NIKAJIMWAGA KWA MWENYE MALI.

Naitwa Salome Shemazua mkazi wa Pongwe Jijini Tanga nina umri wa kati ya miaka 35, ni mshichana mwenye umbo zuri la kibantu ambalo linaweza kumvutia mwanaume yeyote mwenye akili timamu na mwenye kupenda wanawake wenye uasilia yaani wale wasiopenda wanawake vimbaumbau wale wanaoijifanya eti wana menteini na kukondesha vipaja vyao kaa kuku wa kisasa, mimi ni kibonge bwana umbo nambari nane lakini hata hivyo sijaolewa. Hiyo sio shida kwani wote tunajua kuwa kuolewa nako ni majaliwa. 

Tanga mkonge Hotel

Hata hivyo katika kubangaiza hapa na pale katika shughuli za maisha nilitokea kupendwa na baba mmoja hivi wa makamo sikuwa na muda hata wa kuuliza umri wake  ingawa alionekana kama angeweza kunizaa na huenda pia ningeweza kuwa mwanae wa pili au watatu hivi, nilikutana na baba huyu pale Texas motel moja ya baa maarufu hapa Pongwe, baba huyu aliyekuwa anafanya kazi saruji kiwanda cha simenti kilichopo karibu na mji wa Pongwe alitupa ndoana yake kwangu  nami bila ya fedheha sikuwa na hapana  nilimkubalia, wenyeji wangu walikwisha kunipa stori kuwa wanaume wa saruji wana pesa kama njugu kutokana na mishahara mizuri wanayolipwa na kiwanda hicho ambacho huchangia mapato ya kutosha katika jiji la Tanga niliona nami nimepata wangu wa kumchuna, Nilijitahidi sana kumpagawisha baba Yule kimapenzi kama unavyojua hapa Tanga waja leo waondoka leo  nilimpagawisha na mambo ya kipwani, nilijituma hasa nikijua kuwa hii ndio nafasi ya kumfanya baba huyu ajikite kwangu na kumsahau bi mkubwa,  hasa ukichukulia kuwa Alisha mwaga malalamiko kibao kuhusu bi mkubwa kuwa hajitumi na ni mshamba na kuwa hata kimaumbile mimi nimemzidi bi mkubwa kwa kila idara alidai mzee huyu kuwa bi mkubwa huyo ni kafupi na kamekomaa na ukikaona ni kuwa hata mkononi hakajai sikujua kwanini sasa alimuoa au alilazimishwa lakini niliona vyovyote iwavyo shuhuda hizi zinanipa ujasiri wa kujituma kuliko, na kumuonyesha kuwa na sisi wenye maumbile ya kibantu mchezoni nasi hatujambo nikijipindua hivi na vile kuonyesha manjonjo  kwa ujumla nilifanikiwa sana kumroga Baba Yule wa bara huko, hapa simaanishi maswala ya kishirikina namaanisha jinsi nilivyofanikiwa kumfisadi kimapenzi baba Yule,

Kujituma kwangu hakukuwa bure kwani alinihamisha kwenye nyumba ya kupanga na kunijengea kajumba kangu kazuri maeneo ya Ambangulu kwa wale wanaoijua Pongwe kule Tanga, nilijengewa kajumba potabo kwani kana vyumba vitatu na kila kitu ndani yaani selfu konteini  niliendelea kujidekeza na kupewa kila kitu nilichokitaka  ingawa nilimsikia Buzi wangu akilalamika kuwa ana maswala ya Ada ya watoto na kuwa na majukumu mengine huko kwa bi mkubwa, mi sikujali kwani niliendeleza ufisadi wangu bila kujali kuwa kuna kafamilia kanaumia  ingawa kaubinadamu kanaponijia  huwa najiuliza je ningelifanyiwa miye ingekuwaje? Lakini Mapepo ya ukatili yaliponivaa sikujali nilijitia moyo acha huyo bi mkubwa akome, Mungu ametuleta duniani tukomeshe wanawake wachovu wasiojituma kwa nini amtese baba wa watu ? mtu unapata bahati ya kuolewa halafu uinaichezea kweli upele anapewa asiye na kucha nilijitia moyo kuhalalisha upashikuna wangu na ufisadi kiwembe na nilitiwa moyo kwani wanawake wengi pale Pongwe hizo ndo issue zetu wengi ni nyumba ndogo.

Siku moja iliyopelekea kuelezea kisa hiki kama waswahili wasemavyo  “Mwizi zake arobaini” au za mwizi arubaini, Nilipatana na mzee wangu Yule  kwamba tukatese huko maeneo ya Raskazone njia ya kwenda hospital kuu ya Mkoa bombo karibu na daraja upande wa kulia ambako kuna hotel moja maarufu siku hizi nyuma kidogo ya shule ya sekondari ya mkwakwani sipendi kutaja jina la hoteli hiyo kwa maslahi ya mwenye hoteli hata hivyo kwa wenyeji wa Tanga watakuwa wamenipata vilivyo lakini hata kabla ya kwenda hoteli, Bwanangu Yule aliniambia nitangulie mjini na kupitia saluni kisha yeye angenipitia akitokea Saruji anakoishi  akiwa na usafiri wake, Nilitangulia na rafiki zangu kadhaa waliokuwa wakienda mjini nao kwenye mishemishe zao tuliingia saluni moja karibu na stendi kuu ya mji wa Tanga katika barabara maarufu kama Taifa rodi, saluni hii inapendwa na watu wengi sana hususani wakiwemo wale wanaotokea Pongwe hasa kwa sababu ya utaalamu wao pia wa kusuka rasta, na pia kuandaa maharusi, kama iliyo ada tulikutana na wanawake wengine kadhaa wengine wakihudumiwa na wengine wakisubiri, tulipofikia hatua ya kuhudumiwa  kama unavyojua mambo ya umbeya wa saluni tulianza na mada mbalimbali za kisiasa, umbeya udaku na mengineyo kedekede na baadaye ilikuja mada ya uchunaji mabuzi, hapo ndipo nilipodakia kama nimefikishwa kwani mimi sio mzuri sana kwenye maswala ya siasa za Tanzania nilizichoka kwani niliona kama tunazugwa tu  hivyo sikuwa na interesti na siasa tangu alipostaafu Mkapa na hata kufatilia Bunge nilifuatilia alipohutubia Kikwete ile hutuba yake ya bungeni ya kwanza kabisa, kwa hiyo eneo hili utafikiri nilipewa maiki nilieleza kuwa kuchuna mabuzi kunalipa, kulikuwa na mama mmoja mfupi aliyeonekana kama amekomaa hivi alionekana kupinga mada ya maswala ya waume za watu na kuonya kuwa inatesa sana wale walioolewa. Nilimkatisha mama huyo na kuanza kumsomesha kama mtoa mada mkuu huku nikiungwa mkono kwa herufi kubwa mada hii ilinigusa utafikiri ndio mwenyekiti wa kamati Fulani huko Bungeni  nilionyesha faida kadhaa za kufaidika kutokana na kuchuna mabuzi, huku nikitamba juu ya kajumba nilikojengewa  na aina ya simu maarufu kama blakiberi niliyonunuliwa na buzi na nilionyesha wazi jinsi wanaume wa saruji wanavyojua kuhonga na kuwa hata pale saluni buzi wangu atanipitia kwenda kutesa maeneo ya Rasikazone na kuwa atalipa hata hela ya gharama yote ya pale saluni, nilitoa mada siku hiyo utafikiri kungwi wa kicheni pati niliwaponda sana wanawake wachovu na kueleza pia kuwa buzi wangu anasema kuwa ka mwanamke kake kamekondeana na kukomaa kama nyigu na kuwa hata kwenye mkono hakajai hakana intateiniment na kwa mkwara mkubwa wakati mwingine niliwasiliana naye kumuulizia hani kuwa yuko wapi na mbona anachelewa ili mradi tu kuwapagawisha wanasaluni pale, Mama Yule kimbaumbau  aliyekuwa na nywele nzuri sana nyingi lakini kanyimwa nyama mwenye uso uliionekana kama ana mapito hivi kama wasemavyo watu wa dini Fulani ambao hujidai wanaimani kali,  alinyamaza kimya kama amelowa maji, nilimwaga sera na hatimaye alionekana kuunga mkono kama mbunge aliyepotea kutoka kambi ya upinzani, hilo lilinipa kichwa na kujiona kama ninatawala saluni kwa muda wana saluni wenyewe walikuwa bize kutushughulikia wakiwa kimya  na wengi walikuwa wakinisikiliza jinsi nilivyojimwaga na kumkandia mke mwenza ambaye nilikuwa simfahamu. Mwisho ikawa kama wote tumeshughulikiwa na wengine walikaa vitini kwaajili ya kuhudumiwa.

Niliinua simu yangu aina ya blakiberi niliyohongwa na kumjulisha dalingi wangu kuwa niko tayari na kuwa aje alipe tuondoke, kwa kawaida anaijua saluni hiyo kwani hiyo haikuwa mara ya kwanza, lakini kwa vile siku ile nilijimwaga sana kila mmoja alikuwa na hamu ya kumuona huyo buzi ni wa aina gani, alikuja mzee Yule na gari yake ya kifahari aina ya mark tu saluni grandi alipoteremka  aliingia mojakwamoja saluni na  nilimkimbilia kwa busu na mdeko wa nguvu “hai hani karibu umekuja nchukua eh njoo basi hani unlipie kisha ndo tuondoke”, jambo la kushangaza siku ile ni kuwa baba Yule katika hali isiyokuwa kawaida yake alikuwa kama ananitaaliza, au kunishushua kwa lugha za kitanga, Busu langu la siku ile lilikuwa pia limechanganyika na ishara ya kuwaonyesha kuwa huyu nitakayembusu ndiye kama vile alivyofanya mtume mmoja wa Bwana Yesu aliyeitwa Yuda Iskariote, lakini kama nilivyokugusia awali mwitikio wa shuga dady Yule ulikuwa kama amepigwa ganzi na ghafla mama Yule kimbaumbau alisimama kama afande  na kuanza kuteremsha matusi mazito sana  yakielekea kwa baba Yule  huku akilalamika kuwa watoto wamefukuzwa ada wameshindwa kwenda shule, nyumbani tunashindia dagaa na maharage tu kumbe wewe unajengea Malaya zako, kila mmoja alikuwa anashangaa na idadi ya watu ilianza kuongezeka pale saluni matusi yalimwagika kama mvua na hatimaye nikageukiwa miye na  yalimwagikia upande wangu  na nilipojaribu kujibu huku nikiwa nashangaa nilipokea mkong’oto mkali nikiambiwa Malaya wewe firauni mkubwa nikiambiwa ukome wewe kuchukua waume za watu nilishangaa mama huyu niliyekuwa naye saluni inakuwaje ana mamlaka kubwa kiasi hiki ndipo akili ilianza kunijia kuwa huku ndio kufumaniwa, Viungo vilinilegea kipondo kile kilipelekea kuchaniwa nguo  kiasi cha kuwa uchi, watu niliokuwa nao saluni walianza kupata majibu kuwa kumbe mwenye mali halisi alikuwa ni mwanamke Yule nilizomewa kama paka mwizi, ilikuwa ni aibu ya mwaka siwezi kusahau jamani  umbeya wa saluni bwana kumbe nilikuwa najimwaga kwa mwenye mali,wanaume za watu shoga nimekoma,unataka kujua yaliishije we mbeya sana mijimacho ka chura mbona ulipoacha kunyonya maziwa ya mamako mi sijakuuliza? Si uliacha bila kuambiwa sasa ulitaka niendelee kusumbua nyumba za watu mkong’oto ule ulikuwa kama zile stori za betina na zena katika magazeti ya sani zamani.kwa sasa nimeamua kujishughulisha na shughuli ndogondogo za kibiashara, nimeachana na maisha ya kupenda dezo kumbe bure ni gharama.

Na Rev. Innocent Kamote

Mkuu wa wajenzi mwenye Hekima

SI KILA MWANAMKE AMEKUJA KUCHEZEWA HAPA DUNIANI.

Siku hizi huwa nashindwa kujiuliza sana kuhusu maisha, najiuliza kuhusu watu kushindwa kuwajibika kwa matendo yao na maisha yao kwa ujumla, Maswali haya najiuliza baada ya kujifunza kupitia uzoefu mmoja  na ambao ningependa kuushiriki na wengine leo hii 

Ilikuwa mwaka 1995 nilikuwa nimepata uhamisho kutoka wilayani mpanda  kuja Dar ni lazima niwe mkweli kwamab siku hiyo ilikuwa ni mara yangu ya kwanza  kuja dar kuishi mara nyingine kama mbili tatu hivi nilikuwa napita  tu kiofisi, nakuja ofisini kwetu na siku ya pili narudi mkoani, Nilipofika nilitafuta nyumba na kupata katika maeneo ya mwenge,  sikuja na familia yangu kwa sababu ilinibidi kuja kutafuta nyumba kwanza  na kasha familia yangu  ifuate baada ya kuhakikisha kuwa nimepata nyumba , nikiwa bado mgeni wiki ya pili tu, niliotoka siku moja kwenda kutembea  na kunywa kidopgo, wakati huo tulisha kubaliana na familia yangu  kwamba wajiandae na kuja Dar baada ya wiki mbili.

Siku hiyo nilikwenda kutembea katika baa moja maarufu wakati ule pale Mwenge-Sinza najua unanielewa vema kama unaipata vilivyo mitaa na vitongoji vya Dar ilivyo na utata kubainisha , Basi wakati nakunywa akatokea  dada mmoja akanizoea palepale.Kule kwetu Mpanda mwanamke kukuzoea haraka ni lazima  awe anakupenda hasa kwa hiyo nilitafasiri kuwa huyu dada kanizimia haswa tulikunywa naye na kuzoeana usiku huo huo.

Hatimaye nilikwenda naye kwangu na kupitisha usiku naye kiibilisi, kosa namba moja likawa hili, nilimwambia kwamba sijaoa, kwa ushamba wangu nilidhania kumwambia msichana  wa Dar kwamba nimeoa ingekuwa ni kujiangusha sana kwa hiyo Yule changudoa ambaye mimi nilimuona kuwa mwanamke wa maana sana  baada ya kunidanganya kwamba anafanya kazi ubalozini na ametokea kunipenda, kusikia sijaoa nadhgani alijua amejipatia bwana, kwa sababu hiyo akawa amepata pa kulala , Zile pesa zangu za uhamisho nilianza kuzimwaga  kwa matumizi ya kijingakijinga. Nilikuwa sijui mambo ya bilicanas au FM, nikayajua kupitia kwake Ilibidi mke wangu anishitue akiwa ofisi ya basi pale Kariakoo, Nilikuwa nimekwisha sahau kabisa hata kuhusu kuja kwake, nilifanya utaratibu wa kwenda kumpokea, kwa habari ya yuel changudoa nilishindwa kumjulisha kuhusu ujio wa familia yangu, nilitaka nimfahamishe kwamba mke wa kaka yangu na watoto wamekuja na hivyo itabidi tusikutane nyumbani kwanza kwaajili ya kulinda heshima.

Lakini ningempata wapi? Mtu anakwambia anafanya ubalozini ukimwambia nipeleke anakwambia anafanya hazina , ukimwambia nipeleke ofisini kwako  anabadilika na kukwambia kuwa yuko Usalama wa Taifa, aha Niliamua kwenda kwanza kituoni  kuwachukua watu wangu, nilifika kituoni  na kukuta pamoja na mke wangu na watoto wawili alikuwemo mama mkwe wangu, niliwachukua na kuwapeleka nyumbani Mwenge muda ulikuwa ni kwenye saa tano asubuhi siku ya jumapili, Nilimwambia mke wangu kuwa ninaenda kazini, kuna kazi maalumu huko, niliondoka  kwenda  kumsaka Yule changudoa lakini sikuweza kumpata . Ilibidi nirejee nyumbani na kuamua kwamba , nikisikia hodi tu  nitakuwa wa kwanza  kwenda mlangoni ili kuuwa soo hukohuko,Ni kweli jioni  iliingia  na usiku ukaingia  kwenye saa mbili hivi wakati tunakula  ndiyo ikatokea  Mlango mkubwa ulikuwa umesindikwa tu kama unavyojua  watu wa Bushi kufunga milango kwao sio Issue, Ghafla tuliona mlango ukifunguliwa na mwanamke aliingia, Mwanamke Yule akiwa  amelewa alipiga kelele “Haroo daring izi faini yuu welikamu” Halafu alikuja pale mezani  na kuniinamia  na kunibusu. Kumbe una wageni daring wangu mbona hujasema ndiyo maana sikukuona sehemu sehemu…’ Ehee Hebu tulia bwana wewe unaona kuna wageni halafu unaanza kuleta fujoi zako, Huyu hapa ni mke wangu hawa ni watoto wangu na huyu ni mama mk…” Nilisema kwa kelele.

Alinikatisha karibu mke mwenzangu mimi pia ni mke wa huyu bwana tulikuwa hatujuani…” Niliinuka kutaka kuangusha kipigo lakini kabla sijarusha ngumi au kibao nilijikuta niko chini Mke wangu ni wale ambao hawakuja duniani kuchezewa na wanaume. Alimvaa  changudoa Yule  na kushughulika neye vilivyo kuna kupigwa na kusuuzwa, Yule changudoa alisuuzwahaswa, ilibidi mama mkwe aingilie kati na kumsihi mwanawe aache  vurugu, changudoa Yule alitumia nafasi hiyo kuiona njia  kwa kukurupuka kama guruwe pori  lililokoswakoswa mshale, huku akisema tutaonana, kasha ikafuata zamu yangu nakwambia mkioa muwe mnatazama vizuri kuna wanawake wengine bwana wakikasirika, wana kuwa kama nyati majeruhi, Kama isingekuwa kelele za ‘Mama unamuua baba‘ ya watoto na mama mkwe  kuingilia kati apigwe yeye badala yangu  huenda ningefikishwa Muhimbili kitengo cha kuunga mifupa MOI nikiwa unga wa dona.  Najua ungependa niendelee sawa si unapenda kuona wengine wakiadhirika ili upate nyuzi ehe! Ngoja yaje kukupata hutakuwa na hamu hata ya kusikiliza ya wenzio!.

Mkuu wa wajenzi mwenye Hekima

Rev Innocent Kamote

Wakurugenzi wakaniita!

WAKURUGENZI WAKANIITA

Sikumbuki tarehe wala mwezi lakini ilikuwa mwaka wa 1990 wakati huo nilikuwa nimeachishwa kazi katika kiwanda kimoja cha viatu, kilichokuwa barabara ya Pugu siku hizi Nyerere, nilikuwa nafanya kazi pale kama mlinzi mwaka huo ndio nilipata skendo na kuachishwa kazi 

 Kiwanda cha Viatu Pugu

Nikawa nahangaika kutafuta kazi mjini, Nilifanikiwa mwaka huohuo kukutana na mtu ambaye alisoma na ndugu yangu, huyu Bwana aliamua kunisaidia kupata kazi mahali, aliponiuliza kuhusu elimu yangu nilimwambia nimemaliza kidato cha sita, ingawa ukweli ni kwamba nimesihia darasa la saba, Alinifanyia mpango nikapata kazi kwenye kiwanda kimoja hapohapo barabara ya Nyerere.Nilitafuta vyeti vya bandia  kutoka kwa rafiki yangu ambaye wakati huo alikuwa chuo kikuu, niliajiriwa kama karani waupokeaji wa mali ghafi na udhiinishaji wa  utokaji wa bidhaa, ilikuwa ni nafasi kubwa sana hata kwa mtu wa kidato cha sita, hata hivyo kwa sababu ilikuwa ni kazi yenye kuhitaji tu maelekezoili mtu kumudu kuifanya  niliielewa  kwa kiasi.

Bahati mbaya mwezi wa kwanza tu wa kazi , nikaanza kwa unoko sana, nilikuwa najifanya najua na nikawa nawazibia watu riziki zao, ili nipendwe na wenye kampuni, Kumbe katika unoko huo huo ,taarifa za kwamba mimi ni darasa la saba  na niliwahi kupata skendo zilifika pale kazini, Siku  hiyo nafika kazini kama kawaida , nikaitwa kwa mkurugenzi. Nikajua kuwa ninaenda kumwagiwa misifa kutokana na utendaji wangu wa kazi, kufika mkurugenzi akaniambaia, “tulikuajiri tukiamini kwamba kila ulilolisema kwetu lina ukweli, Hebu hasa jina lako na kiwango chako cha elimu na wapi uliwahi kufanya kazi kabla ya kuja hapa”

Nilihisi moyo ukianza kudunda kwa kasi na kwa nguvu, Nilijikaza na kusema  sijafanya kazi popote, tangu nimemaliza masomo ya kidato cha sita mwaka juzi, na jina langu ndilo hili ninalotumia, Wakurugenzi waliokuwa wamenizunguka walitabasamu kwa dharau hadi nikaogopa “Sasa bwana kuna mawili ama tukupeleke polisi sasa hivi kwa kudanganya na kufoji vyeti na jina la mtu  ambalo si lako au uondoke sasa hivi bila hata kipande cha karatasi yaani kama ulivyokuja , Hatuna haja ya kubishana nawe kwa sababu unaujua ukweli wote kuliko sisi”  Mkurugenzi mkuu alisema, Yule jamaa aliyenifanyia mpango wa kazi naye alikuwepo kwenye kikao kile , “Umeniangusha sana sikutegemea kabisa, kumbe hata sekondari hujakanyaga unakwenda kujipachika ufomu six wa bure! Kwa kweli hata tukionana njiani usinisalimie kabisa, Ungenisababishia kuharibu kazi yangu bure” Aliniambia.

Nilimwambia nimekosa nitaondoka sasa hivi na sitaki chochote, Nilijivuta polepole na kuanza kutoka nje, huko nje kumbe wafanya kazi wengine  walishapata  taarifa, kwa hiyo nilipokuwa nikikatiza mitaa walikuwa wakinicheka  na kunizomea , sikujibu chochote  kwa kweli ilikuwa fedheha  ya mwaka  unataka kujua nini kiliendelea we bwege nini? Mbona unapenda sana umbeya kwa taarifa yako sasa tukio hili lilinifanya niende kujisomea kwa machungu nikamaliza kidato cha sita na sasa nina stashahada ya uhasibu. Ilikuwa fedheha ambayo ililipa!.

Mkuu wa wajenzi mwenye Hekima

Rev. Innocent Kamote

Nikaalikwa Kama Mtoto wa Waziri!

NIKAALIKWA KAMA MTOTO WA WAZIRI

Mimi ni kijana wa umri wa miaka 34. Malezi na makuzi yangu yalikuwa ni ya wale wazazi ambao kwa siku hizi wangeitwa machekibobu, hawa ni wazazi ambao wanataka kujionyesha  kwa watu wengine kwamba  wao ni watu wenye fedha ,waliotoka kwenye familia bora, waliosoma sana  ingawa sio kweli kwa hiyo name nilikuwa mtu wa aina hiyo mpaka niulipofunzwa na dunia.

Kwa ujumla ni kama nilifundishwa kujikataa kwamba siyo mimi na nilimudu sana kujikataa kwani katika kukua kwangu name nimekuwa mtu wa kujikweza mwaka 2000 ni kiwa nimemaliza masomo katika chuo cha biashara nilipata kibarua kwenye ofisi binafsi katika eneo la viwanda vingunguti nilianza kazi hapo nikiwa kama karani wa kawaida tu wa kutumwa shughuli za hapa na pale kujaza fomu za hesabu za fedha na mengine ya aina hiyo

Wakati nikiwapo hapo kazini nilikutana na msichana mmoja ambaye alikuwa akifanya kazi kampuni ya jirani, nilikutana na msichana huytu wakati wa chakula cha mchana Lunch hapo eneo la viwanda. Kwa keli nilimpenda sana ghafla, yaani jicho la kwanza. Lakini Mungu si Athumani naye alionekana kunipenda ghafla pia, tulijikuta tukiwa marafiki baada ya mimi kumuanza ingawa kiuoga uoga kwani alikuwa mzuri sana na pia alikuwa anamiliki usafiri aina ya Rav4 ya milango mitatu, nilipochokoza alikubali kirahisi tofauti na nilivyotarajia

 Rav4 ya Milango mitatu

Kama kawaida yangu katika kujitambulisha mimi nilijitambulisha kwa  kujilambisha ujiko wa ajabu sana, mimi ni mwenyeji wa Tanga  na baba yangu anajuana na mtu mmoja mkubwa serikalini ambaye hadi sasa ni waziri. Badala ya kusema ukweli kuhusu baba yangu ambaye kwa maisha ya kichekibobu kama yangu alikuwa amesha chalala sana nilimtaja mkubwa huyo

Yule binti aliniamini na huko nyumbani alitangaza bila shaka kwamba amepata mtu ampendaye ambaye baba yake ni mtu Fulani, siku hiyo binti alinialika niende nyumbani kwao kwaajili ya chakula cha mchana ilikuwa ni jumapili, nilijitahidi sana hadi nikamudu kukodi gari ya rafiki yangu kwa shilingi 40,000 ili niendenalo mwenyewe kule wajue kwamba nina gari unajua kitu gani kilitokea?

Nilipofika nyumbani kwao Yule binti nilimkuta mama yake, baba yake alikuwa amefariki zamani, lakini pia nilimkuta mtu mwengine, Hebu otea alikuwa nani? Alikuwa ni baba yangu, Nilibabaika sana  na kujiuliza maswali mengi ambayo hayakuwa na majibu nilipigwa na butwaa kwa muda na baba baye pia, nilimsalimia mama wa binti yuile na baadaye kumsalimia baba na kumuuliza uko huku? Baba alisema nashangaa nawe unaijua familia hii Mama Lewisi tulikuwa naye kazini zamani. Siku nyingi sijamtembelea leo ndiyo nimeamua kuja kumwona….” Yuel mama mkwe wangu mtarajiwa aliuliza kwani mnajuana? Baba alisema huyu ni mwanangu wa kwanza” Halafu palizuka ukimya Yule mama kwaajili ya kuua soo alinikaribisha lakini ghafla Yule binti alikuwa amebadilika hakuwa na furaha tena.

Tulikula, lakini katika hali ya undavaundava tu, tulipomaliza  kula sikutaka kukaa zaidi kwani nilijua kuwa binti Yule na mama yake walikuwa wakinisanifu sana , du kutoka kuwa mtoto wa waziri hadi kuwa mtoto wa mzee aliyechezea maisha siku za nyuma, mbaya zaidi ni kuwa baba alikuwa amefika pale kwa nia  ya kuomba msaada, Niliaga nikimwacha baba akiendelea kupiga mabomu yake. Nilikuwa na uhakika kuwa baba aliambiwa ishu zangu zote, kwani jioni alinitembelea kwangu na kuniambia kwamba nimejisanifu sana kwa kujifanya mtoto wa waziri Unataka niendelee kukusimulia? Unataka kujua kuwa niliendelea na urafiki na Yule demu au La au nilitoa pua yangu kwa mama mkwe mtarajiwa? Hivi kichwa chako kiko sawasawa?

Rev. Innocent Kamote

Mkuu wa wajenzi mwenye Hekima

Kupenda sifa nako ni kazi !

KUPENDA SIFA NAKO NI KAZI

Nakumbuka ilikuwa ni mwaka 1995 na ilikuwa ni hapa Daresalaam, wakati huo tulikuwa tukiishi Magomeni Makanya. Nilikuwa nimemaliza masomo kidato cha nne sekondari ya Pugu, ambako sikufanikiwa kufaulu kwani nilipata Division ziro. 

Kwa hiyo nikiwa nyumbani  nilizongwa zongwa na baba na mama pamoja na ndugu zangu  kwa nguvu zao zote  kutokana na kufeli kule, nakumbuka siku ya tukio hili la fedheha ilikuwa ni mkesha wa Krismasi, nilitoka nyumbani  na kwenda kwa jamaa yangu kinondoni jamaa huyu alikuwa ni rafiki yangu  toka shule ya msingi, naye alianguka masomo ya kidato cha nne kama mimi yeye alikuwa anasoma shule moja ya kulipia kule mbeya, lakini yeye wazazi wake, walikuwa wanajimudu kidogo kwa hiyo mara nyingi hata tukienda outing yeye ndiye anakuwa kibosile  yaani anakuwa tajiri tangu kumaliza masomo hadi majibu kutoka tulikuwa watu wa kutanua sana 

 Dar es Salaam

 Siku hiyo tuiliamua kwenda bichi ambapo jamaa yangu alikuwa ametafuta wasichana wawili, Ile jioni tulipokutana aliniambia kwamba itabidi nichukue msichana mmoja na akaninong’oneza, inabidi ujifanye mtoto wa mtu mkubwa maana demu mwenyewe ni mtoto wa kigogo.Bila kumuuliza ni mtoto wa nani, niulichangamkia tenda  na jamaa yangu alinipa shilingi 6,000 na mimi nilikuwa na 1,200 kwa kipindi kile hizo ni fedha nyingi, halafu yeye jamaa yangu akamchukua demu wake  name nikamchukua wangu,tukaenda kila mmoja njia yake humohumo ukumbini, Yule msichana aliniuliza mimi, ni nani  yaani akitaka kunijua vema 

Harakaharaka nilitafuta jibu, Nilimtaja kigogo mmoja wa serikali wakati ule alikuwa ni naibu waziri, Yule msichana aliniambia nakuuliza ukweli siyo mzaha. Mimi nilikazana kumtaja mzee Yule kwamba ndiye baba yangu. Yule msichana alionekana kukereka na alisema sasa mbona sikufahamu, wakati huyo mzee ni baba yangu mdogo na ninaishi kwake? kwanza nilizani ni mzaha  lakini aliponikazia macho kuzidi kuniuliza nilijikuta nikianza kuchanganyikiwa, nilimwambia kwamaba huyo ni mlezi wangu ndiye aliyenilea ingawa ninaishi na mama yangu, aliniuliza kama nawajua watoto wake  Niliropoka kwamba nawajua, aliniuliza kuhusu Yule mtoto wa Yule mzeeambaye amefariki miezi miwili iliyopita sikuwa na jua lolote na Mkwaju ule ulianza kunituhumu kwa kujikweza Kama umetoka familia masikini si unasema tu kwani mapezni unadhani ni laziam  mtu awe na fedha  au umaarufu! Alianza kunisomea  na kwa sababu alikuwa amekunywa kidogo aliongea kwa kelele kubwa ilibidi jamaa yangu na mkwaju wake waje kujua kulikoni Yule binti alimwambia jamaa yangu nini bwana unanipa jamaa mshamba huyu anajipaka zia ukubwa kwa nguvu jamaa yangu alinivuta  kando na kuniuliza kulikoni Nilipomsimulia  alishika mdomo Ahaya! Umeharibu, huyu binti huyo mzee ni baba yake mdogo na ameishi naye tangu akiwa mdogo, unafikiri ilinibidi nifanye nini? Najua uasubiri umbea kwa hamu kubwa Watanzania bwana! 

Mkuu wa wajenzi mwenye Hekima

Rev Innocent Kamote