UJUMBE: AGANO LA RANGI SABA!

Mstari wa Msingi Mwanzo 9: 12-17.

Utangulizi:

Rangi saba Kisayansi ni matokeo ya kuakisiwa kwa Mwanga wa jua katika matone ya maji ya mvua au mabaki ya matone ya maji ya mvua yaliyoko angani ambayo husababisha kuonekana kwa umbile la Duara lenye rangi saba maarufu kama Upinde wa Mvua, umbile hili hutoea wakati jua likiwa upande wa mashariki zaidi linapoelekea kutoka kuchomoza au upande wa magharibi zaidi linapoelekea kuzama “rainbow”

Kibiblia upinde wa mvua ni agano la Mungu alilolifanya Nuhu pamoja na wanadamu wote waliosalia juu ya uso wa nchi tangu baada ya gharika ya hasira za Mungu zilizoanguka juu ya uso wa nchi kwa sababu ya dhambi za wanadamu.

13-15 “Mimi nauweka upinde wangu winguni, nao utakuwa ni Ishara ya agano kati yangu na nchi, Hata itakuwa nikitanda mawinguni juu ya nchi, upinde utaonekana winguni nami nitalikumbuka agano langu, lililoko kati yangu na ninyi na kila kiumbe hai katika wote wenye mwili, wala maji hayatakuwa gharika tena kuwaharibu wote wenye mwili”

Angalia maneno hayo kwa makini! Angalia kwa makini sana! Tukiacha sababu za kisayansi Upinde wa mvua ni Ishara, ni ishara ya agano kati ya Mungu na wanadamu, Upinde ni wa Mungu, Pamoja na maelezo mazuri ya wanasayanzi Mungu ni zaidi ya wanasayansui Yeye ndiye anayeuweka upinde huo na autazamapo hukumbuka agano lake, ni Ishara ya uwepo wa Mungu mwenyewe angalia maneno yale Itakuwa NIKITANDA MAWINGUNI ni yeye ndiye anayeusababisha utokee na kutukumbusha na kujikumbusha “REHEMA ZAKE KWA WANADAMU MILELE” Hataruhusu tugharikishwe tena na maji! Hataruhusu Hasira yake iwahukumu wanadamu kila autazamapo upinde, Upinde huu ni agano la Milele sio kwa Nuhu na wanawe tu, bali na wanadamu wote tulioko leo ambao ni uzao wa Nuhu. Hivyo upinde wa Mvua ni alama muhimu ya milele iliyobaki inayoweza kuonekana kwa macho, ukiacha Nguzo ya wingu, iliyowaongoza Israel Jangwani.

Ni muhimu kufahamu je katika upinde huu wa mvua Mungu anatufundisha nini, ni muhimu kufahamu kuwa katika agano hili la upinde wa mvua ndani yake kuna rangi saba na rangi hizi ndio zinazoleta ujumbe muhimu kwa wanadamu

1.       Rangi nyekundu (Red)– Katika upinde wa mvua rangi hii huonekana kwa ukali zaidi kama rangi muhimu na iliyo juu ya nyingine, ni alama ya Damu, hakuna mtu anaweza kumfikia Mungu au kupokea rehema za Mungu, damu ndio njia pekee ya kumfikia Mungu,Israel walikombolewa kutoka Misri na kulindwa dhidi ya hukumu kwa tendo la Pasaka yaani walichinja kondoo kwa maelekezo ya Mungu na Damu yake ilitumika kupaka miimo ya malango, hivyo hasira ya Mungu haikuipiga nyumba zao badala yake walipata rehema (Kutoka 12:12-13) Kumbuka pia jinsi Rahabu kule Yeriko alivyookolewa na nyumba yake kwa kuweka alama ya kamba nyekundu Yoshua 2:18-21,  watu waliomwamini Kristo wamekombolewa kwa Damu ya thamani ya Mwana wa Mungu(1 Petro. 1:18-19)

    Tuionapo rangi nyekundu katika upinde wa mvua inatukumbusha kuwa hakuna pigo lolote la hukumu ya Mungu linaloweza kutupiga, na linamkumbusha Mungu ahadi hii na kuwa katika kuhukumu kwake atakumbuka Rehema, hili ni agano linalotuthibitishia kuwa sasa basi hakuna hukumu ya adhabu juu ya hao walio katika Kristo Yesu! Rangi nyekundu ikiwa juu yako, haijalishi historia yako ilikuwa ni ya namna gani Mungu anayo njia na ametupa njia ya kumkaribia yeye na kufaidi rehema zake hii ni damu ya Yesu inatukumbusha Rehema ni damu inayolia ili kwamba tusilipizwe kisasi bali tusamehewe, Rehema za Mungu zipo na zinapatikana kwa kazi aliyoifanya Yesu msalabani , tunaweza kumuendea yeye na kupata neema,

2.       Rangi ya Zambarau (Purple) -  Rangi hii Kihistoria na kibiblia ni rangi ya utawala au ufalme licha ya kuelezea Kuwa Yesu ni mfalme wa wafalme pia inaelezea kuwa sisi ni watawala au wafalme  (I Petro 2:9 ) Biblia inasema hivi “ Bali ninyi ni mzao mteule, ukuhani wa kifalme, taifa takatifu, watu wa milki ya Mungu, mliokuwa hamkupata rehema, bali sasa mmepata rehema. Biblia inaonyesha Jinsi ambavyo Mungu amaetufanya ukuhani wa kifalme watu wa milki yake waliopata rehema ujumbe huo uko katika rangi ya zambarau kila tuionapo katika upinde wa Mvua unatukumbusha mamlaka na utawala tuliopewa wanadamu dhidi ya ulimwengu na mazingira yake, Mungu anataka tuutawale ulimwengu na kumiliki kila kitu.

3.       Rangi ya Chungwa (Orange) – Rangi hii inazungumzia Maisha mapya, Mungu mwenye uwezo wa kufanya yote kuwa mapya kwa rehema zake, anasahau yote yaliyofanywa na wanadamu huko nyuma na sasa anaanza Historia mpya, sahahu uharibifu na maangamizi yote yaliyokupata huko nyuma, kamwe sio mpango wa Mungu kuhusu future yako MUngu anakusudia kuandika historia mpya wakati wote katika maisha yako, sahau historia ya kushindwa, ya kuharibikiwa, ya kuonewa, ya misiba, ya kutokufanikiwa liangalie agano lake hili jipya muamini Mungu kuwa ni wa mambo mapya na yakuwa anakwenda kuyafanya yoote kuwa mapya 2Wakoritho 5:16-19 Mungu kwa nafsi yake ametupatanisha naye.hata kama umekuwa na historia mbaya ya uovu Isaya 1:18 Mungu anakukaribisha useme naye apate kukusafisha, 1Yohana 1:9

4.       Rangi ya Kijani (Green) – Rangi hii inazungumzia Ustawi na faraja na amani Zaburi 23 inatuthibitishia kuwa Mungu ni Mchungaji mwena nayakuwa fadhili zake ni za Milele, Yeye ametupa namna tunavyoweza kustawi sana Yoshua 1:5-8 endapo tutaliangalia neno lake na kulitii tutastawi na kufanikiwa sana na Mungu mwenyewe atakuchunga, na penye majani mabichi atakulaza na kukufariji.

5.       Rangi ya Blue (Sky) – Rangi hii inazungumzia kuhusu ufamle wa Mbinguni au ufalme wa Mungu, inatushuhudia jinsi ambayo ufalme huu uko karibu na kuwa mwanadamu pasipo mbingu yaani Mungu hawezi kwa namna yoyote kustahimili Yohana 3:13 Yesu pekee aliyeshuka na kupaa tena mbinguni ndiye mwenye uwezo wa kuleta majibu yenye matumaini kwa wanadamu, zaidi ya yote Mungu kwa rehema zake anamkaribisha kila mtu katika ufalme wake na hatima yetu ni kuingia mbinguni

6.       Rangi ya Manjano (Yellow) – Ni rangi inayozungumzia Uhai, inawakilisha mwanga wa jua, inawakilisha nafaka na inawakilisha kiini cha yai, inazungumzia uhai wetu, licha ya kumtaja Yesu kama Nuru ya ulimwengu Yohana 8:12 jambo linalotuthibitishia kuwa hatutaingizwa gizani tena na kuwa uhai wetu umefichwa katika Mungu, hakuna mtu awezaye kuondoa ustawi wa uhai wetu bali Mungu mwenyewe nay a kuwa tukimuamini uhai wetu utaungwa naye milele na milele

7.       Rangi ya kioo au Maji (white) – Ni rangi ambayo ni ngumu zaidi kuiona katika upinde wa mvua, inazungumzia usafi wa Mungu na utakatifu wake na haki, Haki yetu mbele za Mungu hakuna mtu anaweza kuiona ni Mungu ndiye anayeweza kutuhesabia haki hiyo hakuna mwanadamu mwenye kuweza kuisimamia wala kujitia katika kiti cha hukumu ya Mungu na kutuhukumu isipokuwa Mungu mwenyewe, ni vizuri kila mwanadamu akajifunza kukaa kimya kuhusu maisha ya wengine, unapotaka kujihusisha na kufuatilia maisha yaw engine bila kujua wamesimamamje na Mungu unajiweka katika hatari Warumi 8:33-34 “Ni nani atakayewashitaki wateule wa Mungu? Mungu ndiye  mwenye kuwahesabia haki, Ni nani atakayewahukumia adhabu? Kristo ndiye aliyekufa, naam na zaidi ya hayo amefufuka katika wafu, naye yuko mkono wa kuume wa Mungu, tena ndiye anayetuombea” haya ni majibu mazuri kwa wale wenye tabia ya kutaka kujivika madaraka  ya kuhukumu wengine na kutoa adhabu, wakati aliyeteseka ni Yesu na mwenyewe Yuko mkono wa Kuume wa Mungu anatuombea.

Sifa za Upinde wa Mvua

1.       Hakuna mtu anaweza kuona mwanzo wala mwisho wa Upinde wa Mvua – Fadhili za Mungu hazina kikomo kamwe

2.       Hakuna mtu anayeweza kuuweka - Baraka za Mungu na neema yake ikiwekwa juu ya mtu imewekwa huwezi kubadilisha , Karama za Mungu hazina majuto wala mwisho wake

3.       Hakuna mtu anaweza kuumiliki – Hakuna dini inaweza kukiri kuwa alama ile ni ya kwao, Iliwekwa kabla ya dini, iko kwaaajili ya wanadamu wote imewekwa na Mungu, Yesu sio wa dini Fulani wala wa Mtu Fulani yeye yuko kwaaajili ya watu wote, hakuna mtu mwenye hati miliki ya kummiliki Yesu.

4.       Hakuna mtu anaweza kuuomba Upinde utokee ni wazo la Mungu, - Huwezi kushindana na kusudi la Mungu, Mungu anayo haki ya kubariki yeyote amtakaye, kumuhesabia haki, kumuokoa na hatuwezi kumpangia

5.       Kila mtu huuona hivyohivyo – na huwezi kuuondoa, Mungu ndiye anayeuweka na ni Mungu ndiye anayeuondoa, Kama chanzo cha Baraka za Mtu ni Mungu mwenyewe basi hakuna mtu anaweza kukuondolea, kila mmoja anaweza kumuona Mungu kubwa ni Baba yake kwa namna ileile,

6.       Upinde ni agano linalomweleza wazi Ibilisi kamwe asitegemeee kusikia tena hata milele hasira za Mungu zigimgharikisha mwanadamu, endapo yuko mtu anategemea kusikia habari zako mbaya tena, mwambie nina agano la rangi saba usitegemee kusikia mabaya toka kwangu.

Ujumbe na : Mkuu wa wajenzi mwenye Hekima

Rev. Innocent Kamote.

UJUMBE: NINA NINI NAWE, YESU, MWANA WA MUNGU ALIYE JUU?

ANDIKO LA MSINGI MARKO 5:1-20.

   Jacob Koshy alikulia katika mji mkuu wa Singapore akiwa na maono ya kuwa Dereva na kuwa na mafanikio makubwa sana katika maisha, alikuwa na ndoto za kupata fedha na kumiliki mali, Hata hivyo mpango wake huo ulimpelekea kujiunga na mtandao wa kimataifa wa kusambaza madawa ya kulevya Duniani, mwaka 1980 alikamatwa na seriakali na kuwekwa Gerezani.

    Alikata tamaa sana, alichoka kabisa, kwa vile ndoto zake, makusudi na mipango ya maisha aliyokuwa nayo iliharibika kabisa hakukuwa na tumaini tena na alivunjika moyo, alijiingiza katika uvutaji mkubwa wa sigara na tumbaku, hata ingawa havikuwa vinaruhusiwa huko Gerezani, alipopata tumbaku ili aweze kuivuta alitumia karatasi za Biblia ya GIDEON ili kusokotea tumbaku na kuvuta, siku moja alipitiwa na usingizi huku akiwa anavuta, aliposhituka aliona karatasi yote ya sigara imeungua na kimebaki kipande kidogo cha karatasi, alipoamua kukikunjua alikuta kimeandikwa “Saul Saul Mbona waniudhi?”  Jacob aliomba Biblia nyingine na kuisoma habari ya Saul kwa undani zaidi, kisha akajisemea Kama Yesu anaweza kubadili mwelekeo wa mtu katili namna hii, bila shaka anaweza kubadili mwelekeo wangu, aliamua kupiga magoti na kumkubali Yesu akiwa Gerezani, Maisha yake yalibadilika alikuwa ushuhuda kwa wafungwa wengine, alitolewa gerezani kutokana na badiliko kubwa, alijiunga na kanisa na kufanya kazi za kanisa alioa mke wa Kikristo, kwa sasa Jacob amekuwa Mmishionari anayehubiri njili huko Mashariki ya mbali akiwaeleza watu, Yesu ni Mwana wa Mungu aliye Juu.

    Marko 5:1-9 Biblia inasema “ Wakafika ng'ambo ya bahari mpaka nchi ya Wagerasi.  Na alipokwisha kushuka chomboni, mara alikutana na mtu, ambaye ametoka makaburini, mwenye pepo mchafu;     makao yake yalikuwa pale makaburini; wala hakuna mtu ye yote aliyeweza kumfunga tena, hata kwa minyororo;  kwa sababu alikuwa amefungwa mara nyingi kwa pingu na minyororo, akaikata ile minyororo, na kuzivunja-vunja zile pingu; wala hakuna mtu aliyekuwa na nguvu za kumshinda.  Na sikuzote, usiku na mchana, alikuwako makaburini na milimani, akipiga kelele na kujikata-kata kwa mawe.  Na alipomwona Yesu kwa mbali, alipiga mbio, akamsujudia; akapiga kelele kwa sauti kuu, akasema, Nina nini nawe, Yesu, Mwana wa Mungu aliye juu? Nakuapisha kwa Mungu usinitese.  Kwa sababu amemwambia, Ewe pepo mchafu, mtoke mtu huyu.  Akamwuliza, Jina lako nani? Akamjibu, Jina langu ni Legioni,”

     Ndugu Msomaji wangu nafahamu kuwa husomi ujumbe huu kwa bahati mbaya Nguvu zake Mjenzi mkuu wa Mbinguni zimekuvuta ili apate kukuganga na kukuponya moyo wako, inawezekana umepigika, huna amani, umepoteza kiu na shauku ya maisha, ndoto zako na mitazamo yako imepotea, unaona giza kila inapoitwa leo, hujui hata kesho itakuwaje, hupendi kufa lakini unaona heri hata ya kifo, unashindwa uchague nini unaona heri kusikuche, ni giza linakuzunguka kila kona unajuta laiti ningefanya hivi au vile na unaweza kumchukia Mungu na kuona ni kama anakuleta katika hatima ngumu na ya aibu kila kitu kinakataa!

   Hali hii ndio inayomkuta Kichaa tunayesoma Habari zake katika Marko 5:1-7 mtu huyu aliishi makaburini, ni kama alikua anawaza kufa au alizungukwa na mauti na akawa anatamani kufa ama alikuwa akiwajutia ndugu zake waliokufa zamani, au mapepo yalimuongoza kushinda makaburini, alijitenga na ulimwengu wa walio hai, alijiona hastahili kuwa miongoni mwao, alijawa na huzuni, maisha yake yalisikitisha, aliishi maisha ya upweke, hakuwa na mtu wa kumtia moyo, alikuwa amekwazwa na jamii na jamii imechoka naye, amaumizwa ni muhitaji, hakuwa na mtu wa kumuonyesha upendo, hakuna aliyesema dally wala honey hakuna mtu aliyetamani kuwa naye wala kupiga naye story hali yake ilikuwa mbaya, alikuwa ni picha ya mtu aliyetengwa mbali na huruma za Mungu, amekatiliwa mbali na Mungu na watu wake pia hali ya mtu huyu ilikuwa ya kusikitisha hakuwa na nguo mwili wake haukujua jua wala baridi aliishi maisha ya kusikitisha mnomno.

Mstari 3-5 hakuwa na msaada biblia inasema hakuna mtu aliyekuwa na uwezo wa kumfunga tena kwa minyororo, ilikuwa ngumu kumdhibiti tena mtu huyu, alikuwa anauwezo wa kukata kila aina ya minyororo, alijichukia alitamani kufa alijikatakata na kupiga makelele ukichaakichaa ulimvamia hii ilikuwa ni picha ya mtu aliye katika vifungo vya Ibilisi, hata watu waliojaribu kumsaidia walichoka naye, alibaki na huzuni na kukosa msaada ni kama alikuwa katika gereza la Mateso na uonevu na katika mikono isiyo na huruma ya mashetani.

Mstari wa 5 Mateso yake yalikuwa endelevu ilikuwa usiku na mchana, alijikatakata na kujijeruhi kwa mawe, hakuwa na uzuzi wala ngozi nzuri, angeoga saa ngapi, aligeuka kuwa kama mnyama, huenda alirushiwa chakula kwa mbali na alikula kama mbwa, hii inaonyesha hali zinazowazunguka walimwengu wengi, huwezi kujua kwa nini wengine wanajiingiza katika ukahaba wa hali ya juu, uvutaji wa bangi na madawa ya kulevya, ulevi na ujambazi uliokithiri na hawawezi kujitoa kamwe huko kwani ziko nguvu za manyanyaso zinawakandamiza huko na wakati mwingine hawafanyi kusudi, hawawezi kujiweka huru na wanamezwa na huzuni za historia ya maisha yao yasiyo na msaada

Akiwa katika hali ya kusikitisha na amekosa msaada mji mzima siku moja Yesu alifunga safari kwenda katika nchi ile, iko wazi kabisa kuwa Yesu hakuwa na jambo lingine lolote la kufanya katika mji ule alikwenda akiwa na jambo moja tu, kutoa msaada kwa mtu huyu, hatujui kama akili zake ziliweza kutambua chochote maana alikuwa amepagawa na mapepo yaliyojiambulisha kwa jina la Legion la kirumi ambalo maana yake ni kikosi cha jeshi la askari 6000, askari hao au mapepo hayo ndiyo yaliyoweza kumtambua Yesu, walipiga mbio wakiwa katika mwili wa mtu huyu na kusujudu na kupiga kelele NINA NINI NAWE, YESU, MWANA WA MUNGU ALIYE JUU? Kumbuka jinsi ambavyo hata safari ya Yesu ya kufika nchi ile ilikuwa ngumu kulikuwa na upepo mkali ambao Yesu aliukemea ni wazi kuwa mazingira ya mji ule na nchi ile ya wagerasi yalikuwa na nguvu za giza tupu, yalikuwa ni ngome ya shetani yalikuwa hayapenyeki kirahisi, ilikuwa ngumu hata mapepo yale kuhama nchi ile kwani yaliomba yasihamishwe katika nchi ile yalikuwa na madai maalumu, yalikuwa na miliki maalumu, yalikuwa yameufanya mji ule kuwa kiti chao cha enzi, Lakini hata hivyo mapepo yale yalikuwa na uelewa maalumu kuwa Yesu ni nani Yalimuapisha Yesu kwa Mungu kuwa asiwatese Biblia inasema mashetani huwa yanatetemeka Yakobo 2:19 Yalitetemeka na kusujudu yalipomuona Yesu ambaye ni kiboko yao.

Leo ni siku yako ya kuwekwa huru ninakutangazia ukomo wa misiba na majanga na mikosi na balaa na nuksi na laana na mitazamo na manuizo na matamshi mabaya uliyotamkiwa kwa mamlaka niliyopewa kama myumishi wa Mungu aliye hai namuomba Mungu abadilisha maisha yako, iwe ghafla au kidogokidogo Mungu akubadilishe kabisa imetosha mateso yako, vifundo vya kichawi na nguvu za kiza ziharibiwe na uwe huru kwa Damu ya Yesu Kristo matatizo yako yapige kelele nina nini nawe Yesu mwana wa Mungu aliye juu!

Ashukuriwe Yesu mwana wa Mungu aliye hai kijana huyu aliyefungwa kwa miaka alijikuta akiwa katika mikono salama ya Bwana na mwokozi mwenye wingi wa huruma na neema Yesu alitoa msaada Yesu hakufanya jingine katika nchi ile zaidi ya kumponya mtu huyu na kumuweka huru!

Hali ya mtu huyu mwenye kuteswa na mapepo na Jacob Koshy zinafanana na hali za wengi wetu kwa mazingira tofauti, kumbe Bwana anatujali anajishughulishja na maisha yetu, hajabadilika Yesu Kristo ni Yeye Yule jana leo na hata milelel amaegharimika kwaajili yetu, yuko tayari kubadili maisha yetu, kutoka katika hali ya kutokuheshimika kutupeleka katika hali ya kuheshimika, kutoka katika kupoteza tumaini kutupeleka katika tumaini, kutoka katika hali ya ukichaa kuwa wapeleka habari njema, kutoka katika kufanyika kuwa nyumba ya shetani kutufanya kuwa nyumba ya Roho Mtakatifu, maisha ya mtu huyu yalibadilishwa na kujaa neema ya Mungu angalia kuwa

Mtu huyu aliponywa, akili zake zilirejea

1.   aliketi akiwa salama

2.  alivaa mavazi

3.  alirudiwa na akili zake

4.  alikuwa tayari kumfuata Yesu

5.  alifanyika Muhubiri wa Injili

6.  na Mungu alitukuzwa kwaajili yake.

Yesu alimkomboa kwa gharama kubwa Machoni pa Yesu mtu huyu alikuwa wa thamani kuliko wanyama wa kufugwa waliokuweko katika mji ule, ni muhimu kufahamu kuwa watu waliofuga nguruwe hawakuwa Wayahudi  wayahudi waliamini kuwa nguruwe ndiye moja ya wanyama wachafu zaidi walio najisi hivyo ni wazi wafugaji walikuwa ni mataifa hivyo ni wazi kuwa walishiriki maswala ya kichawi na Yesu aliwatia hasara, kwani ni wazi pia ya kuwa mtu huyu alirogwa! Wachawi hao waliogopa kupata hasara kwani walimsihi Yesu aondoke katika nchi yao

Gharama ya ukombozi wake Mapepo yaliyotoka yaliomba yawaingie Nguruwe, mapepo yaliwaingia Nguruwe 2000, kilo moja ya nguruwe leo ni 6000-7000 kama kila nguruwe alikuwa na kilo 200 chukua 7000 x 200 x 2000 = 2,800,000,000/- Bilion 2 na milioni mia nane ilikuwa ni thamani ya kichaa Yule aliyeokolewa na Yesu

Ndugu yangu thamani yako katika macho ya Mungu Baba na Mikono ya Yesu kristo ni kubwa sana, haijalishi wewe ni kahaba, kichaa, mvuta bangi, shoga, mla madawa ya kulevya, uliyekataliwa, chokoraa, usiyesoma, mwenye ukoma, mwenye ukimwi, unaishi na hiv, una sukari, huna thamani kwa mumeo, mkeo, ndugu zako, unaonekana mzigo na kadhalika wewe kwa Yesu sio mzigo kwa mjenzi mkuu mwenye huruma wewe ni wa thamani, unamuhitaji Yesu tu abadilishe maisha yako yeye Yuko tayari kubadili historia yako na kukupa msaada ikiwa uko tayari fuatilia maombi haya ninayokuombea kwa kumaanisha kabisa kutoka Moyoni

Mungu mwema! Na Baba yangu! mtumwa wako ninaomba kwa unyenyekevu mkubwa nikibubujikwa na machozi, ninajishusha chini ya magoti yangu najiinamisha katika miguu yako kwaajili ya msomaji na msikilizaji wa ujumbe huu Eeeee Bwana Mungu wangu hakuna mwanadamu aliye mbaya sana duniani kiasi ambacho asihitaji au asisitahili kupata rehema zako nakuomba leo eeeeee bwana Mungu wangu katika Jina la Yesu Mwana wa Mungu aliye Juu umponye na kumuhurumia msomaji wangu ili ajue ya kuwa nguvu zako zipo hata katika maadnishi haya badili kabisa maisha yake nakulilia ee mwokozi usiitazame dhambi yake wala ya jamaa zake wala ukoo wake, wala makosa yake, kumbuka rehema zako hata katika hasira zakoooo  oooooh ohhhhho Bwana mtumwa wako ninakusihi badili kabisa maisha ya mtu huyu leo aliyekosa msaada ufanyike msaada kwake katika Jina la Yesu Kristo ameeen!

Baada ya sala hiyo nilikuwa nalia machozi nilipokuwa nakuombea naamini umetembelewa na Mungu huyu tumwabuduye niandikie ili nimshukuru mungu pamoja nawe au acha ujumbe wako chini ya ujumbe huu katika face book

Rev. Innocent Kamote

0718990796

MKUU WA WAJENZI MWENYE HEKIMA

NIMEKUKIMBILIA WEWE BWANA NISIAIBIKE MILELE

ZABURI 71:1-24.
 

Utangulizi:

Zaburi ya 71 ni zaburi inayofikiriwa kuwa ni zaburi yatima kwa vile mwandishi wake hajulikani, hata hivyo naweza kuifikiri zaburi hii kuwa ni ya Daudi kwa vile ina muungano na Zaburi ya 70 ambayo tuna uhakika kuwa imeandikwa na Daudi, Zaburi hii ni zaburi ya Maombi na inaonekana kuwa ni maombi yanayofanywa na mtu mzima au mzee, akililia msaada wa Mungu kwa Haraka.

Zaburi 71:1-4.

Mwandishi amekuwa mtu mzima lakini maisha yake ya uzee yanasumbuliwa na adui, adui mwenyewe ni mwovu, katili na mdhalimu hana huruma, anachokitaka ni kusambaratisha na kuangamiza maisha ya mtu huyu, Mzee anaona ni kama ataaibishwa hapa, Uzee hapa pia unaweza kutumika kama uzoefu. Kutokana na mazingira haya magumu ya kuzungukwa na adui, mwovu na mdhalimu, Mwandishi anaonyesha kuwa ana uzoefu kuhusu Mungu na jinsi alivyoweza kumshindia vita za aina mbalimbali katika maisha. 

Mstari 4 “Ee Mungu wangu uniopoe mkononi mwa mkorofi, Katika mkono wake mwovu Mdhalimu”

Mwandishi wa Zaburi anajua kuwa hakuna njia nyingine, namna iliyoko mbele ni kumuomba Mungu na hivyo anajitegemeza katika kuomba na kumkumbusha Mungu namna alivyomshindia vita za aina mbalimbali, tangu ujana wake na jinsi Mungu alivyokusudia mema tangu kuzaliwa na tangu tumboni mwa mama yake Zaburi 71:5-9.

Mwandishi anaangalia mpango wa adui wa sasa “Mstari wa 10-11”  “kwa maana adui zangu wananiamba nao wanaoniotea roho yangu hushauriana , wakisema , Mungu amemwacha, Mfuateni mkamateni, hakuna wa kumponya”

Adui ana mpango mbaya juu ya maisha ya kila mmoja wetu, anataka kuivizia roho yetu anataka kutuua, anafikiri Mungu ametuacha, anafikiri ni kipindi cha kutukandamiza,kutukamata na hakuna namna tunavyoweza kuponyoka. Haya ndio yalikuwa mazingira ya mwandishi wa zaburi hii na wakati mwingine huwa ndio mazingira yanayokuzunguka. 

Mst 12-24 mwandishi kupitia uzoefu alionao anatabiri kuwa Mungu hatamuacha aaibike milele na kuwa  Mungu atakuwa upande wake na kuwa Mungu atampigania na kuwa atasimulia na kushuhudia Matendo makuu ya Mungu na na sifa zake na haki yake kwakuwa wameaibishwa wametahayarika walionitakia mabaya, waliokusudia kumuaibisha wameaibishwa wao.

Msomaji wangu Ukimtumaini Bwana hutatahayarika!, Mungu ndio kila kitu katika maisha yetu ni lazima tumkimbilie na kumtegemea yeye kwake kunalipa tukimtegemea Mungu, hatatuacha tuaibike, Bwana atakushindia kutoka vita moja kwenda nyingine aina yoyote ya udhalimu wa kishetani, kiafya, kiuchumi, kikazi, na mengineyo Mungu atatutetea yeye alisema nitawapigania nanyi mtanyamaza kimya Neno la Mungu ni dhahiri na tujikinge kwake

Mkuu wa Wajenzi Mwenye Hekima.

Rev. Innocent Kamote.