko hapo juu hawakuwa mitume, lakini walitumiwa kwa viwango vikubwa Mungu Roho Mtakatifu akifanya kazi pamoja nao bila kubagua kiviwango, wale wanaoamini katika kifungu kile cha 1Wakorintho 13:8-13

 

1Wakorintho 13:8-13 “Upendo haupungui neno wakati wo wote; bali ukiwapo unabii utabatilika; zikiwapo lugha, zitakoma; yakiwapo maarifa, yatabatilika. Kwa maana tunafahamu kwa sehemu; na tunafanya unabii kwa sehemu; lakini ijapo ile iliyo kamili, iliyo kwa sehemu itabatilika. Nilipokuwa mtoto mchanga, nalisema kama mtoto mchanga, nalifahamu kama mtoto mchanga, nalifikiri kama mtoto mchanga; tokea hapo nilipokuwa mtu mzima, nimeyabatilisha mambo ya kitoto. Maana wakati wa sasa tunaona kwa kioo kwa jinsi ya fumbo; wakati ule tutaona uso kwa uso; wakati wa sasa nafahamu kwa sehemu; wakati ule nitajua sana kama mimi nami ninavyojuliwa sana. Basi, sasa inadumu imani, tumaini, upendo, haya matatu; na katika hayo lililo kuu ni upendo.”

 

Kifungu hiki hakizungumzii hata kidogo kukoma kwa karama katika wakati huu wa sasa, Paulo anachozungumzia hapa ni kuwa karama zitakoma wakati wa utimilifu wa wakati  na huu ni ule  wakati Yesu Kristo atakaporudi na wakati wa ufalme wa mbinguni na sio kwa wakati wa mitume wala wakati wa sasa

 

Aidha katika kanisa leo ziko shuhuda mbalimbali nyingi sana za kazi za uponyaji na ishara na miujiza inayoshuhudia kuendelea kuwepo kwa Kazi za Roho Mtakatifu, shuhuda hizi haziwezi kupuuzwa kwa sababu nyingi zinatoka kwa watu waaminifu nikiwemo mimi mwenyewe ambaye nimeombea watu na kuona wakiponywa, Ishara na miujiza ni sehemu muhimu sana inayorahisisha kazi ya injili na kwa sababu hiyo Paulo mtume aliwasihi wakorintho kutamani sana karama za rohoni,  hivyo kuamini kuwa miujiza ilikoma ni imani ya kijinga na ya kipuuzi inayotaka kupuuzia utendaji wa Roho Mtakatifu na kulifanya kanisa kuwa taasisi ya kawaida kama ya kimwili tu isiyo na madhihirisho ya nguvu za Mungu.

 

1Wakorintho 14:1 “Ufuateni upendo, na kutaka sana karama za rohoni, lakini zaidi kwamba mpate kuhutubu.”

 

·         Kutokupuuzia kanuni ya kupanda na kuvuna – Iko kanuni ambayo inatisha sana ni kanuni ya kupanda na kuvuna wahindi wanaiita Karma, kwamba ni tambia ya kujirudia rudia kwa matendo unayotenda, iwapo unatenda mema kuna namna utakuja kuyavuna kwa wakati wake, lakini vile vile ukitenda yasiyopasa uko uwezekano wa kuyavuna pia, maandiko yanatuonya kutokudanganyika katika hilo, yaani kufikiri hutavuna kile unachokipanda kwa hiyo ukipanda katika mwili utavuna uharibifu na ukipanda katika roho utavuna uzima milele.

 

Wgalatia 6:9-10 “Tena tusichoke katika kutenda mema; maana tutavuna kwa wakati wake, tusipozimia roho. Kwa hiyo kadiri tupatavyo nafasi na tuwatendee watu wote mema; na hasa jamaa ya waaminio.”

 

Wagalatia 6:7-8 “Msidanganyike, Mungu hadhihakiwi; kwa kuwa cho chote apandacho mtu, ndicho atakachovuna. Maana yeye apandaye kwa mwili wake, katika mwili wake atavuna uharibifu; bali yeye apandaye kwa Roho, katika Roho atavuna uzima wa milele.”

 

Kama hutaki kujiumiza moyo wako basi ni muhimu sana ukaizingatia kanuni hii, hii ni kanuni ya ulimwengu wa roho, Mungu hulipa kisasi na kisasi ni juu yake kwa msingi huo ni muhimu sana kujiepusha kuwafanyia watu mambo yale ambayo wewe hungependa kufanyiwa vinginevyo uwezekano wa kanuni hii kutenda kazi unaweza kuwa mkubwa

 

Mathayo 7:12 “Basi yo yote myatakayo mtendewe na watu, nanyi watendeeni vivyo hivyo; maana hiyo ndiyo torati na manabii.”

 

Jinsi ya kufanya ili kuepuka udanganyifu.

Maandiko yanatupa tahadhari kwamba tuwe waangalifu ili tusije tukadanganyika kwa msingi huo yale yaliyoelezwa katika kipengele cha pili na mengineyo ambayo sijayaorodhesha lakini Roho wa Mungu yu aweza kukufunulia katika maandiko basi yazingatiwe ili tusiingie katika udanganyifu.

Waebrania 3:12-19 “Angalieni, ndugu zangu, usiwe katika mmoja wenu moyo mbovu wa kutokuamini, kwa kujitenga na Mungu aliye hai.Lakini mwonyane kila siku, maadamu iitwapo leo; ili mmoja wenu asifanywe mgumu kwa udanganyifu wa dhambi. Kwa maana tumekuwa washirika wa Kristo, kama tukishikamana na mwanzo wa uthabiti wetu kwa nguvu mpaka mwisho; hapo inenwapo, Leo, kama mtaisikia sauti yake, Msifanye migumu mioyo yenu, Kama wakati wa kukasirisha. Maana ni akina nani waliokasirisha, waliposikia? Si wale wote waliotoka Misri wakiongozwa na Musa? Tena ni akina nani aliochukizwa nao miaka arobaini? Si wale waliokosa, ambao mizoga yao ilianguka katika jangwa? Tena ni akina nani aliowaapia ya kwamba hawataingia katika raha yake, ila wale walioasi? Basi twaona ya kuwa hawakuweza kuingia kwa sababu ya kutokuamini kwao.”

Luka 21:8 “Akasema, Angalieni, msije mkadanganyika, kwa sababu wengi watakuja kwa jina langu, wakisema, Mimi ndiye; tena, Majira yamekaribia. Basi msiwafuate hao.”                             

 

Na Rev. Innocent Samuel Kamote

Mkuu wa wajenzi mwenye hekima

Mkijijenga juu ya Imani yenu!

Yuda 1:20-21 “Bali ninyi, wapenzi, mkijijenga juu ya imani yenu iliyo takatifu sana, na kuomba katika Roho Mtakatifu, jilindeni katika upendo wa Mungu, huku mkingojea rehema ya Bwana wetu Yesu Kristo, hata mpate uzima wa milele.”

Utangulizi:

Mojawapo ya changamoto kubwa tuliyonayo katika nyakati za leo ni pamoja na kuwa na wakristo dhaifu sana, na walio legelege mniwie radhi kwa lugha hii niliyoitumia, ukilinganisha na wakristo wa miaka ya nyuma, Lakini sababu mojawapo kubwa ambayo imepelekea wakristo wa nyakati za leo kuwa dhaifu licha ya kuwa kuna teknolojia kubwa na upatikananaji rahisi wa mafundisho ya neno la Mungu katika mitandao, na hata kuwepo kwa vitabu vikubwa vya mawazo na michango mbalimbali ya kibiblia ambavyo zamani vilikuwa ghali sana kuvipata, lakini siku hizi unaweza kuvipakua kutoka kwenye mitandao ya kijamii hata bure mfano hata kupitia “www.pdfdrive.com” Pamoja na hayo bado kuna upungufu mkubwa wa wakristo wa nyakati za leo kushindwa kuwa na uwezo wa kujijenga kiimani na kuwa imara kiasi cha kuweza kuitetea imani, kujijenga kiimani hakutofautiani sana na kujijenga kiafya kwa kufanya mazoezi ili uwe na afya nzuri, kujiweka vizuri, kuhakikisha unakuwa na nguvu na kuwa fiti au kuwa imara kimwili, sasa katika hali kama hiyo hiyo kujijenga katika imani kuna maana ya kufanya mazoezi na kujiandaa ili uweze kuwa vizuri na hata kukabiliana na mazingira yoyote yale ya mashambulizi ya kiroho na kiimani na zaidi ya yote kuweza kuwa na uwezo wa kupambanua mafundisho yasiyo sahihi, na yaliyo sahihi na hata kuweza kuwasaidia wengine. 

1Wakorintho 9:25-27 “Na kila ashindanaye katika michezo hujizuia katika yote; basi hao hufanya hivyo kusudi wapokee taji iharibikayo; bali sisi tupokee taji isiyoharibika. Hata mimi napiga mbio vivyo hivyo, si kama asitaye; napigana ngumi vivyo hivyo, si kama apigaye hewa; bali nautesa mwili wangu na kuutumikisha; isiwe, nikiisha kuwahubiri wengine, mwenyewe niwe mtu wa kukataliwa.”

Paulo mtume anayafananisha maisha ya kiroho na maisha ya wanamichezo ambao wakati wote mazoezi ni sehemu ya maisha yao, wanamichezo huchukua mazoezi ya aina mbalimbali kwaajili ya kujenga afya ya miili yao na kwaajili ya kukabiliana na ushindani wa aina mbalimbali wanaoweza kukutana nao katika mashindano ya aina mbalimbali, mtu anapokuwa hana nidhamu ya mazoezi uwezo wake wa kustahimili na kushindana hupungua na kuwa rahisi kushindwa, vivyo hivyo katika maisha ya kiroho, na ndio maana Paulo mtume anasema naye anashiriki zoezi anashiriki kujitia nidhamu ili asiishie kuwahubiri wengine kisha yeye akawa mtu wa kukataliwa. Mazoezi ya kiroho yanaweza kuhusisha, kuabudu, kuomba, kusoma neno la Mungu, kufunga, kutoa, kustahimili majaribu, kuishindania Imani, kusoma vitabu vya kiroho, kuijua misingi ya imani yako na kuisimamia, na kukua katika hekima na busara.

Katika kifungu cha msingi, ambacho ndio moyo wa somo letu leo tutachukua muda kujifunza kwa kina na mapana na marefu kile anachokizungumza Yuda ili sisi nasi tuweze kujijenga juu ya imani yetu jambo ambalo litatusaidia kukuwa kiroho na kiufahamu na kuweza kuishindania Imani. Moja ya dalili zinazonyesha kuwa watu wengi hawajajengeka kiufahamu ni pamoja na kuchukuliwa huku na kule na kila wimbi la mafundisho na mlipuko wa kimakanisa ua kimahubiri na au wafanya maombezi na kadhalika.

Waefeso 4:11-14 “Naye alitoa wengine kuwa mitume, na wengine kuwa manabii; na wengine kuwa wainjilisti na wengine kuwa wachungaji na waalimu; kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe; hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo; ili tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukizifuata njia za udanganyifu.”

Unapoliangalia kanisa la Mungu katika nyakati za leo utaweza kuona kwa uwazi kuwa watu wana upungufu mkubwa sana wa uwezo wa kuisimamia na kuitetea Imani, kwa sababu kwanza ni kama hawajui hata wanachokiamini na badala yake wamekuwa washabiki wa makundi mbalimbali ya milipuko ya kiinjili, watu wana ukuaji hafifu wa kiroho na ni kama wanakosa misimamo na sababu kubwa ni kutokujijenga kiroho na kuacha kujijenga kiimani, kwa hiyo kila wanachoambiwa na watu wajanja wajanja wanatii bila kuuliza uliza wala kuhoji ni kama watu wanapokea imani na mafundisho kwa njia ya hisia zaidi kuliko kwa njia ya kutumia akili na nadhani wanafikiri labda kutumia akili ni dhambi, sio dhambi kutumia akili katika kujifunza neno la Mungu na kuhoji juu ya maswala ya kiimani, na kimaandiko, tunapoteza uungwana wa kujifunza kwa sababu imani yetu imejengwa katika kupokea zaidi bila kuhoji, kutii zaidi bila kufanya uchunguzi, Imani ni kama chakula huwezi kuokota tu na kukipeleka kwa wengine wale bila kujua usalama na ubora wa chakula hicho, kila mtumishi duniani mafundisho yake yanapaswa kupimwa, na kufanyiwa uchunguzi na utafiti ili kubaini kuwa anachokisema ndivyo kilivyo? Bila kujali umaarufu na ukubwa wa mtu

Matendo 17:10-12 “Mara hao ndugu wakawapeleka Paulo na Sila usiku hata Beroya. Nao walipofika huko wakaingia katika sinagogi la Wayahudi.Watu hawa walikuwa waungwana kuliko wale wa Thesalonike, kwa kuwa walilipokea lile neno kwa uelekevu wa moyo, wakayachunguza maandiko kila siku, waone kwamba mambo hayo ndivyo yalivyo.Basi watu wengi miongoni mwao wakaamini, na wanawake wa Kiyunani wenye cheo, na wanaume si wachache.”

Watu waungwana ni wale wanayoyachunguza maandiko na kuyapima ili kujithibitishia kama mafundisho hayo ni sahihi au la, na sio swala la kwa sababu andiko limesomwa tu, hata shetani anayajua maandiko na anaweza kuyatumia kwa hiyo ni wajibu wetu sisi kama walaji kupima kama fundisho hilo lina ubora au la. Sasa basi ili tuweze kujijenga kiimani Yuda anazungumza maswala muhimu manne ambayo tunaweza kuyatumia kujijenga katika imani, maswala hayo yanapatikana katika kifungu hiki ambacho tutachukua muda kukitafakari na kukifanyia uchambuzi wetu wa kina katika siku ya leo.

Yuda 1:20-21 “Bali ninyi, wapenzi, mkijijenga juu ya imani yenu iliyo takatifu sana, na kuomba katika Roho Mtakatifu, jilindeni katika upendo wa Mungu, huku mkingojea rehema ya Bwana wetu Yesu Kristo, hata mpate uzima wa milele.”

Mkijijenga juu ya Imani yenu - Neno mjijenga juu ya Imani yenu katika Biblia ya kiingereza NIV linasomeka “build yourselves up” au kwa kiingereza changu “by building yourselves up” Neno hilo kujijenga katika kiyunani linasomeka kama “epoikodomeō” maana yake kwa kiingereza “to buil up or to build upon” mkijijenga juu ya misingi au msingi wa Imani yenu, au kujenga juu ya msingi ambao umekwishakuwekwa yaani kujijenga juu ya imani ambayo ni takatifu sana ambayo imejengwa juu ya Kristo na mitume na manabii

Waefeso 2:20-21 “Mmejengwa juu ya msingi wa mitume na manabii, naye Kristo Yesu mwenyewe ni jiwe kuu la pembeni.Katika yeye jengo lote linaungamanishwa vema na kukua hata liwe hekalu takatifu katika Bwana.”

Kwa sababu hiyo yaani kila mtu aliyeokolewa anapaswa kujijenga katika misingi ya imani anapaswa kujua kuwa anaamini nini na anapaswa kuielewa hiyo misingi ya imani yake, Imani ya kweli imejengwa katika ufunuo ulioletwa kwetu na Yesu Kristo na mitume na manabii kwa hiyo wakristo wakiwa na uelewa juu ya misingi iliyowekwa na Kristo na mitume na  manabii ambayo kimsingi inapatikana katika neno la Mungu na inakazia utakatifu wataweza kuwa na misimamo thabiti kujua wanachokiamini na kukitetea kwa sababu kitakuwa kimewekwa wazi kwao kupitia mafundisho ya neno la Mungu, Yuda alikuwa anaandika waraka wake wakati ambapo kanisa lilikuwa na uvamizi wa mafundisho potofu, walimu wa uongo walikuwa wakilishambulia kanisa kwa mafundisho yasiyo sahihi na hivyo alikuwa akiwataka wakristo waishindanie Imani, na wafikie ngazi ya kuwa na uwezo wa kijisimamia na kuishindania imani 

Yuda 1:3-4 “Wapenzi, nilipokuwa nikifanya bidii sana kuwaandikia habari ya wokovu ambao ni wetu sisi sote, naliona imenilazimu kuwaandikia, ili niwaonye kwamba mwishindanie imani waliyokabidhiwa watakatifu mara moja tu. Kwa maana kuna watu waliojiingiza kwa siri, watu walioandikiwa tangu zamani hukumu hii, makafiri, wabadilio neema ya Mungu wetu kuwa ufisadi, nao humkana yeye aliye peke yake Mola, na Bwana wetu Yesu Kristo.” 

Kwa kawaida huwezi kuwaambia watu waishindanie imani kama imani yenyewe hawaijui kwa sababu hiyo kila mkristo anapaswa kuacha uvivu na kukubali kujifunza neno la Mungu kwa kulisoma, kuandika notes na kwa kuuliza maswali, wakristo hawapaswi kuwa wajinga kiasi ambacho hata ukiambiwa kuna kadi za kusamehewa dhambi unanunua, kuna sabuni za upako unaogea tu, ukiambiwa ugali wa upako unajilia tu, hauna hata msingi wa kimaandiko wa kuhoji kuwa agizo la namna hii limeandikwa wapi, katika biblia?  upungufu mkubwa tulio nao leo ni kuwa na wakristo wa hovyo samahani pia kwa neno hilo hii ni kwa sababu ya kukosa watu wanaojitoa katika neno la Mungu na kujifunza imani yao kwa kina na mapana na marefu, Nyakati za Kanisa la kwanza watu walikaa katika fundisho la Mitume na walijifunza neno la Mungu kwa umakini na wakajijengea uwezo wa kuitetea imani, kwa sababu walilijua neno, walilijua kusudi la Mungu na walijua jinsi ya kulitumia neno la Mungu kwa halali na kukuwa kiroho hata kuwa walimu wa wengine. 

Matendo 2:42 “ Wakawa wakidumu katika fundisho la mitume, na katika ushirika, na katika kuumega mkate, na katika kusali.”

Matendo 20:27-28 “Kwa maana sikujiepusha na kuwahubiria habari ya kusudi lote la Mungu. Jitunzeni nafsi zenu, na lile kundi lote nalo, ambalo Roho Mtakatifu amewaweka ninyi kuwa waangalizi ndani yake, mpate kulilisha kanisa lake Mungu, alilolinunua kwa damu yake mwenyewe.”

2Timotheo2:15 “Jitahidi kujionyesha kuwa umekubaliwa na Mungu, mtenda kazi asiye na sababu ya kutahayari, ukitumia kwa halali neno la kweli.” 

Martin Luther alipokuwa akiishindania imani ilipokuwa imechakachuliwa na wakatoliki aliweka misimamo mikuu mitano ya maswala ya msingi ambayo mtu anayeiamini Biblia na anayemuamini Mungu wa kweli anapaswa kujiuliza kama imani ya mtu huyo haikuzingatia maswali haya muhimu matano tayari alihisi kuna changamoto ya kiimani

Sola scripura (Scripture alone) – Msingi wa Imani hiyo utokane na uwiano wa maandiko na sio mapokeo ya wanadamu.

Solus Christus (Christ alone) – kiini cha ujumbe na njia ya kuhesabiwa haki itokane na kile ambacho Kristo amekikamilisha pale Msalabani, na kwa njia yake na fundisho lake

Sola fide (Faith alone) – kuwa wokovu unapatikana kwa Imani kupitia kazi iliyofanywa na Yesu msalabani sawa na inavyoelekezwa katika maandiko

Sola gratia (Grace alone) – kila tunachokipokea kutoka kwa Mungu kwa njia ya wokovu mwanzo mpaka mwisho kinatokana na neema ya Mungu

Soli deo Gloria (Glory to God alone) – Lolote tunalolipokea na kulifurahia katika wokovu wetu ni kwaajili ya utukufu wa Mungu na sio vinginevyo.

Ni kama Luther aliweka Rula rahisi kwa mwamini wa kawaida kujihoji na kujiuliza kile anachokiamini je ni cha kibiblia? Kimo katika maandiko kwa uwiano wake?, Imani hii ina mtu anatafuta jina au anamuinua Kristo? Imani yake na maelekezo yake ya kiimani yanatokana na neno la Kristo na yanaelekeza huko? Je tunayoyapokea ni kwa neema? Na je Mungu anatukuzwa, kwa wataalamu wa uchambuzi wa neno la Mungu viko vipimo vingi zaidi ya hivi vya kupima mafundisho ya kweli na iko misingi mingi zaidi ya hii lakini hayo ni maswali Muhimu ambayo Mkristo wa kawaida anaweza kujiuliza, Leo hii inasikitisha sana kuona kuwa wakristo hawafundishwi neno la Mungu katika kiwango cha kutosha, na hawajifunzi ipaswavyo, na hawajui hata kusudi la kuweko kwao wala kusudi la Mungu, na wala hawajui kulitumia neno la Mungu kwa halali, tuna wakristo ambao wanaruka huku na huko wakiwa hawajui hata wanalolitafuta, wako wengine wana miaka mingi lakini hawajui lolote wala hata kanisani hawaandiki notisi za kile kinachohubiriwa na kinachofundishwa, mimi ninapoandika neno la Mungu mara baada ya Roho Mtakatifu  kunipa ujumbe kwa kawaida huwa natumia masaa yasiyopungua nane mpaka siku mbili au tatu kuandaa ujumbe, na wakati mwingine wasomaji wangu wameniambia somo zuri lakini ni refuuuuuu, mimi siandiki kwaajili ya watu wavivu, naandika kwaajili ya watu wanaojua ambao Mungu atakuja kuwatumia kuzisoma jumbe zangu na kuzitumia kuujenga mwili wa Kristo na sio lazima somo liishe siku hiyo hiyo, sio hivyo tu kama wewe unaona unatumia vocha nyingi kwa kusoma tu mimi natumia gharama kubwa na muda mwingi kusoma, kutafakari, kuomba kumsikiliza Mungu, kujitenga, kuhariri na kuyarusha kwenye mitandao ili ikufikie, wewe ambaye unaweza kutumia nusu saa tu kujisomea, au unaweza kukopi na kuhamishia kwenye simu yako ukajisomea baadae, wakristo wavivu sio sehemu ya wanafunzi wangu. Mimi wakati ninaokoka pale Mwenge Full Gospel Bible Fellowship ibada ilikuwa inaanza saa mbili asubuhi na inaisha saa mbili usiku wale wanaokumbuka kati  ya 1995-1996 tulipokuwa na ujenzi wakati huo uko ukumbi namba moja tu, hatukuwa tunakula chakula, wala kunywa chai, mchungaji wetu wakati huo @Zachary Kakobe alikuwa akifundisha kwa kutumia maandiko mengi sana, kumsubiri tu mpaka atokee madhabahuni ilikuwa inahitaji uvumilivu, yeye ametusaidia kuwa imara sio kama wakristo wa kidigitali ambao kila saa wanaangalia saa, wanarushiwa maandiko kwenye screens sisi andiko likikupita unakwenda kujitafutia, Mazoezi yale yalitusaidia sana kujijenga kiimani, sisemi kuwa watu wawe na ibada ndefu na zisizoajli muda kwa sababu Mungu ni Mungu wa utaratibu, lakini nasema hatukuona shida wakati uole Mchungaji wetu kutumia muda mwingi na mrefu sana kutuzamisha katika neno la Mungu,  na kumbuka wakati huo Mchungaji wetu alikuwa anasemwa vibaya kila mahali, ukijitambulisha kuwa unasali kwa Kakobe kila anayekusikia anafikiri wewe ni pepo, ulikuwa ni wakati mgumu sana lakini ulitufanya imara sana. Paulo mtume kuna nyakati alikuwa anafululiza kuhubiri na kutoa maagizo mpaka kuna mtu alisinzia akaanguka ghorofani, akafa akafufuliwa na mahubiri yakaendelea  ona ni ukweli unaothibitisha kuwa wakristo wa nyakati za kanisa la kwanza walikaa katika neno kwa muda mrefu sana na hawakusema kuwa amekosa hekima ona:- 

Matendo 20:7-11 “Hata siku ya kwanza ya juma, tulipokuwa tumekutana ili kumega mkate, Paulo akawahutubu, akiazimu kusafiri siku ya pili yake, naye akafuliza maneno yake hata usiku wa manane. Palikuwa na taa nyingi katika orofa ile tulipokuwa tumekusanyika. Kijana mmoja, jina lake Eutiko, alikuwa ameketi dirishani, akalemewa na usingizi sana; hata Paulo alipoendelea sana kuhubiri, akazidiwa na usingizi wake akaanguka toka orofa ya tatu; akainuliwa amekwisha kufa. Paulo akashuka, akamwangukia, akamkumbatia, akasema, Msifanye ghasia, maana uzima wake ungalimo ndani yake. Akapanda juu tena, akamega mkate, akala, akazidi kuongea nao hata alfajiri, ndipo akaenda zake.”

Mkristo kaaa katika neno, jifunze neno la Mungu, jadilianeni neno la Mungu, hoji kila kitu usichokielewa, Biblia sasa iko wazi kwa kila mtu, nyenzo za kutusaidia kutafasiri maandiko ziko kila mahali, maarifa yameongezeka, usikubali kuwa miongoni mwa watu wanaoweza kubebeka hovyo hovyo, Maswala ya Mungu yasiwe maswala ya kufanyiwa majaribio, lazima tuyapime maandiko, tuipime miujiza, na tuwapime watumishi wa Mungu wa ngazi yoyote ile hata kama wanashusha moto kutoka mbinguni, mtu aliyejijenga kiimani ataweza kupambanua kwa mujibu wa misingi ya Imani aliyolelewa na iliyo sawa na maandiko.

Kuomba katika Roho - Kuomba katika Roho Mtakatifu ni mojawapo ya njia muhimu sana inayosaidia sisi kuwa imara kiroho na kujijenga wenyewe. Kuomba “Katika” neno hili Katika kwa kiingereza “in” kwa kiyunani ni “en” tafasiri yake kwa kingereza ni “instrumentality” maana yake kwa kingereza “the quality or state of being instrumental” huku ni kuomba kwa ubora na uwepo wa Roho Mtakatifu, kuomba kwa roho, kuomba kupitia Roho Mtakatifu, kuomba tukitumiwa au kwa kuwezeshwa na Roho Mtakatifu, Wakristo wengi sana wanapenda kuwa mashujaa wa maombi na wengi sana wanajiumiza kwa sababu wanatumia nguvu zao katika kuomba, wanashindana na neno la Mungu ambalo limesema hatujui kuomba kama itupasavyo kuomba kwa sababu hiyo ni lazima tumtegemee Roho Mtakatifu atusaidie katika maombi yetu kila wakati yawe marefu au mafupi, lakini maombi hayo yataenda zaidi ya maneno yetu ya kawaida, na hisia zetu za kawaida na yatakuwa ya ndani sana yenye mzigo na kuugua kwa hivyo  hayatakuwa ya kujilazimisha bali yatakuwa yanabebwa na Roho wa Mungu  kwa hiyo ni lazima uwe naye  na umuhishishe yeye na wakati mwingine utumie muda mrefu kunena. Kabla ya maombi yoyote yale mimi moyoni huwa namwambia Roho Mtakatifu nisaidie kuomba kwa sababu mimi mwenyewe siwezi, na matokeo ya maombi wakati wote yamekuwa yenye ubora.

Warumi 8:26 “Kadhalika Roho naye hutusaidia udhaifu wetu, kwa maana hatujui kuomba jinsi itupasavyo, lakini Roho mwenyewe hutuombea kwa kuugua kusikoweza kutamkwa”. 

Waefeso 6:18 “kwa sala zote na maombi mkisali kila wakati katika Roho, mkikesha kwa jambo hilo na kudumu katika kuwaombea watakatifu wote;”

Roho Mtakatifu ndiye anayetuumbia hisia za kutaka kuwa na mawasiliano na baba yetu wa Mbinguni, na ni kuomba katika Roho ndiko kunakomuimarisha mkristo kwa kujijenga na zaidi ya yote kuomba katika Roho kunayafanya maombi kuwa rahisi sana kuliko uwezo wetu na zaidi ya hayo ni moja ya silaha za kiroho zinazoainishwa katika neno la Mungu yaani kusali katika Roho, je unamtegemea Roho wa Mungu katika maombi yako? Au unatumia nguvu zako? Je unajijenga kwa kuomba katika Roho? Unanena kwa lugha?

1Wakorintho 14:2-4 “Maana yeye anenaye kwa lugha, hasemi na watu, bali husema na Mungu; maana hakuna asikiaye; lakini anena mambo ya siri katika roho yake. Bali yeye ahutubuye, asema na watu maneno ya kuwajenga, na kuwafariji, na kuwatia moyo. Yeye anenaye kwa lugha hujijenga nafsi yake; bali ahutubuye hulijenga kanisa.”

Kujilinda katika upendo wa Mungu – hii ina maana gani? Ni muhimu kufahamu kuwa kukaa katika upendo wa Mungu kuna maana pana na rahisi sana katika mtazamo wa agano la kale mwanadamu ndiye aliyekuwa na wajibu mkubwa wa kutumia nguvu, akili na moyo wetu wote katika kumpenda Mungu na kumtii, lakini katika agano jipya tunaelezwa kuwa ni Mungu ndiye aliyetupenda ona:-

Kumbukumbu 6:4-5 “Sikiza, Ee Israeli; Bwana, Mungu wetu, Bwana ndiye mmoja. Nawe mpende Bwana, Mungu wako, kwa moyo wako wote, na kwa roho yako yote, na kwa nguvu zako zote.”

Yohana 3:16 “Kwa maana jinsi hii Mungu aliupenda ulimwengu, hata akamtoa Mwanawe pekee, ili kila mtu amwaminiye asipotee, bali awe na uzima wa milele.”

Katika agano jipya ni Mungu ndiye aliyetupenda, na Bwana Yesu alitupenda upeo kwa hiyo wajibu wetu mkubwa ni kuitikia upendo huo wa Mungu kwa kukaa ndani yake na kushika yale yote ambayo Bwana Yesu ametuamuru, kwa hiyo mwitikio wetu sio kutumia nguvu na akili mwitikio wetu ni kukubali kwa moyo kukaa katika pendo lake tunampenda kwa sababu alitupenda kwanza, tunampenda kwa sababu ametusamehe, ametuokoa, ametubariki, ametupa uzima, ametulinda, ametupa neema kwa hiyo tunaonyesha mwitikio kwa upendo wake kwa kuendelea kukaa katika upendo wake huo kwa kuzishika amri zake na wala sio nzito ni kwa hiyari na kuitikia  na ni kwa kupenda tu, yaani kumpenda Mungu na wenzetu.

Yohana 15:9-10 “Kama vile Baba alivyonipenda mimi, nami nilivyowapenda ninyi, kaeni katika pendo langu.Mkizishika amri zangu, mtakaa katika pendo langu; kama vile mimi nilivyozishika amri za Baba yangu na kukaa katika pendo lake.”

1Yohana 4:9-11 “Katika hili pendo la Mungu lilionekana kwetu, kwamba Mungu amemtuma Mwanawe pekee ulimwenguni, ili tupate uzima kwa yeye.Hili ndilo pendo, si kwamba sisi tulimpenda Mungu, bali kwamba yeye alitupenda sisi, akamtuma Mwanawe kuwa kipatanisho kwa dhambi zetu. Wapenzi ikiwa Mungu alitupenda sisi hivi, imetupasa na sisi kupendana.”

 

Neno kukaa katika Pendo la Mungu kwa kiyunani kukaa linatumika neno “Menō” neno hili kwa kiingereza ni abide (mara 61), remain (mara 16), dwell (mara 15), continue (mara 11), tarry (mara 9), endure (mara 3), misc (mara 5) kwa jumla limetumika katika maandiko mara 127 maana yake Kukaa, kubaki, kuishi, kuendelea, kawia, vumilia, jistawishe, maneno hayo yanamaanisha kuendelea kuweko katika fungamano na upendo wa Yesu hadi mwisho, ni kama vile wanandoa wanapooana wakapendana au mume akampenda mke akamuoa, ili ndoa hiyo idumu mke anapaswa kuendelea kuwepo kwa mumewe, na shughuli zote katika nyumba na mahusiano zinapaswa kuendelea, kwa hiyo mke huyo huheshimiwa kwa sababu anajulikana ni mke wa mtu Fulani kwa sababu maisha yao ya uhusiano yanaendelea kwa hiyo endelea kudumu katika uhusiano wako na Mungu na endelea kufanya mambo yote yale yanayodumisha uhusiano wako na Yesu Kristo hivyo tu, kama ulivyo ulinzi wa mke wa mtu, utajilinda kaatika Imani kwa kuendelea kushikamana na Yesu.

 

Kwa kungojea Rehema – Watu waliookoka wengi wetu tuna tabia ya kujihakikishia kuwa tunaingia mbinguni! Sio vibaya kujigamba namna hiyo lakini ni lazima tuwe wanyenyekevu sana tunapaswa kujikumbusha kuwa Yesu atarudi kama hakimu wa mwisho, yeye ndiye mwenye mamlaka ya mwisho ya kuamua nani aende mbinguni na nani abaki, Hakuna mtu anaweza kumuamulia, na wale wanaojifikiri kuwa wanastahili wanaweza kujikuta wakikataliwa. Hakuna mwanadamu hata mmoja anaweza kuwa na kigezo za kujifikiri kuwa anafaa kuingia mbinguni, isipokuwa hatuna budi kusubiri au kungojea kwa Rehema kwa kiyunani neno Rehema ni “eleos”  ambalo maana yake ni “compassion” ambalo kwa Kiswahili ni huruma, kwa hiyo wakristo ni lazima tuwe na unyenyekevu kwani mbinguni hatujiingizi tu, wala huwezi kuwa na kipimo sahihi cha kufikiri kuwa wewe ndio utaingia vigezo vyote vya msingi anavyo mwenye harusi, anavyo aliyetoa mwaliko anavyo hakimu mkuu Yesu Kristo, maandiko yanaonya kuwa kuna watu wengi ambao watafanya mambo ya muhimu kwa jina la Yesu na watajifikiria kuwa wana vigezo vya kuingia mbinguni lakini watakataliwa, tuache kiburi bila rehema za Mungu hakuna mtu hata mmoja anayeweza kutoboa na kudhani ya kuwa ataingia mbinguni hata kama utakuwa na bidii, Yesu mwenyewe ndiye anayewajua atakaowakaribisha kwake tuache unafiki, tuache kiburi, tuache kujihesabia haki, tuache kuhukumu wengine kana kwamba sisi tumekwisha kufika, kuingia mbinguni ni kwa kungojea rehema, huyu anayezungumza hapa ni mdogo wake Yesu wamenyonya ziwa moja anasema “HUKU MKINGOJEA REHEMA YA BWANA WETU YESU KRISTO, HATA MPATE UZIMA WA MILELE” kumbe uzima wa milele ni kwa rehema tu na hivyo wakristo wanapaswa kusubiria kwa unyenyekevu  kimsingi neno kungojea kwa rehema katika maandiko ya kiyunani linasomeka hivi “Prosdechomai eleos”  tafasiri yake ni “to intercourse hospitality credence” ambalo tafasiri yake “kusubiria uthibitisho wa kitabibu” yaani wakristo wanapaswa kumsubiria Yesu kama mgonjwa anayesubiri wito wa daktari au kama mgonjwa anayesubiria majibu ya vipimo vya afya yake subira ya namna hiyo hainaga kiburi, ni subira yenye unyenyekevu ndani yake mgonjwa husubiria huruma za daktari akuthibitishie kuwa uko sawa au hauko sawa, sasa kama wewe unajifikiri au unakiburi na unajidhania kuwa wewe hivyo ulivyo Yesu atakuingiza tu mbinguni bila rehema zake subiria kwa kiburi majibu yako yanakuja, sisemi hivi kukutisha bali nataka utambue kuwa sisi wanadamu tulivyo hatupaswi kujivunia wokovu na kujifikiri kuwa tunaweza kusimama kwa nguvu zetu, kama tumeokolewa kwa neema tutaingia mbinguni kwa neema na sio kwa kujigamba. Hivi ndivyo tunavyoonywa hata katika maandiko. 

Muhubiri 7:15 “Mambo hayo yote nimeyaona mimi katika siku za ubatili wangu, yuko mwenye haki apoteaye katika haki yake, yuko na mtu mwovu azidishaye maisha yake katika udhalimu wake. Usiwe na haki kupita kiasi; Wala usijiongezee hekima mno; Kwani kujiangamiza mwenyewe?”

Warumi 9:14-16 “Tuseme nini basi? Kuna udhalimu kwa Mungu? Hasha! Maana amwambia Musa, Nitamrehemu yeye nimrehemuye, nitamhurumia yeye nimhurumiaye. Basi, kama ni hivyo, si katika uwezo wa yule atakaye, wala wa yule apigaye mbio; bali wa yule arehemuye, yaani, Mungu.”

Mathayo 7:21-23 “Si kila mtu aniambiaye, Bwana, Bwana, atakayeingia katika ufalme wa mbinguni; bali ni yeye afanyaye mapenzi ya Baba yangu aliye mbinguni. Wengi wataniambia siku ile, Bwana, Bwana, hatukufanya unabii kwa jina lako, na kwa jina lako kutoa pepo, na kwa jina lako kufanya miujiza mingi? Ndipo nitawaambia dhahiri, Sikuwajua ninyi kamwe; ondokeni kwangu, ninyi mtendao maovu.”

Endapo utaishi katika hayo na kutembea kwa unyenyekevu, na kukaa katika upendo wa Mungu basi kumbuka kuwa Mungu katika rehema zake atatukaribisha kwake na tutakuwa imara katika imani zetu, Bwana ampe neema kila mmoja wetu kujijenga katika Imani tukingojea rehema za Bwana wetu hata tupate uzima wa milele Amen “ukiyajua hayo heri wewe ukiyatenda” 

Na Rev. Innocent Samuel Kamote 

Mkuu wa wajenzi mwenye hekima

  

Wewe ndiye mtu yule !

1Wakorintho 1: 26-29 “Maana, ndugu zangu, angalieni mwito wenu, ya kwamba si wengi wenye hekima ya mwilini, si wengi wenye nguvu, si wengi wenye cheo walioitwa; bali Mungu aliyachagua mambo mapumbavu ya dunia awaaibishe wenye hekima; tena Mungu alivichagua vitu dhaifu vya dunia ili aviaibishe vyenye nguvu; tena Mungu alivichagua vitu vinyonge vya dunia na vilivyodharauliwa, naam, vitu ambavyo haviko, ili avibatilishe vile vilivyoko; mwenye mwili awaye yote asije akajisifu mbele za Mungu”

Utangulizi

Ni muhimu kufahamu kuwa Katika maisha, watu wengi sana hujiona kuwa hawana maana kwa sababu ya hali zao, historia yao, au upungufu wao na udhaifu walionao. Wengine hujidharau kwa sababu hawana elimu kubwa, hadhi ya kijamii, au uwezo wa pekee au vipawa. Lakini Biblia inafundisha kwamba Mungu hachagui watu kwa vigezo vya wanadamu bali kwa kusudi lake mwenyewe. Tena bila kujali Hali zao, Leo tunajifunza jinsi Mungu anavyoyachagua mambo manyonge, yaliyodharauliwa, na yasiyo na sifa za dunia kwa ajili ya utukufu wake. Na kwaajili yake yeye mwenyewe.

Tutajifunza somo hili WEWE NDIYE MTU YULE  kwa kuzingatia vipengele vitatu vifuatavyo:-

• Uchaguzi wa Mungu

• Mifano ya watu waliochaguliwa na Mungu

• Wewe ndiye mtu yule

Uchaguzi wa Mungu. 

Ni muhimu kufahamu kuwa Mungu katika Hekima yake anaweza kuamua Kwa kuwa ana Haki ya kuamua kumchagua na kumtumia mtu yeyote yule bila kujali kama mtu huyo anakidhi au kutosha vigezo vya kawaida vya kibinadamu, uchaguzi wa Mungu ni wa tofauti na Wa kibinadamu Kwa sababu Mungu huangalia Moyo.

1Samuel 16:7 “Lakini Bwana akamwambia Samweli, Usimtazame uso wake, wala urefu wa kimo chake; kwa maana mimi nimemkataa. Bwana haangalii kama binadamu aangaliavyo; maana wanadamu huitazama sura ya nje, bali Bwana huutazama moyo”

Warumi 9:11-15 “kwa maana kabla hawajazaliwa wale watoto, wala hawajatenda neno jema wala baya, ili lisimame kusudi la Mungu la kuchagua, si kwa sababu ya matendo, bali kwa sababu ya nia yake aitaye), aliambiwa hivi, Mkubwa atamtumikia mdogo. Kama ilivyoandikwa, Nimempenda Yakobo, bali Esau nimemchukia. Tuseme nini basi? Kuna udhalimu kwa Mungu? Hasha! Maana amwambia Musa, Nitamrehemu yeye nimrehemuye, nitamhurumia yeye nimhurumiaye”

Tabia hii ya Mungu inathibitisha kuwa Mungu hutumia watu wasiotegemewa na jamii waliokataliwa, wanyonge na hata waoga na wasiojiamini wakati mwingine ili kuonyesha utukufu wake. Hivyo, mtu yeyote anayejiona hafai hana sababu ya kujidharau, bali anaweza kumtumaini Mungu ili amtumie kwa utukufu wake.

Mifano ya watu waliochaguliwa na Mungu 

Wengi wa watu waliochaguliwa na Mungu au kutumiwa na Mungu walikuwa ni watu wenye changamoto za kukosekana kwa vigezo vya kibinadamu vya kukidhi haja na mahitaji ya nafasi ambazo Mungu alikuwa amewaitia ili wamtumikie, na wakati mwingine hata wao wenyewe walijiweka katika mzani na kujipima na kijibaini kuwa hawatoshi katika vigezo na masharti au viwango sawa na majukumu waliyokuwa wamepewa.

1. Musa  - Aliogopa sana kumkabili Farao ambaye Kwa nyakati zile alikuwa ni mtawala wa Dunia ya wakati huo tena dikteta katili mwenye jeshi lisilo na mpinzani, Pamoja na kujifikiria kuhusu uwezo wake wa kunena Kwa sababu ya kigugumizi Musa alimshauri Mungu kuchagua mtu mwingine.

- Ni jambo la kushangaza kuwa Mungu hakuponya kinywa Chake Wala kigugumizi ingawa angetaka angemponya lakini alimuhakikishia kuwa atakuwa Pamoja naye.

- Kutoka 3:10-11 “Haya, basi, nitakutuma sasa kwa Farao, ili upate kuwatoa watu wangu, hao wana wa Israeli, katika Misri. Musa akamwambia Mungu, Mimi ni nani, hata niende kwa Farao, nikawatoe wana wa Israeli watoke Misri?”

- Kutoka 4:10-12 “Musa akamwambia Bwana Ee Bwana, mimi si msemaji, tokea zamani, wala tokea hapo uliposema na mtumishi wako; maana mimi si mwepesi wa kusema, na ulimi wangu ni mzito. Bwana akamwambia, Ni nani aliyekifanya kinywa cha mwanadamu? Au ni nani afanyaye mtu kuwa bubu au kiziwi, au mwenye kuona, au kuwa kipofu? Si mimi, Bwana? Basi sasa, enenda, nami nitakuwa pamoja na kinywa chako, na kukufundisha utakalolinena.”

2. Gideoni - Alihofia kuwa yeye ni masikini na anatokea katika kabila ndogo, pia alikuwa mtu mwenye hofu na woga, ni ukweli ulio wazi kuwa mwenyewe alijiona kuwa sio kitu, Lakini Bwana alimtumia na kumchagua kuwa mwamuzi wa Israel

- Waamuzi 6:14-15 “Bwana akamtazama, akasema, Enenda kwa uwezo wako huu, ukawaokoe Israeli na mkono wa Midiani. Je! Si mimi ninayekutuma Akamwambia, Ee Bwana, nitawaokoa Israeli kwa jinsi gani? Tazama, jamaa zangu ndio walio maskini sana katika Manase, na mimi ndimi niliye mdogo katika nyumba ya baba yangu.”

- Mungu alimuhakikiashia kuwa atakuwa Pamoja naye na kuwa atawapiga Wamidiani kama mtu mmoja

- Waamuzi 6:16 “Bwana akamwambia, Hakika nitakuwa pamoja nawe, nawe utawapiga Wamidiani kama mtu mmoja”

- Hata Pamoja na kuhakikishiwa Hilo ni ukweli ulio wazi kuwa Gideoni bado alibaki kuwa mwoga udhaifu wake unaweza kulinganishwa na njozi uliyootwa na kambi ya adui zake ambao waliota ndoto na kutafasiriana, kuwa Gideoni ni kama mkate wa shairi (Ngano) ambao ulisambaratisha hema za wamidiani, mfano huu wa ndoto unaonyesha jinsi ambavyo Mungu anatumia kitu dhaifu sana katika kufanikisha kazi yake kwaajili ya utukufu wake

- Waamuzi 7:9-15 “Ikawa usiku uo huo Bwana akamwambia, Ondoka, shuka kambini; maana nimeitia katika mikono yako. Lakini, ukiogopa kushuka, shuka pamoja na Pura mtumishi wako kambini; nawe utasikia wanayoyasema, na baada ya haya mikono yako itatiwa nguvu; ushuke kambini. Ndipo akashuka pamoja na Pura mtumishi wake hata kufikilia mwisho wa watu wenye silaha waliokuwa kambini. Nao Wamidiani na Waamaleki na, hao wana wa mashariki walikuwa wametua bondeni, mfano wa nzige kwa wingi; na ngamia zao walikuwa hawana hesabu; mfano wa mchanga wa ufuoni, kwa wingi. Hata Gideoni alipofika, tazama, palikuwa na mtu mmoja aliyekuwa akimhadithia mwenziwe ndoto, akasema, Tazama, naliota ndoto, na tazama, mkate wa shayiri ulianguka katika kambi ya Wamidiani, ukafika hata hema moja, ukaipiga hata ikaanguka, nao ukaipindua, hata ikalala chini. Mwenzake akamjibu akasema, Habari hii haikosi kuwa upanga wa Gideoni, mwana wa Yoashi, mtu wa Israeli. Mungu amewatia Wamidiani na jeshi lote katika mkono wake. Ikawa, aliposikia habari ya ile ndoto, na kufasiriwa kwake, akasujudu; akarudi katika jeshi la Israeli akasema, Inukeni, kwa maana Bwana amelitia jeshi la Midiani mikononi mwenu”

3. Sauli - Alikuwa Anatafuta Punda wa baba yake, lakini kumbe Mungu alikuwa amemwambia Samuel kuwa atamleta mtu ambaye atakuwa mfalme wa Israel na kuwa Samuel alipaswa kumpaka mafuta Kwa kuwa Mungu Amekusudia awe mfalme.

- 1Samuel 9: 1-6 “Basi, kulikuwa na mtu mmoja wa Benyamini, jina lake akiitwa Kishi, mwana wa Abieli, mwana wa Serori, mwana wa Bekorathi, mwana wa Afia, mwana wa Mbenyamini, mtu shujaa, mwenye nguvu. Naye alikuwa na mwana, aliyeitwa jina lake Sauli, kijana, tena mzuri; wala katika wana wa Israeli hakuwako mtu mzuri kuliko yeye; tangu mabega yake kwenda juu alikuwa mrefu kuliko watu wote. Na punda za Kishi, baba yake Sauli, walikuwa wamepotea. Kishi akamwambia Sauli mwanawe, Haya basi, twaa mtumishi mmoja pamoja nawe, uondoke, uende ukawatafute punda hao. Naye akapita kati ya nchi ya milima milima ya Efraimu, akapita na kati ya nchi ya Shalisha, lakini hawakuwaona; kisha wakapita kati ya nchi ya Shaalimu, wala huko hawakuwako; wakapita kati ya nchi ya Wabenyamini, lakini hawakuwapata. Hata walipofika nchi ya Sufu, Sauli akamwambia yule mtumishi aliyefuatana naye, Haya, na turudi, baba yangu asije akaacha kufikiri habari za punda akatufikiri sisi. Naye akamwambia, Tazama, katika mji huu mna mtu wa Mungu, naye ni mtu mwenye kuheshimiwa; yote asemayo hutukia kweli kweli; basi, twende huko; labda yeye aweza kutuambia habari ya safari yetu tunayoiendea.”

- Unaona hapo tunapata habari ya Sauli aliyekuwa anatafuta punda waliopotea wa baba yake. Alikuwa mtu wa kawaida kutoka kabila la Benyamini, ambalo lilikuwa dogo kati ya makabila ya Israeli.

Inaonekana Mungu anasababisha mkasa huu wa kupotea Kwa Punda lakini yeye anaandaa mpango wa kumleta mtu yule Kwa Samuel ili kupakwa mafuta, mwendo wa siku tatu Porini bila kupiga mswaki, au kuoga unaweza kusababisha wewe uliyeagizwa kumpaka mafuta mfalme kufikiri kuwa Mungu amechagua mtu mchafu lakini hii ilikuwa njia ya Mungu kutimiza kusudi lake, hivyo Samueli alimpaka mafuta, Je Sauli alijiona mwenye kutosha ? La hasha ! 

- 1 Samweli 9:21 – Sauli alimwambia Samweli: “Je! Mimi si Mbenyamini, wa kabila ndogo katika Israeli? Na jamaa yangu si ndogo katika kabila la Benyamini? Mbona basi unanena nami maneno kama haya?”

- Alikuwa hajui kuwa Mungu alikuwa amempangia kuwa mfalme wa Israeli.

- 1 Samweli 10:1 “Samueli alimpaka mafuta na kumwambia: “Bwana amekutia mafuta uwe mkuu juu ya watu wake Israeli.”

- Hii inatufundisha kuwa hata pale mtu anapokuwa anashughulika na mambo ya kawaida, Mungu anaweza kuwa na mpango mkubwa juu yake. Hata pale mtu anapojifikiri kuwa yeye sio mwenye kutosha au kufaa Mungu husema kuwa wewe ndiye mtu yule!

4. Daudi - Alikuwa ni mtoto aliyekataliwa na kudharauliwa na jamii na hata baba yake na ndugu zake, haiwezekani Yese kuwaita watoto Saba wanaume katika sherehe muhimu ya kuweka wakfu mfalme ajaye, Kisha mtoto huyu akaachwa Porini! Ni dhahiri kuwa hakuhesabika kuwa ni mwenye kufaa, vyanzo vya kale vinaelezea kuwa Daudi alihesabika kama mwana haramu katika nyumba ya baba yake, kuwekwa kwake kuchunga kondoo katika mazingira ya Dubu na Simba ilikuwa yamkini ikiwezekana afie huko, ni Samuel ndiye aliyekujua kuondoa utata wa mashaka kuhusu Daudi kuwa mwana wa Yese Kwa kuuliza kama Yuko mtoto mwingine na hata hivyo yeye akawa ndiye mtu yule ambaye Mungu amekusudia ona:-

- 1Samuel 16: 8-12 “Ndipo Yese akamwita Abinadabu, akampitisha mbele ya Samweli. Naye akasema, Bwana hakumchagua huyu. Ndipo Yese akampitisha Shama. Naye akasema, wala Bwana hakumchagua huyu. Yese akawapitisha wanawe saba mbele ya Samweli. Samweli akamwambia Yese, Bwana hakuwachagua hawa. Kisha Samweli akamwambia Yese, Watoto wako wote wapo hapa? Naye akasema, Amesalia mdogo wao, na tazama, anawachunga kondoo. Basi Samweli akamwambia Yese, Tuma watu, wamlete; kwa sababu hatutaketi hata atakapokuja huku. Basi akatuma mtu, naye akamleta kwao. Naye alikuwa mwekundu, mwenye macho mazuri, na umbo lake lilikuwa la kupendeza. Bwana akasema, Ondoka, umtie mafuta; maana huyu ndiye.”

5. Petro - Alikuwa mtu mwenye hofu, lakini pia mwenye kujiaminisha kupita kawaida, pia alikuwa mtu mwenye kukata tamaa, Yeye aliwahi kumkana Yesu mara tatu, lakini pia kabla ya kukutana na Yesu alijihisi kuwa yeye ni mtu mwenye dhambi, Yesu alimtia moyo kuwa asiogope kwani yeye angemfanya kuwa mvuvi wa watu, baadae Mungu alimtumia Kwa viwango vya juu na kuwa mojawapo ya watu ambao ni nguzo ya Kanisa

- Luka 5:3-10 “Akaingia katika chombo kimoja, ndicho chake Simoni, akamtaka akipeleke mbali kidogo na pwani. Akaketi, akawafundisha makutano ali chomboni. Hata alipokwisha kunena, alimwambia Simoni, Tweka mpaka kilindini, mkashushe nyavu zenu mvue samaki. Simoni akajibu akamwambia, Bwana mkubwa, tumefanya kazi ya kuchosha usiku kucha, tusipate kitu; lakini kwa neno lako nitazishusha nyavu. Basi, walipofanya hivyo walipata samaki wengi mno, nyavu zao zikaanza kukatika; wakawapungia mikono washirika wao waliokuwa katika chombo cha pili, waje kuwasaidia; wakaja, wakavijaza vyombo vyote viwili, hata vikataka kuzama. Simoni Petro alipoona hayo, alianguka magotini pa Yesu, akisema, Ondoka kwangu, kwa kuwa mimi ni mtu mwenye dhambi, Bwana. ‘Maana alishikwa na ushangao, yeye na wote waliokuwa pamoja naye, kwa sababu ya wingi wa samaki walioupata; na kadhalika Yakobo na Yohana, wana wa Zebedayo, waliokuwa washirika wa Simoni. Yesu akamwambia Simoni, Usiogope, tangu sasa utakuwa ukivua watu.”

- Luka 22:33-34 “Akamwambia, Bwana, niwapo pamoja nawe, mimi ni tayari kwenda gerezani au hata kifoni. Akasema, Nakuambia, Petro, jogoo hatawika leo, kabla wewe hujanikana mara tatu ya kuwa hunijui.”

- Luka 22:56-60 “Ndipo mjakazi mmoja akamwona ameketi mwangani, akamkazia macho akasema, Na huyu alikuwa pamoja naye. Akakana, akisema, Ee mwanamke, simjui. Baadaye kitambo mtu mwingine alimwona akasema, Wewe nawe u mmoja wao. Petro akasema, Ee mtu, si mimi. Halafu, yapata saa moja, mtu mwingine alikaza kusema, Hakika na huyu alikuwa pamoja naye, kwa kuwa yeye pia ni Mgalilaya. Petro akasema, Ee mtu, sijui usemalo. Na papo hapo alipokuwa katika kusema, jogoo aliwika.”

- Matendo 4:13 “Basi walipoona ujasiri wa Petro na Yohana, na kuwajua ya kuwa ni watu wasio na elimu, wasio na maarifa, wakastaajabu, wakawatambua ya kwamba walikuwa pamoja na Yesu”

Wewe ndiye mtu yule! 

Penginepo wewe ni mtu unayejihukumu na kujidharau na kujifikiria kuwa wewe sio kitu na kuwa Labda huna vigezo, na Kwa sababu ya vipimo vyako na mitazamo kadhaa ya kibinadamu unaweza kujifikiria kuwa Labda hufai mbele za Mungu lakini neno hili limekujia maalumu kwako ili kukujulisha ya kuwa hupaswi kujidharau wewe ndiye mtu yule ambaye Mungu amekusudia kukutumia bila kujali hali yako, Historia yako, kabila yako na changamoto zozote unazozipotia.

Hupaswi kujidharau, Mungu aliyekujua na kukuandaa tangu tumboni anakujua vema na Kwa vigezo vyake wewe ndiye mtu yule ambaye Mungu anataka kukutumia Kwa vigezo vyake na sio vyako au vya wanadamu, usikubali wakati wowote kuwekwa katika vigezo vya kibinadamu na badala yake kumbuka kuwa ni Kristo ndiye aliyekufa kwaajili yako na wewe ndiye mtu yule ambaye Mungu amekusudia kumtumia!

Yeremia 1:4-7 “Neno la Bwana lilinijia, kusema, Kabla sijakuumba katika tumbo nalikujua, na kabla hujatoka tumboni, nalikutakasa; nimekuweka kuwa nabii wa mataifa. Ndipo niliposema, Aa, Bwana MUNGU! Tazama, siwezi kusema; maana mimi ni mtoto. Lakini Bwana akaniambia, Usiseme, Mimi ni mtoto; maana utakwenda kwa kila mtu nitakayekutuma kwake, nawe utasema kila neno nitakalokuamuru.”

Mungu anakujua vizuri sana anakujua vema, hujazaliwa Kwa bahati mbaya, Mungu anapokuwa na wewe wewe hubaki tena kuwa mtu wa kawaida, nyenyekea katika neema yake na Roho wake Mtakatifu atakubeba, hakuna jambo lolote katika mapenzi ya Mungu ambalo tunaweza kulifanya Kwa uwezo wetu au nguvu zetu hapana

Yohana 15:5 “Mimi ni mzabibu; ninyi ni matawi, akaaye ndani yangu nami ndani yake, huyo huzaa sana; maana pasipo mimi ninyi hamwezi kufanya neno lo lote.”

Zekaria 4:6 “Akajibu akaniambia, akisema, Hili ndilo neno la Bwana kwa Zerubabeli, kusema, Si kwa uwezo, wala si kwa nguvu, bali ni kwa roho yangu, asema Bwana wa majeshi.”

Acha kujidharau, acha kujiona duni fanya kazi na wajibu ule ambao Mungu ameukusudia kwako, yeye aliyekuita anakujua vizuri na anajua Hali unayoipitia, na changamoto ulizo nazo yeye ndiye utoshelevu wetu pale inapoonekana kuwa hatutoshelezi.

2Wakorintho 3:5-6 “Si kwamba twatosha sisi wenyewe kufikiri neno lo lote kwamba ni letu wenyewe, bali utoshelevu wetu watoka kwa Mungu. Naye ndiye aliyetutosheleza kuwa wahudumu wa agano jipya; si wa andiko, bali wa roho; kwa maana andiko huua, bali roho huhuisha.”

Uongezewe neema! 

Na. Rev. Innocent Samuel Kamote

Mkuu wa wajenzi mwenye Hekima!

Kama umande wa Hermoni!

Zaburi 133:1-3 “Tazama, jinsi ilivyo vema, na kupendeza, Ndugu wakae pamoja, kwa umoja. Ni kama mafuta mazuri kichwani, Yashukayo ndevuni, ndevu za Haruni, Yashukayo mpaka upindo wa mavazi yake. Kama umande wa Hermoni ushukao milimani pa Sayuni. Maana ndiko Bwana alikoamuru baraka, Naam, uzima hata milele.”

Utangulizi:

Moja ya siri kubwa sana ya mafanikio ya kiroho na Baraka nyingi sana katika jamii yoyote ile, iwe Taifa, Kanisa, Familia, Ndoa, taasisi, na kadhalika yote yenye kujumuisha na kuwakutanisha watu Pamoja, umoja ni mojawapo ya nyenzo muhimu sana ya kusababisha Baraka nyingi. 

Mtumishi wa Mungu Daudi alilijua hili na akalizungumzia katika Zaburi ya 133, na kutuonyesha kuwa umoja unaleta upako, umoja unaleta Baraka, umoja unaleta uzima, tena hata uzima wa milele, Kimsingi Roho Mtakatifu hawezi kutenda kazi mahali ambapo kuna utengano, ubaguzi, upendeleo, ubinafsi, mafarakano na kukosekana kwa umoja, kwa kulijua hili Hata Bwana wetu Yesu Kristo aliwaombea wanafunzi wake yaani ikiwa ni pamoja na wewe na mimi kuwa tuwe na umoja 

Yohana 17:11-12. “Wala mimi simo tena ulimwenguni, lakini hawa wamo ulimwenguni, nami naja kwako. Baba mtakatifu, kwa jina lako ulilonipa uwalinde hawa, ili wawe na umoja kama sisi tulivyo.Nilipokuwapo pamoja nao, mimi naliwalinda kwa jina lako ulilonipa, nikawatunza; wala hapana mmojawapo wao aliyepotea, ila yule mwana wa upotevu, ili andiko litimie.” 

Mpango wangu leo sio kuzungumzia kuhusu umoja, lakini Bwana amenituma kuzunguzia faida za umoja, au matokeo yanayoletwa na Umoja, Daudi anaona wema unaotokana na watu kukaa kwa umoja na anaelezea matokeo yake, au faida zake na anatoa mifano miwili, mmoja ni Mafuta mazuri kutoka kichwani, na pili umande wa Hermoni unaoshukia Sayuni, kimsingi Daudi anazungumzia Upako na Umande ambao ni matokeo ya Baraka za Roho Mtakatifu. Na kubwa zaidi nitazungumzia hili la “Kama umande wa Hermoni” tutajifunza somo hili kama umande wa Hermoni kwa kuzingatia vipengele vitatu vifuatavyo:-

Umuhimu wa umande.

Kama umande wa Hermoni.

Jinsi ya kufunikwa na umande.

Umuhimu wa umande.

Ni muhimu kufahamu kuwa umande katika lugha ya kiebrania unaitwa “ţal” kwa kiingereza unaitwa “dew” umande una umuhimu mkubwa sana katika nchi sawasawa tu na mvua ilivyo na umuhimu, wale wanaoishi katika inchi zenye mfumo wa kuweko kwa umande watakuwa wanafahamu jinsi umande ulivyo wa muhimu, inchi ikikosa mvua hakuna tofauti na inchi ikikosa umande, Wayahudi walikuwa na uelewa mkubwa sana kuhusu umuhimu wa umande, ukweli ni kuwa kunyimwa mvua pamoja na umande ilikuwa ni hukumu kubwa sana ni janga

1Wafalme 17:1 “Basi Eliya Mtishbi, wa wageni wa Gileadi, akamwambia Ahabu, Kama Bwana, Mungu wa Israeli, aishivyo, ambaye ninasimama mbele zake, hakutakuwa na UMANDE wala mvua miaka hii, ila kwa neno langu.”

Umande katika historia ya Israel uliwakilisha uwepo wa Mungu, umande ulikuwa na umuhimu mkubwa sana kama ilivyo mvua, ulikuwa na manufaa makubwa sana kwao, umande uliifanya nchi iwe na utulivu na kupoa kutoka katika joto la jangwa, ulileta utulivu kwa wanadamu, umande huifanya nchi iwe na hali joto lenye kupendeza sana, umande unaifanya ardhi iwe tayari kupokea mbegu njema na kustawi, umande kuondoka ilikuwa sawa tu na uwepo wa Mungu kuondoka, Mungu alikuwa amewathibitishia Israel kuwa atakuwa pamoja nao kama umande, umande unapokuwepo kila kitu kinastawi na umande unapokauka hali huwa mbaya 

Hosea 14:4-6 “Mimi nitawaponya kurudi nyuma kwao; nitawapenda kwa ukunjufu wa moyo; kwa maana hasira yangu imemwacha. NITAKUWA KAMA UMANDE kwa Israeli; naye atachanua maua kama nyinyoro, na kuieneza mizizi yake kama Lebanoni. Matawi yake yatatandaa, na uzuri wake utakuwa kama uzuri wa mzeituni, na harufu yake kama Lebanoni.”

Israel walipokuwa jangwani wote tunakumbuka jinsi Mungu alivyowalisha kwa mana, lakini wote tunakumbuka kuwa mana ilishuka pamoja na umande, na umande ulikuwa ukiondoka basi muda wa kuokota mana ungeondoka na umande, na jua lingechukua nafasi yake na hivyo kusingeliweko na mana tena, kwa hiyo ujio wa Mana wakati wote uliambatana na umande 

Kutoka 16:13-15 “Ikawa wakati wa jioni, kware wakakaribia, wakakifunikiza kituo; na wakati wa asubuhi umande ulikuwa juu ya nchi pande zote za kituo. NA ULIPOINUKA ULE UMANDE uliokuwa juu ya nchi, kumbe! Juu ya uso wa bara kitu kidogo kilichoviringana, kidogo kama sakitu juu ya nchi. Wana wa Israeli walipokiona, wakaambiana, Nini hiki? Maana hawakujua ni kitu gani. Musa akawaambia, Ndio mkate ambao BWANA amewapa ninyi, mle.”

Hesabu 11:7-9 “Na hiyo mana ilikuwa mfano wa chembe za mtama na kuonekana kwake kulikuwa kama kuonekana kwake bedola. Watu wakazunguka-zunguka na kuikusanya, kisha wakaisaga kwa mawe ya kusagia, au kuitwanga katika vinu, kisha wakaitokosa nyunguni, na kuandaa mikate; na tamu yake ilikuwa kama tamu ya mafuta mapya. UMANDE ULIPOYAANGUKIA MARAGO WAKATI WA USIKU, HIYO MANA ILIANGUKA PAMOJA NAO.”

Wana wa Israel walifahamu umuhimu wa umande, Umande ulikuja na mana, na ni umande ulioifanya mana isichafuke japo iliangukia juu ya nchi, lakini nchi haikuweza kuichafua mana kwa sababu ilikuja na UMANDE, Endapo wote tunakubaliana kuwa Mana ni mkate kutoka mbinguni na unamwakilisha Yesu, basi vile vile utakubaliana nami kuwa Umande unawakilisha uwepo wa Roho Mtakatifu, Hakuna Baraka kubwa kwa kanisa kama kuwa na Roho Mtakatifu, yeye analeta wakati wa kuburudishwa na kuondoa kila aina ya hali ya ukavu wa kiroho, katika kanisa na kutuletea uamsho na wakati mzuri wa kufanya naye kazi, bila kupigwa na jua, sasa kwa mujibu wa Daudi kama watu wanataka kuburudishwa na kufurahia Baraka za Mungu siri imejificha katika wema wa kukaa kwa umoja, na hii ndio kanuni muhimu ya kanisa kuwa na uamsho, na zaidi ya yote kama ulijifunza kuwa katika alama za Roho Mtakatifu ni pamoja na njiwa, moto, maji, mafuta, wingu, kisima, mito ya maji, na upepo, leo nakuongezea na UMANDE. 

Kama umande wa Hermoni.

Zaburi 133:1-3 “Tazama, jinsi ilivyo vema, na kupendeza, Ndugu wakae pamoja, kwa umoja. Ni kama mafuta mazuri kichwani, Yashukayo ndevuni, ndevu za Haruni, Yashukayo mpaka upindo wa mavazi yake. KAMA UMANDE WA HERMONI ushukao milimani pa Sayuni. Maana ndiko Bwana alikoamuru baraka, Naam, uzima hata milele.”

Kwa nini kama umande wa Hermoni? Mlima Mlima Hermoni ni Moja ya safu za milima yenye urefu wa maili 30, na upana wa maili 15 urefu wake kwenda juu ni futi zaidi ya 9000 kutoka usawa wa bahari, safu hii ya milima imefunikwa na theluji kama unavyoweza kuona pichani, Milima hii iko kaskazini mashariki mwa Israel katika mpaka wa Syria na Lebanon Mlima huu una utajiri mkubwa sana wa kusababisha mvua, lakini pia una chemichemi za maji na zaidi ya yote ni chanzo kikuu cha mto Yordani, lakini mlima huu pia husababisha umande katika Sayuni au Israel kwa hiyo Daudi anauona mlima huu kama chanzo cha Baraka kubwa sana kwa Israel, Daudi anaona kuwa watu wakikaa kwa umoja Mungu huachilia Baraka zake na ustawi sawa na mlima huu unavyotumiwa na Mungu kuwa chanzo kikubwa cha mafanikio ya kilimo kwa Israel, Ni katika mlima huu pia ndiko inakohisiwa kuwa Yesu alipanda na wanafunzi wake na kugeuka sura yake MLIMA MREFU FARAGHANI

Mathayo 17:1-8 “Na baada ya siku sita Yesu akawatwaa Petro, na Yakobo, na Yohana nduguye, akawaleta juu ya mlima mrefu faraghani; akageuka sura yake mbele yao; uso wake ukang'aa kama jua, mavazi yake yakawa meupe kama nuru. Na tazama, wakatokewa na Musa na Eliya, wakizungumza naye. Petro akajibu akamwambia Yesu, Bwana, ni vizuri sisi kuwapo hapa; ukitaka, nitafanya hapa vibanda vitatu, kimoja chako wewe, na kimoja cha Musa, na kimoja cha Eliya. Alipokuwa katika kusema, tazama, wingu jeupe likawatia uvuli; na tazama, sauti ikatoka katika lile wingu, ikasema, Huyu ni Mwanangu, mpendwa wangu, ninayependezwa naye; msikieni yeye. Na wale wanafunzi waliposikia, walianguka kifulifuli, wakaogopa sana.”

2Petro 1:16-18 “Maana hatukufuata hadithi zilizotungwa kwa werevu, tulipowajulisha ninyi nguvu zake Bwana wetu Yesu Kristo na kuja kwake; bali tulikuwa tumeuona wenyewe ukuu wake. Maana alipata kwa Mungu Baba heshima na utukufu, hapo alipoletewa sauti iliyotoka katika utukufu mkuu, Huyu ni Mwanangu, mpendwa wangu, ninayependezwa naye. Na sauti hiyo sisi tuliisikia ikitoka mbinguni tulipokuwa pamoja naye katika mlima ule mtakatifu.” 

Kwa ujumla Ustawi mzima wa Israel unategemea sana mlima wa Hermoni, na ndio maana Daudi anasema huko ndiko Mungu alikoziamuru Baraka, na kwanini anasema hivyo kwa sababu umande pia katika Israel unaungamanishwa na baraka, hakuna mahali popote pale katika Biblia mtu alibarikiwa kisha neno UMANDE lisitajwe, wakati wote wazee katika Biblia walipotamka baraka walimtamkia mtu kuwa na UMANDE kama neema na baraka kubwa sana kutoka mbinguni kwa hiyo kutamkiwa ya UMANDE katika maisha ya mwanadamu ni ishara ya Baraka ona:-

Mwanzo 27:27-29 “Akakaribia akambusu. Naye akasikia harufu ya mavazi yake, akambariki akasema, Tazama, harufu ya mwanangu Ni kama harufu ya shamba alilolibariki BWANA. MUNGU NA AKUPE YA UMANDE WA MBINGU, Na ya manono ya nchi, Na wingi wa nafaka na mvinyo. Mataifa na wakutumikie Na makabila wakusujudie, Uwe bwana wa ndugu zako, Na wana wa mama yako na wakusujudie. Atakayekulaani alaaniwe, Na atakayekubariki abarikiwe.” 

Mwanzo 27:39 “Esau akamwambia babaye, Una mbaraka mmoja tu, babangu? Unibariki mimi, mimi nami, Ee babangu. Esau akapaza sauti yake, akalia. Isaka, baba yake, akajibu, akamwambia, Angalia, penye manono ya nchi patakuwa makao yako, NA PENYE UMANDE WA MBINGU UNAOTOKA JUU.”

Kumbukumbu 33:13-15 “Na Yusufu akamnena, Nchi yake na ibarikiwe na Bwana; Kwa vitu vya thamani vya mbinguni, KWA HUO UMANDE, Na kwa kilindi kilalacho chini, Na kwa vitu vilivyo bora vya matunda ya jua, Na kwa vitu vilivyo bora vya maongeo ya miezi, Na kwa vitu viteule vya milima ya kale, Na kwa vitu vilivyo bora vya vilima vya milele,”

Mika 5:7-9 “Na hayo mabaki ya Yakobo yatakuwa kati ya kabila nyingi MFANO WA UMANDE UTOKAO KWA BWANA, mfano wa manyunyu katika manyasi; yasiyomngojea mtu, wala kuwakawilia wanadamu.Na hayo mabaki ya Yakobo yatakuwa kati ya mataifa, kati ya kabila nyingi, mfano wa simba kati ya wanyama wa msituni, kama mwana-simba kati ya makundi ya kondoo, ambaye, akiwa anapita katikati, hukanyaga-kanyaga na kurarua-rarua, wala hakuna wa kuokoa.Mkono wako na uinuliwe juu ya adui zako, na adui zako wote wakauliwe mbali.” 

Ayubu 29:19-20 “Shina langu limeenea hata kufika majini, NA UMANDE hukaa usiku kucha katika matawi yangu; Utukufu wangu utakuwa mpya kwangu, Na uta wangu hurejezwa upya mkononi mwangu.”

Unaona? Kwa hiyo Umande ni alama ya Baraka, umande ni alama ya ustawi, umande ni alama ya kuburudishwa, umande ni alama ya Roho Mtakatifu na matunda yake, Baraka hizi tunaweza kuziona kwa sharti la kukaa pamoja na kwa umoja, hatuwezi kukaa pamoja na kwa umoja kama hakuna msamaha, kama hakuna umoja, kama hakuna upendo, kama hakuna amani, kama hakuna furaha, kama hakuna kiasi, kama hakuna adabu, kama hakuna uvumilivu, kama hakuna kutokuhesabu mabaya, kama hakuna kuchukuliana, kama hakuna kujaliana, kama hakuna kula pamoja, kama hakuna ushirikiano, kama kuna ubinafsi, kama kuna mimi kwanza, kama kuna kujiona bora, kama kuna kusengenyana, kama kuna kuchafuana, kama kuna kuchokana, kama hakuna fadhili, kama kuna husuda, kama kuna kujivuna, kama kuna kiburi, kama kuna uchungu, kama kuna udhalimu, kama hakuna ukweli, kama kuna fitina, kama kuna majungu, kama kuna wivu, kama kuna uadui, kama kuna uzushi, kama kuna husuda, kama kuna kurogana na kuharibiana, kama kuna mashindano, Mungu hataweza kuamuru Baraka zake kuja kwetu kama hatuna ukomavu wa kutosha na kufikia hatua ya kuchukuliana unataka Baraka za Mungu zije kwako kumbuka, unataka Mungu aziamuru Baraka kumbuka kumbuka, katika Taifa, katika Kanisa, katika ndoa, katika taasisi, katika mashirika, katika kampuni, katika biashara, kote tutaziona Baraka za Mungu ikiwa tu tutakaa kwa umoja, Mungu ataachilia upako wake kwa kila kiungo katika mwili wa Kristo na ataachilia Baraka zake kama umande wa Hermoni katika maisha yetu yote   

Jinsi ya kufunikwa na umande.

Mtafute Mungu kwanza – Kama hauna uhusiano mzuri na Mungu hakikisha kuwa unautafuta kwanza uso wake, unatafuta kuwa na uhusiano mzuri na Mungu, yeye ndiye chanzo cha Baraka zote yaani UMANDE endapo utautafuta uso wake hakuna kitu ambacho Mungu atakunyima kwa sababu Mungu amekusudia kumbariki kila mmoja 

Mathayo 6:31-33 “Msisumbuke, basi, mkisema, Tule nini? Au Tunywe nini? Au Tuvae nini? Kwa maana hayo yote Mataifa huyatafuta; kwa sababu Baba yenu wa mbinguni anajua ya kuwa mnahitaji hayo yote. Bali utafuteni kwanza ufalme wake, na haki yake; na hayo yote mtazidishiwa.”

Mwabudu yeye – Ulimwengu wa roho unaachilia vitu kwa ibada ukimuabudu shetani atakupa heshima, mali na utajiri wa dunia lakini nafsi yako itaangamia, lakini ukimtumikia Mungu na kumtii hiyo ndiyo ibada ataziachilia Baraka zake na zitakupata 

Mathayo 4:8-10 “Kisha Ibilisi akamchukua mpaka mlima mrefu mno, akamwonyesha milki zote za ulimwengu, na fahari yake, akamwambia, Haya yote nitakupa, ukianguka kunisujudia. Ndipo Yesu alipomwambia, Nenda zako, Shetani; kwa maana imeandikwa, Msujudie Bwana Mungu wako, umwabudu yeye peke yake.”

Kumbukumbu 28:1-8 “Itakuwa utakaposikia sauti ya Bwana, Mungu wako, kwa bidii, kutunza kuyafanya maagizo yake yote nikuagizayo leo, ndipo Bwana, Mungu wako, atakapokutukuza juu ya mataifa yote ya duniani; na baraka hizi zote zitakujilia na kukupata usikiapo sauti ya Bwana, Mungu wako. Utabarikiwa mjini, utabarikiwa na mashambani. Utabarikiwa uzao wa tumbo lako, na uzao wa nchi yako, na uzao wa wanyama wako wa mifugo, maongeo ya ng'ombe wako, na wadogo wa kondoo zako. Litabarikiwa kapu lako, na chombo chako cha kukandia unga. Utabarikiwa uingiapo, utabarikiwa na utokapo. Bwana atawafanya adui zako wainukao juu yako kupigwa mbele yako; watakutokea kwa njia moja, lakini watakimbia mbele yako kwa njia saba. Bwana ataiamuru baraka ije juu yako katika ghala zako, na mambo yote utakayotia mkono wako; naye atakubarikia katika nchi akupayo Bwana, Mungu wako.”  

Kuwa na Amani na watu wote – Uhusiano wetu hauwezi kuwa kamili kama tutakuwa na madai kuwa tunampenda Mungu huku hatuwajali wengine, huna Amani na watu wengine maana yake hakuna umoja, Mungu hawezi kuachilia Baraka zake kwa watu wenye mafarakano, ndio maana moja ya silaha kubwa anayoitumia shetani katika kanisa, taifa, familia, taasisi na kdhalika ni pamoja na kuondoa umoja. Kwa kuvuruga Amani.

Waebrania 12:14 “Tafuteni kwa bidii kuwa na amani na watu wote, na huo utakatifu, ambao hapana mtu atakayemwona Bwana asipokuwa nao;”

Acha kuwa mwilini - Acha ukristo wa mwilini, jikaze, onyesha ukomavu, jionyeshe kuwa mwanaume, onyesha kukua, uwe na uwezo wa kusamehe na kuachilia, wewe kila siku una yale yale tu, fungua moyo wako kubali kukua kiroho, usiweke mtu moyoni, usimchafue nduguyo, kuwa na amani na watu wote maana yake hata wale waliokukosea, wakati mwingine usisubiri waje kukuomba msamaha wewe achilia au nenda kaombe Amani usijifungie kwenye gereza la kukosa mafanikio utajichelewesha

 

1Wafalme 2:1-3 “Basi siku ya kufa kwake Daudi ikakaribia, akamwusia Sulemani mwanawe, akasema, Mimi naenda njia ya ulimwengu wote; basi uwe hodari, ujionyeshe kuwa mwanamume; uyashike mausia ya Bwana, Mungu wako, uende katika njia zake, uzishike sheria zake, na amri zake, na hukumu zake, na shuhuda zake, sawasawa na ilivyoandikwa katika torati ya Musa, upate kufanikiwa katika kila ufanyalo, na kila utazamako;”

1Wakorintho 3:1-3 “Lakini, ndugu zangu, mimi sikuweza kusema nanyi kama na watu wenye tabia ya rohoni, bali kama na watu wenye tabia ya mwilini, kama na watoto wachanga katika Kristo.Naliwanywesha maziwa sikuwalisha chakula; kwa kuwa mlikuwa hamjakiweza. Naam, hata sasa hamkiwezi,kwa maana hata sasa ninyi ni watu wa tabia ya mwilini. Maana, ikiwa kwenu kuna husuda na fitina, je! Si watu wa tabia ya mwilini ninyi; tena mnaenenda kwa jinsi ya kibinadamu?”  

  

Acha uchoyo uwe mtoaji – Neno la Mungu limesema ni heri kutoa kuliko kupokea, wewe hutoi, umekuwa mchoyo kila kitu kizuri unajilimbikizia na kutaka kiwe chako, unataka Baraka za Mungu ili iweje? Ili uringishie watu? Ili uwakanyage watu kichwani? Ili uwe na mamalaka juu ya watu? Mungu amekusudia kutubariki ili tuwe baraka Kwa wengine.

Matendo 20:33-35 “Sikutamani fedha wala dhahabu, wala mavazi ya mtu. Ninyi wenyewe mnajua ya kuwa mikono yangu hii imetumika kwa mahitaji yangu na ya wale waliokuwa pamoja nami.Katika mambo yote nimewaonyesha ya kuwa kwa kushika kazi hivi imewapasa kuwasaidia wanyonge, na kuyakumbuka maneno ya Bwana Yesu, jinsi alivyosema mwenyewe, Ni heri kutoa kuliko kupokea.” 

Tumejifunza kuwa UMANDE unawakilisha Baraka za Mungu na baraka hizi za Mungu ni pamoja na uwepo wake na upako wa Roho Mtakatifu, lakini ili tuweze kufunikwa na baraka hizo ni lazima tuyatende mambo yale yote ambayo katika jamii yanatufanya tuwe na umoja na amani na kuacha yale yote yanayotufarakanisha tukiwa na umoja katika jambo lolote lile tutafanikiwa, kwa umri wangu huu nimeona taasisi zikifa, zikiharibika, na kudumaa kwa sababu tu watu walitanguliza maslahi yao mbele na wakaacha kuwajali wengine na wakavuruga umoja na kuondoa Amani na matokeo yake ikawa ni ukiwa, Mungu anapoona ya kuwa hatumjali yeye wala hatutendeani kwa hisani basi, atamtuma nabii wake ambaye atatangaza kuwa hapatakuwa na mvua wala umande………  

Na. Mchungaji Innocent Kamote

Mkuu wa wajenzi mwenye Hekima.

Mungu ajibuye kwa Moto!

1Wafalme 18:20-24 “Basi, Ahabu akapeleka watu kwa wana wa Israeli wote, akawakusanya manabii pamoja katika mlima wa Karmeli. Naye Eliya akawakaribia watu wote, akanena, Mtasita-sita katikati ya mawazo mawili hata lini? Bwana akiwa ndiye Mungu, mfuateni; bali ikiwa Baali ni Mungu, haya! Mfuateni yeye. Wale watu hawakumjibu neno. Ndipo Eliya akawaambia watu, Mimi nimesalia, mimi peke yangu, nabii wa Bwana; lakini manabii wa Baali ni watu mia nne na hamsini. Kwa hiyo na watutolee ng'ombe wawili; wao na wajichagulie ng'ombe mmoja, wamkate-kate na kumweka juu ya kuni, wasitie moto chini; nami nitamtengeza huyo ng'ombe wa pili, na kumweka juu ya kuni, wala sitatia moto chini. Nanyi ombeni kwa jina la mungu wenu, nami nitaomba kwa jina la Bwana; na Mungu yule ajibuye kwa moto, na awe ndiye Mungu. Watu wote wakajibu wakasema, Maneno haya ni mazuri.”

Utangulizi:

Ni muhimu kufahamu kuwa mojawapo ya njia ya kupambana na manabii wa uongo, sio tu kuwajibu kwa mafundisho peke yake, lakini ni pamoja na ishara na miujiza inayoambatana na utendaji wa Roho Mtakatifu, katika maisha ya watumishi na Kanisa kwa ujumla. Wakati mwingine ili Mungu wa kweli apate kujulikana ni lazima ishara mashuhuri zifanyike, ili watu wapate kuamini kuwa Mungu ni mwenye nguvu, Ishara na miujiza ni ya Muhimu sana katika kuthibitisha uweza na nguvu za Mungu.

Kutoka 7:10-12 “Basi Musa na Haruni wakaingia kwa Farao, wakafanya vivyo kama BWANA alivyowaambia; Haruni akaibwaga fimbo yake chini mbele ya Farao, mbele ya watumishi wake, ikawa nyoka. Ndipo Farao naye akawaita wenye akili na wachawi; na hao waganga wa Misri wakafanya vivyo kwa uganga wao. Wakabwaga chini kila mtu fimbo yake, nazo zikawa nyoka; lakini fimbo ya Haruni ikazimeza fimbo zao.”

Mungu amewapa watumishi wake Ishara na miujiza kwa uweza wa Roho wake Mtakatifu kwaajili ya kusaidia watu lakini wakati mwingine kama ishara kwa wasioamini wapate kuamini na kuondoka katika hali ya mashaka na kusita sita, Wakati wa Nabii Eliya jamii kubwa ya wana wa Israel walikuwa wamepoteza njia sahihi ya kumuabudu Mungu na wengi walikuwa wamegeukia miungu mingine wakiabudu miungu ya kikanaani akiwemo Baali, kwa hiyo ulifikia wakati wakaanza kuchanganya ibada za Mungu wa kweli na ibada za Baali, kimsingi walikuwa ni watu wenye kusitasita katika mawazo mawili. Eliya akilielewa hili huku moyoni mwake akiwa na agizo la kuirejesha mioyo ya wana wa Israel katika ibada ya Mungu wa kweli yeye alitoa wazo, ambalo liliungwa mkono na manabii wa Baali na watu wote kwamba ufikie wakati sasa Mungu yule atakayejibu kwa Moto huyo awe ndiye Mungu wa kufuatwa na kuabudiwa. Tutajifunza somo hili kwa kuzingatia vipengele vitatu vifuatavyo:-

Mtasita-sita katikati ya mawazo mawili hata lini?

Mungu yule ajibuye kwa moto

Mwisho wa Manabii wa uongo

Mtasita-sita katikati ya mawazo mawili hata lini?

Moja ya mambo ambayo yanamuudhi sana Mungu ni pamoja na kuwa na mtu au watu wenye kusitasita, Mungu anavutiwa sana na mtu au watu wanaofanya maamuzi, Mara kwa mara Mungu kupitia watumishi wake kadhaa amewahi kuwapa changamoto wanadamu kufanya maamuzi ya kuchagua, kila siku katika maisha yetu tunaweza au tumepewa kuchagua, unaweza kuchagua uzima au mauti, unaweza kuchagua laana au baraka, unaweza kuchagua Mungu au miungu, unaweza kuchagua kuwa moto au baridi, Kuchagua upande mmoja ndio njia sahihi, na kusisita katika mawazo mawili sio sahihi na ni jambo ambalo linamchukiza sana Mungu na kumnyima furaha.

Kumbukumbu 30:15-16. “Angalia, nimekuwekea leo mbele yako uzima na mema, na mauti na mabaya; kwa hivi nikuagizavyo leo kumpenda Bwana, Mungu wako, kuenenda katika njia zake, na kushika maagizo yake, na amri zake, na hukumu zake, upate kuwa hai na kuongezeka; Bwana, Mungu wako, apate kukubarikia katika nchi uingiayo kuimiliki.”

Kumbukumbu 11:26-28 “Angalieni, nawawekea mbele yenu hivi leo baraka na laana;baraka ni hapo mtakapoyasikiza maagizo ya Bwana, Mungu wenu, niwaagizayo leo; na laana ni hapo msiposikiza maagizo ya Bwana, Mungu wenu, mkikengeuka katika njia niwaagizayo leo, kwa kuandama miungu mingine msiyoijua.”

Yoshua 24:14-15 “Basi sasa mcheni Bwana, mkamtumikie kwa unyofu wa moyo na kwa kweli; na kuiweka mbali miungu ambayo baba zenu waliitumikia ng'ambo ya Mto, na huko Misri; mkamtumikie yeye Bwana.Nanyi kama mkiona ni vibaya kumtumikia Bwana, chagueni hivi leo mtakayemtumikia; kwamba ni miungu ile ambayo baba zenu waliitumikia ng'ambo ya Mto, au kwamba ni miungu ya wale Waamori ambao mnakaa katika nchi yao; lakini mimi na nyumba yangu tutamtumikia Bwana.” 

Ufunuo 3:15-16 “Nayajua matendo yako, ya kuwa hu baridi wala hu moto; ingekuwa heri kama ungekuwa baridi au moto. Basi, kwa sababu una uvuguvugu, wala hu baridi wala moto, nitakutapika utoke katika kinywa changu.” 

Waebrania 10:38 “Lakini mwenye haki wangu ataishi kwa imani; Naye akisita-sita, roho yangu haina furaha naye.”

Maisha yetu ni uchaguzi, Maandiko yanashauri tumchague Mungu lakini tusibaki katikati, kumchagua Mungu ni Baraka kubwa sana na kuacha kumchagua Mungu ni laana, Mungu hapandezwi wala havutiwi na watu wanaositasita, wala havutiwi na watu vuguvugu, Mungu anataka tuwe moto na tumchague yeye kumchagua yeye ni kuchagua mafanikio, tatizo lililoko leo halina tofauti na tatizo lililokuweko wakati wa Eliya, jamii ya watu katika Israel walikuwa wanasitasita, walikuwa vugu vugu, walikuwa wakichanganya ibada ya Mungu mwenyezi na miungu ya Kanaani ya Baali, Eliya alitokea kama nabii aliyesalia peke yake na wengi walikuwa wakimuabudu Baali, akaamua kuweka changamoto ya kitaifa, kuanzia na mfalme kwamba watu wote wafanye uamuzi na Mungu halisi wa kweli ajulikane kuwa Mungu ili afuatwe, Eliya alikuja sio tu na swali lakini alikuja na suluhu ya changamoto iliyokuwa inawakabili watu, Eliya alisema

 “manabii wa Baali ni watu mia nne na hamsini. Kwa hiyo na watutolee ng'ombe wawili; wao na wajichagulie ng'ombe mmoja, wamkate-kate na kumweka juu ya kuni, wasitie moto chini; nami nitamtengeza huyo ng'ombe wa pili, na kumweka juu ya kuni, wala sitatia moto chini” 

katika mjadala huu na hoja hii Eliya aliwapa changamoto kuwa moto utoke kwa Mungu, kama manabii wa baali wana mungu kwa kweli basi sadaka yao itatiwa moto na Baali na kama Mungu anayewakilishwa na Eliya ni wa kweli basi sadaka yake itatiwa moto na Mungu mwenyezi na wazo hilo lilikuwa jema na lilikubalika ili kuumaliza utata.

1Wafalme 18:20-24 “Basi, Ahabu akapeleka watu kwa wana wa Israeli wote, akawakusanya manabii pamoja katika mlima wa Karmeli. Naye Eliya akawakaribia watu wote, akanena, Mtasita-sita katikati ya mawazo mawili hata lini? Bwana akiwa ndiye Mungu, mfuateni; bali ikiwa Baali ni Mungu, haya! Mfuateni yeye. Wale watu hawakumjibu neno. Ndipo Eliya akawaambia watu, Mimi nimesalia, mimi peke yangu, nabii wa Bwana; lakini manabii wa Baali ni watu mia nne na hamsini. Kwa hiyo na watutolee ng'ombe wawili; wao na wajichagulie ng'ombe mmoja, wamkate-kate na kumweka juu ya kuni, wasitie moto chini; nami nitamtengeza huyo ng'ombe wa pili, na kumweka juu ya kuni, wala sitatia moto chini. Nanyi ombeni kwa jina la mungu wenu, nami nitaomba kwa jina la Bwana; na Mungu yule ajibuye kwa moto, na awe ndiye Mungu. Watu wote wakajibu wakasema, Maneno haya ni mazuri.”

Mungu yule ajibuye kwa moto

Eliya alikuwa anajua kwamba ili kumaliza utata kuna umuhimu wa kufanya ishara mashuhuri, Na muujiza huu ambao ulifanyika kando ya mlima Karmel ulikuwa ni wa muhimu sana na umeweka alama ya kipekee katika historia ya Israel, kutokana na umashuhuri wake, Karmel kwa kiebrania (ho Kármelos maana yake ni bustani ya matunda hata hivyo kutokana na ishara kubwa na muujiza uliofanyioka hapo watu wengi sana hupaita mahali hapo Mlima wa Moto) Ishara mashuhuri inapofanyika huwanyima maadui uwezo wa kujibu hoja na kukosa mashiko ya kile wanachokisimamia, Ishara mashuhuri ni lile tukio ambalo Mungu hulifanya na macho ya watu wote wakishuhudia kwa macho ya nyama yaani sio kwa kutilia shaka, Mfano Yesu alipomfufua Lazaro, ambaye alikuwa amezikwa siku nne na taarifa zake zilijulikana sana, au mfano wa Mlemavu ambaye Petro na Yohana walimsaidia kwenye mlango mzuri ambaye alikuwa anajulikana na jamii nzima kuwa anaomba omba, watu wale ambao dunia inawajua, mji unajua, nchi inajua na taifa linajua na maadui wa Mungu hawawezi kuikana ishara hiyo hiyo huitwa ishara mashuhuri, hiki ndicho ambacho Eliya alikuwa amekikusudia kifanyike ili dunia yote na taifa zima liweze kukubali na kuamini ya kwamba Adonai ndiye Mungu wa kweli ilikuwa ni lazia lifanyike tukio ambalo sio la kawaida.

Matendo 4:15-16 “Wakawaamuru kutoka katika baraza, wakafanya shauri wao kwa wao, wakisema, Tuwafanyie nini watu hawa? Maana ni dhahiri kwa watu wote wakaao Yerusalemu ya kwamba ishara mashuhuri imefanywa nao, wala hatuwezi kuikana.” 

Jamii nzima ilikubaliana na tukio hilo na manabii wa Baali walikuwa wakwanza kuomba nadhani ilikuwa asubuhi kuanzia mida ya saa tatu mpaka jioni kwenye saa tisa, na kisha saa tisa Eliya alichukua nafasi naye na kuomba na hivi ndivyo mambo yalivyokuwa:-

1Wafalme 18:25-39 “Eliya akawaambia manabii wa Baali, Jichagulieni ng'ombe mmoja, mkamtengeze kwanza; maana ninyi ndio wengi; mkaliitie jina la mungu wenu, wala msitie moto chini. Wakamtwaa yule ng'ombe waliyepewa, wakamtengeza, wakaliitia jina la Baali tangu asubuhi hata adhuhuri, wakisema, Ee Baali, utusikie. Lakini hapakuwa na sauti, wala aliyejibu. Nao wakaruka-ruka juu ya madhabahu waliyoifanya. Ikawa, wakati wa adhuhuri, Eliya akawafanyia dhihaka, akasema, Mwiteni kwa sauti kuu; maana ni mungu huyo; labda anazungumza, au ana shughuli, au anasafiri, au labda amelala, sharti aamshwe. Wakapiga kelele, wakajikata-kata kwa visu na vyembe kama ilivyo desturi yao, hata damu ikawachuruzika. Ikawa, wakati wa adhuhuri ulipopita, walitabiri hata wakati wa kutoa dhabihu ya jioni; lakini hapakuwa na sauti, wala aliyejibu, wala aliyeangalia. Kisha Eliya akawaambia watu wote, Nikaribieni mimi. Watu wote wakamkaribia. Akaitengeneza madhabahu ya Bwana iliyovunjika. Eliya akatwaa mawe kumi na mawili, kwa hesabu ya kabila za wana wa Yakobo, aliyejiliwa na neno la Bwana na kuambiwa, Jina lako litakuwa Israeli. Naye akaijenga madhabahu kwa mawe hayo katika jina la Bwana; akafanya mfereji, kama wa vipimo viwili vya mbegu, ukiizunguka madhabahu. Kisha akazipanga zile kuni, akamkata yule ng'ombe vipande vipande, akaviweka juu ya kuni. Akasema, Jazeni mapipa manne maji, mkayamwage juu ya sadaka ya kuteketezwa, na juu ya kuni. Akasema, Fanyeni mara ya pili. Wakafanya mara ya pili. Akasema, Fanyeni mara ya tatu. Wakafanya mara ya tatu. Yale maji yakaizunguka madhabahu; akaujaza mfereji maji. Ikawa, wakati wa kutoa dhabihu ya jioni, Eliya nabii akakaribia, akasema, Ee Bwana, Mungu wa Ibrahimu, na wa Isaka, na wa Israeli, na ijulikane leo ya kuwa wewe ndiwe Mungu katika Israeli, na ya kuwa mimi ni mtumishi wako, na ya kuwa nimefanya mambo haya yote kwa neno lako. Unisikie, Ee Bwana, unisikie, ili watu hawa wajue ya kuwa wewe, Bwana, ndiwe Mungu, na ya kuwa wewe umewageuza moyo wakurudie. Ndipo moto wa Bwana ukashuka, ukaiteketeza sadaka ya kuteketezwa, na kuni, na mawe, na mavumbi, ukayaramba yale maji yaliyokuwamo katika mfereji. Na watu wote walipoona, wakaanguka kifudifudi; wakasema, Bwana ndiye Mungu, Bwana ndiye Mungu.”

Unaona? Eliya hakufanya mambo haya kwa nafsi yake tu alikuwa amepokea maelekezo kutoka kwa Bwana anasema na yakuwa nimefanya haya kwa neno lako, alikuwa ameutafuta uso wa Mungu kwa kiwango cha kutosha ili Mungu aweze kuthibitika na sio Mungu tu na nabii wa kweli aweze kuthibitika, Mungu anapojibu kwa Moto utendaji wake huonekana kwa Dhahiri na hiki ndicho kilichotokea watu wote walijua kuwa Mungu wa Ibrahimu, na Isaka na Yakobo kuwa ni Mungu wa kweli, na hapo ndipo Eliya na watu wote walipokuwa na nguvu dhidi ya manabii wa uongo, kanisa la Mungu leo tutaweza kuwashinda manabii wa uongo ikiwa tu miujiza yetu, itazidi yao, Imani yetu itazidi yao, makusanyiko yetu yatazidi yao, watu wenye changamoto mbalimbali duniani watatujia na kuhitaji msaada kutoka kwetu, hakuna siasa kwa Mungu, Mungu wa kweli atadhihirika na mashaka ya watu yataondoka ikiwa tu tutakuwa na uwezo wa kujibu changamoto zinazowakabili watu, hatuwezi kamwe kumtanganza Mungu kwa ujasiri endapo Mungu wetu hawezi kuwasaidia watu hata ugonjwa wa mafua tu, Umefika wakati tumtafute Bwana, tumtake Bwana na nguvu zake ili Mungu wetu aweze kudhihirika wazi wazi kwa wale wasioamini na wale wanaotupinga hivi ndivyo Eliya alivyoibuka mbabe mbele ya wale waliokuwa wanampinga yaani Mungu wake kuonyesha uwezo wa kujibu kwa moto na hii ndio tofauti ya Mungu aliye hai na mungu aliyekufa.

Mwisho wa Manabii wa uongo

Jambo kubwa la msingi lililotokea ni kuwa manabii wa uongo walipoteza washirika wao kwani watu wote baada ya tukio hilo walimrudia Mungu, Walitambua kuwa Mungu wa Ibrahimu, na Isaka na Yakobo, Mungu wa Eliya ni Mungu wa kweli na walitubu wakitambua ya kuwa wamefanya dhambi kwa kuabudu miungu mingine 

1Wafalme 18:39 “Na watu wote walipoona, wakaanguka kifudifudi; wakasema, Bwana ndiye Mungu, Bwana ndiye Mungu.”

Ni lazima watu wote duniani wamjue Mungu wa kweli, zimekuweko falsafa nyingi duniani na dini nyingi lakini watu wengi hawamjui Mungu wa kweli, sisi kama Eliya Leo hatuna budi kuitangazia jamii kuwa Yesu Kristo ndiye njia na kweli na uzima, Yeye ni ishara mashuri kwani amefufuka yu hai na ameketi mkono wa kuume wa Mungu baba Mwenyezi, watu wote wanapaswa kutambua hilo na kuacha mashaka na kusita sita wote wanapaswa kumchagua Mungu aliye hai na wa kweli kwa hiyo ni muhimu kwetu kufanya uamuzi leo, na kumkubali Yesu kuwa Bwana na mwokozi wa maisha yetu, watu wote wanapaswa kujua kuwa duniani kuna watu wengi wanaabudu, wengine mpaka wanajikata kata na kujitoa dhabihu, lakini hii haimaanishi kuwa jitihada zao za kidini na kiimani walizonazo kwamba zinaweza kuwaokoa au kana kwamba wako sahihi, wakati umefika na saa ipo ambayo waabuduo halisi watamuabudu Mungu katika Roho na kweli, na wakati huo ni sasa, ni lazima jamii itambue kuwa kubudu kusiko sahihi kuna matokeo yasiyo sahihi na moja ya matukio hayo ni kutupwa katika ziwa liwakalo Moto, Mungu sio tu awawahukumu manabii wa uongo lakini pia ataihukumu miungu kwa sababu imeiba utukufu wake kwa muda mrefu na kwa miaka Mingi,  na kuwapotosha wanadamu. Jamii ya watu wa wakati wa Eliya walirudisha utukufu kwa Mungu wakisema Bwana ndiye Mungu, Bwana ndiye Mungu, Navutiwa na maneno hayo ninapoyasoma katika Biblia ya kingereza iitwayo Complete Jewish Bible “CJB” inasoma hivi 

“When all people saw it, they fell on their faces and said, ADONAI is God! ADONAI is God."

Watu walisujudu na kukubali kuwa Mungu ndiye Bwana Mungu ndiye Bwana, watu walirudisha utii kwa Mungu na huo ndio ukawa mwisho wa manabii wa uongo, hatuwezi kuwaua leo manabii wa uwongo, lakini nyakati za agano la kale watu makafiri waliuawa hivyo Eliya aliamuru manabii wa baali wakamatwe na wakachinjwa, sisi namna yetu ya kuwachinja ni kumuhubiri Mungu wa kweli na kufanya miujiza na ishara za kweli kwa jina la Yesu Kristo, kwa kusudi la kurejesha mioyo ya watu kwa Mungu wa kweli na kumpa yeye heshima na utukufu, huku wakitambua kuwa Yesu ndiye njia na kweli na uzima!

1Wafalme 18:40 “Eliya akawaambia, Wakamateni hao manabii wa Baali, asiokoke hata mmoja. Wakawakamata; na Eliya akawachukua mpaka kijito cha Kishoni, akawaua huko.”

Hitimisho 

Kumbuka kumtumikia Mungu wa kweli, kumbuka kumuabudu Mungu wa kweli na ondoka katika kusita sita, acha kupeleka ibada mahali kusiko sahihi, je umewahi kujiuliza kama unaabudu Mungu wa kweli? Kama uko kwenye Imani sahihi au la? Amua leo kabla ya hukumu 

“Mwenye haki ataishi kwa Imani akisitasita Roho yangu haina furaha naye asema Bwana”

Na. Rev. Innocent Samuel Kamote

Mkuu wa wajenzi mwenye Hekima.